Nibii Ni Tsɔɔ Akɛ Nyɔŋmɔ Susuɔ Mumuii Ahe
Ŋmɛnɛ lɛ, ayɛ mumuii aaafee akpekpei 70 yɛ jeŋ fɛɛ, ni amɛteŋ mɛi babaoo kɛ mɛi gbaa sane yɛ mumuii awiemɔi 200 kɛ sɛɛ lɛ ateŋ ekome loo nɔ ni fa fe nakai mli. Dɔlɛ sane ji akɛ, bei pii lɛ, mɛi kɛ mumuii yeee jogbaŋŋ, tamɔ bɔ ni amaniɛbɔi ni nyiɛ sɛɛ nɛɛ tsɔɔ lɛ:
“Yɛ je lɛŋ fɛɛ lɛ, bei pii lɛ, mɛi ebuuu hegbɛi ni mumuii kɛ mɛi ni nuuu nii jogbaŋŋ lɛ yɔɔ lɛ.”—National Association of the Deaf (U.S.).
“Mumuii ni yɔɔ maji ni kpaako amɛyaa amɛhiɛ lɛ amli lɛ fata mɛi ni yeɔ ohia futaa yɛ jeŋ fɛɛ lɛ ahe, ni ewa kɛhã amɛteŋ mɛi babaoo akɛ amɛbaaná hegbɛ kɛya skul, amɛná nitsumɔ, loo amɛnine ashɛ saji ni he hiaa amɛ lɛ anɔ.”—World Federation of the Deaf.
Te Nyɔŋmɔ naa mumuii loo toimulɔi ehãa tɛŋŋ? Mɛni Biblia wieɔ yɛ mumuii loo toimulɔi ahe? Ni mɛni Yehowa Odasefoi feɔ kɛwaa amɛ ŋmɛnɛ?
Bɔ Ni Nyɔŋmɔ Naa Mumuii Loo Toimulɔi Ehãa
Biblia lɛ hãa wɔnaa akɛ Yehowaa Nyɔŋmɔ susuɔ mumuii ahe waa. Esumɔɔ ni akɛ amɛ aye jogbaŋŋ ni agbɛnɛ hu amɛná tsɔsemɔi ni ekɛhãa ahe sɛɛ.
Ŋmalɛ: “Kaalomɔ toimulɔ.”—3 Mose 19:14.
Nɔ ni etsɔɔ: Mla ni Yehowa kɛhã blema Israelbii lɛ bu hegbɛi ni mumuii loo toimulɔi yɔɔ lɛ ahe.
Ŋmalɛ: “Nyɔŋmɔ kwɛɛɛ mɛi ahiɛiaŋ.”—Bɔfoi 10:34.
Nɔ ni etsɔɔ: Yehowa susuɔ gbɔmɛi srɔtoi fɛɛ ni jɛ maji srɔtoi, shihilɛi srɔtoi, kɛ wiemɔi srɔtoi amli lɛ ahe, ni mumuii hu fata he.
Ŋmalɛ: “Yesu yakpa maji kɛ akrowai lɛ fɛɛ anɔ, . . ni eshiɛ Maŋtsɛyeli lɛ he sane kpakpa lɛ.”—Mateo 9:35.
Nɔ ni etsɔɔ: Yesu ba shikpɔŋ lɛ nɔ koni ebatsɔɔ mɛi Nyɔŋmɔ Maŋtsɛyeli lɛ he sane, ni ehã amɛle nɔ ni Maŋtsɛyeli nɛɛ baafee ehã adesai fɛɛ, ni mumuii hu fata he.—Mateo 6:10.
Ŋmalɛ: “[Yesu hãa] toimulɔi po nuɔ nii, ni mumuii hu wieɔ.”—Marko 7:37.
Nɔ ni etsɔɔ: Yesu hã toimulɔ ko nu nii, ni enyɛ ewie, ni ekɛ enɛ tsɔɔ nɔ ni Nyɔŋmɔ Maŋtsɛyeli lɛ baatsu wɔsɛɛ. Yɛ shihilɛ nɛɛ mli lɛ, Yesu jɛ mlihilɛ mli ekɛ nuu toimulɔ lɛ ye yɛ gbɛ ni woŋ lɛ hiɛgbele nɔ dani etsa lɛ, ni ehã enu nii ni ebɔi wiemɔ.—Marko 7:31-35.
