Dani Obaashiɛ lɛ, Ekolɛ Ehe Baahia ni Otao Mɛi ni Wieɔ Wiemɔ Pɔtɛɛ Ko
1. Mɛni hewɔ yɛ hei ni awieɔ wiemɔi srɔtoi lɛ, ahaa asafo fɛɛ asafo shiɛɔ ehaa mɛi ni wieɔ wiemɔ pɔtɛɛ ko yɛ eshikpɔŋkuku lɛ mli lɛ?
1 Yɛ Pentekoste afi 33 Ŋ.B., beni afɔse mumɔ krɔŋkrɔŋ ashwie Yesu kaselɔi lɛ anɔ sɛɛ lɛ, “amɛbɔi wiemɔi srɔtoisrɔtoi awiemɔ” amɛtsɔɔ mɛi ni jɛ shikpɔŋ lɛ nɔ hei krokomɛi kɛba lɛ. (Bɔf. 2:4) Nɔ ni jɛ mli ba ji akɛ, abaptisi mɛi aaafee 3,000 sɔŋŋ. Naakpɛɛ sane ji akɛ, etamɔ nɔ ni mɛi ni babua amɛhe naa nɛɛ ateŋ kpotoo hu wieɔ wiemɔ kome, ekolɛ Hebri loo Hela. Kɛlɛ, Yehowa ha ashiɛ Maŋtsɛyeli lɛ he sane lɛ atsɔɔ amɛ yɛ amɛ diɛŋtsɛ amɛmaŋ, he ni afɔ amɛ yɛ lɛ, wiemɔ mli. Ŋwanejee ko bɛ he akɛ, yiŋtoo kome hewɔ ni enɛ ba lɛ nakai ji akɛ, bei pii lɛ, mɛi hereɔ sanekpakpa lɛ nɔ waa kɛ́ ashiɛ atsɔɔ amɛ yɛ amɛ diɛŋtsɛ amɛmaŋ, he ni afɔ amɛ yɛ lɛ, wiemɔ mli. Enɛ hewɔ lɛ, yɛ hei ni awieɔ wiemɔi srɔtoi lɛ, ahaa asafo fɛɛ asafo shiɛɔ ehaa mɛi ni wieɔ wiemɔ pɔtɛɛ ko yɛ eshikpɔŋkuku lɛ mli. (Ato Wɔhe Gbɛjianɔ wolo lɛ, bf. 107, kk. 1-2) Ahaaa kui ni kɛ wiemɔ kroko feɔ kpee lɛ amɛshikpɔŋkuku, moŋ lɛ amɛshiɛɔ amɛhaa mɛi ni wieɔ wiemɔ ni amɛkɛfeɔ kpee ni yɔɔ asafo ni kwɛɔ amɛnɔ lɛ loo asafoi krokomɛi ni yɔɔ akutso lɛŋ lɛ ashikpɔŋkuku lɛŋ.
2. (a) Mɛni mɛi ni wieɔ wiemɔ pɔtɛɛ ko lɛ ataomɔ tsɔɔ, ni nɛgbɛ ehe baahia ni afee enɛ yɛ? (b) Te asafoi aaafee tɛŋŋ amɛye amɛbua amɛhe kɛtsu shikpɔŋkuku ni awieɔ wiemɔi srɔtoi yɛ mli lɛ mli nii? (d) Kɛ́ wɔyana mɔ ko ni yɔɔ sane lɛ he miishɛɛ shi ewieɔ wiemɔ kroko lɛ, mɛni esa akɛ wɔfee?
