Nyɛyaa Nɔ Nyɛtsaa Nii Ni Nyɛkakpaa

¹ Biblia lɛ shii wɔ ni wɔyiŋ afee wɔ kɔshikɔshi yɛ shikpɔŋkuku ni bɔfoi lɛ kɛ mra be mli Kristofoi kaselɔi lɛ tsu mli nii lɛ he. Beni Yesu egbo sɛɛ be fioo ko lɛ, nɔyelɔi lɛ bɔ amɛ kɔkɔ ni “amɛkatsi tã ni amɛkatsɔɔ nii” yɛ Yesu he dɔŋŋ. (Bɔfoi 4:18) Mɛni hewɔ? Yiŋtoo kome ji omanye ni amɛyeɔ yɛ naakpɛɛ gbɛ nɔ lɛ. Akpekpei abɔ miitsɔmɔ heyelilɔi, taakɛ Bɔfoi lɛ Asaji 4:4 bɔɔ amaniɛ lɛ: “Shi mɛi ni nu wiemɔi lɛ ateŋ mɛi pii he ye, ni hii lɛ ayibɔ aaafee akpei enumɔ.”

² Akɛni wɔ hu wɔyaa nɔ wɔtsɔɔ nii ni wɔkpaaa hewɔ lɛ, gbɔmɛi akpei ohai abɔ, hɛɛ, akpekpei abɔ miitsɔmɔ heyelilɔi yɛ wɔgbii nɛɛ amli. Yɛ November nyɔŋ nɛɛ mli lɛ wɔna hegbɛ akɛ wɔkɛ Awake! kɛ Buu-Mɔɔ lɛ baaha koni ashɛ. Ŋwanejee ko bɛ he akɛ Awake! atsu gbɛfaŋnɔ ni he hiaa he nii yɛ shi ni ehɛleɔ gbɔmɛi lɛ yɛ amɛmumɔŋ hiamɔ nii ahe lɛ mli. Enɛ kɛ miishɛɛ ebaha mɛi babaoo, akɛni amɛtsɔ nɔ amɛkase Nyɔŋmɔ suɔmɔnaa nifeemɔ lɛ hewɔ.​—Okɛto Mateo 5:3 he.

Bɔɔ Mɔdɛŋ Waa

³ Kɛji oooye omanye yɛ tafaa lɛ mli lɛ, belɛ esa akɛ obɔ mɔdɛŋ ni okɛtao mɛi ni baashɛ lɛ. Eyɛ mli akɛ naatsii lɛ yɛ nɔ lolo moŋ, shi yɛ hei pii lɛ, nyɛmimɛi lɛ nyɛɔ amɛyeɔ odase trukaa aloo yɛ gbɛi pɔtɛɛ nɔ po ni naagba ko baaa he. Akɛni Awake! kɛ Buu-Mɔɔ lɛ wieɔ saji ni saa gbɔmɛi ashihilɛ he pɔtɛɛ lɛ ahe hewɔ lɛ, nɔ nɔŋŋ ni he hiaa ni ofee ji ni otee saneyitso ko ni he hiaa ni mɔ ni okɛwieɔ lɛ baana he miishɛɛ lɛ shi. Yɛ be mli ni etsɔɔ ejwɛŋmɔ kɛ naatsɔɔmɔ kuku ni eyɔɔ lɛ sɛɛ lɛ, obaanyɛ ogbala ejwɛŋmɔ kɛya nakai sane pɔtɛɛ lɛ nɔ yɛ woji tɛtrɛbii lɛ ekome mli. Wo lɛ hewalɛ koni eshɛ, ni oma nɔ mi oha lɛ akɛ, kɛtsɔ nakai gbɛ nɔ lɛ, shɛɛ sane lɛ baashɛ eŋɔɔ be fɛɛ be, akɛni yɛ naatsii lɛ hewɔ lɛ, bɔ ni wɔyasaraa mɛi lɛ bɛ nɔtonɔto dɔŋŋ amrɔ nɛɛ lɛ hewɔ. Nyɛteŋ mɛi komɛi baafa gbɛ kɛya maŋsɛɛ yɛ November mli. Mɛɛ jɔɔmɔ nyɛaana mli ŋɔɔmɔ nɛkɛ yɛ maŋ ni naatsii bɛ mli, he ni nyɛbaanyɛ nyɛye odase ni mɔ ko etsiii nyɛnaa ni nyɛkɛ woji tɛtrɛbii lɛ ashɛɛ hu aha yɛ lɛ! Wɔmiiwo nyɛ hewalɛ ni nyɛkɛ nakai hegbɛ lɛ atsu nii yɛ be mli ni nyɛyaa kpokpaa Wulu nɔ kpee lɛ.

