Kuu Osɛɛ Kɛya He ni Ajie Miishɛɛ Kpo yɛ Lɛ
1 Wɔteŋ mɛi pii eye omanye yɛ woji tɛtrɛbii kɛ woji bibii ajaa mli. Ehe miihia ni wɔku wɔsɛɛ wɔya amɛŋɔɔ koni wɔbɔ mɔdɛŋ wɔkanya miishɛɛ babaoo lolo. Omanye ni wɔyeɔ yɛ nakai feemɔ mli lɛ baanyɛ adamɔ bɔ ni wɔsaa wɔhe jogbaŋŋ dani wɔyafeɔ sɛɛsaramɔ lɛ nɔ.
2 Kaimɔ akɛ obalaŋtai pii susuɔ nibii ni kɔɔ onukpai ahe lɛ nɔŋŋ hu he. May Awake! lɛ hiɛ saji ni pɛiɔ naagbai ni yaa nɔ bianɛ, taakɛ obalaŋtai naa amɛ lɛ mli. Nɛkɛ saji nɛɛ kɛ shishinumɔ ni baanyɛ aye abua obalaŋtai haa, kɛ amɛ fɔlɔi fɛɛ hu, koni amɛle nɔ ni he hiaa diɛŋtsɛ yɛ shihilɛ mli.
3 Kɛ okɛ May 8 “Awake!” lɛ ha lɛ, obaanyɛ oto gbɛjianɔ ni odi sɛɛ kɛtsɔ May 22 nɔ lɛ ni okɛaaha nɔ. Obaanyɛ okɛɛ akɛ:
◼ “Wolo tɛtrɛɛ ni mikɛha bo nyɛsɛɛ lɛ wieɔ hiɛnɔkamɔ kɛha gbekɛbii ahe. Ebi ni wɔ obalaŋtai lɛ adara yɛ jeŋ ni hiɛnɔkamɔ bibioo ko pɛ ekɛhaa yɛ wɔsɛɛ be he lɛ mli. Amɛteaŋ mɛi pii jieɔ bɔ ni amɛsumɔɔɔ enɛ lɛ kpo kɛtsɔɔ atuatsemɔ subaŋ nɔ. Shi amɛteŋ mɛi komɛi yɛ ni ŋmɛɔ pɛpɛɛpɛ ni amɛhiɛɔ susumɔi kpakpai ni nɔ kwɔlɔ amli. Sane ni yɔɔ Awake! hee nɛɛ mli lɛ tsɔɔ bɔ ni saneyeli he wulu ko fi obalaŋta ko ni yeko afii 15 lɛ sɛɛ eha lɛ mli. Misusuɔ akɛ ohiɛ baasɔ nɔ ni eyɔɔ kɛɛmɔ lɛ.”
4 Obaanyɛ okpɛ oyiŋ akɛ okɛ “brochure” loo wolo bibioo ko baaha kɛtsɔ gbɛ ni tamɔ nɛkɛ nɔŋŋ nɔ:
◼ “Minya sane kuku ni wɔgba nyɛsɛɛ lɛ, ni kɔɔ shikpɔŋ lɛ wɔsɛɛ he lɛ he waa. Ani obaanyɛ osusu bɔ ni shihilɛ baaji yɛ biɛ beni Nyɔŋmɔ kɛ yiwalɛ kɛ piŋmɔ baa naagbee lɛ he okwɛ? [Okɛ mfoniri ni yɔɔ Mɛni Ji Yiŋtoo ni Yɔɔ Shihilɛ Sɛɛ?—Te Ooofee Tɛŋŋ Ole Hu? lɛ baafa 31 lɛ atsɔɔ lɛ.] Kadimɔ Biblia mli kukuji babaoo ni yɔɔ baafai 29 kɛ 30 lɛ fɛɛ ni tsɔɔ jɔɔmɔi ni Nyɔŋmɔ Maŋtsɛyeli lɛ kɛbaaba lɛ mli lɛ. [Kɔ ŋmalɛ kome ni okane kɛjɛ wolo bibioo lɛ mli tɛɛ.] Masumɔ ni mashi enɛ maha bo.”
5 Kɛ oku osɛɛ lɛ, ekolɛ obaana akɛ shiatsɛ lɛ nine shɛɔ lɛ diɛŋtsɛ ejamɔ he woji anɔ, ni enuɔ he akɛ nomɛi nɔŋŋ fa. Obaanyɛ okɛɛ akɛ:
◼ “Bɔ fɛɛ bɔ ni wɔ jamɔ ji ha lɛ, naagbai nɛɛ fɛɛ saa wɔhe—awuiyeli, helai ni mli wawai, wɔsusuɔ nibii ni ebɔle wɔhe kɛkpe lɛ ahe—aloo jeee nakai? [Ŋmɛɛ gbɛ ni ewie.] Ani onuɔ he akɛ nɛkɛ naagbai nɛɛ ahe tsabaa diɛŋtsɛ yɛ? [Kanemɔ 2 Petro 3:13.] Atsɔɔ yiŋtoo ni yɔɔ wɔ wolo lɛ sɛɛ lɛ mli yɛ Buu-Mɔɔ lɛ baafa 2. [Kanemɔ sane kuku ko loo enyɔ ni otsɔ hiɛ ohala.] Mɛi pii ni jeee Yehowa Odasefoi nyaa wɔ woji lɛ akanemɔ he yɛ shɛɛ saji ni hiɛnɔkamɔ yɔɔ mli, ni damɔ Biblia lɛ nɔ, ni yɔɔ mli lɛ hewɔ. Kɛ shiatsɛ lɛ ha hetoo kpakpa lɛ, tsɔɔmɔ wɔ shia Biblia mli nikasemɔ he gbɛjianɔtoo lɛ mli.
6 Ekolɛ obaanyɛ otsɔ gbɛ ni tamɔ nɛkɛ nɔ:
◼ “Beni miba biɛ nyɛsɛɛ lɛ, wɔwie nɔ ni yɔɔ wɔsɛɛ be kɛha wɔje lɛ he. Te osusuɔ amaniɛbɔɔ nɛɛ he ohaa tɛŋŋ? [Tsii saji heei komɛi ni ayaa nɔ awieɔ he lɛ ta.] Kɛ gbɔmɛi nu nibii ni tamɔ nakai lɛ, ehaa amɛsusuɔ nɔ ni baa je nɛɛ nɔ lɛ he, aloo jeee nakai? Wɔheɔ wɔyeɔ akɛ nɛkɛ nibii nɛɛ tsɔɔ akɛ ‘naagbee gbii’ ni agba he sane afɔ shi yɛ Biblia lɛ mli yɛ 2 Timoteo 3:1-5 lɛ amli wɔyɔɔ lɛ.” Beni okane emli saji otii lɛ sɛɛ lɛ, obaanyɛ obi lɛ akɛ ani ena gbɔmɛi ni tamɔ bɔ ni atsɔɔ mli pɛpɛɛpɛ aha nɛɛ ekomɛi lo. Okɛ yitsei bibii ni yɔɔ Reasoning wolo lɛ baafai 234-8 lɛ ekome atsa sanegbaa lɛ nɔ.
7 Kɛ wɔsaa wɔhe jogbaŋŋ ni wɔjie lɛ kpo akɛ wɔmiisumɔ ni wɔye wɔbua diɛŋtsɛ lɛ, wɔbaanyɛ wɔna hekɛnɔfɔɔ akɛ mɛi ni yɔɔ tsuijurɔ lɛ baabo toi.—Yoh. 10:27, 28.