Bɔ ni Wɔɔfee Wɔsaa Wɔhe Kɛha Sɔɔmɔ Kpee Lɛ
1. Mɛɛ yiŋtoo hewɔ ato Sɔɔmɔ Kpee lɛ he gbɛjianɔ, ni mɛɛ gbɛ nɔ wɔbaanyɛ wɔtsɔ wɔna he sɛɛ kɛmɔ shi?
1 Ato Sɔɔmɔ Kpee lɛ he gbɛjianɔ koni akɛwaje wɔ ni wɔshiɛmɔ nitsumɔ lɛ amɔ̃ shi. Saji titri ni asusuɔ he lɛ kɔɔ Maŋtsɛyeli sanekpakpa lɛ shiɛmɔ, kaselɔi feemɔ, kɛ kojomɔ ni Nyɔŋmɔ kɛbaaba ni ebɛŋkɛ lɛ jajemɔ he. (Mat. 28:20; Mar. 13:10; 2 Pet. 3:7) Kɛ́ wɔsaa wɔhe jogbaŋŋ, ni wɔkɛ wɔhe wo kpee nɛɛ ni he hiaa lɛ mli lɛ, wɔnáa he sɛɛ waa.
2. Mɛɛ gbɛ nɔ wɔɔtsɔ wɔsaa wɔhe kɛbo wiemɔ ni abaaha lɛ toi?
2 Wiemɔ ni Ahaa: Bei pii lɛ, atsɔɔ wolo ni abaajɛ mli aha wiemɔ lɛ yɛ gbɛtsɔɔmɔi ni akɛhaa wielɔ lɛ mli. Obaanyɛ okase sane ni abaasusu he, ní ŋmalɛi ni atsɛ yisɛɛ shi aŋmalako emli wiemɔi lɛ fata he lɛ, koni osusu bɔ ni obaafee okɛtsu nii yɛ shiɛmɔ nitsumɔ lɛ mli lɛ he.
3. Mɛni wɔbaanyɛ wɔfee kɛsaa wɔhe kɛha sanegbaa kɛtsɔ sanebimɔ kɛ hetoo nɔ?
3 Sanegbaa Kɛtsɔ Sanebimɔ kɛ Hetoo Nɔ: Abaatsu fã nɛɛ he nii tamɔ afeɔ Buu-Mɔɔ Nikasemɔ lɛ nɔŋŋ. Akɛ wiemɔ kuku baakpa hiɛ, kɛkɛ lɛ amu naa kuku. Folɔmɔ otii ni yɔɔ kuku fɛɛ kuku mli lɛ ashishi, koni osaa ohe akɛ okɛ saji ahetoo ni yɔɔ kuku, ni shishinumɔ yɔɔ he baaha.
4. Mɛɛ gbɛ nɔ wɔɔtsɔ wɔsaa wɔhe kɛha fã ni ji toibolɔi ni akɛaagba sane lɛ?
4 Toibolɔi ni Akɛaagba Sane: Abaatsu fã nɛɛ he nii akɛ wiemɔ ni ahaa, shi wielɔ lɛ baabi toibolɔi lɛ ni amɛkɛ amɛhe awo mli yɛ hei komɛi. Kɛ́ ofolɔ saji otii lɛ ashishi, ni okwɛ ŋmalɛi ni atsɛ yisɛɛ shi aŋmalako emli wiemɔi lɛ amli lɛ, obaanyɛ oha saji ni abaabibii lɛ ahetoo. Nyɛmi nuu ni tsuɔ fã nɛɛ he nii lɛ baabɔ mɔdɛŋ ni eha toibolɔi lɛ kɛ amɛhe awo sanegbaa lɛ mli kɛjie otii lɛ akpo.
5. Mɛni baaye abua wɔ koni wɔná nɔkwɛmɔnii lɛ ahe sɛɛ kɛmɔ shi?
5 Nɔkwɛmɔnii: Nɔkwɛmɔnii ni tsɔɔ bɔ ni abaafee akɛ sane ni asusuɔ he lɛ atsu nii yɛ nyɛshikpɔŋkuku lɛ mli lɛ fata nifeemɔ nɛɛ fãi komɛi ahe. Abaaha asafoŋ onukpai loo shiɛlɔi ni he esa loo gbɛgbalɔi afee nɔkwɛmɔnii lɛ. Obaanyɛ osusu gbɛ nɔ ni abaanyɛ atsɔ atsu fã nɛɛ he nii lɛ he yɛ ohesaamɔ lɛ mli. Kɛ́ afee shiɛmɔ wiemɔ ko he nɔkwɛmɔnɔ lɛ, susumɔ bɔ ni obaanyɛ okɛ tsu nii, kɛ bɔ ni obaaha ekɔ shiatsɛmɛi srɔtoi ahe lɛ he. Bɔɔ mɔdɛŋ ni ohiɛ wolo loo wolo tɛtrɛɛ ni akɛbaatsu nii kɛfee nɔkwɛmɔnɔ lɛ eko. Kɛ́ nyɛmiifee gbɛkɛ Weku Jamɔ lɛ, ni nyɛfee shiɛmɔ wiemɔi nɛɛ ekomɛi ahe nɔkwɛmɔnɔ lɛ, ehe baaba sɛɛnamɔ kɛha nyɛ.
6. Mɛɛ yiŋtoi komɛi ahewɔ ni esa akɛ wɔsaa wɔhe kɛha Sɔɔmɔ Kpee lɛ?
6 Sɔɔmɔ Kpee lɛ feɔ nɔ ni yɔɔ miishɛɛ kɛ́ wɔsaa wɔhe jogbaŋŋ, ní wɔjwɛŋ gbɛtsɔɔmɔi ni sa ni akɛbaaha lɛ nɔ dani wɔtee kpee lɛ. Enɛ ni wɔɔfee lɛ baaha wɔnyɛ wɔwowoo wɔhe hewalɛ waa diɛŋtsɛ. (Rom. 1:11, 12) Kɛ́ wɔŋɔ be kɛsaa wɔhe kɛha Sɔɔmɔ Kpee lɛ, ebaawaje wɔ koni wɔtsu nitsumɔ ni atuu awo wɔdɛŋ lɛ he nii jogbaŋŋ.—2 Tim. 3:17.