Ye Obua Mɛi Heei Lɛ Ni Amɛya Hiɛ
1 Yɛ April 17, 1992 lɛ, gbɔmɛi aaashɛ akpekpei 11.5 bua amɛhe naa ye Jeŋ fɛɛ kɛha Kristo gbele Iɛ Kaimɔ lɛ yeli. Yibɔ nɛɛ fa fe shiɛlɔi ni yɔɔ Yehowa Odasefoi asafoi amli yɛ Je lɛŋ fɛɛ lɛ ayifalɛ Iɛ toi enyɔ. Kwɛ bɔ ni ehaa mɔ mii shɛɔ ehe akɛ eeena nɛkɛ gbɔmɛi babaoo nɛɛ ni miike yuu kɛmiiba “Yehowa gɔŋ lɛ” nɔ! (Mika 4:2) Amrɔ nɛɛ, gbɔmɛi aaashɛ akpekpei kpawo sɔŋŋ yɛ ni miijie miishɛɛ kpo yɛ anɔkwa Jamɔ he yɛ gbɛ ko nɔ, ni kɛlɛ amɛjeee mɛi ni jieɔ Yehowa yi yɛ faŋŋ mli lolo. Eka shi faŋŋ akɛ wiemɔ ni Yesu wie akɛ “nikpamɔ lɛ fa” lɛ eba mli waa ŋmɛnɛ fe bei fɛɛ ni eho!—Mat. 9:37, 38.
2 Yɛ May nyɔŋ lɛ nɔ lɛ, wɔbaabɔ mɔdɛŋ yɛ gbɔ krɛdɛɛ nɔ ni wɔkɛye wɔbua mɛi fɛɛ ni sa lɛ ni amɛna shiɛmɔ nitsumɔ lɛ mli gbɛfaŋnɔ. Asafo Woloŋ Nikasemɔ nɔkwɛlɔ lɛ, kɛ nyɛmimɛi hii krokomɛi ni he esa kɛ gbɛgbalɔi ni yɔɔ ekuu lɛ mli lɛ, baatsu nɔ titri ko yɛ enɛ mli. Otii etɛ ni wɔkɛmamɔ wɔhiɛ ji (1) ni wɔto shia Biblia mli nikasemɔ he gbɛjianɔ wɔha mɛi heei ni babo maŋshiɛmɔ krɛdɛɛ lɛ kɛ Kaimɔ lɛ toi afii nɛɛ lɛ; (2) ni wɔwo mɛi ni kaseɔ nii lɛ hewalɛ ni amɛhe asa akɛ shiɛlɔi ni abaptisiko amɛ; kɛ (3) ni wɔha bɔ ni wɔkɛ wɔhe woɔ shiɛmɔ nitsumɔ lɛ mli wɔhaa lɛ aya hiɛ.
3 Esa akɛ mɔ fɛɛ mɔ abɔ mɔdɛŋ waa ni ekɛhere mɛi heei ni baa wɔkpeei lɛ eko fɛɛ eko shishi lɛ ahiɛmɛɛ ni ekɛle amɛ hu. Mɛni wɔbaanyɛ wɔfee ni wɔkɛwo mɛi ni yɔɔ wiemɔ lɛ he miishɛɛ nɛɛ ateŋ mɛi pii hewalɛ ni amɛna shia Biblia mli nikasemɔ ni akɛ amɛ feɔ daa?
4 Kɛ aja mli lɛ, afee Biblia mli nikasemɔ 58,590 yɛ Ghana yɛ 1992 sɔɔmɔ afi lɛ mli nyɔŋ fɛɛ nyɔŋ nɔ. Shiɛlɔi baanyɛ afɔ amɛ woloŋ nikasemɔ nɔkwɛlɔ lɛ nine ni efata amɛhe yɛ Biblia mli nikasemɔ feemɔ mli koni etsɔ nakai gbɛ nɔ ekɛle nikaselɔi lɛ. (kmGA 5/81 bf. 1) Ekolɛ nɛkɛ Biblia kaselɔi nɛɛ ateŋ mɛi komɛi ebɔi kpeei baa amrɔ nɛɛ, ni amɛsa akɛ mɛi ni baanyɛ ana shia-kɛ-shia nitsumɔ lɛ mii gbɛfaŋnɔ. Ani mɛi heei lɛ yeɔ odase trukaa daa, yɛ gbɛ ko nɔ? Ani amɛshɛɔ hesaai ni baaha amɛtsɔmɔ shiɛlɔi ni abaptisiko amɛ lɛ ahe, taakɛ atsɔɔ yɛ Our Ministry wolo lɛ baafai 97-9 lɛ? Kɛ nakai lɛ, tsɔɔmɔ amɛ bɔ ni amɛaafee amɛje shia-kɛ-shia nitsumɔ lɛ shishi yɛ be mli ni akpɛlɛ amɛnɔ akɛ shiɛlɔi ni abaptisiko amɛ lɛ sɛɛ.
5 Esaaa ni wɔkuɔ wɔhiɛ wɔfɔɔ hewalɛ ni wɔɔwo wɔhe yɛ wɔ Kristofoi ahenaabuamɔ mli lɛ nɔ. (Heb. 10:24, 25) Kɛji mɛi komɛi egbɔjɔ yɛ sɔɔmɔ nitsumɔ lɛ mli lɛ, no lɛ esa akɛ woloŋ nikasemɔ nɔkwɛlɔi lɛ ato gbɛjianɔ krɛdɛɛ ni akɛye abuɔ amɛ ni akɛwo amɛ hewalɛ. Bei komɛi lɛ, miishɛɛ ni akɛaafɔ amɛ nine ni amɛfata wɔhe yɛ shiɛmɔ nitsumɔ lɛ mli lɛ ji nɔ nɔŋŋ ni he hiaa.
6 May ni wɔɔfee lɛ nyɔŋ krɛdɛɛ yɛ wɔ shiɛmɔ nitsumɔ lɛ mli lɛ baabi ni mɔ fɛɛ mɔ aye abua. Ekaa ni woloŋ nikasemɔ nɔkwɛlɔ lɛ kɛbaanyiɛ hiɛ lɛ baanyɛ afee babaoo yɛ be mli ni eyeɔ ebuaa mɔ fɛɛ mɔ yɛ ekuu lɛ mli koni ena shiɛmɔ nitsumɔ lɛ mli gbɛfaŋnɔ kɛmɔ shi lɛ. Abaanyɛ abo kpeei krokomɛi ahe gbɛjianɔ kɛha shiɛmɔyaa. Abaanyɛ asusu mɛi ni edara yɛ afii amli lɛ ahe yɛ gbɛ krɛdɛɛ nɔ, ni abaanyɛ aye abua gbekɛbii lɛ yɛ gbɛi titrii anɔ. Esa akɛ fɔlɔi akwɛ ni weku muu lɛ fɛɛ ana shiɛmɔ nitsumɔ lɛ mli gbɛfaŋnɔ yɛ May mli. Kɛ wɔ fɛɛ wɔkɛ wɔ nibii kpakpa ha Yehowa yɛ nɛkɛ nikpamɔ be nɛɛ mli lɛ, no lɛ wɔbaana edɛŋ jɔɔmɔi babaoo.