Mɛni Obaakɛɛ Muslimnyo?
1 Ani oná hegbɛ oye Muslimnyo ko odase pɛŋ? Kɛ nakai ni lɛ, ekolɛ obaana akɛ, Muslimbii yɛ Nyɔŋmɔ mli hemɔkɛyeli waa kɛ ekãa. Shi kɛlɛ, nɔ ko fioo pɛ amɛle yɛ Paradeiso ni baa yɛ shikpɔŋ nɔ lɛ ni Yehowa gbalɔi lɛ gba amɛfɔ̃ shi lɛ he, ni wɔbaasumɔ ni wɔgba amɛ nakai hiɛnɔkamɔ lɛ he sane. (1 Tim. 2:3, 4) Esa akɛ saji ni nyiɛ sɛɛ nɛɛ aye abua bo koni oye odase kpakpa.
2 Muslimbii heɔ Allah, loo Nyɔŋmɔ nɔ amɛyeɔ, ni amɛheɔ amɛyeɔ akɛ Muḥammad ji Nyɔŋmɔ gbalɔ. Amɛ wolo krɔŋkrɔŋ ji Koran lɛ, ni atsɛɔ amɛjamɔ lɛ akɛ Islam, ní shishitsɔɔmɔ ji “heshibaa.” Koran lɛ tsɔɔ akɛ amale kɛ amagai ajamɔ ejaaa, ni ákɛ Nyɔŋmɔ kome yɔɔ, ni ákɛ ejeee Triniti ko fã. Agbɛnɛ hu, etsɔɔ susuma ni gbooo, hɛl la, kɛ ŋwɛi paradeiso he sane. Muslimbii kpɛlɛɔ Biblia lɛ nɔ akɛ Nyɔŋmɔ Wiemɔ, shi amɛheɔ amɛyeɔ akɛ atsake, yɛ be mli ni akɛ nɔ ko kwraa futuko Koran lɛ ni yɔɔ eklɛŋklɛŋ niŋmaa lɛ mli lolo lɛ.
3 Okɛ Naanyobɔɔ Su, Ŋaa, kɛ Sɛɛyoomɔ Atsu Nii: Kɛ okɛ Muslimnyo ko miigba sane lɛ, okɛ naanyobɔɔ su kɛ ŋaa atsu nii. (Abɛi 25:15) Ha ehi ojwɛŋmɔ mli akɛ, áto Muslimbii ahemɔkɛyelii lɛ ashishi waa kɛmɔ shi ni ákɛ, emli babaoo yɛ ni amɛkase lɛ ojogbaŋŋ amɛwo amɛyitsoŋ. No hewɔ lɛ, jamɔŋ tsɔɔmɔi ahesusumɔ kɛ agbɛnɛ tsɔɔmɔ ni amɛaatsɔɔ akɛ amɛle nɔ ni Nyɔŋmɔ suɔmɔnaa nii ji lɛ efeko amɛmumɔŋ nɔyaa lɛ fã. (Rom. 12:2) Bɔni afee ni aye abua Muslimbii lɛ, tsuishitoo kɛ sane shishinumɔ he miihia.—1 Kor. 9:19-23.
4 Kaawie wiemɔi ni baaha Muslimnyo ko asusu akɛ oji Kristendomnyo. Ha efee faŋŋ akɛ, ojeee Katolik loo Protestant jamɔ mlinyo, ni ákɛ esoro bo. Wiemɔ Biblia lɛ he akɛ eji Nyɔŋmɔ Wolo. Akɛni ewoɔ Muslimbii amli la akɛ aaakɛɛ akɛ “Nyɔŋmɔ bi” hewɔ lɛ, bei pii lɛ, ehi jogbaŋŋ akɛ akɛ wiemɔ nɛɛ tsuŋ nii loo agbaa he sane yɛ saneyitso ni tamɔ nɛkɛ mli kɛyashi beni mɔ lɛ aaaná nɔyaa yɛ mumɔŋ gbɛfaŋ. Shi kɛlɛ, obaanyɛ owie Yesu he akɛ eji gbalɔ loo tsulɔ. Kwa ŋwanejee. Kɛ oyɔse akɛ mlifu miitao aba lɛ, tsɔ ŋaa gbɛ nɔ ni okɛshi jɛmɛ amrɔ nɔŋŋ.
5 Ehi jogbaŋŋ akɛ akɛ mɔ kome pɛ aaawie fe nɔ ni akɛ kuu aaawie. Bei pii lɛ, nilee yɛ mli akɛ yei aaaye yei odase, ní hii aye hii odase. Eyɛ faŋŋ akɛ, jeee yɛ shihilɛi fɛɛ mli, shi esa akɛ akɛ jwɛŋmɔ ni ja atsu nii. Agbɛnɛ hu, Muslimbii pii susuɔ nɔ ni amɛnaa akɛ ejeee yei atade ni sa kɛ hesaamɔ ni sa lɛ he waa diɛŋtsɛ. Ehe miihia ni nyɛmimɛi yei ale enɛ jogbaŋŋ.—1 Kor. 10:31-33.
