Ani Obaanyɛ Okɛ Ohe Aha Koni Oyasɔmɔ yɛ Kooyigbɛ?

Yɛ bei ni eho lɛ amli lɛ, nyɛmimɛi pii kɛ miishɛɛ here ninefɔɔ ákɛ akɛ be kuku ayafee gbɛgbalɔi krɛdɛɛi yɛ Kooyigbɛ lɛ nɔ. Ni kɛlɛ, wiemɔ kui ateŋ béi ni tee nɔ yɛ jɛmɛ lɛ haaa shiɛmɔ nitsumɔ lɛ aya nɔ jogbaŋŋ. Akɛni etamɔ nɔ ni shihilɛ lɛ eba shi saŋŋ ni shihilɛ lɛ miiya nɔ jogbaŋŋ bianɛ hewɔ lɛ, ehe ebahia ni atee be kuku gbɛgbamɔ krɛdɛɛ nitsumɔ lɛ shi ekoŋŋ.

Te mɛi komɛi ena mli gbɛfaŋnɔ amɛha tɛŋŋ yɛ bei ni eho lɛ amli? Nyɛmimɛi komɛi kɛ amɛ hejɔɔmɔ be tsu nii yɛ maŋ ni amɛ diɛŋtsɛ amɛhalaa (loo nɔ ni Asafo lɛ hala kɛhaa amɛ lɛ mli). Mɛi ni hiɛ amɛ diɛŋtsɛ amɛ nitsumɔ lɛ kɛ nyɔji enyɔ, etɛ, loo nɔ ni fe nakai yatsu nii yɛ jɛmɛ. Nyɛmimɛi fioo komɛi (ni gbalashihilɛ mli hefatalɔi ni bɛ bii babaoo fata he lɛ) po to gbɛjianɔ koni amɛfã amɛyahi jɛmɛ ni amɛyaye amɛbua asafoi komɛi yɛ be mli ni amɛtsuɔ heloonaa nitsumɔ lolo. Amaniɛbɔi ni nine shɛ nɔ yɛ be ni eho lɛ mli lɛ tsɔɔ miishɛɛ ni amɛyɔɔ kɛ Yehowa ni amɛdaa lɛ shi yɛ hegbɛ ni amɛna akɛ amɛkɛ amɛhe aaawo teokrase nitsumɔ ni yɔɔ miishɛɛ nɛɛ mli lɛ. Bo hu obaanyɛ ona miishɛɛ ni tamɔ nakai nɔŋŋ!

Eyɛ mli ákɛ akɛ nɔmimaa miiwie Kooyigbɛ lɛ he moŋ, shi hiamɔ lɛ eba yɛ hei krokomɛi hu yɛ Shwilao, Brong Ahafo, kɛ Anaigbɛ Kpokpai lɛ anɔ. Yɛ nɔ ni kɔɔ gbɛ ni aaatsɔ nɔ akɛŋma ehe gbɛbimɔ wolo lɛ he lɛ, ofainɛ ni okwɛ gbɛtsɔɔmɔi ni akɛha yɛ May 1992 Wɔ Maŋtsɛyeli Sɔɔmɔ lɛ baafa 1 lɛ mli. Nɔ kome ni he hiaa waa ni ataoɔ ji bɔ ni ehe hiaa akɛ okɛ ogbɛbimɔ wolo lɛ aaamaje kɛtsɔ nyɛ onukpai lɛ anɔ koni eshɛ nitsumɔ he nine lɛ dɛŋ, kɛ hoo kwraa lɛ nyɔji etɛ kɛtsɔ hiɛ. Mɛni tsiɔ onaa yɛ Yehowa mlihilɛ lɛ ni okɛaasa onaa okwɛ lɛ he, kɛtsɔ ohe ni okɛaaha koni oyasɔmɔ yɛ he ni hiamɔ lɛ da yɛ lɛ?—Lala 27:13; 1 Kor. 15:58.