2 Kɛ́ he ni oyɔɔ lɛ, nyɛ fɛɛ nyɛwieɔ wiemɔ kometoo lɛ nɔŋŋ lɛ, ewaaa akɛ obaashiɛ yɛ shĩa kɛ shĩa. Shi, kɛ́ awieɔ wiemɔi srɔtoi yɛ maŋ mli ni oyɔɔ lɛ, onáŋ lɛ mlɛo akɛ oooshiɛ yɛ shĩa kɛ shĩa. Ekolɛ, asafoi ni kɛ wiemɔ kroko feɔ kpee lɛ shiɛɔ yɛ nakai akutsei lɛ nɔŋŋ amli. Eyɛ mli akɛ ekolɛ asafoi nɛɛ kɛ aŋkroaŋkroi ni wieɔ owiemɔ ni amɛkɛkpeɔ yɛ shiɛmɔ mli lɛ ahe saji baaha bo moŋ, shi mɔ titri ni sɔ̃ kã enɔ akɛ etao mɛi ni wieɔ owiemɔ lɛ ji asafo loo kuu mli ni oyɔɔ lɛ. (Kwɛmɔ akrabatsa ni ji “Nyɛyea Nyɛbuaa Nyɛhe” lɛ.) No hewɔ lɛ, ehe baahia ni otao mɛi ni wieɔ owiemɔ lɛ, ni obaanyɛ ofee enɛ kɛtsɔ bi ni ooobi ni atsɔɔ bo mɛi ni wieɔ nakai wiemɔ lɛ. Te aaafee tɛŋŋ atao mɛi ni wieɔ wiemɔ pɔtɛɛ ko lɛ?
3. Mɛni baatsɔɔ he ni esa akɛ asafo loo kuu ko atao mɛi yɛ, kɛ bei abɔ ni esa akɛ aye kɛtao mɛi nɛɛ?
3 Bɔ ni Abaafee Ato Mɛi ni Wieɔ Wiemɔ Pɔtɛɛ ko lɛ Ataomɔ he Gbɛjianɔ: Bei abɔ ni abaaye kɛtao mɛi yɛ hei ni awieɔ wiemɔ srɔtoi yɛ lɛ baadamɔ shihilɛi ni yɔɔ jɛmɛ lɛ anɔ. Akɛ nɔkwɛmɔnɔ lɛ, mɛi enyiɛ yɔɔ akutso lɛ mli ni wieɔ nakai wiemɔ lɛ? Shiɛlɔi enyiɛ yɔɔ jɛmɛ? Mɛi enyiɛ ashĩai asafo lɛ loo kuu lɛ le momo? Akpaaa gbɛ akɛ asafo lɛ baaye be kometoo lɛ nɔŋŋ kɛtao akutso lɛ mli hei srɔtoi lɛ fɛɛ, moŋ lɛ ebaanyɛ ekɛ ejwɛŋmɔ ama hei ni mɛi babaoo yɔɔ yɛ eshikpɔŋkuku lɛ mli lɛ, kɛ hei krokomɛi ni kɛ eshikpɔŋkuku lɛ mli jekɛɛɛ tsɔ lɛ anɔ. Kɛlɛ, ehe miihia waa ni ato gbɛjianɔ jogbaŋŋ kɛtao mɛi lɛ bɔni afee ni aha mɛi babaoo aná hegbɛ amɛtsɛ Yehowa gbɛ́i lɛ.—Rom. 10:13, 14.
4. (a) Te esa akɛ ato mɛi ni wieɔ owiemɔ lɛ ataomɔ he gbɛjianɔ aha tɛŋŋ? (b) Mɛɛ gbɛi komɛi anɔ obaanyɛ otsɔ oná mɛi ni wieɔ owiemɔ lɛ?