Ŋmalɛ: “Abaagbele toimulɔi hu atoii.”—Yesaia 35:5.
Nɔ ni etsɔɔ: Yehowa gba efɔ̃ shi akɛ toimulɔi lɛ baanu nii.—Yesaia 29:18.
Nibii Ni Yehowa Odasefoi Feɔ Kɛwaa Mumuii Ŋmɛnɛ?
Yehowa Odasefoi shiɛɔ Nyɔŋmɔ wiemɔ ni hãa anáa hiɛnɔkamɔ lɛ amɛhãa mumuii yɛ jeŋ fɛɛ. Mɛni wɔfeɔ koni wɔnyɛ wɔtsu enɛ he nii? Wɔfeɔ Bibliai kɛ Biblia kasemɔ vidioi yɛ mumuii awiemɔ ni fa fe 100 amli. Wɔkɛ mumuii kaseɔ Biblia lɛ, ni wɔfeɔ Kristofoi akpeei hu yɛ mumuii awiemɔi srɔtoi amli. Wɔfeɔ enɛ fɛɛ wɔhãa mɛi ni miisumɔ ni Nyɔŋmɔ aye abua amɛ lɛ, ni wɔheee nɔ ko. Mɛni hewɔ? Ejaakɛ Yesu fã akɛ: “Yaka nyɛná, yaka nyɛkɛhãa.”—Mateo 10:8.
Onine baanyɛ ashɛ nibii nɛɛ anɔ yɛ Intanɛt lɛ nɔ, loo obaanyɛ odaunlodi owo mobail foŋ kɛ ehenɔi lɛ anɔ kɛjɛ JW.ORG kɛ JW Library Sign Language app lɛ nɔ.
JW.ORG. Kɛ́ ootao sane ko lɛ, klikimɔ wiemɔ okadi ni yɔɔ wɛbsaiti lɛ ŋwɛigbɛ lɛ, ni ohala mumuii awiemɔ pɔtɛɛ ni otaoɔ lɛ.
JW Library Sign Language app. Okɛ app ni awooo he nyɔmɔ nɛɛ lɛ awo ofoŋ kɛ ehenɔi lɛ anɔ koni onyɛ odaunlodi mumuii awiemɔ vidioi owo nɔ loo obaanyɛ okwɛ vidioi nɛɛ tɛ̃ɛ yɛ nɔ.
Mɛɛ Nibii Wɔfeɔ Kɛyeɔ Wɔbua Mumuii Ni Amɛkɛkase Biblia Lɛ?
Biblia lɛ yɛ mumuii awiemɔ mli. Afee Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ yɛ Amerika Mumuii Awiemɔ mli, ni yɛ je lɛŋ fɛɛ lɛ, no ji klɛŋklɛŋ mumuii awiemɔ Biblia muu lɛ fɛɛ ni afee. Amrɔ nɛɛ, afee Jeŋ Hee Shishitsɔɔmɔ Biblia muu lɛ fɛɛ loo efã ko yɛ mumuii awiemɔi babaoo amli, ni daa afi lɛ akɛ mumui awiemɔi krokomɛi fataa he. (Kɛ́ ootao ona mumuii awiemɔi amli ni afee Biblia nɛɛ yɛ, loo okwɛ yɛ Intanɛt lɛ nɔ lɛ, kwɛmɔ akrabatsa ni ji “Jeŋ Hee Shishitsɔɔmɔ Biblia Lɛ Yɛ Mumui Awiemɔ Mli.”)
Kwɛmɔ vidio ni ji The Complete New World Translation Is Available in ASL (Afee Jeŋ Hee Shishitsɔɔmɔ Biblia Muu Lɛ Fɛɛ Yɛ ASL Mli) koni ona deŋme ni wɔgboɔ koni wɔnyɛ wɔfee Biblia lɛ yɛ mumui awiemɔ mli.
Kɛ́ ootao ni o-Biblia kanemɔ lɛ aŋɔɔ onaa lɛ, okɛ JW Library Sign Language app lɛ awo ofoŋ loo tablɛt nɔ. App nɛɛ baanyɛ ahã ohala ŋmalɛi pɔtɛɛ ni otaoɔ lɛ yɛ mumuii awiemɔ Biblia lɛ mli.
