Ani Okaneɔ Woji Tɛtrɛbii Lɛ?

¹ Maŋsɛɛ sanekpakpa shiɛlɔi ni ebote gbalashihilɛ mli ni yɔɔ Afrika lɛ wie enɛ yɛ woji tɛtrɛbii lɛ ahe akɛ: “Buu-Mɔɔ lɛ yeɔ ebuaa wɔ ni ehaa wɔhiɛ hiɔ wɔhe nɔ yɛ wɔshikpɔŋkuku lɛ he. Wɔnáa ekãawoo kɛ hewalɛwoo kɛjɛɔ eko fɛɛ eko ni jieɔ kpo lɛ mli.” Ani oyɛ hiɛsɔɔ ni mli kwɔ ni tamɔ nakai nɔŋŋ kɛha wɔ woji tɛtrɛbii lɛ? Ni ani oshweɔ koni okane?

² Eheɔ be ni fa saŋŋ ni akɛŋmaa woji tɛtrɛbii ní abaanyɛ akane yɛ minitii fioo ko mli lɛ. Kɛ ole enɛ lɛ, ani obaakane saji lɛ hiɛaŋhiɛaŋ ko kɛkɛ, ni okwɛ mfonirii lɛ, loo ni yɛ be kɛ bei amli lɛ okane sane ko ni gbala ojwɛŋmɔ lɛ pɛ kɛkɛ? Wɔbaafee mɛi ni le nii kɛ́ wɔfee babaoo fe nakai. Esa akɛ wɔhe be koni wɔkane wɔ woji tɛtrɛbii lɛ eko fɛɛ eko ni jieɔ kpo lɛ, ni wɔtao emli saji lɛ fɛɛ. Buu-Mɔɔ lɛ ji wɔ wolo tɛtrɛɛ titri kɛha mumɔŋ niyenii yɛ ebe naa. Awake! lɛ wieɔ saji ni yɔɔ miishɛɛ ni kɔɔ nibii srɔtoi ahe. Jeee akɛ nɔ ni wɔkaseɔ kɛjɛɔ nɛkɛ woji tɛtrɛbii nɛɛ akanemɔ mli lɛ woɔ wɔmumɔŋ hewalɛ kɛkɛ, shi moŋ esaa wɔ hu kɛha shiɛmɔ nitsumɔ lɛ ní wɔɔná mli gbɛfaŋnɔ kɛmɔ shi lɛ. Beni wɔyeɔ anɔkwa yɛ ekanemɔ lɛ mli lɛ, ebaawo wɔ ekãa koni wɔkɛ woji tɛtrɛbii lɛ aha mɛi krokomɛi.

³ Bɔ ni Ooofee Oya Ohiɛ yɛ Nikanemɔ Mli: Ani ooonyɛ ofee babaoo yɛ woji tɛtrɛbii lɛ ni okaneɔ daa lɛ mli? Naa ŋaawoi enyɔ ni yeɔ omanye yɛ mɛi babaoo agbɛfaŋ. (1) Too nii ni akaneɔ daa lɛ he gbɛjianɔ. Beni okɛ minitii 10 loo 15 kaneɔ daa gbi lɛ, onaa baakpɛ ohe yɛ bɔ ni obaanyɛ okane babaoo yɛ otsi mli lɛ he. (2) Too gbɛjianɔ ko ní baaha ona nɔ ni okane momo lɛ. Ekolɛ obaanyɛ okadi sane fɛɛ sane ni okaneɔ lɛ shishijee. Kɛ enɛ bɛ lɛ, obaanyɛ oshi saji lɛ ekomɛi ni okaneko loo ekolɛ wolo tɛtrɛɛ muu lɛ fɛɛ. Ehe miihia ni oto nikanemɔ he gbɛjianɔ ni baaye ebua bo ni okpɛtɛ he.​—⁠Okɛto Filipibii 3:​16 he.

⁴ “Tsulɔ anɔkwafo kɛ nilelɔ” lɛ tsuɔ tsakemɔi ni yaa nɔ lɛ ahe nii yɛ nilee mli kɛtsɔ saji ni eŋmalaa ni kɔɔ gbɔmɛi ahiamɔ nii ahe lɛ nɔ. (Mat. 24:45) Woji tɛtrɛbii lɛ esa wɔshihilɛi ahe lɛɛlɛŋ. Bɔ ni wɔyaa hiɛ yɛ mumɔŋ wɔhaa lɛ titri damɔ bɔ ni wɔkaneɔ teokrase he saji wɔhaa lɛ nɔ. Mumɔŋ jɔɔmɔi kpakpai yɛ kɛha mɛi ni toɔ be koni amɛkane woji tɛtrɛbii lɛ fɛɛ lɛ.