Kpokpaa nɔ Kpee ni Baaye Abua Wɔ ni Wɔbaa Wekukpãa ni Kã Wɔ kɛ Yehowa Teŋ lɛ Yi
1. Mɛni ji gbɛ kome ni Yehowa tsɔɔ nɔ eyeɔ ebuaa wɔ koni wɔnyɛ wɔtsu fãmɔ ni ekɛha wɔ akɛ wɔshiɛ sanekpakpa lɛ he nii?
1 Yehowa jɛɔ suɔmɔ mli ekɛ gbɛtsɔɔmɔ, tsɔsemɔ kɛ hewalɛwoo haa wɔ koni wɔnyɛ wɔtsu fãmɔ ni ekɛha wɔ akɛ wɔshiɛ sanekpakpa lɛ he nii. (Mat. 24:14; 2 Tim. 4:17) Gbɛ kome ni etsɔɔ nɔ ekɛ nibii nɛɛ haa wɔ ji kpokpaa nɔ kpeei ni wɔfeɔ daa afi lɛ. Saneyitso ni abaasusu he yɛ afi 2010 sɔɔmɔ afi lɛ mli ji “Baamɔ Wekukpãa ní Kã Okɛ Yehowa Teŋ lɛ Yi,” ni edamɔ Romabii 8:5 kɛ Yuda 17-19 lɛ nɔ. Kpee lɛ baaje shishi kɛjɛ otsi ni ji February 8, 2010.
2. (a) Mɛɛ gbɛ̀i anɔ kpokpaa nɔ kpee lɛ he baaba sɛɛnamɔ kɛha wɔ? (b) Mɛɛ gbɛ nɔ kpokpaa nɔ kpeei ni afee kɛho lɛ eye ebua bo yɛ sɔɔmɔ nitsumɔ lɛ mli?
2 Bɔ ni Wɔbaaná He Sɛɛ: Gbɛjianɔtoo lɛ baaye abua wɔ ní wɔhiɛ ahi osharai tamɔ nibii ni baanyɛ ahé wɔ be, ní egbala wɔjwɛŋmɔ kɛjɛ nibii ni he hiaa titri lɛ anɔ lɛ nɔ. Wɔbaakase nibii ni haa anaa akɛ mɔ ko ji mumɔŋ gbɔmɔ, kɛ bɔ ni wɔɔfee wɔte shi wɔshi efɔŋfeemɔ gbɛ ni aŋmɛɔ. Wiemɔ ni abaaha kɛtsara nɔ Hɔgbaa lɛ baatsɔɔ nɔ ni aŋkroaŋkroi kɛ wekui baanyɛ afee kɛwaje wekukpãa ni kã amɛ kɛ Yehowa teŋ yɛ nɔnyɛɛ babaoo kɛ amɛhemɔkɛyeli lɛ he kaai ni amɛkɛkpeɔ lɛ fɛɛ sɛɛ. Gbɛjianɔtoo lɛ baaye abua wɔ ni wɔbu wɔtsui he, wɔhe awa yɛ mumɔŋ, ni wɔjwɛŋmɔ ahi jɔɔmɔi kpelei ni yɔɔ kɛha mɛi ni baa wekukpãa ni kã amɛ kɛ Yehowa teŋ lɛ yi lɛ nɔ.
3. Mɛɛ be nyɛbaaya nyɛkpokpaa nɔ kpee lɛ, ni mɛni otswa ofai shi akɛ obaafee?
3 Kɛ́ oná ole be kɛ he ni nyɛbaaya nyɛkpokpaa nɔ kpee lɛ yɛ nɔŋŋ lɛ, too gbɛjianɔ ni oya gbii enyɔ lɛ fɛɛ koni oyabo nifeemɔi lɛ fɛɛ toi. Ná nɔmimaa akɛ, Yehowa jɔɔ mɔdɛŋbɔlɔ nitsumɔi anɔ.—Abɛi 21:5.
4. Mɛni wɔyɔɔ nɔmimaa akɛ wɔnine baashɛ nɔ yɛ kpokpaa nɔ kpee ni abaafee lɛ shishi?
4 Eji anɔkwale akɛ, nikeenii kpakpa nɛɛ jɛ Yehowa ŋɔɔ. Gbɛjianɔ ni tsulɔ anɔkwafo kuu lɛ eto lɛ ji nɔ pɛ ni he hiaa wɔ koni wɔnyɛ wɔya nɔ wɔtsu wɔsɔɔmɔ nitsumɔ lɛ. Wɔmiida Yehowa shi akɛ ekɛ nibii ni baaye abua wɔ ni wɔya nɔ ‘wɔmɔ wɔhiɛnɔkamɔ jajemɔ lɛ mli ni awa ni ekagbugbã’ lɛ eha wɔ.—Heb. 10:23-25; Yak. 1:17.