Bɔɔ Ekpakpafeemɔ He Mɔdɛŋ!
1 Beni afi 2003 Kaimɔ be lɛ heɔ ashɛ lɛ, wɔyɛ yiŋtoi babaoo ni wɔɔdamɔ nɔ ni ‘wɔbɔ ekpakpafeemɔ he mɔdɛŋ.’ (1 Pet. 3:13) Yiŋtoi nɛɛ ateŋ nɔ ni he hiaa fe fɛɛ lɛ ji Yesu Kristo kpɔmɔ afɔleshaa lɛ. (Mat. 20:28; Yoh. 3:16) Beni bɔfo Petro wieɔ enɛ he lɛ, eŋma akɛ: “Jeee nibii ni fiteɔ, taakɛ jwiɛtɛi loo shika, aŋɔkpɔ̃ nyɛ kɛjɛ nyɛ yaka jeŋba ni nyɛná . . . lɛ mli, shi moŋ, kɛ Kristo mɔ ni tamɔ toobi ni he bɛ kpa loo ŋmamɔnɔ ko lɛ lá ni jara wa lɛ.” (1 Pet. 1:18, 19) Hiɛsɔɔ ni wɔyɔɔ kɛha nɛkɛ suɔmɔ ni nɔ bɛ nɛɛ lɛ kanyaa wɔ ni ehaa wɔbɔɔ ekpakpafeemɔ he mɔdɛŋ, ni wɔyɔseɔ akɛ Yesu “ŋɔ lɛ diɛŋtsɛ ehe eha yɛ wɔnajiaŋ, koni ekpɔ̃ wɔ kɛjɛ nɔtɔmɔ fɛɛ mli, ni etsuu wɔhe efee lɛ diɛŋtsɛ emaŋ krɔŋŋ ní hiɛ dɔɔ nitsumɔi kpakpai ahe lɛ.”—Tito 2:14; 2 Kor. 5:14, 15.
2 Kɛ́ wɔfee nibii ni sa Nyɔŋmɔ hiɛ lɛ, wɔnáa wɔkɛ lɛ teŋ wekukpaa kpakpa mli ŋɔɔmɔ ni wɔbajeɔ esuɔmɔ kwɛmɔ shishi. Petro tee nɔ ewie akɛ: “Mɔ ni taoɔ akɛ etsɛ yɛ jeŋ ni ena gbii kpakpai lɛ, . . . ewi efɔŋ ni efee ekpakpa, etao hejɔlɛ ni enyiɛ no sɛɛ. Ejaakɛ [Yehowa, NW] hiŋmɛii kã jalɔi ahe, ni eboɔ amɛfaikpamɔ toi.” (1 Pet. 3:10-12) Yɛ nɛkɛ jaramɔ bei nɛɛ mli lɛ, mɛɛ jɔɔmɔ eji nɛkɛ akɛ wɔɔle akɛ Yehowa miikwɛ wɔnɔ ni efee klalo akɛ ebaaye ebua wɔ, ní ‘ébaa wɔyi tamɔ ehiŋmɛi mli ajaŋmalaatɛ.’—5 Mose 32:10; 2 Kron. 16:9.
3 Yɛ kaai ni klɛŋklɛŋ Kristofoi ni Petro ŋma amɛ wolo lɛ kɛkpeɔ lɛ fɛɛ sɛɛ lɛ, awo amɛ hewalɛ kɛ ekãa waa ni amɛjaje sanekpakpa lɛ kɛyashɛ shɔŋŋ bɔ ni amɛaanyɛ. (1 Pet. 1:6; 4:12) Nakai nɔŋŋ hu eji yɛ Nyɔŋmɔ webii agbɛfaŋ ŋmɛnɛ. Eyɛ mli akɛ wɔyɛ “jaramɔ bei” amli moŋ, shi hiɛsɔɔ ni wɔyɔɔ yɛ Yehowa ejurɔfeemɔ he lɛ kanyaa wɔ ni wɔkɛ ekãa feɔ Nyɔŋmɔ suɔmɔnaa nii. (2 Tim. 3:1; Lala 145:7) Nyɛhaa wɔsusua nitsumɔi kpakpai ni wɔbaatsu he nii yɛ Kaimɔ be lɛ mli lɛ ateŋ ekomɛi ahe wɔkwɛa.
