Ha “Wɔwie Sane Oti lɛ He Tɛ̃ɛ!”
1 Ani onu pɛŋ ni shiatsɛ ko miifo oshiɛmɔ wiemɔ ni ósaa lɛ jogbaŋŋ lɛ mli kɛ wiemɔi ni ji: ‘Mɛni otaoɔ? Wiemɔ sane oti lɛ he tɛ̃ɛ!’ Mɛni wɔbaanyɛ wɔkase kɛjɛ niiashikpamɔ ni tamɔ nɛkɛ mli?
2 Gbɔmɛi babaoo etooo amɛtsui shi ŋmɛnɛ. Amɛmiisumɔ ni amɛle mɛi ni wɔji kɛ nɔ hewɔ ni wɔba amɛŋɔɔ. Kɛ amɛná amɛle akɛ yiŋtoo hewɔ ni wɔba jɛmɛ ji ni wɔkɛ amɛ agba Biblia lɛ he sane lɛ, ekolɛ amɛsumɔŋ ni amɛbo toi. Biblia kanemɔ kɛ mumɔŋ sanegbaai jeee nibii ni he hiaa yɛ gbɔmɛi babaoo ashihilɛi amli. Te wɔbaafee tɛŋŋ wɔkɔne shiatsɛmɛi ni tamɔ nɛkɛ yiŋ koni amɛkɛ wɔ asusu Biblia saneyitso ko he minitii fioo ko?
3 Nɔ ni Tsuɔ Nii Jogbaŋŋ Fe Fɛɛ: Gbɛ ni abaatsɔ nɔ ji ni akɛ wiemɔi fioo ko pɛ ni aaanyɛ aha shiatsɛ lɛ ale akɛ Biblia lɛ kɛ naagbai ni kɔɔ lɛ diɛŋtsɛ ehe lɛ naa tsabaai kpakpai haa. Shiɛmɔ wiemɔi ni mɔɔ shi fe fɛɛ lɛ wieɔ sanebimɔ pɔtɛɛ ko ni ato he gbɛjianɔ koni eha shiatsɛ lɛ asusu sane lɛ he lɛ he, ni nɔ ni nyiɛɔ sɛɛ ji ŋmalɛ ko ni haa sanebimɔ lɛ hetoo. Ekolɛ obaaná gbɛtsɔɔmɔi ni nyiɛ sɛɛ nɛɛ ekomɛi ni oooka okwɛ lɛ he miishɛɛ. Ato he gbɛjianɔ koni eye ebua ní “wɔwie sane oti lɛ he tɛ̃ɛ” oyayaayai yɛ be mli ni wɔteeɔ shiatsɛ lɛ miishɛɛ shi lɛ.
4 Yɛ shikpɔŋkuku he ni bei pii lɛ gbɔmɛi kɛɔ akɛ amɛbɛ he miishɛɛ lɛ mli lɛ, teemɔ sanebimɔ ko shi ni kɔɔ amɛ diɛŋtsɛ amɛhe:
◼ “Yɛ be mli ni wɔbɛŋkɛɔ afii akpe ni baa lɛ, ani onuɔ hiɛnɔkamɔ loo yiŋkɔshikɔshifeemɔ he? [Ŋmɛɛ gbɛ ni ewie.] Biblia lɛ gba nifeemɔi ni haoɔ mɔ, ni wɔnaa ŋmɛnɛ lɛ kɛ nɔ ni ejɛ mli eba lɛ hu he sane efɔ̃ shi.” Kanemɔ Timoteo 3:1, 2, 5 kɛ Abɛi 2:21, 22.
◼ “Aasusu gbɔmɔtsoŋ hewalɛnamɔ he waa diɛŋtsɛ yɛ wɔmaŋ nɛɛ mli. Ani ole akɛ Nyɔŋmɔ woɔ shi akɛ ebaajie helai fɛɛ kɛya kwraa?” Kanemɔ Kpojiemɔ 21:3, 4.
◼ “Yɛ mɛɛ gbɛ nɔ osusuɔ akɛ ehe baaba sɛɛnamɔ kɛha wɔ akutso lɛ, eji mɔ fɛɛ mɔ ni yɔɔ biɛ lɛ kɛ Biblia mli shishitoo mlai tsuɔ nii kulɛ?” Kanemɔ Mateo 22:37-39.
5 Akɛni akɛ famɔ eha wɔ akɛ wɔshiɛ Maŋtsɛyeli lɛ he sanekpakpa lɛ hewɔ lɛ, esa akɛ wɔgbala mɛi ajwɛŋmɔ kɛya nɔ ni Maŋtsɛyeli lɛ baatsu lɛ nɔ be fɛɛ be ni wɔɔnyɛ. Obaanyɛ okɛɛ akɛ:
◼ “Ani ole akɛ wolo ni etsɛ fe fɛɛ yɛ je lɛŋ, ní ji Biblia lɛ egba efɔ̃ shi akɛ abaaná jeŋ muu fɛɛ nɔyeli kome?” Kanemɔ Daniel 2:44.