⁴ Gbɛi kpakpai pii yɛ ni wɔɔnyɛ wɔtsɔ nɔ wɔha mɛi ashɛ woji tɛtrɛbii lɛ yɛ nyɔŋ nɛɛ nɔ. Ekome ji ni wɔɔha wɔ Biblia mli nikaselɔi lɛ kɛ mɛi krokomɛi ni yɔɔ wiemɔ lɛ he miishɛɛ lɛ hegbɛ ni amɛshɛ. Ekolɛ wɔ Biblia mli nikaselɔi lɛ ateŋ mɔ ko shɛɔ woji tɛtrɛbii lɛ ekome. Mɛni hewɔ owooo lɛ ŋaa ni enine ashɛ enyɔ lɛ fɛɛ nɔ? Abaanyɛ awo wekui lɛ hewalɛ ni amɛshɛ Buu-Mɔɔ lɛ eko amɛha weku lɛ mli bii lɛ ateŋ mɔ fɛɛ mɔ koni amɛnyɛ amɛsaa amɛhe kɛha Buu-Mɔɔ Nikasemɔ lɛ. Ŋaawoo kroko hu ji ni wɔna mɛi ni heɔ woji tɛtrɛbii lɛ daa koni wɔha mɛi ni yɔɔ he miishɛɛ babaoo lɛ hegbɛ ni amɛshɛ eko. Esa akɛ wɔha mɛi ni jieɔ anɔkwa miishɛɛ kpo lɛ hegbɛ hu ni wɔkɛ amɛ akase Biblia lɛ.

Lɛɛmɔ Osɔɔmɔ Nitsumɔ Lɛ Mli

⁵ Be hoko tsɔ akɛ aaaŋmala gbɛbimɔ wolo kɛha gbɛgbalɔi awalɔi asɔɔmɔ nitsumɔ lɛ kɛha November nyɔŋ lɛ. Akɛ weku lɛ, ani nyɛmiito gbɛjianɔ ni nyɛkɛ nyɛhe awo gbɛgbamɔ nitsumɔ lɛ mli yɛ je lɛŋ hejɔɔmɔ gbii lɛ amli yɛ December? Amrɔ nɛɛ ji be ni esa akɛ nyɛbɔi bɔ ni nyɛaanyɛ nyɛfee enɛ yɛ omanyeyeli mli lɛ he susumɔ. Kɛji weku muu lɛ fɛɛ nyɛŋ afee gbɛgbalɔi awalɔi lɛ, ani nyɛbaanyɛ nyɛtsu nii kutuu koni weku lɛ mli mɔ kome loo mɛi ni fa kɛ amɛhe awo mli? Kɛ jeee nakai lɛ, ani ebaahi akɛ kɛ hooo kwraa lɛ, nyɛye be ni fa saŋŋ yɛ sɔɔmɔ nitsumɔ lɛ mli ni nyɛkɛ Awake! kɛ Buu-Mɔɔ woji tɛtrɛbii lɛ aha?

⁶ Wɔhiɛ sɔɔ mumɔŋ sɛɛnamɔi kɛ jɔɔmɔi ni wɔnine eshɛ nɔ kɛjɛ Awake! kɛ Buu-Mɔɔ lɛ baafai lɛ amli lɛ waa diɛŋtsɛ. Wɔle akɛ mɛi ni hiɛ tsui krɔŋŋ yɛ wɔshikpɔŋkuku lɛ mli lɛ hu baana woji tɛtrɛbii lɛ akanemɔ yɛ daa nyɔŋ nɔ lɛ he sɛɛ babaoo diɛŋtsɛ. Nyɛhaa wɔyaa nɔ yɛ wɔnitsɔɔmɔ lɛ mli kɛ dɛŋdadei ni Yehowa kɛha wɔ lɛ yɛ November nyɔŋ lɛ mli. Kɛ wɔfee nakai lɛ. wɔbaakpa Yehowa jɔɔmɔi babaoo ni wɔdiɛŋtsɛ hu wɔɔjie wɔhe kpo akɛ jɔɔmɔi kɛha mɛi krokomɛi.​—Gal. 6:⁠9.