4 Fɔ̃ɔ Mɛi Krokomɛi Nine Kɛba Kaimɔ lɛ Shishi: Gbɛ kome ni wɔbaanyɛ wɔtsɔ nɔ ni wɔjie hiɛsɔɔ kpo yɛ nikeenii ni nɔ bɛ, ni ji kpɔmɔnɔ lɛ he ji ni wɔya daa afi Yesu gbele lɛ kaimɔ lɛ shishi, nɔ ni abaaye afi nɛɛ nɔ̃ lɛ yɛ Shɔ, April 16 beni hulu enyɔ shi sɛɛ lɛ. (Luka 22:19, 20) Nyɛsɛɛ afi lɛ, beni asafoi 94,600 ni yɔɔ jeŋ fɛɛ lɛ bu akɔntaa lɛ, wɔná mɛi ayibɔ ni naa shɛɔ 15,597,746! Eji yibɔ ni fa fe mɛi ni ba nifeemɔ lɛ shishi nyɛsɛɛ afi lɛ kɛ mɛi 220,000.
5 Mɛi enyiɛ baaba afi nɛɛ? Babaoo baadamɔ bɔ ni wɔbaabɔ mɔdɛŋ diɛŋtsɛ wɔha ni wɔwo mɛi krokomɛi hewalɛ ni amɛbafata wɔhe lɛ nɔ. Jee shishi kɛtsɔ mɛi fɛɛ ni obaasumɔ ni ofɔ̃ amɛ nine lɛ agbɛi ni oooŋmala lɛ nɔ. Mɛi ni esa akɛ okai amɛ titri ji oweku mli bii ni bɛŋkɛ bo kpaakpa lɛ. Kɛji akɛ ohefatalɔ lɛ jeee heyelilɔ lɛ, jɛɛ otsui mli okɛɛ owu lɛ loo oŋa lɛ akɛ oosumɔ ni efata ohe kɛya nifeemɔ lɛ shishi. Wu ko ni ejeee heyelilɔ kɛɛ akɛ, etee nyɛsɛɛ afi lɛ Kaimɔ lɛ eko ejaakɛ ena bɔ ni jɛmɛ ni ebaaya lɛ he hiaa eŋa ha lɛ waa. No sɛɛ lɛ, mɛi ni obaanyɛ oŋma amɛgbɛi ji wekumɛi, akutsoŋbii, mɛi ni okɛtsuɔ nii, loo mɛi ni okɛyaa skul. Bɔɔ mɔdɛŋ ni ofɔ̃ o-Biblia mli nikaselɔi lɛ anine.
6 Be mli ni oŋmala gbɛi lɛ ogbe naa lɛ, too be ni okɛfɔ̃ amɛteŋ mɔ fɛɛ mɔ nine. Okɛ Kaimɔ lɛ he ninefɔɔ wolo ni akala lɛ atsu nii. Bɔni afee ni oye obua mɛi koni amɛkai be kɛ he ni abaafee Kaimɔ lɛ yɛ lɛ, okɛ taip-raita atswa loo okɛ onine aŋma be kɛ he ni abaafee yɛ lɛ jogbaŋŋ ni eje shi faŋŋ yɛ ninefɔɔ wolo lɛ shishigbɛ. Beni April 16 heɔ ashɛ lɛ, kaimɔ mɛi ni oŋmala amɛgbɛi lɛ kɛtsɔ amɛŋɔɔ ni oooya tɛ̃ɛ loo kɛtsɔ tɛlifoŋ nɔ. Nyɛhaa wɔyea wɔbua mɛi babaoo bɔ ni wɔɔnyɛ koni amɛba nifeemɔ ni yɔɔ krɔŋkrɔŋ fe fɛɛ nɛɛ shishi.
7 Ye Obua Mɛi ni Ba Kaimɔ lɛ Shishi Lɛ: Gbi gbɛkɛ kɛha Kaimɔ lɛ ji nifeemɔ be ko ni yɔɔ miishɛɛ be fɛɛ be. Wɔnáa hegbɛ wɔkɛhereɔ aŋkroaŋkroi ni efɔɔɔ wɔkpeei baa lɛ ahiɛmɛɛ. Too gbɛjianɔ ni obashɛ shi mra ní osɛɛ atsɛ dani oshi, yɛ bɔ ni shihilɛi ni yɔɔ he ni oyɔɔ lɛ baaŋmɛ gbɛ ahã lɛ naa. Tsɔ̃ hiɛ klɛŋklɛŋ ni okɛ hegbɛ lɛ atsu nii ni okɛle mɛi heei ni eba lɛ. Jiemɔ hedɔɔ kɛ suɔmɔ kpo.—Rom. 12:13.