◼ “Mɛni ji nɔ ni osusuɔ akɛ shihilɛi baatamɔ aha kɛ́ Yesu Kristo ye shikpɔŋ lɛ nɔ?” Kanemɔ 72:7, 8.
6 Yɛ shikpɔŋkuku mli he ni gbɔmɛi sumɔɔ jamɔ yɛ lɛ, obaanyɛ oka hiɛkpamɔ wiemɔi nɛɛ eko okwɛ:
◼ “Anáa hetsɛ̃ ahaa gbɔmɛi babaoo yɛ nuu loo yoo ni amɛji, jamɔ mli ni amɛyɔɔ, loo amɛ hewolo nɔ su hewɔ. Yɛ mɛɛ gbɛ nɔ osusuɔ akɛ Nyɔŋmɔ feɔ enii yɛ hetsɛ̃ ni tamɔ nɛkɛ he?” Kanemɔ Bɔfoi lɛ Asaji 10:34, 35.
◼ “Wɔle akɛ Yesu Kristo fee naakpɛɛ nibii babaoo yɛ egbii lɛ amli. Kɛ obaanyɛ obi lɛ koni efee naakpɛɛ nɔ̃ kome ekoŋŋ etsɔɔ bo lɛ, kulɛ mɛni no baafee?” Kanemɔ Lala 72:12-14, 16.
7 Kɛ shiatsɛ lɛ miishashao shi akɛ eeegbele shinaa lɛ, obaanyɛ oje sanegbaa shishi kɛtsɔ enɛ kɛɛmɔ nɔ:
◼ “Eji nɔ ko ni eje mɛi pii atsine ŋmɛnɛ akɛ amɛaanu sane ko ni kɔɔ naagbai ahe. Amɛmiisumɔ ni amɛnu akɛ aná naagbai anaa tsabaa. Ŋwanejee ko bɛ he akɛ nakai eji yɛ ogbɛfaŋ. Shi nɛgbɛ wɔbaanyɛ wɔná wɔnaagbai anaa tsabaai diɛŋtsɛ yɛ?” Ŋmɛɛ gbɛ ni ewie. Kanemɔ 2 Timoteo 3:16, 17.
8 Mɛni Hewɔ Okaaa Okwɛɛɛ? Bei pii lɛ, sanebimɔ kuku ni yɔɔ tɛ̃ɛ lɛ ji nɔ̃ diɛŋtsɛ ni he hiaa ni akɛaatee shiatsɛ ko miishɛɛ shi. Yoo ko ni tsutsu ko lɛ eteɔ shi ewoɔ anɔkwale lɛ fɔ̃ nine etsɛ nyɛmimɛi yei enyɔ kɛba eshia be mli ni amɛteŋ mɔ kome ebi lɛ sane nɛɛ: “Ani obaanyɛ oyɔse Maŋtsɛyeli ni osɔleɔ yɛ he yɛ Nuntsɔ lɛ Sɔlemɔ lɛ mli lɛ?” Sanebimɔ lɛ tée yoo lɛ akɔnɔ shi, ni ekpɛlɛ ni akɛ lɛ afee Biblia mli nikasemɔ. Amrɔ nɛɛ eji Yehowa tsulɔ ni ejɔɔ ehe nɔ!
9 Kɛ okɛ shiatsɛ ko miiwie lɛ, kwɛmɔ owiemɔi ojogbaŋŋ. Jɛɛ anɔkwayeli mli owie. Gbɔmɛi sumɔɔ waa ni amɛkɛ miishɛɛ ahere nɔ kɛ́ amɛyiŋ tsɔ̃ akɛ wɔyɛ amɛhe miishɛɛ lɛɛlɛŋ lɛ.—Bɔf. 2:46, 47.
10 Sanekpakpa shiɛmɔ nitsumɔ lɛ ji kaa ŋmɛnɛ. Shiatsɛmɛi komɛi ayiŋ feɔ amɛ kɔshikɔshi yɛ gbɔi ahe. Mɛi krokomɛi hu bɛ dekã kwraa ni be fioo pɛ amɛnáa kɛhaa mɔ. Ni kɛlɛ, wɔbaanyɛ wɔná nɔmimaa akɛ gbɔmɛi babaoo yɛ lolo ni esa akɛ ana amɛ. (Mat. 10:11) Mɔdɛŋ ni wɔbɔɔ kɛtaoɔ amɛ lɛ baanyɛ aye omanye babaoo kɛ́ wɔha wɔ shiɛmɔ wiemɔi lɛ fee kuku ni “wɔwie sane oti lɛ he tɛ̃ɛ!”