Gbɛjianɔtoo Kɛha Kristofoi Shiɛlɔi
1. Mɛɛ gbɛjianɔtoo hee aje shishi yɛ 1938 mli, ni mɛni hewɔ ato gbɛjianɔ nɛɛ?
1 Yɛ afi 1938 mli lɛ, Yehowa asafo lɛ je gbɛjianɔtoo hee ko shishi. Afɔ̃ asafoi komɛi anine ni amɛya zone assemblies, ni amrɔ nɛɛ wɔtsɛɔ lɛ akɛ kpokpaa nɔ kpeei lɛ ashishi. Mɛni hewɔ ato gbɛjianɔ nɛɛ? January 1939 Informant (ni amrɔ nɛɛ wɔtsɛɔ lɛ Wɔ Maŋtsɛyeli Sɔɔmɔ) lɛ ha hetoo akɛ: “Kpeei nɛɛ fata Teokrase Gbɛjianɔtoi ni Yehowa kɛtsuɔ e-Maŋtsɛyeli lɛ shiɛmɔ lɛ he nii lɛ ahe. Gbɛtsɔɔmɔi ni akɛhaa yɛ jɛmɛ lɛ yeɔ ebuaa wɔteŋ mɔ fɛɛ mɔ ni enyɛ etsu nitsumɔ ni akɛwo wɔdɛŋ lɛ jogbaŋŋ.” Kɛ́ wɔkwɛ bɔ ni Maŋtsɛyeli shiɛlɔi lɛ ayi efa babaoo kɛjɛ 58,000 pɛ yɛ afi 1938 mli kɛteke mɛi 7,000,000 yɛ afi 2009 mli lɛ, eyɛ faŋŋ akɛ kpokpaa nɔ kpeei lɛ miitsu yiŋtoo hewɔ ni ato he gbɛjianɔ lɛ he nii koni eye ebua shiɛlɔi ni amɛtsu nitsumɔ ni ‘akɛwo amɛdɛŋ lɛ’ jogbaŋŋ!
2. Mɛɛ wiemɔi abaaha yɛ kpokpaa nɔ kpee ni wɔbaafee yɛ sɔɔmɔ afi hee lɛ mli lɛ shishi?
2 Saneyitso Kɛha Afi ni Baa Lɛ: Wɔmiikpa kpokpaa nɔ kpeei ni abaafee yɛ sɔɔmɔ afi hee lɛ mli lɛ kɛ hewalɛ ni ebaawo wɔ lɛ gbɛ waa. Ajie kpeei lɛ saneyitso ni ji “Nyɛjɛɛɛ Je Lɛŋ” lɛ kɛjɛ Yohane 15:19. Mɛni ji wiemɔi komɛi ni ekã shi faŋŋ akɛ Kristofoi shiɛlɔi baaná he sɛɛ jogbaŋŋ? Hɔɔ lɛ, abaaha wiemɔ ni yitso ji “Be Fɛɛ Sɔɔmɔ lɛ Buɔ Wɔhe—Yɛ Mɛɛ Gbɛ Nɔ?” Agbɛnɛ hu, wɔbaabo wiemɔ ni abaaha kɛtsara nɔ ni hiɛ fãi etɛ ni yitso ji “Kaaha . . .” “Kooloo lɛ Miibule Bo,” “Ajwamaŋ Kpeteŋkpele lɛ Miibule Bo,” kɛ “Jarayelɔi lɛ Miibule Bo” lɛ toi. Hɔgbaa lɛ, wɔbaabo wiemɔ ni abaaha kɛtsara nɔ ni yitso ji “Suɔmɔ Yehowa, shi Jeee Je Lɛ” toi. Wiemɔi krokomɛi ni abaaha lɛ ekomɛi ji “Nyɛyaa nɔ Nyɛhia Shi ‘akɛ Gbɔi kɛ Mɛikpɔji’” kɛ “Nyɛtsui Anyɔa Nyɛmli! Nyɛbaanyɛ Nyɛye Je lɛ nɔ Kunim.”
3. Kɛ́ wɔtee kpokpaa nɔ kpee lɛ, mɛɛ sɛɛ wɔbaanyɛ wɔná?
3 Beni nyɛmi yoo ko ni kɛ ehe wooo sɔɔmɔ nitsumɔ lɛ mli jogbaŋŋ lɛ tee kpokpaa nɔ kpee ko ni afee nyɛsɛɛ nɛɛ lɛ sɛɛ lɛ, eŋma akɛ kpeei lɛ ye ebua lɛ ni esaa epɛi eshihilɛ mli ekwɛ ni etswa efai shi akɛ, ‘ekɛ ehe baawo sɔɔmɔ nitsumɔ lɛ mli vii ni ekɛ nibii komɛi ejieŋ enaa dɔŋŋ!’ Ŋwanejee ko bɛ he akɛ kpokpaa nɔ kpee ni abaafee yɛ sɔɔmɔ afi hee lɛ mli lɛ baaye abua wɔ fɛɛ ni wɔsumɔ Yehowa, shi jeee je lɛ. (1 Yoh. 2:15-17) Bɔɔ mɔdɛŋ ni oya eko ni obo toi jogbaŋŋ ni oná gbɛjianɔ ni ajɛ suɔmɔ mli ato kɛha Kristofoi shiɛlɔi lɛ he sɛɛ jogbaŋŋ kɛmɔ shi!