8 Ani abaanyɛ aye abua mɛi ni ba Kaimɔ lɛ shishi lɛ ateŋ mɛi komɛi ni amɛná mumɔŋ hiɛyaa kɛtsɔ shia Biblia mli nikasemɔ nɔ? Bɔɔ mɔdɛŋ ni oŋmala gbɔi ni amrɔ nɛɛ mɔ ko esaraaa amɛ lɛ agbɛi kɛ amɛ adrɛs bɔni afee ni onyɛ okɛ yelikɛbuamɔ ni he hiaa lɛ aha amɛ. Kɛ́ ajɛ suɔmɔ mli aye abua amɛ lɛ, ekolɛ mɛnɛɛmɛi ateŋ mɛi komɛi baaya amɛhiɛ ni amɛhe baasa ákɛ shiɛlɔi ni abaptisiko amɛ dani wɔsɛɛ afi Kaimɔ be lɛ aaashɛ. Beni osaraa mɛi ni ba Kaimɔ lɛ shishi lɛ, fɔ̃ɔ amɛ nine kɛha maŋshiɛmɔ krɛdɛɛ ni abaaha April 27 lɛ.
9 Ani Obaanyɛ Ofee Gbɛgbalɔi Awalɔ yɛ Kaimɔ Be Nɛɛ Mli? Daa afi lɛ, ekãa ni wɔyɔɔ kɛha Yehowa lɛ kanyaa wɔ koni wɔkɛ wɔhewalɛ atsu nii yɛ sɔɔmɔ nitsumɔ lɛ mli kɛmɔ shi yɛ nyɔji ni atsuɔ teokrase nitsumɔi krɛdɛɛi ahe nii yɛ mli lɛ mli. Ákɛ nɔkwɛmɔnɔ lɛ, yɛ March yɛ nyɛsɛɛ afi lɛ mli lɛ, shiɛlɔi 6,555 kɛ amɛhe wo gbɛgbalɔi awalɔ nitsumɔ lɛ mli. Kɛtsɔ Yehowa jɔɔmɔi anɔ lɛ, nɔyaa ba yɛ sɔɔmɔ nitsumɔ lɛ fãi srɔtoi lɛ fɛɛ mli, ni mɛi 237,309 ba Kaimɔ lɛ shishi. Enɛ tsɔɔ akɛ kɛji wɔfee ekome kɛshiɛ sanekpakpa lɛ yɛ Kaimɔ be lɛ mli lɛ, ebaanyɛ ewo yibii kpakpai.
10 Asafo ko ni shiɛlɔi 107 kɛ daa gbɛgbalɔi 9 yɔɔ mli lɛ bɔ amaniɛ akɛ amɛná “nyɔŋ ko ni nɔ bɛ” nyɛsɛɛ April nyɔŋ lɛ, beni mɛi 53 kɛ amɛhe wo gbɛgbalɔi awalɔ nitsumɔ lɛ mli, ní asafoŋ onukpai lɛ kɛ asafoŋ sɔɔlɔi lɛ fɛɛ fata he lɛ. Mɛɛ gbɛ nɔ onukpai lɛ tsɔ̃ amɛtswa ekãa kɛha gbɛgbalɔi awalɔ nitsumɔ lɛ amɛma shi kɛha nakai nyɔŋ lɛ? Amɛje shishi mra ni amɛwo mɛi babaoo ni amɛbaanyɛ hewalɛ koni amɛkɛ amɛhe awo mli. Ato kpee kɛha shiɛmɔyaa he gbɛjianɔ yɛ bei srɔtoi amli yɛ gbi lɛ mli bɔni afee ni enyɛ ehi eha mɛi fɛɛ ni yɔɔ asafo lɛ mli lɛ. Ama tɛlifoŋ nɔ odaseyeli nɔ mi jogbaŋŋ diɛŋtsɛ, titri lɛ kɛha mɛi ni bɛ gbɔmɔtsoŋ hewalɛ lɛ.