4 Bɔni afee ni kɛ́ aatao mɛi yɛ hei ni awieɔ wiemɔi srɔtoi yɛ lɛ, mɔ ko akayatsu nii yɛ hei ni atsu nii yɛ momo lɛ, esa akɛ onukpai akuu lɛ, titri lɛ shiɛmɔ nitsumɔ nɔkwɛlɔ lɛ ato nitsumɔ nɛɛ he gbɛjianɔ jogbaŋŋ, ni ekwɛ koni akɛtsu nii. (1 Kor. 9:26) Yɛ kui ni wieɔ wiemɔ kroko, ni amɛyɔɔ asafo ko kwɛmɔ shishi lɛ agbɛfaŋ lɛ, esa akɛ onukpai akuu ni yɔɔ asafo ni kwɛɔ kuu lɛ nɔ lɛ mli lɛ aha nyɛmi nuu ko ni sa ni yɔɔ kuu lɛ mli lɛ, kɛ́ aaahi lɛ asafoŋ onukpa loo asafoŋ sɔɔlɔ, anyiɛ nitsumɔ nɛɛ hiɛ. Asafoi kɛ kui babaoo yɛ gbɛjianɔ ni amɛto kɛtaoɔ mɛi. Amɛfeɔ enɛ kɛtsɔ saramɔ ni amɛyasaraa akutsei amli kɛtaoɔ hei ni amɛbaanyɛ amɛkɛfata amɛshikpɔŋkuku ni amɛtsuɔ nii yɛ mli lɛ ahe lɛ nɔ. Onukpai akuu ni yɔɔ asafo ni kwɛɔ kuu lɛ nɔ lɛ mli lɛ baanyɛ ato gbɛjianɔ koni asafo muu lɛ fɛɛ kɛ amɛhe awo nitsumɔ nɛɛ mli be kɛ beaŋ.—Kwɛmɔ akrabatsa ni ji “Bɔ ni Ooofee Oná Mɛi ni Wieɔ Owiemɔ” lɛ.
5. (a) Mɛɛ ŋaawoi komɛi yɔɔ kɛha shiɛlɔi ni yataoɔ mɛi ni wieɔ wiemɔ pɔtɛɛ ko lɛ? (b) Mɛni wɔbaanyɛ wɔkɛɛ beni wɔtaoɔ mɛi lɛ?
5 Be fɛɛ be ni wɔkɛ wɔhe baawo mɛi ni wieɔ wiemɔ pɔtɛɛ ko lɛ ataomɔ mli lɛ, esa akɛ wɔha oti ko ahi wɔjwɛŋmɔ mli. Akɛni nifeemɔ nɛɛ fata wɔsɔɔmɔ nitsumɔ lɛ he hewɔ lɛ, esa akɛ be fɛɛ be lɛ wɔtadewoo kɛ wɔhesaamɔ atsɔɔ akɛ shiɛlɔi ji wɔ. Mɛi babaoo ena akɛ kɛ́ amɛtsɔ hiɛ amɛkase shiɛmɔ wiemɔ lɛ shii abɔ, ni amɛkɛ wiemɔ ni mɛi lɛ wieɔ lɛ tsu nii kɛtao mɛi lɛ, eyeɔ ebuaa amɛ ni amɛkɛ miishɛɛ tsuɔ, ni amɛhe saa yɛ wiemɔ lɛ kasemɔ mli. Wɔbaanyɛ wɔbu be ni wɔyeɔ kɛtaoɔ mɛi lɛ, shi jeee be ni wɔyeɔ kɛtoɔ shikpɔŋkuku lɛ kɛ ehe nibii krokomɛi ahe gbɛjianɔ lɛ. Kɛ́ wɔna mɔ ko ni wieɔ wiemɔ lɛ, esa akɛ wɔbɔ mɔdɛŋ wɔshiɛ wɔha lɛ, koni no sɛɛ lɛ wɔha shiɛmɔ nitsumɔ nɔkwɛlɔ lɛ loo mɔ ko ni ehala lɛ lɛ ale bɔni afee ni aŋma afata shikpɔŋkuku lɛ he saji lɛ ahe. Kɛ́ mɔ lɛ jie miishɛɛ kpo jio ejieee miishɛɛ kpo jio lɛ, esa ákɛ akɛ gbɛjianɔtoo nɛɛ atsu nii. Eyɛ mli akɛ mɛi ni wieɔ wiemɔ pɔtɛɛ ko lɛ ataomɔ he miihia moŋ, shi esa akɛ wɔŋmɛ pɛpɛɛpɛ koni wɔkɛ wɔhe awo nitsumɔ lɛ fãi srɔtoi lɛ fɛɛ amli.—Kwɛmɔ akrabatsa ni ji “Nɔ ni Esa Akɛ Okɛɛ kɛ́ Ootao Mɛi ni Wieɔ Wiemɔ Pɔtɛɛ ko” lɛ.
