Fã 4—Ní Wɔɔfee Biblia Mli Nikasemɔi ni Yaa Hiɛ
Ní Aaatsɔse Nikaselɔi lɛ Koni Amɛsaa Amɛhe
1 Bei pii lɛ nikaselɔ ni kaneɔ nikasemɔ lɛ mli kɛtsɔɔ hiɛ, ni efolɔɔ hetooi lɛ ashishi, ni esusuɔ bɔ ni ebaanyɛ eha hetoo yɛ lɛ diɛŋtsɛ ewiemɔ mli lɛ he lɛ yaa ehiɛ oyayaayai yɛ mumɔŋ. No hewɔ lɛ, kɛ́ oje nikasemɔ ko ni baaya nɔ daa lɛ shishi lɛ, okɛ nikaselɔ lɛ afee ekome kɛkase nii lɛ, ni otsɔɔ lɛ bɔ ni asaa he ahaa. Yɛ nikaselɔi babaoo agbɛfaŋ lɛ, ebaafee nɔ ni yeɔ ebuaa ákɛ akɛ amɛ aaafee ekome kɛkase saneyitso loo nikasemɔ kome.
2 Hetooi Ashishi Folɔmɔ kɛ Otii Aŋmalamɔ: Tsɔɔmɔ lɛ bɔ ni afeɔ anaa hetoo ni yɔɔ tɛ̃ɛ kɛha sanebimɔi ni akala lɛ. Okɛ bo diɛŋtsɛ owolo ni okɛ nikaselɔ lɛ kaseɔ, ní ofolɔ wiemɔi otii loo wiemɔi kukuji pɛ ashishi yɛ mli lɛ atsɔɔ lɛ. Ekolɛ be ni nyɛkaseɔ nii lɛ, ebaasumɔ ni efolɔ wiemɔi pɛ ni baaha ekai hetooi lɛ ashishi, ni ekɛkase onɔkwɛmɔnɔ lɛ. (Luka 6:40) No sɛɛ lɛ, kɛɛmɔ lɛ ni eha hetoo yɛ lɛ diɛŋtsɛ ewiemɔ mli. Enɛ baaye abua bo koni ona bɔ ni enuɔ nikasemɔ lɛ shishi jogbaŋŋ ehaa.
3 Ŋmalɛi ni atsɛ yisɛɛ shi aŋmalako amɛmli wiemɔi lɛ ni aaasusu he jogbaŋŋ lɛ ji nikaselɔ lɛ hesaamɔ fã ko ni he hiaa waa. (Bɔf. 17:11) Ye obua lɛ koni ena akɛ ŋmalɛ fɛɛ ŋmalɛ ni atsɛ yisɛɛ shi aŋmalako emli wiemɔi lɛ fiɔ oti ko sɛɛ yɛ kuku lɛ mli. Tsɔɔmɔ lɛ bɔ ni aŋmalaa wiemɔi fioo komɛi ashweɔ shi yɛ baafai lɛ anaagbee gbɛ yɛ ewolo lɛ mli. Maa anɔkwa sane ni tsɔɔ akɛ nɔ ni ekaseɔ lɛ damɔ Biblia lɛ nɔ lɛ nɔ mi oha lɛ. Wo lɛ hewalɛ ni ekɛ ŋmalɛi ni atsɛ yisɛɛ shi aŋmalako amɛmli wiemɔi lɛ atsu nii yɛ esane hetoo hamɔ mli be ni nikasemɔ lɛ yaa nɔ lɛ.
4 Nikasemɔ lɛ Hiɛkpamɔ kɛ Emlitĩi: Dani nikaselɔ lɛ baaje nikasemɔ muu lɛ fɛɛ shishi lɛ, ebaafee nɔ ni yeɔ buaa akɛ eeekpá saneyitso lɛ hiɛ. Maa nɔ mi oha lɛ akɛ ebaanyɛ ekpá nikasemɔ lɛ hiɛ kɛtsɔ saneyitso lɛ, saneyitsei bibii lɛ, kɛ mfonirii lɛ amli ni eeekwɛ yɛ be kukuoo ko mli lɛ nɔ. Gbalamɔ mli otsɔɔ lɛ akɛ dani ebaamu ehesaamɔ lɛ naa lɛ, ebaafee nɔ ni nilee yɔɔ mli akɛ ekɛ be fioo ko aaatĩ nikasemɔ lɛ mli saji otii lɛ amli, ekolɛ kɛtsɔ saji amlitĩi ni yɔɔ akrabatsa lɛ mli lɛ nɔ, kɛji akɛ eko yɛ. Nikasemɔ lɛ mli ní eeetĩ yɛ nɛkɛ gbɛ nɔ lɛ baaye abua lɛ koni sane lɛ aka eyitsoŋ.
5 Nikaselɔ lɛ ni oootsɔse koni esaa ehe jogbaŋŋ kɛha nikasemɔ lɛ baaye abua lɛ koni eha sane hetoo ni shishinumɔ yɔɔ mli yɛ asafoŋ kpeei ashishi. Ebaaye ebua lɛ hu koni ená nikasemɔ su, ni ebaaná he sɛɛ be ni akɛ lɛ egbe e-Biblia nikasemɔ lɛ naa.