11 Nyɛmi yoo ko ni eye afii 86, ni nyɛɛɛ anyiɛ yɛ gbɔmɔtsoŋ naagbai ahewɔ lɛ kɛ egbɛi ha kɛha gbɛgbalɔi awalɔ nitsumɔ lɛ. Kɛ́ eje shishi kɛjɛ leebi lɛ, ekɛ ŋmɛlɛtswai enyɔ loo nɔ̃ tsuɔ tɛlifoŋ nɔ odaseyeli beni eta niyeli okpɔlɔ he, ni ejɔ́ɔ ehe ŋmɛlɛtswai fioo ko kɛkɛ lɛ eku esɛɛ ebatsu ekoŋŋ. Mɔ ko ni ekɛ lɛ gba sane lɛ wu kɛ ebihii enyɔ ni eye kɛjɛ afii nyɔŋma kɛ etɛ lɛ eje mli yɛ afii enyɔ ni eho lɛ mli, ni enuuu nɔ hewɔ ni Nyɔŋmɔ ŋmɛɔ nibii gbohii ni tamɔ nɛkɛ gbɛ lɛ shishi. Aye lɛ odase jogbaŋŋ kɛmɔ shi, ni aje Biblia mli nikasemɔ shishi. Tɛlifoŋ nɔ odase ni ayeɔ gbɛkɛ kɛ yɛ bei krokomɛi amli lɛ ji gbɛ ni hi jogbaŋŋ ni atsɔɔ nɔ ahaa nine shɛɔ mɛi ni yɔɔ shiai loo akutseiaŋ hei ni anyɛɛɛ aya jɛmɛ lɛ anɔ. Enyɛɔ eyeɔ ebuaa shiɛlɔi hu ni amɛnine shɛɔ mɛi ni bɛ shia leebi lɛ anɔ.
12 Asafoŋ onukpai lɛ mu amɛ amaniɛbɔɔ lɛ naa kɛtsɔ enɛ kɛɛmɔ nɔ akɛ: “Wɔná bei ni hi fe fɛɛ nɛɛ mli ŋɔɔmɔ, ni wɔhiɛ sɔ hegbɛi kɛ jɔɔmɔi ni Yehowa ha wɔteŋ mɔ fɛɛ mɔ nine shɛ nɔ lɛ waa diɛŋtsɛ.” Kɛ́ asafo ni oyɔɔ mli lɛ to gbɛjianɔ jogbaŋŋ lɛ, amɛ hu amɛnine baanyɛ ashɛ jɔɔmɔi ni tamɔ nɛkɛ nɔ.
13 Nyɛbɔa Mɔdɛŋ ni Mɔ Fɛɛ Mɔ kɛ Ehe Awo Shiɛmɔ Nitsumɔ lɛ Mli: Suɔmɔ ni wɔyɔɔ kɛha Nyɔŋmɔ kɛ naanyo gbɔmɔ lɛ tsirɛɔ wɔ ni wɔtoɔ be nyɔŋ fɛɛ nyɔŋ nɔ koni wɔkɛ mɛi agba sanekpakpa lɛ he sane. (Mat. 22:37-39) Asafo Woloŋ Nikasemɔ nɔkwɛlɔi lɛ kɛ amɛsɛɛkwɛlɔi abɔ mɔdɛŋ fɛɛ ni amɛaanyɛ ni amɛye amɛbua amɛkuu lɛ mli bii lɛ ni amɛkɛ amɛhe awo shiɛmɔ nitsumɔ lɛ mli nyɔŋ fɛɛ nyɔŋ nɔ. Gbɛ ni hi jogbaŋŋ ni akɛaafee enɛ ji ni atsɔ hiɛ ato gbɛjianɔ ni akɛ aŋkroaŋkroi pɔtɛɛi komɛi ni yɔɔ kuu lɛ mli lɛ atsu nii yɛ shiɛmɔ nitsumɔ lɛ mli. Yɛ nɔ najiaŋ ni ooomɛ kɛyashi nyɔŋ lɛ naagbee gbɛ dani ofee enɛ lɛ, jee shishi mra. Enɛ baaha oná hegbɛi babaoo ni okɛ yelikɛbuamɔ ni suɔmɔ yɔɔ mli aha.
