Ogbɛfaŋnɔ Ni Baaha kpeei Ahe Aba sɛɛnamɔ
1 Wɔkpeei lɛ yeɔ ebuaa wɔ bɔni afee ni wɔle Yehowa jogbaŋŋ. Eyeɔ ebuaa wɔ ni wɔnuɔ emlai kɛ shishitoo mlai lɛ ashishi ni ewoɔ wɔ hewalɛ hu koni wɔhi shi yɛ naa. Kpeei hu saa wɔ jogbaŋŋ bɔni afee ni wɔna gbɛfaŋnɔ ni mɔɔ shi yɛ shiɛmɔ nitsumɔ ni kɛ yiwalaheremɔ baa lɛ mli. Ni eyeɔ ebuaa wɔ hu koni wɔshɛ oti ni ma wɔhiɛ ni ji naanɔ wala yɛ Nyɔŋmɔ jeŋ hee lɛ mli lɛ he. Kɛji wɔɔtsu wɔ gbɛfaŋnɔ akɛ aŋkroaŋkroi koni wɔha kpeei lɛ ahe aba sɛɛnamɔ lɛ, no lɛ, ŋmɛlɛtswai abɔ ni wɔkɛbuaa wɔhe naa kutuu yɛ kpeei ashishi lɛ kɛ sɛɛnamɔi babaoo baaha wɔ.
2 Otii etɛ komɛi yɛ ni haa kpeei ahe baa sɛɛnamɔ—hesaamɔ, he ni akɛwoɔ mli, kɛ nibii ni akaseɔ lɛ kɛ nitsumɔ. Etɛ nɛɛ fɛɛ kɛ amɛhe tsaa. Hesaamɔ jogbaŋŋ haa he ni akɛwoɔ mli lɛ feɔ mlɛo kɛ miishɛɛ. Hemɔkɛyeli jajemɔ yɛ miishɛɛ kɛ ekaa mli lɛ woɔ mɛi ni boɔ toi lɛ ahewalɛ ni ekanyaa amɛ. (Efes. 4:29) Eka shi faŋŋ akɛ kɛji mɛi fɛɛ ni eba kpee lɛ nuɔ nɔ ni akɛɔ lɛ shishi ni ayeɔ ebua amɛ ni amɛhiɛ asɔ bɔ ni amɛaafee ni amɛkɛ nɔ ni awieɔ lɛ atsu nii yɛ gbɛi ni anyɛɔ atsuɔ he nii nɔ yɛ amɛ diɛŋtsɛ amɛshihilɛi amli koni amɛkɛye amɛbua mɛi krokomɛi ni amɛbatsɔmɔ kaselɔi lɛ, no lɛ amɛkɛbaatsu nii.
Buu-Mɔɔ Kɛ Asafo Woloŋ Nikasemɔi Lɛ
3 Buu-Mɔɔ Nikasemɔ lɛ kɛ Asafo Woloŋ Nikasemɔ lɛ ji kpeei ni he hiaa waa diɛŋtsɛ ejaakɛ nomɛi anɔ “Tsulɔ anɔkwafo kɛ nilelɔ” lɛ tsɔɔ ni ekɛ hemɔkɛyeli lɛɔ shiabii lɛ. (Mat. 24:45-47) Ani otoɔ be ohaa ohe koni okɛkase nikasemɔ ni abaasusu he lɛ? Ani ofee klalo akɛ obaaha saji ahetoo yɛ kpeei lɛ ashishi? Eka shi faŋŋ akɛ, otsuɔ gbɛfaŋnɔ ko ni he hiaa waa he nii yɛ enɛ gbɛfaŋ.
