Feemɔ Sɛɛsaramɔi yɛ Woji Bibii ni Okɛha lɛ Fɛɛ Nɔ
1 Bɔfo Paulo jie Filipibii lɛ ayi ejaakɛ ‘amɛtsĩɛ bɔ ni amɛjwɛŋɔ ehe amɛhaa lɛ hiɛ.’ (Fil. 4:10) Kɛ wɔkɛ amɛ nɔkwɛmɔ nɔ lɛ tsu nii akɛ okadi kɛha shiɛmɔ nitsumɔ lɛ, ‘wɔbaatsĩɛ bɔ ni wɔjwɛŋɔ’ mɛi ni wɔyeɔ amɛ odase lɛ ‘ahe lɛ hiɛ’ ni ebaatsirɛ wɔ ni wɔfee sɛɛsaramɔi.
2 Kɛ okɛ “Nɔyeli ni kɛ Paradeiso Baaba” wolo bibioo lɛ eko ha lɛ, obaanyɛ okɛɛ nɔ ko tamɔ nɛkɛ:
◼ “Miisusu sanegbaa ni wɔna nyɛsɛɛ lɛ he, ni ŋmalɛi enyɔ komɛi ba mijwɛŋmɔ mli ni masumɔ ni mikɛ bo asusu he. Ekolɛ obaakai akɛ wɔwie bɔ ni Nyɔŋmɔ baahe shikpɔŋ lɛ nɔyeli lɛ he. Yehowa Nyɔŋmɔ ewo shi yɛ Biblia lɛ mli akɛ enɛ baaba mli. [Kanemɔ Daniel 2:44.] Ani oheɔ oyeɔ akɛ enɛ baanyɛ aba mli lɛlɛŋ? [Ŋmɛɛ gbɛ ni ejie naa.] Bo nɔ ni Nyɔŋmɔ kɛɔ yɛ bɔ ni enyɛɔ ehaa eshiwoi baa mli ehaa lɛ he lɛ toi. [Kanemɔ Yesaia 55:11.] Ani esaaa akɛ enɛ awo wɔ hewalɛ ni wɔkɛ wɔhiɛ afɔ̃ Nyɔŋmɔ Maŋtsɛyeli lɛ nɔ? Shi mɛɛ be Nyɔŋmɔ baaha eshiwoi lɛ aba mli?” Ha ele akɛ obaaha nakai sanebimɔ lɛ hetoo kɛ oba eŋɔɔ be kroko.
3 Obaanyɛ okɛ nɛkɛ gbɛ nɛɛ atsu nii kɛ oofee sɛɛsaramɔ yɛ mɔ ko ni he “Beni Mɔ Ko ni Osumɔɔ lɛ Egbo” wolo bibioo lɛ eko lɛ ŋɔɔ:
◼ “Mibɔ mɔdɛŋ waa akɛ maku misɛɛ maba ekoŋŋ, yɛ wɔ sanegbaa ni kɔɔ wɔsuɔlɔ ko gbele he lɛ hewɔ.” Okɛ mfoniri ni yɔɔ baafa 30 lɛ atsɔɔ lɛ ni okɛɛ akɛ: “Ani okaiɔ nɛkɛ miishɛɛ shihilɛ ni ji gbɔmɛi ni ateeɔ amɛ shi ni amɛkɛ amɛsuɔlɔi feɔ ekome ekoŋŋ nɛɛ? Mikɛ sanebimɔ ko shi bo ni kɔɔ he ni enɛ baaba mli yɛ lɛ he, yɛ ŋwɛi loo yɛ shikpɔŋ nɛɛ nɔ. Ekolɛ ona Biblia lɛ hetoo ni yɔɔ wolo bibioo nɛɛ baafa 26 lɛ.” Nyɛsusua otii ni yɔɔ kukuji etɛ kɛyashi enumɔ lɛ mli lɛ ahe, ni okane Yohane 5:21, 28, 29. Kɛ be yɛ lɛ, nyɛkanea ŋmalɛi ni eshwɛ yɛ nakai baafa lɛ ekomɛi.
4 Ani oje nikasemɔ shishi yɛ “Naa! Miifee Nii Fɛɛ Ehee” wolo lɛ mli? Kɛ otee sɛɛsaramɔ lɛ, obaanyɛ ofee enɛ:
◼ Gbelemɔ baafa 30 lɛ ekoŋŋ, ni otsɔɔ lɛ sanebimɔi ni ji: “Biblia lɛ ji wolo ni ekaaa yɛ mɛɛ gbɛi anɔ?” Gbelemɔ baafa 3 kɛ 4, ni nyɛsusu kukuji 1-4, kɛ agbɛnɛ mfoniri ni yɔɔ wolo lɛ hiɛ lɛ hu he. Kanemɔ ŋmalɛi ni atsɛ yɛ kuku 4 lɛ he shishigbɛ niŋmaa lɛ mli lɛ ekome loo enyɔ. Tsɔɔmɔ lɛ akɛ Biblia lɛ pɛ ji wolo ni haa hiɛnɔkamɔ ni yɔɔ nyam tamɔ nɛkɛ. Too gbɛjianɔ kɛha saramɔ kroko. Yɛ saramɔ ni ji etɛ lɛ sɛɛ lɛ, kɛ etamɔ nɔ ni nikasemɔ lɛ baatsa nɔ lɛ, obaanyɛ obɔi nikasemɔ hee he akɔntaabuu!
5 Obaanyɛ oje sanegbaa shishi yɛ “The Divine Name That Will Endure Forever” lɛ mli yɛ nɛkɛ gbɛ nɔ:
◼ “Nyɛsɛɛ lɛ, minyɛ mitsɔɔ bo Nyɔŋmɔ gbɛi yɛ Biblia lɛ mli. Gbɛi Yehowa lɛ ni wɔɔle ni wɔkɛtsu nii lɛ ji wɔjamɔ lɛ fã ni he hiaa.” Gbelemɔ baafa 31, ni nyɛtĩ otii ni yɔɔ naagbee kukuji ejwɛ lɛ mli lɛ amli, ni okane Yohane 17:3 kɛ Mika 4:5. Tsɔɔmɔ lɛ akɛ wɔyɛ Biblia kasemɔ gbɛjianɔtoo ni baanyɛ atsɔɔ lɛ bɔ ni abaatse Nyɔŋmɔ gbɛi lɛ he yɛ gbɛ kpakpa nɔ, kɛ bɔ ni wɔbaanyɛ wɔna paradeiso shikpɔŋ nɔ jɔɔmɔi amli ŋɔɔmɔ wɔha.
6 No hewɔ lɛ, tsĩɛmɔ bɔ ni osusuɔ mɛi ni okɛkpe lɛ ahe ohaa lɛ hiɛ. Kã he oya amɛ ŋɔɔ daa, ni osaa nɔ ko ni he yɔɔ sɛɛnamɔ ni okɛ amɛ agba he sane. Obaanyɛ ofee mɔ ni “woɔ yibii” yɛ kaselɔi heei afeemɔ mli.—Mat. 13:23.