Saamɔ Ohe Bianɛ Oha Nitsumɔ ni Fa ni Ka Wɔhiɛ lɛ
1 Kɛ nikpamɔ be shɛ lɛ, mɛi ni kɛ amɛhe woɔ mli lɛ feɔ mɛi ni bɛ deka kwraa. Ni kɛ hehiamɔ be shɛ lɛ, gbɔmɛi miaa amɛhiɛ ni amɛyaa amɛbaa kɛ ekaa fe be fɛɛ. Nikpamɔ be kɛ hehiamɔ be mli wɔyɔɔ lɛ. Babaoo yɛ ni abaatsu. Ani oosaa ohe koni otsu nɔ fɛɛ nɔ ni abiɔ ni atsu lɛ?—Mat. 9:37, 38; 13:39; Luka 13:24; 1 Tim. 4:10.
KAIMƆ LƐ
2 Kaimɔ be lɛ ji be ni he hiaa fe fɛɛ yɛ afi lɛ mli kɛha Yehowa webii. Afi nɛɛ kaimɔ lɛ yeli baa nɔ yɛ Shɔ gbɛkɛ, March 22. Ani ooto gbɛjianɔ koni nɔ ko nɔ ko akatsi okɛ oweku lɛ gbɛ yɛ eshishi ni nyɛaaba lɛ he? Ani oofɔ nine ootsɛ owekumɛi kɛ nanemɛi koni amɛ hu amɛba? Ni mɛi ni yɔɔ wiemɔ lɛ he miishɛɛ yɛ oshikpɔŋkuku lɛ mli lɛ, mɛi ni okɛ amɛ kaseɔ Biblia lɛ, kɛ otsutsu Biblia kaselɔi hu?—Luka 22:19; Kpoj. 22:17.
3 Nɔ ni onukpai lɛ fɔɔ feemɔ ji akɛ amɛtoɔ gbɛjianɔ ni ashaa Maŋtsɛyeli Asa lɛ mli dani Kaimɔ lɛ baa bɔni afee ni akɛsaa nɔ fɛɛ nɔ. Ani ato gbɛjianɔ aha mɔ ni baaha Kaimɔ wiemɔ lɛ, nibii ni akɛbaatsɔɔ kɛ mɛi ni baasɔmɔ yɛ mli, kɛ agbɛnɛ sɛii ni fa ni abaana kɛ nyɛmimɛi ni baatsu nii yɛ nɛkɛ be krɛdɛɛ nɛɛ mli?
Gbɛfaŋnɔ Ni Yaa Hiɛ Ni Aaana Yɛ Sɔɔmɔ Nitsumɔ Lɛ Mli
4 Kaimɔ be lɛ kaiɔ wɔ afɔle ni Yesu sha eha wɔ lɛ. No hewɔ lɛ, eji be ni sa jogbaŋŋ kɛha wɔ akɛ wɔɔsusu bɔ ni wɔɔfee ni wɔya hiɛ yɛ wɔsɔɔmɔ nitsumɔ lɛ mli lɛ he. Enɛ ji gbɛi anɔ ni wɔɔtsɔ wɔjie wɔhiɛsɔɔ kpo wɔha Yehowa duromɔ kɛtsɔ e-Bi lɛ nɔ lɛ.
