Okɛ Miishɛɛ Ashiɛ Sanekpakpa Lɛ
1 “Miishwe akɛ mana nyɛ, . . . Kɛ ka mikome mihewɔ lɛ miisumɔ akɛ, . . . majaje sanekpakpa lɛ matsɔɔ nyɛ.” Nɛkɛ ji bɔ ni bɔfo Paulo je ewolo ni eŋma kɛyaha nyɛmimɛi ni yɔɔ Roma lɛ shishi. Mɛni hewɔ Paulo yɔɔ he miishɛɛ akɛ eeeyasara amɛ lɛ? Ekɛɛ akɛ: “Koni mibaná yibii komɛi yɛ nyɛ hu nyɛteŋ, . . . Ejaakɛ mihiɛ gbooo Kristo sanekpakpa lɛ he, ejaakɛ eji Nyɔŋmɔ hewalɛ, ni aŋɔhereɔ . . . yiwala.”—Rom. 1:11-16.
2 Paulo jie nɛkɛ miishɛɛ nɛɛ nɔŋŋ kpo beni ekɛ Efeso onukpai lɛ wieɔ lɛ. Ekai amɛ akɛ: “Kɛjɛ klɛŋklɛŋ gbi nɔ ni miba Asia nɛɛ, . . . mishiuuu nii . . . lɛ eko nɔ, ni mijaje mitsɔɔ nyɛ yɛ faŋŋ kɛ shia fɛɛ shia hu; ni miye . . . odase mitsɔɔ Yudafoi kɛ Helabii fɛɛ lɛ.” (Bɔf. 20:18-21) Yɛ shikpɔŋkukuji ni akɛwo edɛŋ lɛ fɛɛ mli lɛ, oti ni ma Paulo hiɛ ji, ni egbɛ yiwalaheremɔ he sanekpakpa lɛ eshwã ni ená Maŋtsɛyeli yibii. Mɛɛ su kpakpa ni sa kasemɔ nɛ!
3 Wɔbaanyɛ wɔbi wɔhe akɛ: ‘Ani mijieɔ nakai miishɛɛ lɛ nɔŋŋ kpo beni mijajeɔ sanekpakpa lɛ yɛ mikutso lɛ mli? Yɛ nɔ najiaŋ ni mabu shiɛmɔ nitsumɔ lɛ akɛ nitsumɔ ko kɛkɛ lɛ, ani miyɛ he miishɛɛ akɛ mawie sanekpakpa lɛ he matsɔɔ mɛi babaoo bɔ ni manyɛ? Ani mikɛ sɔlemɔ esusu mishihilɛi ahe? Ani mika gbɛ̀i fɛɛ ni manyɛ matsɔ nɔ mafee nakai yɛ wɔshikpɔŋkuku lɛ mli, tamɔ shiɛmɔ yɛ shia kɛ shia, yɛ gbɛjegbɛ nɔ, yɛ nitsumɔhei, yɛ tɛlifoŋ nɔ, kɛ trukaa odaseyeli mikwɛ?’
4 Okɛ Miishɛɛ Ashiɛ Yɛ April Mli: April nyɔŋ lɛ ji be kpakpa ni wɔbaanyɛ wɔkɛwo gbɛfaŋ nɔ ni wɔnáa yɛ shiɛmɔ nitsumɔ lɛ mli lɛ mli hewalɛ. Esa akɛ ŋmɛlɛtswaa ni ataoɔ ni atse nɔ lɛ aha mɛi babaoo kɛ amɛhe awo gbɛgbalɔi awalɔ nitsumɔ lɛ mli. Ekolɛ, oshihilɛi baaŋmɛ bo gbɛ koni osɔmɔ akɛ gbɛgbalɔi awalɔ yɛ April kɛ May mli. Aloo ekolɛ, yɛ ŋmɛlɛtswaa ni ataoɔ ni atsake lɛ hewɔ lɛ, obaanyɛ okɛ ohe awo daa gbɛgbamɔ nitsumɔ lɛ mli. Kɛ́ oji asafoŋ shiɛlɔ lɛ, ani obaanyɛ okɛ be babaoo awo sɔɔmɔ nitsumɔ lɛ mli yɛ nyɔŋ nɛɛ nɔ kɛ nɔ ni baanyiɛ sɛɛ aba lɛ mli fe bɔ ni ofɔɔ feemɔ lɛ, ni okɛye obua mɛi ni baanyɛ atsu gbɛgbamɔ nitsumɔ lɛ? No baaha Yehowa tsui anya!
5 Taakɛ Paulo ji lɛ, esa akɛ Maŋtsɛyeli shiɛlɔi fɛɛ aya nɔ ajie miishɛɛ kpo kɛtsɔ babaoo ni amɛaaná yɛ shiɛmɔ nitsumɔ lɛ mli lɛ nɔ. Ní wɔɔfee nɔ ni wɔɔnyɛ lɛ fɛɛ yɛ sɔɔmɔ nitsumɔ lɛ mli lɛ kɛ miishɛɛ diɛŋtsɛ baaha wɔ. Paulo ná nɛkɛ miishɛɛ nɛɛ yɛ esɔɔmɔ krɔŋkrɔŋ lɛ mli. Ebaahi jogbaŋŋ akɛ wɔkase enɔkwɛmɔnɔ kpakpa lɛ.—Rom. 11:13; 1 Kor. 4:16.