Miishɛɛ ni Wɔɔha Eya Hiɛ yɛ Sɛɛsaramɔi Amli
1 Akɛ sɔɔmɔ nitsumɔ lɛ toɔ okwaayeli he yɛ gbɛ ni ja nɔ, ni akɛ sɛɛsaramɔi toɔ nibii lɛ akwramɔ kɛ amɛnɔ nu shwiemɔ hu he. (Mat. 13:23; Luka 10:2; 2 Kor. 9:10) Akɛ “Nyɔŋmɔ hefatalɔi nitsulɔi” lɛ, gbɛnaa nii ka wɔnɔ akɛ wɔye wɔbua wu hee fɛɛ wu hee ni ekwɛ̃ ni eda kɛshɛ salɛ mli ni ewo yibii hu. (1 Kor. 3:6, 9) Mɛɛ gbɛ ni hi fe fɛɛ wɔɔtsɔ nɔ wɔtsu enɛ?
2 Okɛ be nɔ yeli atsu nii ni oya sɛɛsaramɔ yɛ mɛi fɛɛ ni na he miishɛɛ lɛ aŋɔɔ. Saamɔ okwɛ oshia-kɛ-shia kadimɔ wolo lɛ nɔ, ni okpɛ oyiŋ yɛ mɔ ni sa akɛ oyasara kɛ nɔ ni okɛ lɛ baawie he lɛ he. Bei pii lɛ, nɔ ni nyɛgba he sane beni otee eŋɔɔ klɛŋklɛŋ lɛ ji nɔ ni baatsɔɔ saneyitso ni nyɛbaagba he sane. Feemɔ tswaa, ni oha Ŋmalɛ mli susumɔi komɛi ni baanyɛ abaje mli lɛ ahi ojwɛŋmɔ mli. Ehi jogbaŋŋ be fɛɛ be akɛ akɛ Biblia lɛ aaatsu nii, ni ayoo hewalɛ ni eyɔɔ ni ekɛshɛɔ tsui lɛ he tɔ̃ɔ lɛ.—Heb. 4:12.
3 Kɛji oshi “Ani Nyɔŋmɔ Susuɔ Wɔhe Lɛlɛŋ?” wolo bibioo lɛ eko oha lɛ lɛ, no lɛ ekolɛ obaanyɛ owie kɛje shishi akɛ:
◼ “Gbɔmɛi anɔkwafoi pii heɔ amɛyeɔ akɛ Nyɔŋmɔ baakpata shikpɔŋ lɛ hiɛ, yɛ be mli ni mɛi krokomɛi hu sheɔ gbeyei akɛ adesa diɛŋtsɛ baafee nakai. Mɛni bo hu osusuɔ? [Ŋmɛɛ gbɛ ni ejie naa.] Biblia lɛ kɛɔ wɔ akɛ yɛ nɔ najiaŋ ni eeekpata shikpɔŋ lɛ hiɛ lɛ, Nyɔŋmɔ baajie efɔŋ feemɔ fɛɛ kɛjɛ nɔ ni ekɛtsuu he, koni eha etsɔ he ni toiŋjɔlɛ kɛ shweshweewshe shihilɛ yɔɔ.” Gbalamɔ ejwɛŋmɔ kɛya baafa 22, ni okane Abɛi 2:21, 22, ni atsɛ yisɛɛ yɛ jɛmɛ lɛ. Tsɔɔmɔ lɛ shia Biblia kasemɔ he gbɛjianɔtoo lɛ mli jogbaŋŋ, aloo okɛ woji tɛtrɛbii heei ni eba lɛ aha lɛ, ni okɛ lɛ ato gbɛjianɔ akɛ obaaku osɛɛ oba eŋɔɔ ni okɛ lɛ abasusu Nyɔŋmɔ shiwoo ni kɔɔ jeŋ hee lɛ he lɛ he babaoo.
4 Kɛ okɛ “Naa! Miifee Nii Fɛɛ Ehee” wolo bibioo lɛ ha lɛ, obaanyɛ okɛɛ akɛ:
◼ “Nyɛsɛɛ ni mibasara bo lɛ, wɔkane Nyɔŋmɔ shiwoo ni ekɛha akɛ ebaafee shikpɔŋ lɛ paradeiso, tamɔ nɔ ni afee he mfoniri yɛ wolo bibioo ni mishi miha bo lɛ sɛɛ lɛ he saji kɛjɛ Biblia lɛ mli. Wɔbaanyɛ wɔna jɔɔmɔ nɛɛ mli gbɛfaŋnɔ kɛtsɔ Nyɔŋmɔ suɔmɔnaa nii kɛ bɔ ni esaa wɔhe ehaa lɛ he nii babaoo ni wɔɔkase lɛ nɔ.” Kanemɔ Yohane 17:3, koni no sɛɛ lɛ ogbele kɛya kukuji 52 kɛ 53 yɛ baafa 27. Okɛ lɛ asusu nɔ hewɔ ni ehe hiaa ni ana Nyɔŋmɔ Wiemɔ lɛ he nilee ni ja jogbaŋŋ lɛ he kuku.
5 Kɛ otee oyaasara mɔ ko ni oha lɛ “Yiŋtoo ni Yɔɔ Shihilɛ Sɛɛ” wolo bibioo lɛ eko, ni mɔ lɛ sumɔɔ Nyɔŋmɔ jamɔ lɛ, no lɛ ekolɛ eeehi akɛ oookɛɛ lɛ akɛ:
◼ “Ekolɛ otĩ Nuŋtsɔ lɛ Sɔlemɔ lɛ mli okɛɛ aahu shii abɔ. Kɛ obi ni Nyɔŋmɔ Maŋtsɛyeli lɛ aba lɛ, mɛɛ susumɔ baa ojwɛŋmɔ mli?” Kɛ shiatsɛ lɛ jie naa lɛ, gbalamɔ ejwɛŋmɔ kɛya kukuji 8 kɛ 9 lɛ yɛ baafa 26, koni no sɛɛ lɛ okane Daniel 2:44. Ekolɛ obaanyɛ otsa sanegbaa lɛ nɔ, ni ogbala mli otsɔɔ lɛ akɛ Nyɔŋmɔ Maŋtsɛyeli lɛ baa baatsɔɔ efɔŋ feemɔ kɛ amanehulu fɛɛ naagbee. Maa nɔ mi oha lɛ akɛ kɛ jalɔi ji wɔ yɛ Nyɔŋmɔ hiɛ lɛ, no lɛ wɔbaanyɛ wɔna naanɔ wala mli ŋɔɔmɔ yɛ Paradeiso yɛ shikpɔŋ nɛɛ nɔ.
6 Kaimɔ akɛ wɔbaanyɛ wɔya sɛɛsaramɔ yɛ mɔ fɛɛ mɔ ni na he miishɛɛ akɛ eeebo wɔ toi lɛ ŋɔɔ, ekɔɔɔ he eko akɛ ehe wolo loo eheee. Bɔɔ mɔdɛŋ ni oto be ko daa otsi kɛha sɛɛsaramɔi afeemɔ. Yehowa baajɔɔ omɔdɛŋbɔɔ kɛ hiɛmiamɔ akɛ oooha miishɛɛ ni mɛi naa lɛ aya hiɛ lɛ nɔ. Eba akɛ eeewo yibii kɛjie eyi.—Yoh. 15:8.