5 Ani obaanyɛ osɔmɔ akɛ gbɛgbalɔi awalɔ yɛ March loo April, aloo yɛ nyɔji enyɔ lɛ fɛɛ mli? Akɛ nɛkɛ nyɔji nɛɛ, kɛ agbɛnɛ May baatsu nii koni afa ta krɛdɛɛ ko ni akɛjaje Kpojiemɔ mli saji lɛ atsɔɔ. April baakadi Revelation Climax wolo lɛ he tafaa lɛ shishijee, ni eka shi faŋŋ akɛ Maŋtsɛyeli shiɛlɔi fɛɛ baasumɔ ni amɛkɛ amɛhe aha yɛ nitsumɔ nɛɛ tsumɔ mli. April hiɛ otsii anaagbee enumɔ. Mɛɛ hegbɛ fɛfɛo nɛ akɛ wɔkɛ Hɔɔi enumɔ nɛɛ fɛɛ aaafee woji tɛtrɛbii lɛ agbii ni tsara nɔ, ni wɔkɛ Buu-Mɔɔ fɛfɛji ni kɔɔ Babilon kpeteŋkpele lɛ he lɛ aha! April 15 Buu-Mɔɔ lɛ hu hiɛ wiemɔ ni mli wa ni ji “Ajwamaŋ ni Hiɛ Eshwie Shi Lɛ” kɛ agbɛnɛ yiŋkpɛɛ ni mli wa ni nyiɛ no sɛɛ ba yɛ wɔ “Ŋwɛi Jalɛsaneyeli” kpeei lɛ ashishi lɛ. Mɛni ekoŋŋ wɔtaoɔ ni baatsirɛ wɔ koni wɔfee mɛi ni kɛ wɔhe aaawo otsi naagbee enumɔ nɛɛ mli nitsumɔ mli, kɛ aaahi lɛ, akɛ gbɛgbalɔi awalɔi, ni wɔja nɛkɛ shɛɛ sane ni mli wa nɛɛ babaoo wɔha fe be fɛɛ! Ni nɔ ni baafi nɛkɛ shɛɛ sane ni kanyaa mɔ nɛɛ sɛɛ ji April 8 Awake! lɛ ni baahɛle wɔ shi ni egbele wɔhiŋmɛii kɛ saji komɛi ni kɔɔ Adesai Awala Hiɛ ni Nazibii lɛ Kpata lɛ he lɛ. Kɛ enɛɛmɛi kpe sɛɛ lɛ, akɛ March nɔ lɛ atsu nii yɛ April ni aja April nɔ lɛ babaoo kɛji akɛ amɛshɛ shi yɛ May mli, yɛ be mli ni wɔjeɔ wɔ nyɔji enyɔ Buu-Mɔɔ shɛɛ he tafaa lɛ shishi lɛ.
6 Mɔdɛŋbɔɔ krɛdɛɛ he miihia koni anyɛ ana gbɛfaŋnɔ babaoo yɛ sɔɔmɔ nitsumɔ lɛ mli. Kɛ onyɛɛɛ ofee gbɛgbalɔ lɛ, ebaahi jogbaŋŋ akɛ okɛ ŋmɛlɛtswaa oti ko aaama shi oha bo diɛŋtsɛ ohe yɛ March kɛ April mli. Ani obaanyɛ oto gbɛjianɔ ni ona sɔɔmɔ nitsumɔ lɛ mli gbɛfaŋnɔ babaoo kɛtsɔ heloo gbɛfaŋ nibii komɛi asɛɛdii kɛ hiɛtserɛjiemɔ ni ooofo nɔ lɛ nɔ? Bɔɔ he mɔdɛŋ. Bi Yehowa ni ewo bo hewalɛ ni ejɔɔ bo. Mɛi ni yɔɔ gbɔmɔtsoŋ gbɔjɔmɔi komɛi lɛ baanyɛ ana akɛ mɛi krokomɛi ayelikɛbuamɔ baaha ni amɛ hu amɛnyɛ amɛna babaoo feemɔ yɛ nɛkɛ tafaa nɛɛ mli.
7 Kɛha wɔteŋ mɔ fɛɛ mɔ lɛ, esa akɛ March, April kɛ May afee be ni deka bɛ mli kwraa kɛha wɔ yɛ Yehowa sɔɔmɔ mli. Onukpai lɛ baabɔ mɔdɛŋ ni amɛto nɔ fɛɛ nɔ he gbɛjianɔ fɛfɛo. Esa akɛ akwɛ ni ashɛ woji ni he baahia Iɛ kɛtsɔ hiɛ. Akwɛ ni ana woji tɛtrɛbii krokomɛi, titri lɛ April 15 Buu-Mɔɔ lɛ eko afata he. Ato shikpɔŋkuku he gbɛjianɔ, ni akwɛ ni atsu mli nii kɛmɔ shi. Ato gbɛjianɔ aha shiɛmɔyaa, ni gbɛkɛnaashi odaseyeli fata he. Yɛ be mli ni wɔkɛ mɔdɛŋbɔɔ sɔleɔ wɔbiɔ Yehowa jɔɔmɔ lɛ, nyɛbaa wɔkɛ be lɛ atsua nii ni wɔkɛjiea eyi.