6 Nibii ni Abaawie He: Wiemɔ bɔ ni Nyɔŋmɔ kɛ esuɔmɔ lɛ da waa ha lɛ he yɛ faŋŋ mli. Kaashashao shi akɛ oookɛɛ akɛ anɔkwa heyelilɔ ji bo, ni ákɛ mɔ kome ji Nyɔŋmɔ (jeee Triniti), ni ákɛ amaga jamɔ ejaaa. Wiemɔ efɔŋfeemɔ ni yaa nɔ yɛ je lɛŋ ŋmɛnɛ lɛ he—tawuu, maŋ basabasafeemɔ, hewolonɔ su mli hetsɛ̃, kɛ osatofeemɔ ni anaa faŋŋ yɛ mɛi babaoo ni sumɔɔ jamɔ ateŋ lɛ.
7 Wolo bibioo ni ji The Guidance of God—Our Way to Paradise lɛ baaha oná saneyitsei amli nilee babaoo ni obaanyɛ okɛtsu nii koni okɛ Muslimbii aje sanegbaai ashishi. Ato he gbɛjianɔ koni Muslimbii ni yɔɔ he ko ni amɛbaanyɛ amɛnu he yɛ jɛmɛ akɛ, naagba ko kwraa bɛ he akɛ amɛaakase Biblia lɛ anya he.
8 Ákɛ shiɛmɔ wiemɔ lɛ, obaanyɛ okɛɛ akɛ:
◼ “Miibɔ mɔdɛŋ jogbaŋŋ koni mikɛ Muslimbii agba sane. Mikaneɔ nyɛjamɔ lɛ he sane, ni miheɔ miyeɔ akɛ eja akɛ makɛɛ akɛ, Muslimbii heɔ anɔkwa Nyɔŋmɔ kome pɛ lɛ kɛ gbalɔi lɛ fɛɛ amɛyeɔ. [Ŋmɛɛ gbɛ ni ewie.] Masumɔ ni mikɛ bo agba blema gbalɛ ko ni gbaa shikpɔŋ ni abaatsake lɛ afee lɛ paradeiso lɛ he sane. Ani manyɛ makane nɔ ni gbalɔ lɛ wie lɛ matsɔɔ bo? [Kanemɔ Yesaia 11:6-9.] Nɛkɛ gbalɛ nɛɛ haa mikaiɔ sane ko ni atsɛ kɛjɛ Koran lɛ mli ní anaa yɛ wolo bibioo nɛɛ mli lɛ.” Gbelemɔ Guidance of God wolo bibioo lɛ baafa 9, ní okane wiemɔ ni atsɛ sɛɛ ni yɔɔ niŋmaa ni mli ti mli, ní wieɔ jalɔi ni baahi shikpɔŋ nɔ lɛ he lɛ. Kɛ ejie miishɛɛ kpo etsɔɔ lɛ, nyɛgbaa kuku 7 kɛyashi kuku 9 ni yɔɔ baafa ni tsá nɔ lɛ nɔ lɛ koni okɛtsá sanegbaa lɛ nɔ. Shĩ wolo bibioo lɛ, ní oto gbɛjianɔ kɛha sɛɛsaramɔ.—Kwɛmɔ February 1998 Wɔ Maŋtsɛyeli Sɔɔmɔ lɛ baafa 6 lɛ kuku 28 lɛ mli kɛha shiɛmɔ wiemɔ kroko.
9 Kɛ oofɔ̃ nine otsɛ́ mɔ ko koni okɛ lɛ asusu Guidance of God wolo bibioo lɛ mli sane he lɛ, ehi jogbaŋŋ akɛ oootsɛ́ no akɛ sanegbaa, shi kaakɛɛ akɛ eji Biblia mli nikasemɔ. Kɛ agbe wolo bibioo lɛ kasemɔ naa lɛ, esa akɛ nikaselɔ lɛ afee klalo akɛ eeekase Taoɔ wolo bibioo lɛ loo Nilee wolo lɛ. Woji krokomɛi ni aje gbɛ ato he gbɛjianɔ aha Muslimbii ji dɛhiɛmɔ wolo ni ji How to Find the Road to Paradise lɛ kɛ wolo bibioo ni ji The Time for True Submission to God lɛ.
10 Kɛ wɔyɛ Islambii ahemɔkɛyelii kɛ amɛ henumɔi ahe nilee ni tamɔ nɛkɛ lɛ, wɔbaanyɛ wɔkɛ sɛɛyoomɔ atsu nii yɛ woji ni wɔhalaa koni wɔkɛha Muslimbii lɛ mli kɛ gbɛ ni wɔtsɔɔ nɔ wɔyeɔ amɛ odase lɛ mli. Eba akɛ Yehowa aaaya nɔ ajɔɔ mɔdɛŋ ni wɔbɔɔ lɛ nɔ, koni wɔye wɔbua gbɔmɛi srɔtoi fɛɛ, ni amɛtsɛ egbɛi ni ahere amɛyiwala.—Bɔf. 2:21.