6. Mɛɛ naagbai komɛi abaanyɛ akɛkpe yɛ mumuii ataomɔ mli?
6 Kɛ́ Wɔmiitao Mumuii: Mumuii ataomɔ hu hiɛ ehe kwraa, ni ebiɔ mɔdɛŋbɔɔ kɛ faishitswaa. Jeee mɔ ko gbɛ́i, egbɔmɔtso lɛ he nii, loo etade tsɔɔ akɛ mumui ji lɛ. Kɛfata he lɛ, mɔ lɛ weku mli bii kɛ enanemɛi baasumɔ akɛ amɛbu ehe, ni ekolɛ amɛbasumɔŋ akɛ amɛbaaha shiɛlɔi lɛ ale mumui lɛ he saji. Abaanyɛ akɛ ŋaawoi ni nyiɛ sɛɛ nɛɛ ni akɛtaoɔ mumuii lɛ hu atsu nii kɛtao mɛi ni jeee mumuii.
7. (a) Mɛni abaanyɛ afee beni abiɔ mumuii ashi yɛ shĩai lɛ? (b) Te wɔɔfee tɛŋŋ wɔgbɔ mɔ ni wɔkɛbaakpe yɛ shĩa lɛ gbeyeishemɔ nɔ lɛ?
7 Asafoi kɛ kui ni kɛ mumuii awiemɔ feɔ kpee lɛ enyɛ eye omanye kɛtsɔ mumuii ashi ni amɛbiɔ yɛ shĩai lɛ anɔ. Ekolɛ, mɔ ni obaana yɛ shĩa lɛ le akutsoŋnyo ko, mɔ ko ni ekɛtsuɔ nii, loo mɔ ko ni ekɛyaa skul ni wieɔ mumuii awiemɔ. Ekolɛ ele mumuii askul ko. Ekolɛ, eyɛ wekunyo ko ni ji mumui. Ha ehi ojwɛŋmɔŋ akɛ mɛi ayiŋ baanyɛ afee amɛ enyɔɔnyɔ yɛ osaramɔ lɛ he. Kɛlɛ, kɛ́ ojie naanyobɔɔ su kpo, ofee owiemɔ kuku, ni ojɛ anɔkwayeli kɛ bulɛ mli ogbala nibii amli otsɔɔ mɔ ni okɛwieɔ lɛ, no baanyɛ agbɔ egbeyeishemɔ lɛ nɔ. Shiɛlɔi komɛi eye omanye kɛtsɔ Biblia lɛ loo DVD ni yɔɔ mumuii awiemɔ mli ni amɛkɛtsuɔ nii beni amɛbiɔ mumuii ashi yɛ mɛi ni amɛkɛkpeɔ yɛ shĩa lɛ adɛŋ lɛ nɔ lɛ. No sɛɛ lɛ, nɔ ni shiɛlɔi lɛ kɛɔ kɛkɛ ji, amɛmiisumɔ ni amɛkɛ mumui lɛ agba hiɛnɔkamɔ ni yɔɔ Biblia lɛ mli lɛ he sane. Kɛ́ mɔ lɛ emiii nɔ akɛ ebaaha ale mumui ko he sane po lɛ, ekolɛ kɛ́ oha lɛ wolo ni akɛfɔ̃ɔ mɛi anine kɛha asafoŋ kpee koni ekɛha ewekunyo loo enaanyo mumui lɛ, ebaahe.