14 Ani shiɛlɔi ni bɛ gbɔmɔtsoŋ hewalɛ lɛ yɛ okuu lɛ mli, ní ewa waa kɛha amɛ akɛ amɛkɛ amɛhe aaawo shiɛmɔ nitsumɔ lɛ mli? Kɛji akɛ amɛteŋ mɛi komɛi yɛ helatsamɔhe loo amɛka tsũ mli lɛ, eyɛ faŋŋ akɛ hegbɛi fioo ko pɛ amɛbaaná ni amɛkɛye odase. Shi kɛji akɛ amɛkɛ hegbɛi fioo pɛ ni amɛyɔɔ lɛ tsu nii ní amɛha amɛla lɛ kpɛ́ lɛ, ekolɛ amɛbaakanya mɛi ni naa amɛnitsumɔi kpakpai lɛ ni amɛná suɔmɔ diɛŋtsɛ amɛha anɔkwale lɛ. (Mat. 5:16) Esa akɛ asafo woloŋ nikasemɔ nɔkwɛlɔi akwɛ koni mɛi ni tamɔ nɛkɛ lɛ ale akɛ amɛbaanyɛ amɛbu shiɛmɔ nitsumɔ lɛ he akɔntaa kɛjɛ minitii 15, 30 kɛ 45 kɛtsara nɔ nakai. Kɛji akɛ nɛkɛ shiɛlɔi anɔkwafoi nɛɛ nyɛ amɛbu be ni amɛkɛshiɛ lɛ he akɔntaa lɛ, ehaa amɛnáa miishɛɛ. Eyeɔ ebuaa hu ni akwɛ koni Nyɔŋmɔ webii ajeŋ muu fɛɛ shiɛmɔ nitsumɔ lɛ he akɔntaabuu lɛ aja jogbaŋŋ kɛmɔ shi.
15 Oblahii kɛ Oblayei ni Bɔɔ Ekpakpafeemɔ He Mɔdɛŋ! Kwɛ bɔ ni eyɔɔ miishɛɛ akɛ aaana ni Kristofoi oblahii kɛ oblayei kɛ amɛhewalɛ kɛ nyɛmɔ miitsu nii yɛ Yehowa sɔɔmɔ lɛ mli! (Abɛi 20:29) Kɛji akɛ oji oblanyo loo oblayoo lɛ, te ooofee tɛŋŋ ojie ekãa ni oyɔɔ kɛha Yehowa lɛ kpo yɛ nɛkɛ nyɔji krɛdɛɛi ni abaatsu nii yɛ mli lɛ nɔ lɛ?
16 Kɛji akɛ amrɔ nɛɛ oji shiɛlɔ ni abaptisiko lɛ yɛ asafo lɛ mli lɛ, ani ohe baanyɛ asa kɛha nakai hegbɛ lɛ? Bi ohe saji ni nyiɛ sɛɛ nɛɛ: ‘Ani miyɛ Biblia mli anɔkwale lɛ he shishijee nilee? Ani miisumɔ ni mikɛ mihe awo Maŋtsɛyeli sɔɔmɔ lɛ mli? Ani mibaa mijeŋ jogbaŋŋ? Ani mi diɛŋtsɛ minyɛɔ migbaa hemɔkɛyeli ni miyɔɔ lɛ he sane kɛtsɔ mɛi krokomɛi ni migbaa amɛ sanekpakpa lɛ he sane lɛ nɔ? Ani mitsui kanyaa mi ni mafee nakai?’ Kɛji akɛ obaanyɛ oha nakai sanebimɔi lɛ ahetoo akɛ hɛɛ lɛ, belɛ okɛ ofɔlɔi agba bɔ ni osumɔɔ akɛ obatsɔ shiɛlɔ lɛ he sane. Ofɔlɔi baanyɛ amɛkɛ onukpai ni amɛji sɔɔmɔ ajinafoi akuu lɛ mli bii lɛ ateŋ mɔ fɛɛ mɔ agba he sane.
