Kpokpaa nɔ Kpee He Gbɛjianɔtoo Hee

¹ Saneyitso ni abaawie he yɛ kpokpaa nɔ kpee he gbɛjianɔtoo hee ni baaje shishi yɛ February lɛ ji “Nyɛbua, Nyɛdamɔa Shi Shiŋŋ, Nyɛhe Awaa.” Edamɔ bɔfo Paulo hewalɛwoo wiemɔi ni ekɛha klɛŋklɛŋ afii oha lɛ mli Kristofoi ni aŋma yɛ 1 Korintobii 16:13 lɛ nɔ.

² Gbɛjianɔtoo lɛ baaje shishi kɛtsɔ bɔ ni ehe hiaa ni wɔpɛi wɔmli daa yɛ mumɔŋ nibii ahe lɛ nɔmimaa nɔ. Shidaamɔ ni mli wa ni wɔɔhiɛ mli kɛha nɔ ni ja feemɔ yɛ “naagbee gbii” nɛɛ amli lɛ biɔ ni wɔpɛi wɔ kɛ Yehowa teŋ wekukpaa mli yɛ faŋŋ mli, kɛ wɔ shidaamɔ kɛ eshikpɔŋ nɔ gbɛjianɔtoo lɛ hu mlipɛimɔ. (2 Tim. 3:1) Abaakai wɔ yɛ bɔ ni Nyɔŋmɔ hiɛ sɔɔ nii ni wɔtsuɔ waa lɛ he. Ehe miihia ni atsɔɔ wɔ nii yɛ gbɛi ni wɔɔtsɔ nɔ wɔha wɔ Kristofoi asui lɛ aya hiɛ lɛ nɔ, ni wɔhiɛ wɔjeŋba ni feɔ nɔkwɛmɔ nɔ lɛ mli.

³ Abaama bɔ ni ehe hiaa ni wɔfee ekãa yɛ kaselɔi afeemɔ nitsumɔ lɛ mli, be mli ni wɔhe saa kɛhaa mumɔŋ hiɛyaa kɛ gbɛnaa nii lɛ hu lɛ nɔ mi. Akɛ ŋaawoi ni abaanyɛ akɛtsu nii baaha yɛ bɔ ni aŋkroaŋkroi kɛ wekui baanyɛ ahiɛ mumɔŋ niyeli he gbɛjianɔtoo mli daa lɛ he, yɛ wiemɔi, nɔkwɛmɔ nii, kɛ sanegbai sɔrɔtoi amli.

⁴ Kɛ Hɔɔ shɛ lɛ mɛi ni he esa kɛha baptisimɔ lɛ baanyɛ ajaje amɛ henɔjɔɔmɔ lɛ yɛ faŋŋ mli kɛtsɔ nu mli baptisimɔ nɔ. No sɛɛ lɛ, wɔ fɛɛ wɔbaasumɔ ni wɔbabua wɔhe naa Hɔgbaa koni wɔbo maŋshiɛmɔ ni hiɛ yitso akɛ “Mɛni Ji Oshidaamɔ Yɛ Nyɔŋmɔ Hiɛ?” lɛ toi.

⁵ Gbɛjianɔtoo lɛ baaba naagbee kɛ wiemɔ ni woɔ hewalɛ koni adamɔ shi shiŋŋ yɛ hemɔkɛyeli lɛ mli, ni wɔkɛ wɔteŋ mɔ fɛɛ mɔ aye yɛ suɔmɔ kɛ toiŋjɔlɛ mumɔ mli. Kpokpaa nɔ kpee lɛ ji hegbɛi krɛdɛɛi ni Yehowa kɛhaa lɛ ekome, koni wɔ fɛɛ ‘wɔhiɛ adɔ suɔmɔ kɛ nitsumɔ kpakpai ahe wɔha wɔhe.’ (Heb. 10:24, 25) Too gbɛjianɔ kpakpa koni oba nifeemɔ lɛ fɛɛ shishi yɛ gbii enyɔ lɛ mli.