8. Mɛɛ gbɛ nɔ asafo ko ni bɛŋkɛ mumuii asafo lɛ baanyɛ aye abua mumuii asafo lɛ?
8 Gbi kome loo gbii enyɔ yɛ afi lɛ mli lɛ, mumuii awiemɔ asafo ko baanyɛ afɔ̃ asafo ko ni bɛŋkɛ ni kɛ wiemɔ kroko feɔ kpee lɛ nine koni amɛbafata amɛhe kɛtao mumuii yɛ maji loo maŋtiasei ni yɔɔ mumuii asafo lɛ shikpɔŋkuku lɛ mli lɛ mli. Mumuii asafo lɛ baanyɛ ekɛ nitsumɔ nɛɛ he gbɛtsɔɔmɔi aha yɛ kpee ni amɛbaafee kɛha shiɛmɔyaa lɛ mli, ni afee ehe nɔkwɛmɔnɔ. Abaanyɛ aha mumuii asafo lɛ mli shiɛlɔ kome afata kuu fɛɛ fuu he, koni aha amɛ shikpɔŋ he wolo ni tsɔɔ he pɔtɛɛ ni amɛbaatao mumuii lɛ yɛ.
9. Mɛɛ gbɛ nɔ abaanyɛ atsɔ atsu mumuii ataomɔ nitsumɔ lɛ yɛ hei ni amɛbuaa amɛhe naa kɛha kpee loo hiɛtserɛjiemɔ, loo yɛ hei ni amɛnine shɛɔ yelikɛbuamɔ nɔ yɛ lɛ?
9 Abaanyɛ atao mumuii lɛ yɛ hei ni ale akɛ amɛbuaa amɛhe naa kɛha kpee kɛ hiɛtserɛjiemɔ, loo yɛ hei ni amɛnine shɛɔ yelikɛbuamɔ nɔ yɛ maŋ lɛ mli lɛ. Esa akɛ shiɛlɔi lɛ ahesaamɔ afee bɔ ni sa shihilɛ lɛ. Ebaahi jogbaŋŋ akɛ okɛ mɔ kome loo mɛi enyɔ aaagba sane, ni ofee nakai yɛ hiɛshikamɔ mli fe nɔ ni oooshiɛ oha kuu muu lɛ fɛɛ. Kɛ́ enya sanegbaa lɛ he lɛ, obaanyɛ obi ni eha bo efoŋ nɔmba loo oha etsɔɔ he ni obaana lɛ yɛ, ni bo hu oha ele onɔ.
10. Mɛɛ gbɛ nɔ shiɛlɔi baanyɛ atsɔ atao mumuii yɛ nitsumɔhei?
10 Nɔ kroko ni abaanyɛ afee ji ni abaaya nitsumɔhei tamɔ pɛtro hɔɔmɔ hei, nitsumɔhei ni afɔɔ nii ahe yɛ, niyelihei, loo hei tamɔ nakai. Yɛ nitsumɔhei ni tamɔ nɛkɛ lɛ amli lɛ, wɔbaanyɛ wɔbi kɛji nitsulɔi lɛ eko loo mɛi ni bayeɔ jara yɛ jɛmɛ lɛ eko wieɔ mumuii awiemɔ lo. Kɛ́ mumuii askul ko yɛ shikpɔŋkuku lɛ mli lɛ, wɔbaanyɛ wɔkɛ wɔwoji ni afee yɛ mumuii awiemɔ mli awo DVD nɔ lɛ eko aha amɛ.
