Maŋtsɛyeli Jajelɔi Bɔ Amaniɛ
Shikpɔŋ ni Etse Ehe Banee yɛ Paraguay lɛ Mli Nitsumɔ Wo Yibii
BUU MƆƆ Asafo lɛ nitsumɔ he nine ni yɔɔ Paraguay lɛ le bɔ ni ehe hiaa akɛ ashiɛ Maŋtsɛyeli lɛ he sanekpakpa lɛ yɛ eshikpɔŋkuku lɛ mli fɛɛ lɛ jogbaŋŋ diɛŋtsɛ. (Bɔfoi lɛ Asaji 1:8) Amrɔ nɛɛ ji be ni esa akɛ mɔ fɛɛ mɔ ale Maŋtsɛyeli lɛ he sane ni esɔmɔ Yehowa dani ekɛ nibii agbɛjianɔtoo fɔŋ nɛɛ aba naagbee yɛ “amanehulu kpeteŋkpele” ni baa lɛ mli. (Mateo 24:21, 22) Niiashikpamɔi ni nyiɛ sɛɛ lɛ baatsɔɔ nɔ ni afeɔ koni akɛye abua gbɔmɛi ni yɔɔ kpokpai banee ni akɛwoko mɔ ko dɛŋ lɛ anɔ lɛ. Nitsumɔ he nine lɛ bɔ amaniɛ akɛ:
Ato gbɛjianɔ koni atsɔ be kukuoo mli gbɛgbalɔi krɛdɛɛi anɔ akɛtsu shikpɔŋkukuji ni akɛwoko mɛi adɛŋ lɛ fɛɛ amli nii. Kɛjɛ November aahu kɛyashi January nyɔŋ lɛ mli yɛ 1990 sɔɔmɔ afi lɛ mli lɛ, nyɛmimɛi hii kɛ yei 39 tsu nii yɛ maŋtiasei kɛ maji bibii oha ni kɛbashi nakai beaŋ lɛ Maŋtsɛyeli shiɛlɔi bɛ jɛmɛ lɛ amli. Amɛnyɛ amɛkɛ woji wuji 6,119, woji bibii 4,262, kɛ woji tɛtrɛbii 5,144 ha. Yɛ nitsumɔ ni amɛnyɛ amɛtsu nɛɛ hewɔ lɛ, aato shiɛlɔi akui heei ashishi bianɛ.
◻ Nyɛmiyoo ko ni ji gbɛgbalɔ ni miitsu nii yɛ kpokpaa banee ko nɔ shi Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ekome eha yoo ko. Gbɛgbalɔ lɛ kɛɛ lɛ akɛ ekɛ lɛ baafee Biblia mli nikasemɔ, ni ekɛ miishɛɛ kpɛlɛ nɔ. Beni gbɛgbalɔ lɛ ku esɛɛ lɛ, jeee yoo lɛ pɛ mɛɔ lɛ, shi moŋ ewu kɛ amɛbii nyɔŋma lɛ hu fɛɛ. Enɔ be kroko ni etee jɛmɛ ekoŋŋ lɛ, weku muu lɛ fɛɛ kɛ amɛnanemɛi kɛ akutsoŋbii lɛ fɛɛ efee klalo kɛha Biblia mli nikasemɔ lɛ! Yoo lɛ fɔ amɛ nine, ni ekɛɛ amɛ akɛ nikasemɔ lɛ hi jogbaŋŋ diɛŋtsɛ, ni akɛ hiɛnɔkamɔ kɛ jɔɔmɔi ni Yehowa kɛhaa lɛ yɛ naakpɛɛ. Enɛ ji nɔ ko ni mɔ ko ekɛko lɛ nakai da, no hewɔ lɛ enu he akɛ esa akɛ ekutsoŋbii kɛ enanemɛi lɛ hu anu nɛkɛ sanekpakpa nɛɛ.
