Ní Aaafee Shia Biblia Mli Nikasemɔi ni Yaa Hiɛ
1 Mɛni ji nɔ̃ kome ni helatsɛmɛi akwɛlɔ ko ni yɔɔ Tanzania, obalayoo fioo ko ni yɔɔ Argentina, kɛ yoofɔyoo ko ni yɔɔ Latvia lɛ jie lɛ kpo? Abɔɔ amaniɛ yɛ 1997 Yearbook (bf. 8, 46, kɛ 56) lɛ mli akɛ, yɛ suɔmɔ mli ni amɛjɛ akɛ amɛkɛ mɛi aaakase Nilee wolo lɛ fe shikome otsi fɛɛ otsi hewɔ lɛ, mɛi etɛ lɛ fɛɛ tee amɛhiɛ oyayaayai yɛ amɛ shia Biblia mli nikasemɔi lɛ amli. Ájie yi akɛ, be fɛɛ be ni aaahi lɛ, esa akɛ shiɛlɔi abɔ mɔdɛŋ ni amɛkɛ mɔ lɛ akase wolo lɛ mli yitso kome yɛ nikasemɔ lɛ eko fɛɛ eko mli. Shi kɛlɛ, mɛi komɛi naa akɛ ewa akɛ aaafee nakai. Eyɛ mli akɛ titri baadamɔ shihilɛi kɛ nyɛmɔ ni nikaselɔ fɛɛ nikaselɔ yɔɔ ni ekɛaakase nii lɛ anɔ moŋ, shi tsɔɔlɔi ni he esa lɛ eye omanye kɛtsɔ ŋaawoi ni nyiɛ sɛɛ nɛɛ ni amɛkɛtsuɔ nii lɛ nɔ.
2 Taakɛ atsɔɔ mli yɛ nɔ ni aŋma ahɔ July 1996 Wɔ Maŋtsɛyeli Sɔɔmɔ lɛ mli lɛ, ehe hiaa ni otsɔse onikaselɔi lɛ ni amɛsaa amɛhe kɛha nikasemɔ lɛ. Yɛ shishijee mli nɔŋŋ lɛ, ebaahi akɛ oootsɔɔ lɛ mli, ni ofee bɔ ni afeɔ lɛ ahaa lɛ he nɔkwɛmɔ nɔ otsɔɔ. Okɛ Nilee wolo ni oyɔɔ ni okaseɔ lɛ atsɔɔ amɛ. Okɛ amɛ afee ekome kɛsaa nyɛhe kɛha klɛŋklɛŋ nikasemɔ lɛ. Ye obua nikaselɔi lɛ ni amɛna wiemɔi otii loo wiemɔi kukuji ni haa sanebimɔ ni yɔɔ wolo lɛ mli lɛ hetoo tɛ̃ɛ lɛ, koni agbɛnɛ, amɛfolɔ shishi loo amɛdiki mli. Shiɛlɔi komɛi po eha amɛ nikaselɔi lɛ kadimɔ nii loo nii amli dikimɔ nɔ̃, koni amɛkɛtsu nii. Wo amɛ hewalɛ ni amɛkane ŋmalɛi lɛ fɛɛ yɛ be mli ni amɛsaa amɛhe kɛhaa nikasemɔ lɛ. Kɛtsɔ enɛ feemɔ nɔ lɛ, ootsɔɔ amɛ hu ni amɛsaa amɛhe kɛha Asafo Woloŋ Nikasemɔ kɛ Buu-Mɔɔ Nikasemɔ lɛ.—Luka 6:40.
3 Tsɔɔlɔ kpakpa baaha nikaselɔ lɛ awie bɔ ni esumɔɔ, ní lɛ diɛŋtsɛ ewieŋ pii tsɔ̃. Ekwɛɔ koni saji otii bibii akaha ewie nɔ kroko ni kɔɔɔ sane lɛ he. Yɛ bei babaoo mli lɛ, ekɛ saji ni bɛ wolo lɛ mli lɛ wooo nikasemɔ lɛ mli. Yɛ no najiaŋ lɛ, emaa nikasemɔ lɛ mli saji otii lɛ anɔ mi. Mɛi komɛi eha nikaselɔi lɛ woji krokomɛi, koni eye ebua amɛ ni amɛná sanebimɔi lɛ ahetooi lɛ. Kɛfata he lɛ, mɛi ni yɔɔ wiemɔ lɛ he miishɛɛ lɛ anine baashɛ saji babaoo nɔ, kɛtsɔ asafoŋ kpeei ni amɛaaya lɛ nɔ.
4 Ekolɛ, ehe ebahiaŋ ni akane ŋmalɛi ni aŋmalako emli wiemɔi yɛ nikasemɔ lɛ mli lɛ fɛɛ. Abaanyɛ atsɔɔ ŋmalɛi ni aŋmalako emli wiemɔi lɛ amli saji otii lɛ ekomɛi amli. Beni atĩɔ nɔ ni akase kɛtsɔ hiɛ lɛ mli lɛ, maa ŋmalɛi ni he hiaa ni nyɛgba he sane lɛ nɔ mi, ni owo nikaselɔ lɛ hewalɛ ni ekai enɛɛmɛi.
5 Be Sɛɛkɛlɛ Enyiɛ Esa akɛ Nikasemɔ Be lɛ Eko Fɛɛ Eko Ahe?: Ehe ebahiaŋ ni akɛ ŋmɛlɛtswaa kome afee nikasemɔ lɛ. Shiatsɛmɛi komɛi yɛ be saŋŋ, ni ekolɛ, amɛbaasumɔ ni amɛkɛ be kakadaŋŋ akase nii. Aloo ekolɛ, nikaselɔ lɛ baasumɔ ni ekase nii fe shikome yɛ otsi mli. Enɛ he baaba sɛɛnamɔ aha mɛi ni baanyɛ afee nakai.
6 Taakɛ Yesaia 60:8 fee he mfoniri lɛ, ŋmɛnɛ lɛ, Yehowa yijielɔi heei akpei ohai abɔ “filikiɔ tamɔ atatu, loo tamɔ okpoi ni baa amɛ samfɛjiaŋ” yɛ ewebii asafoi lɛ amli. Nyɛhaa wɔ fɛɛ wɔbɛŋkɛa Yehowa he kpaakpa kɛtsua wɔ gbɛfaŋnɔ yɛ be mli ni ebuaa mɛi ni hiɛ gwantɛŋ su lɛ anaa oyayaayai lɛ.—Yes. 60:22.