11. Mɛni hewɔ mɛi ni wieɔ wiemɔ pɔtɛɛ ko lɛ ataomɔ ji shiɛmɔ nitsumɔ lɛ fã ko ni he hiaa waa lɛ?
11 Nitsumɔ Ko ni He Hiaa Waa: Mɛi ni wieɔ owiemɔ lɛ ataomɔ baanyɛ afee nɔ ko ni kaaa shi kwraa. Kɛfata he lɛ, bɔ ni mɛi fãa kɛshiɔ akutso ko mli kɛ bɔ ni mɛi komɛi hu fãa kɛbaa mli lɛ baanyɛ aha nakai akutso lɛ shihilɛ atsake oyayaayai, ni ehaa shikpɔŋkuku lɛ he woji lɛ ahe nitsumɔ jaraa. Fɛɛ sɛɛ lɛ, yɛ hei babaoo lɛ, mɛi ni wieɔ wɔwiemɔ lɛ ataomɔ ji shiɛmɔ nitsumɔ lɛ fã ko ni he hiaa waa. Yehowa, mɔ ni kɛ nitsumɔ ewo wɔdɛŋ akɛ wɔshiɛ lɛ kwɛɛɛ hiɛaŋ. (Bɔf. 10:34) ‘Eesumɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.’ (1 Tim. 2:3, 4) No hewɔ lɛ, nyɛhaa wɔkɛ Yehowa kɛ wɔnyɛmimɛi lɛ afea ekome kɛtao mɛi ni wieɔ wiemɔi srɔtoi fɛɛ ni hiɛ “tsui krɔŋŋ ni hi” lɛ.—Luka 8:15.
[Akrabatsa ni yɔɔ baafa 5]
Nyɛyea Nyɛbuaa Nyɛhe
Kɛ́ asafo loo kuu lɛ baasumɔ ni amɛye amɛbua kɛtao mɛi ni wieɔ wiemɔ ni amɛkɛfeɔ kpee lɛ koni amɛshiɛ amɛha amɛ lɛ, shiɛmɔ nitsumɔ nɔkwɛlɔ lɛ baanyɛ ekɛ onukpai ni yɔɔ asafoi krokomɛi ni bɛŋkɛ ni kɛ wiemɔ kroko feɔ kpee lɛ amli lɛ awie he. Ebaahi akɛ nyɛkɛ asafoi ni amɛkɛ nyɛteŋ jɛkɛɛɛ tsɔ loo asafoi ni mɛi ni wieɔ wiemɔ ni nyɛkɛfeɔ kpee lɛ fa yɛ amɛshikpɔŋkuku lɛ mli lɛ pɛ awie he. No sɛɛ lɛ, asafoi ni akɛ amɛ ewie he lɛ baanyɛ akɛɛ amɛshiɛlɔi lɛ akɛ kɛji amɛkɛ mɛi ni wieɔ nakai wiemɔ lɛ eko kpe lɛ, amɛŋmala mɛi lɛ agbɛ́i kɛ he ni amɛyɔɔ ni amɛkɛha shiɛmɔ nitsumɔ nɔkwɛlɔ lɛ koni ekɛha asafo loo kuu ni biɔ yelikɛbuamɔ lɛ. Shiɛmɔ nitsumɔ nɔkwɛlɔi ni yɔɔ asafoi ni ekɔɔ amɛhe lɛ amli lɛ baanyɛ amɛto gbɛjianɔ ni sa ni baaye abua asafoi enyɔ lɛ fɛɛ kɛtsu shikpɔŋkuku lɛ mli nii jogbaŋŋ kɛmɔ shi, koni amɛtsɔɔ mɛi ni yɔɔ wiemɔ lɛ he miishɛɛ lɛ gbɛ kɛya asafo loo kuu ni kɛ mɛi lɛ awiemɔ feɔ kpee lɛ mli.
Kɛ́ shiɛlɔi yana mɔ ko ni wieɔ wiemɔ kroko, ni ebafee faŋŋ akɛ eyɛ wiemɔ lɛ he miishɛɛ (loo amɛyana mɔ ko ni ji mumui) lɛ, esa akɛ amɛŋmala Please Follow Up (S-43) wolo lɛ nɔ nii oya nɔŋŋ ni amɛkɛyaha amɛsafo lɛ mli woloŋmalɔ lɛ. Enɛ baaha aye abua mɔ lɛ yɛ mumɔŋ oya nɔŋŋ.—Kwɛmɔ km 5/11 bf. 3.
