Sanebimɔ He

◼ Mɛɛ be ebaafee nɔ ni sa akɛ aaatse Asafo Woloŋ Nikasemɔ kuu kroko afata he?

Esa akɛ asusu kuu hee tsemɔ he kɛ́ ehe miihia, bɔni afee ni ahiɛ mɛi aaafee 15 loo nɔ ni shɛɛɛ nakai ní baaba woloŋ nikasemɔhei nɛɛ eko fɛɛ eko shishi, ní Maŋtsɛyeli Asa lɛ fata he. Mɛni hewɔ ajieɔ enɛ yi?

Kɛ́ afee Asafo Woloŋ Nikasemɔ kui bibii lɛ, nɔkwɛlɔ lɛ nyɛɔ etsuɔ mɔ fɛɛ mɔ ni baa shishi lɛ he nii jogbaŋŋ. Kɛfata he lɛ, mɛi fɛɛ nyɛɔ amɛnáa hegbɛ ni fa bɔ ni sa ni amɛkɛhaa saji ahetoo yɛ shihilɛ ni hi ni baaha amɛjaje amɛhemɔkɛyeli lɛ yɛ maŋ. (Heb. 10:23; 13:15) Kui bibii ni anáa yɛ hei babaoo yɛ asafo lɛ shikpɔŋkuku lɛ mli fɛɛ lɛ haa efeɔ mlɛo akɛ aaaya Asafo Woloŋ Nikasemɔ kɛ kpeei kɛha shiɛmɔyaa. Asafoi ni eha amɛ nikasemɔhei efa lɛ ena akɛ, mɛi ni baa woloŋ nikasemɔ lɛ shishi lɛ ayibɔ ni afee lɛ ekome lɛ hu etee hiɛ.

Shihilɛi krɛdɛɛi komɛi baanyɛ ahi shi ni baaha efee nɔ ni nilee yɔɔ mli akɛ aaatse kuu kroko, kɛji eji kuu bibioo po. Enɛ baanyɛ afee anɔkwale yɛ he ni etse ehe banee loo he ni gbɔmɛi fa tsɔ yɛ he ni afeɔ yɛ bianɛ lɛ loo he ni sɛi faaa yɛ. Kɛ́ ehe miihia lɛ, abaanyɛ atse kuu ko ni baakpe yɛ gbi lɛ mli kɛha mɛi ni egbɔlɔ, gbɛkɛnaashi nitsulɔi, loo nyɛmimɛi yei ni yɔɔ wumɛi ni jeee Odasefoi lɛ ahilɛ-kɛhamɔ.

Esa akɛ woloŋ nikasemɔ kui fɛɛ aná shiɛlɔi ni yɔɔ ekãa kɛ mumɔŋ hewalɛ kɛ agbɛnɛ hu nɔkwɛlɔ kɛ nikanelɔ ni he esa. Esa akɛ nyɛmimɛi hii aya hiɛ koni amɛtsu hiamɔi nɛɛ ahe nii yɛ asafo lɛ mli.

Onukpai lɛ baanyɛ aha asafo lɛ ashwere kɛtsɔ kwɛ ni amɛaakwɛ akɛ asafo woloŋ nikasemɔ kui lɛ dara bɔ ni sa, ni akwɛɔ amɛmumɔŋ shidaamɔ nɔ jogbaŋŋ, ni akɛ, amɛkpeɔ yɛ hei ni sa lɛ nɔ. Be fɛɛ be ni eeehi lɛ, abaanyɛ atse kui heei bɔni afee ni mɔ fɛɛ mɔ aná mumɔŋ gbɛjianɔtoo ni ekaaa nɛɛ he sɛɛ kɛmɔ shi. Ani obaanyɛ okɛ oshia aha akɛ woloŋ nikasemɔhe? Mɛi babaoo ni efee nakai lɛ ená mumɔŋ jɔɔmɔi babaoo.