Ohiɛ Ahi Ohe Nɔ Kɛtao Mumuii yɛ Nyɛshikpɔŋkuku lɛ Mli
1 Yehowa kɛ ninefɔɔ lɛ miiha akɛ: “Ba! . . . Mɔ ni sumɔɔ lɛ, ha ni ebayɛ wala nu lɛ yaka.” (Kpoj. 22:17) Mumuii ni amɛyi fáa babaoo daa nɛɛ lɛ fata mɛi ni hereɔ nɛkɛ ninefɔɔ nɛɛ nɔ lɛ ahe. Nɔ ni ejɛ mli kɛba ji akɛ, yɛ afii 13 ni eho nɛɛ mli lɛ, ato mumuii asafoi 27 kɛ mumuii akui 43 shishi yɛ United States nitsumɔhe nine lɛ.
2 Eyɛ mli akɛ mumuii awiemɔ asafoi kɛ kui lɛ gbalaa amɛjwɛŋmɔ kɛyaa mumuii kɛ mɛi ni nuuu nii jogbaŋŋ lɛ anɔ titri yɛ ekãa ni amɛkɛshiɛɔ yɛ amɛ shikpɔŋkukuji srɔtoi lɛ amli lɛ anɔ moŋ, shi mɛi ni tamɔ nakai pii yɛ lolo ni esa akɛ nine ashɛ amɛnɔ ni aye amɛ odase yɛ maŋ nɛɛ mli.
3 Mɛɛ Gbɛ Nɔ Obaatsɔ Oye Obua? Kɛ onyiɛ maŋ lɛ mli lɛ, ani onaa mumuii ni miiwie? Ani ole mɔ ko yɛ onitsumɔhe lɛ, aloo yɛ oskul, ni ewekunyo ko ji mumui? Ha ohiɛ ahi ohe nɔ koni otao mɛi ni ji mumuii yɛ be mli ni otsuɔ odaa gbi mli nitsumɔ lɛ. Shi te ooofee tɛŋŋ ole akɛ amɛbaasumɔ ni aye amɛ Maŋtsɛyeli lɛ he odase?
4 Odaseyeli: Okɛ he diɛŋtsɛ ni mumui lɛ yɔɔ lɛ he saji aha mumuii asafo aloo kuu ni bɛŋkɛ bo lɛ. Mumuii pii yaa hiɛ oyayaayai yɛ anɔkwale lɛ kasemɔ mli kɛji akɛ amɛnyɛ amɛkɛ Odasefoi ni amɛji mumui lɛ bɔ yɛ asafoŋ kpeei ni afeɔ yɛ Amerika Mumuii Awiemɔ mli lɛ ashishi lɛ. No hewɔ lɛ, kɛji akɛ mumuii asafo aloo kuu ko yɛ he ni oyɔɔ lɛ, esa akɛ nyɛ asafo lɛŋ woloŋmalɔ lɛ aŋmala saji ni kɔɔ mumuii fɛɛ ni yɔɔ nyɛshikpɔŋkuku lɛ mli lɛ ahe lɛ ni ekɛmaje mumuii asafo loo kuu lɛ.
5 Ni kɛji akɛ mɔ ko mɔ ko bɛ he ni nyɛyɔɔ ni baanyɛ ekɛ mumɔŋ yelikɛbuamɔ aha mumuii ni yɔɔ nyɛ akutso lɛ mli lɛ hu? Mɛɛ gbɛ nɔ nyɛbaatsɔ nyɛye nyɛbua? Mɛni hewɔ nyɛkuuu nyɛsɛɛ nyɛyasaraaa amɛ ni nyɛkɛ shia lɛ mli bii ateŋ mɔ ko ni nuɔ nii lɛ agba sane? Kɛɛmɔ amɛ akɛ obaasumɔ ni ojie vidio ni kɔɔ mumuii ahe lɛ otsɔɔ mumui lɛ koni okɛtee mumui lɛ miishɛɛ shi. Shiɛlɔi komɛi po ekase Amerika Mumuii Awiemɔ, bɔni afee ni amɛnine ashɛ mumuii lɛ anɔ jogbaŋŋ. (Bɔf. 16:9, 10) Ayɛ Taoɔ wolo bibioo lɛ kɛ Nilee wolo lɛ ni yɔɔ Amerika Mumuii Awiemɔ mli yɛ vidio nɔ. Nɛkɛ dɛŋdadei ni akɛtsuɔ nii yɛ Biblia mli nikasemɔi amli lɛ ewo yibii kpakpai babaoo momo.
6 Kɛ oha ohiɛ hi ohe nɔ kɛtao mumuii yɛ nyɛ akutso lɛ mli lɛ, obaanyɛ oha amɛ hegbɛ koni amɛnu wala nu lɛ yaka.—Mat. 10:11.