[Akrabatsa ni yɔɔ baafa 6]
Bɔ ni Ooofee Oná Mɛi ni Wieɔ Owiemɔ
• Bi mɛi krokomɛi—Biblia mli nikaselɔi, wekumɛi, mɛi ni okɛtsuɔ nii, kɛ mɛi krokomɛi ni tamɔ nakai.
• Okɛ hiɛshikamɔ atsu nii kɛbi mɛi nɛɛ ashi yɛ nitsumɔhei, tamɔ wojiatoohei (libraries), amralo lɛ nitsumɔhei, kɛ kɔlejii nɛkɛ.
• Kwɛmɔ adafitswaa woji lɛ amli kɛha gwabɔi ni mɛi ni wieɔ wiemɔ kroko lɛ eto he gbɛjianɔ akɛ ebaaba nɔ yɛ akutso lɛŋ lɛ.
• Saramɔ shwapoi kɛ nitsumɔhei ni kɛ mɛi ni wieɔ wiemɔ kroko lɛ yeɔ jara loo nɔ ko tamɔ nakai lɛ.
• Kɛ́ obi gbɛ yɛ nɔkwɛlɔi ni yɔɔ nitsumɔhei, yunivɛsiti nikaselɔi agwabɔɔhe, loo tsɔji afoohe ni ale akɛ mɛi ni wieɔ nakai wiemɔ lɛ fɔɔ jɛmɛ yaa lɛ adɛŋ, ni akpɛlɛ nɔ lɛ, okɛ okpɔlɔ ko ama jɛmɛ ni okɛ asafo lɛ woji ni yɔɔ nakai wiemɔ lɛ mli lɛ ashwie nɔ.
[Akrabatsa ni yɔɔ baafa 7]
Nɔ ni Esa Akɛ Okɛɛ kɛ́ Ootao Mɛi ni Wieɔ Wiemɔ Pɔtɛɛ ko
Kɛ́ ojie naanyobɔɔ su kpo, ojɛ anɔkwayeli mli otee osane lɛ nɔ tɛ̃ɛ lɛ, ebaajie yiŋ enyɔɔnyɔ ni ahiɛ yɛ ohe lɛ. Bei pii lɛ, wolo ni yɔɔ ewiemɔ lɛ mli ni okɛaatsɔɔ lɛ lɛ yeɔ ebuaa waa.
Beni oŋa mɔ lɛ sɛɛ lɛ, obaanyɛ okɛɛ akɛ: “Wɔmiitao mɛi ni wieɔ ․․․․․ koni wɔkɛ amɛ agba hiɛnɔkamɔ ni yɔɔ Biblia lɛ mli lɛ he sane. Ani ole mɔ ko ni wɔbaanyɛ wɔkɛ lɛ awie?”
Kɛ́ ootao mumuii lɛ, obaanyɛ okɛɛ akɛ: “Hɛloo. Manyɛ mikɛ nɔ ko atsɔɔ bo? [Okɛ tsɔne bibioo ni akɛjieɔ vidio lɛ ajie New World Translation —On DVD nɔ lɛ mli ŋmalɛ kuku ko otsɔɔ lɛ.] Nɔ ni onaa nɛɛ ji Biblia mli wiemɔ kuku ko yɛ Amerika Mumuii Awiemɔ mli. Kɛfata Biblia lɛ he lɛ, wɔyɛ vidioi srɔtoi ni ahɔ̃ɔɔ, ni ato he gbɛjianɔ koni akɛtsu mumuii amumɔŋ hiamɔ nii ahe nii. Ani ole mɔ ko ni eji mumui loo toimulɔ ni ewieɔ mumuii awiemɔ?” Kɛ́ mɔ lɛ nyɛɛɛ ekai mɔ ko lɛ, bei pii lɛ, ebaahi akɛ obaatsĩ hei komɛi ni ekolɛ ena mumui yɛ pɛŋ lɛ atã, tamɔ nitsumɔhe, skul, loo ekutso lɛ mli nɛkɛ.