Sɔɔmɔ Kpee lɛ Wulaa Wɔ kɛhaa Nitsumɔi Kpakpai Fɛɛ
1 Sɔɔmɔ Kpee lɛ yiŋtoo ji ni ekanya wɔ ni ewula wɔ koni wɔkɛ wɔhe awo shiɛmɔ kɛ kaselɔi afeemɔ nitsumɔ lɛ mli kɛmɔ shi. (2 Tim. 3:17) Shi kɛlɛ, kɛji wɔsaaa wɔhe jogbaŋŋ kɛhaaa kpee lɛ loo ni wɔkɛ nɔ ni wɔkaseɔ lɛ tsuuu nii lɛ, no lɛ sɛɛnamɔi fioo ko pɛ wɔɔna yɛ mli.
2 Ni ooosaa ohe dani kpee lɛ ashɛ lɛ baaye abua bo koni onu nɔ ni atsɔɔ lɛ shishi jogbaŋŋ. Kasemɔ woji ni akɛbaatsu nii lɛ, ni okɛ woji lɛ aba kpee lɛ shishi koni onyiɛ sɛɛ ni onyɛ oha sanebimɔi ahetoo. Bo sane toi jogbaŋŋ, ni oŋmala saji fioo ko ni okɛbaatsu nii sɛɛ mli.
3 Onukpai asɛinɔtalɔ lɛ kwɛɔ kpee lɛ fai sɔrɔtoi ni ato he gbɛjianɔ lɛ amli jogbaŋŋ. Akɛ kpee lɛ fai sɔrɔtoi lɛ woɔ asafoŋ onukpai kɛ asafoŋ sɔɔlɔi ni he esa lɛ adɛŋ koni amɛsaa amɛhe kɛha enɛ. (om bf. 70) Asafoi ni yɔɔ onukpai kɛ asafoŋ sɔɔlɔi fioo pɛ lɛ baanyɛ ni amɛkɛwo nyɛmimɛi krokomɛi ni he esa lɛ adɛŋ koni amɛ hu amɛye amɛbua amɛ. (km 2/77, Sanebimɔ He) Esa akɛ wielɔ fɛɛ wielɔ asaa ehe jogbaŋŋ kɛmɔ shi, ni enyiɛ gbɛtsɔɔmɔ ni akɛha lɛ sɛɛ pɛpɛɛpɛ, ni ekwɛ jogbaŋŋ ni ekatsɛ fe be ni ato aha lɛ lɛ.
4 Akɛ adafitswai jeɔ kpee lɛ shishi daa. Esa akɛ nyɛminuu ni kɛ adafitswaa baaha lɛ ayana onukpai asɛinɔtalɔ lɛ kɛtsɔ hiɛ koni ena ele saji ni he hiaa akɛ atswa he adafi. Nɔ ni baanyɛ afata enɛɛmɛi ahe ji woji ni Asafo lɛ ŋma kɛmaje loo sɔɔmɔ lɛ gbɛjianɔtoo he kaimɔ saji loo amaniɛbɔi ni baa daa nyɔŋ nɔ lɛ. Wɔbaana akɛ helatsɛmɛi yɛ ni ehe baahia ni ayasara amɛ loo ni baasumɔ ni amɛnu asafo lɛ mli nitsumɔi ahe gbɛjianɔ ni ato kɛha wɔsɛɛ ko lɛ he saji fɛɛ. Bo saji atoi jogbaŋŋ koni ole enɛ he saji ni ofee kralo akɛ ooona helatsɛmɛi asaramɔ loo asafo lɛ mli nitsumɔi lɛ amli gbɛfaŋnɔ.
5 Kɛ kpee lɛ fa ko biɔ ni akɛ toibolɔi agba sane lɛ, saamɔ ohe kɛtsɔ nikasemɔ lɛ nɔ ni oookane kɛ ŋmalɛi lɛ ni ooogbele okwɛ mli lɛ nɔ. Susumɔ bɔ ni okɛ ŋaawoi lɛ baatsu nii oha lɛ kɛ saji ni obaanyɛ owie ni okɛwo mɛi krokomɛi ahewalɛ lɛ he. Obaanyɛ ogba niiashikpamɔ ko he sane kuku ni okɛfee bɔ ni abaanyɛ akɛ nɔ ni akaseɔ lɛ atsu nii aha lɛ he nɔkwɛmɔ nɔ.
6 Kɛ abaafee nɔkwɛmɔ nɔ ko lɛ, bɔɔ mɔdɛŋ ofee he mfoniri tamɔ nɔ ni oyɛ shihilɛ ni tamɔ nakai mli, ni osusu nɔ ni obaakɛɛ he. Kadimɔ saji ni akɛfaa he yɛ mli lɛ kɛ bɔ ni ato saji anaa aha lɛ. Bɔɔ mɔdɛŋ ni okai nɔ ni okɛɛ beni obaje shihilɛ ni tamɔ enɛ nɔŋŋ mli lɛ, ni osusu bɔ ni otii ni atsɔɔ lɛ baanyɛ aye abua bo ni oye omanye babaoo wɔsɛɛ ko lɛ he.
7 Esa akɛ atsɔ hiɛ akase nɔkwɛmɔ nii kɛ saji ni abaabibii lɛ jogbaŋŋ. Ejeee nɔ ni woɔ mɔ hewalɛ kwraa akɛ aaashi Asa lɛ nɔ ni ayakase enɛɛmɛi beni kpee lɛ yaa nɔ lɛ. Yɛ bei pii amli lɛ, nikasemɔ lɛ fai sɔrɔtoi ni akɛ bei ni faaa kaseɔ lɛ kanyaaa loo ewooo toibolɔi ahewalɛ. Mɛi komɛi baa ni amɛsaa amɛhe momo akɛ amɛaakase amɛgbɛfaŋnɔ ni amɛbaatsu he nii lɛ kɛ agbe Buu-Mɔɔ Nikasemɔ lɛ naa koni nyɛmimɛi ni tsuɔ wielɔ-kpoku lɛ kɛ tsɔnei ni awieɔ awoɔ mli lɛ ahe nii lɛ ale nɔ ni he baahia. Enɛ hi.
8 Bei komɛi lɛ nɔ ni baafata wiemɔ ni ato he gbɛjianɔ lɛ he ji wiemɔ ni kɔɔ asafo lɛ hiamɔ nii pɔtɛɛ ko he loo Buu-Mɔɔ lɛ mli sane ni yɔɔ ebe naa. Bo enɛ toi jogbaŋŋ, ni okɛ ŋaawoo lɛ ato otsui mli, ni obɔ mɔdɛŋ akɛ okɛaatsu nii.
9 Wɔmiisumɔ ni “wɔsaa wɔhe kɛha nitsumɔi kpakpai fɛɛ.” (2 Tim. 2:21, NW) Sɔɔmɔ Kpee lɛ ji gbɛjianɔ sɔrɔtoi ni Yehowa toɔ koni no aye abua wɔ yɛ enɛ feemɔ mli lɛ ateŋ ekome. Ni wɔɔjɛ anɔkwayeli mli wɔya kpee kɛ mɔdɛŋ ni wɔɔbɔ yɛ anɔkwayeli mli akɛ wɔkɛ nɔ ni wɔkaseɔ lɛ aaatsu nii lɛ baaye abua wɔ lɛlɛŋ koni wɔnyɛ ‘wɔgbe wɔsɔɔmɔ lɛ naa kwraa.’—2 Tim. 4:5.