4 Kɛji otsɔ hiɛ okase nɔ ni abaakase yɛ Buu-Mɔɔ Nikasemɔ lɛ mli aloo Asafo Woloŋ Nikasemɔ lɛ mli lɛ, no lɛ obaafee klalo akɛ ooona miishɛɛ kpele fe fɛɛ ni ji nihamɔ lɛ mli gbɛfaŋnɔ. (Bɔfoi 20:35) Mɛi komɛi naa akɛ kɛ amɛfɔlɔ wiemɔi otii lɛ ashishi lɛ, eyeɔ ebuaa amɛ. Kɛ okane ŋmalɛi ni atsɛ shi aŋmalako amɛmli wiemɔi lɛ ni osusu bɔ ni amɛkɔɔ nɔ ni asusuɔ he lɛ he lɛ, no lɛ obaana Ŋmalɛ mli nɔdaamɔ kɛha hetoi ni ahaa lɛ ahe sɛɛ. Agbɛnɛ ani obaanyɛ oha hetoo yɛ bo diɛŋtsɛ owiemɔ mli, aloo ja okane hetoo lɛ? Otii ni he hiaa fe fɛɛ yɛ teokrase nikasemɔ mli ji ni oha nii ni okaseɔ lɛ atsɔ onɔ koni okɛ tsui mli hiɛsɔɔ kɛ shishinumɔ hu atsu he nii.—Abɛi 2:5; 4: 7, 8.
Teokrase Sɔɔmɔ Skul Kɛ Sɔɔmɔ Kpee
5 Ani obuɔ nikaselɔi awiemɔi ni ahaa bo yɛ skul lɛ mli lɛ akɛ nifeemɔi ni jɛ Yehowa ŋɔɔ ni ojieɔ henumɔ nɛɛ kpo yɛ gbɛ ni otsɔɔ nɔ osaa ohe lɛ mli? Kwɛmɔ akɛ onuɔ nɔ ni obaawie he lɛ shishi jogbaŋŋ ni obaanyɛ owie yɛ gbɛ ni baaŋɔɔ hu nɔ. Shi kɛji akɛ ahako bo nifeemɔ pɔtɛɛ ko po lɛ, kasemɔ nii kɛtsɔ Biblia kanemɔ kɛ nibii krokomɛi ni ato he gbɛjianɔ kɛha daa otsi lɛ nɔ. Esa akɛ afee nakai nɔŋŋ kɛha Sɔɔmɔ Kpee lɛ hu. Ni ooobɔ mɔdɛŋ waa ni nɔ ni akaseɔ lɛ akafee nɔ ni kpaako oleɔ he nɔ ko klɛŋklɛŋ kwraa lɛ, kɛji otsɔ hiɛ okase dani eshɛ be lɛ, no lɛ obaanyɛ onu nɔ ni awieɔ he lɛ shishi jogbaŋŋ yɛ kpee lɛ shishi.
6 Esa akɛ Sɔɔmɔ kpee lɛ mli nɔkwɛmɔ nii kɛ skul lɛ mli nifeemɔi lɛ afee nibii pɔtɛɛ ni afeɔ ni kɔɔ shihilɛi ni yɔɔ he ni nyɛyɔɔ lɛ he ni mɛi fɛɛ baanyɛ anu shishi. Tii gbɛfaŋnɔ ni obaatsu he nii lɛ mli jogbaŋŋ. Agbɛnɛ hu, esa akɛ ohesaamɔ lɛ afee nɔ ni sa koni efee nɔkwɛmɔ nɔ kpakpa kɛha mɛi krokomɛi.
7 Okɛ hesaamɔ kpakpa kɛ wiemɔ ni woɔ mɔ ekaa ama ohiɛ akɛ otii ni obaashɛ he. Fɔlɔi, nyɛyea nyɛbuaa nyɛbii lɛ ni amɛsaa amɛhe koni kɛ amɛna hegbɛ lɛ, amɛha saji ahetoo yɛ amɛ diɛŋtsɛ amɛwiemɔi amli. Lɛlɛŋ, kɛji wɔ fɛɛ wɔha jɛmɛ ni wɔɔshɛ yɛ be ni sa mli kɛ klalo ni wɔɔfee akɛ wɔkɛ wɔhe aaawo mli lɛ fee nibii ni kɔɔ wɔhe aŋkroaŋkroi lɛ, no lɛ eeeha wɔkpee lɛ afee nɔ ni miishɛɛ kɛ saji ni he hiaa ni kanyaa mɔ yɔɔ mli, ni akɛhaa yɛ gbɛ ni mɔɔ toibolɔi ajwɛŋmɔ hu nɔ. Ani oootsu ogbɛfaŋnɔ yɛ enɛ mli koni ‘wɔfee nibii fɛɛ bɔ ni’ eeeha mɛi krokomɛi ni kɛ wɔ ebakpe lɛ ‘anane amɔ shi’?—1 Kor. 14:26.