Be fɛɛ be ni gbɛgbalɔ lɛ feɔ nikasemɔ lɛ, mɛi babaoo diɛŋtsɛ baa aahu akɛ ehaa efeɔ tamɔ asafo bibioo. Gbɔmɛi ni yɔɔ wiemɔ lɛ he miishɛɛ nɛɛ biɔ saji babaoo ni amɛkɛ amɛhe woɔ nikasemɔ lɛ mli. Beni gbɛgbalɔ lɛ gbala mli etsɔɔ amɛ akɛ, akɛni etsu shikpɔŋkuku lɛ mli nii egbe naa hewɔ lɛ, ekɛ ehefatalɔi lɛ baashi jɛmɛ kɛya he kroko lɛ, obalayoo lɛ kɛ dɔlɛ bi lɛ gbɛjianɔ ni amɛbaato amɛha amɛ, mɛi ni yɔɔ wiemɔi lɛ he miishɛɛ Iɛ. Akɛ nyɛmimɛi ni yɔɔ asafo ni bɛŋkɛ amɛ lɛ mli lɛ to gbɛjianɔ koni amɛkɛ amɛ atsa nikasemɔ lɛ nɔ. Amrɔ nɛɛ aha gbɛgbalɔi krɛdɛɛ etee jɛmɛ koni amɛyaye amɛbua mɛi ni tamɔ gwantɛŋi, ni yɔɔ wiemɔ lɛ he miishɛɛ nɛɛ.
◻ Beni nyɛmiyoo gbɛgbalɔ ko hu yaa shia kɛ shia yɛ kpokpaa banee ni akɛwoko mɔ ko dɛŋ lɛ mli lɛ, eyanina nuu ko ni afii nyɔŋma nɛ ni ehe Anɔkwale ni kɛ Mɔ Yaa Naanɔ Wala Mli Lɛ wolo lɛ eko. Kɛjɛ nakai beaŋ kɛbaa nɛɛ fɛɛ, ekɛ Yehowa Odasefoi ekpeko kwraa dɔŋŋ. Shi, ele akɛ Yehowa, mɔ ni etsɛɔ lɛ Yehowa Zebaot lɛ, pɛ ji anɔkwa Nyɔŋmɔ kome lɛ, ni Lɛ ekome pɛ esa akɛ aja. No hewɔ lɛ, lɛ diɛŋtsɛ ejɛɔ ehenumɔ mli, ni ewieɔ Yehowa he etsɔɔ mɔ fɛɛ mɔ ni ele lɛ. Yɛ anɔkwale mli lɛ, enyiɛɔ shitoi enyɔ daa otsi ni eyasaraa gbalashihilɛ mli hefatalɔi enyɔ ni yɔɔ wiemɔ lɛ he miishɛɛ, ni ekɛ amɛ gbaa Nyɔŋmɔ he sane, ejaakɛ, taakɛ lɛ diɛŋtsɛ ewie lɛ, ‘Kɛji mikpa amɛ saramɔ lɛ, amɛhiɛ baakpa Yehowa nɔ.’ Kɛfata nɛkɛ gbalashihilɛ mli hefatalɔi nɛɛ ahe lɛ, mɛi krokomɛi aaashɛ nyɔŋma hu yɛ ni miitao ni akɛ amɛ afee Biblia mli nikasemɔ—ni enɛ fɛɛ jɛ shiɛmɔ ni nuu ni yɔɔ wiemɔ lɛ he miishɛɛ nɛɛ shiɛ etsɔɔ amɛ Iɛ.
Nɔ ni sa kadimɔ ji, gbii fioo ni tsɔ hiɛ dani gbɛgbalɔ lɛ ba eŋɔɔ lɛ, nɛkɛ nuu nɛɛ nɔŋŋ eŋmɛɛɛ gbɛ, ni maŋ lɛ mli osɔfo ko kɛ emɛi babaoo ni fata ehe lɛ abote eshia lɛ kɛ obalayoo foro amaga ni amɛhiɛ lɛ, ni egbala mli etsɔɔ amɛ akɛ eheee amagai eyeee. Osɔfo lɛ mli fu waa. Nakai gbɛkɛ lɛ, nuu lɛ sɔle eha Yehowa kɛha yelikɛbuamɔ. No hewɔ lɛ feemɔ bɔ ni ebaana miishɛɛ kɛ nyamɔ beni gbɛgbalɔ lɛ ba eŋɔɔ lɛ he mfoniri okwɛ! Amɛto gbɛjianɔ amrɔ nɔŋŋ kɛha Biblia mli nikasemɔ ni baaya nɔ daa, ni nuu lɛ miiya hiɛ waa yɛ teokrase gbɛjianɔtoo ni ekɛbɔɔ lɛ mli.
Lɛlɛŋ, Yehowa miijɔɔ naabuamɔ nitsumɔ lɛ nɔ waa yɛ Paraguay yɛ be mli ni nyɛmimɛi lɛ bɔɔ mɔdɛŋ ni amɛye odase ni emɔ shi yɛ nɛkɛ kpokpai ni yɔɔ banee nɛɛ anɔ lɛ.—Mateo 24:14.