Dmytro kɛ eŋa Vita lɛ, mumuii ji amɛ, shi amɛbii lɛ jeee mumuii. Kwɛmɔ bɔ ni amɛweku lɛ náa mumui awiemɔ Biblia lɛ ni amɛkwɛɔ daa gbi lɛ he sɛɛ.
Vidioi ni waa mumuii koni amɛkase Biblia lɛ. Yehowa Odasefoi feɔ mumuii awiemɔ vidioi koni amɛkɛye amɛbua mɛi ni amɛnu Biblia lɛ shishi, ni amɛkɛ emli ŋaawoi lɛ atsu nii. Biblia mli ŋaawoi lɛ yeɔ ebuaa . . .
Biblia mli nikasemɔ ni wɔkɛ mɛi feɔ kɛtsɔ sanegbaa nɔ. Yehowa Odasefonyo ko baanyɛ aye abua bo ni okase Biblia lɛ yɛ mumuii awiemɔ mli, yɛ bɔ ni oshihilɛ kɛ obe baaŋmɛ bo gbɛ lɛ naa. Bi ni atsɔɔ bo bɔ ni wɔkɛ mɛi feɔ Biblia mli nikasemɔ nɛɛ wɔhãa ni wɔheee nɔ ko.
Jeson Senajonon yɛ Philippines. Kwɛmɔ bɔ ni Biblia nikasemɔ nɛɛ ye ebua lɛ ni ekɛ Nyɔŋmɔ bɔ naanyo kpaakpa.
Be ko ni eho lɛ, Mario Antúnez ji sɔlemɔ ko osɔfo yɛ Honduras. Kanemɔ esane ni egba ni yitso ji “Miyɛ Sanebimɔi Babaoo” lɛ koni ona bɔ ni fee ni ená esanebimɔi lɛ ahetoo yɛ Biblia lɛ mli.
Asafoŋ kpeei kɛ kpeei krokomɛi. Wɔyɛ mumuii awiemɔ asafoi kɛ kui yɛ jeŋ fɛɛ, ni daa otsi lɛ, mumuii lɛ kpeɔ kɛkaseɔ Nyɔŋmɔ he nii ni amɛjáa lɛ. Agbɛnɛ hu, daa afi lɛ, wɔfeɔ mumuii awiemɔ kpeei wuji, ni ajɛɔ Biblia lɛ mli atsɔɔ mumuii lɛ anii yɛ kpeei nɛɛ ashishi. Yɛ wɔsafoŋ kpeei lɛ kɛ kpeei krokomɛi ashishi lɛ, wɔtsɔɔ nifeemɔi lɛ ashishi wɔhãa mɛi ni emu toi ni amɛshwila hu lɛ yɛ mumuii awiemɔ krɛdɛɛ ko ni Blɔfo tsɛɔ lɛ tactile interpreting lɛ mli. Agbɛnɛ hu, wɔfeɔ braille woji wɔhãa shwilafoi ni wɔheee nɔ ko.
Taomɔ asafo ko ni bɛŋkɛ bo.
Kanemɔ sane nɛɛ koni ole kpokpaa wulu nɔ kpeei kɛ kpokpaa nɔ kpeei ni wɔfeɔ daa afi lɛ he saji krokomɛi.
Yaa Yesu gbele lɛ kaimɔ lɛ, ni ji henaabuamɔ ni he hiaa fe fɛɛ ni wɔfeɔ daa afi lɛ.
José Luis Ayala yɛ Mexico. Be ni afɔ lɛ lɛ, emu toi loo eji mumui, ni sɛɛ mli lɛ ehiŋmɛi bashwila. Kwɛmɔ vidio nɛɛ ni ona bɔ ni fee ni aye abua lɛ ni ebale Biblia mli anɔkwale lɛ, ni lɛ hu ebɔi mɛi krokomɛi tsɔɔmɔ kɛ hesaa.
a Yehowa ji Nyɔŋmɔ gbɛ́i. (Lala 83:18) Kwɛmɔ sane ni ji “Namɔ Ji Yehowa?” lɛ.