17 Kɛ́ oji sanekpakpa lɛ he shiɛlɔ momo lɛ, ani obaanyɛ okɛ skul gbɛhamɔ be lɛ atsu nii ni okɛlɛɛ osɔɔmɔ nitsumɔ lɛ mli? Kɛtsɔ gbɛjianɔtoo kpakpa kɛ yelikɛbuamɔ ni jɛ fɔlɔi kɛ mɛi krokomɛi adɛŋ lɛ nɔ lɛ, oblahii kɛ oblayei babaoo ní abaptisi amɛ lɛ ényɛ amɛkɛ amɛhe ewo gbɛgbalɔi awalɔ nitsumɔ lɛ mli. Kɛji akɛ ehiŋ nakai feemɔ lɛ, belɛ bɔɔ mɔdɛŋ ni oha oshiɛmɔ nitsumɔ lɛ aya hiɛ. Okɛ oti ko ama ohiɛ. Kɛfata ŋmɛlɛtswai abɔ ni obaaye lɛ he oti ni okɛaama ohiɛ lɛ he lɛ, okɛ oti kroko hu ni kɔɔ bɔ ni oshiɛmɔ nitsumɔ lɛ baamɔ shi eha lɛ he lɛ ama ohiɛ. Ekolɛ obaabɔ mɔdɛŋ ni okane ŋmalɛ kome ko yɛ shinaa fɛɛ shinaa naa, oha osɛɛkuu kɛ saramɔi lɛ aya hiɛ, oje Biblia mli nikasemɔ shishi, loo olɛɛ oshiɛmɔ nitsumɔ lɛ mli ni okɛ tɛlifoŋ nɔ odaseyeli afata he, loo sɔɔmɔ nitsumɔ lɛ fãi krokomɛi. Ni oti ni okɛaama ohiɛ ni kɔɔ onaanyo, skulnyo, loo wekunyo ko ni aaafata ohe kɛya Kaimɔ lɛ shishi afi nɛɛ hu? Teokrase nifeemɔi ni okɛ ohe aaawo mli jogbaŋŋ kɛmɔ shi lɛ baafee nɔ ni haa mɔ náa miishɛɛ, ni eka shi faŋŋ akɛ ebaawo mɛi krokomɛi ni yɔɔ asafo lɛ mli lɛ hewalɛ.—1 Tes. 5:11.
18 Ye Obua Mɛi Heei lɛ ni Amɛná Hiɛyaa: Yɛ nyɛsɛɛ sɔɔmɔ afi lɛ mli lɛ, kɛ aja mli lɛ afeɔ shia Biblia mli nikasemɔi 157,378 daa nyɔŋ nɔ yɛ Ghana. Etsɛŋ tsɔ̃ ni mɛnɛɛmɛi ateŋ mɛi babaoo he baasa kɛyashɛ henɔjɔɔmɔ kɛ baptisimɔ he. Ni kɛlɛ, dani amɛbaashɛ nakai oti lɛ he lɛ, esa akɛ wɔye wɔbua amɛ ni amɛhe asa akɛ sanekpakpa lɛ he shiɛlɔi. Enɛ ji oti ko ni he hiaa waa kɛji wɔmiitsɔɔ mɛi heei lɛ anii ni amɛbatsɔmɔ Yesu Kristo sɛɛnyiɛlɔi. (Mat. 9:9; Luka 6:40) Ani oyɛ Biblia mli nikaselɔ ko ni he esa momo akɛ ekɛ ehe baawo mli?
19 Kɛji akɛ obɛ nɔmimaa yɛ onikaselɔ lɛ nɔyaa he lɛ, bi owoloŋ nikasemɔ nɔkwɛlɔ lɛ loo sɔɔmɔ nitsumɔ nɔkwɛlɔ lɛ ni eye ebua bo. Ekolɛ obaanyɛ ofɔ̃ lɛ nine ni efata ohe yɛ nikasemɔ be lɛ mli. Nɛkɛ nyɛmimɛi nɛɛ yɛ niiashikpamɔ ni nɔ bɛ ni abaanyɛ adamɔ nɔ akwɛ bɔ ni nikaselɔ lɛ mumɔŋ hiɛyaa tamɔ eha. Ekolɛ amɛyɛ ŋaawoi komɛi ni baaye abua nikaselɔ lɛ ni eya nɔ ená mumɔŋ hiɛyaa.
20 Kɛ́ onikaselɔ lɛ kɛɛ bo akɛ eetao ni etsɔ shiɛlɔ ni abaptisiko lɛ ni osusuɔ akɛ ehe esa lɛ, okɛ onukpai asɛinɔtalɔ lɛ agba he sane. Ebaato gbɛjianɔ ni onukpai enyɔ kɛ bo kɛ onikaselɔ lɛ akpe ni akwɛ akɛ ehe esa lo, ni akɛ saji ni jeɔ kpo yɛ Our Ministry wolo lɛ baafa 98-99 lɛ baatsu he nii. (Kwɛmɔ The Watchtower, November 15, 1988, baafa 17.) Kɛ́ akpɛlɛ nikaselɔ lɛ nɔ akɛ etsɔ shiɛlɔ ni abaptisiko lɛ lɛ, jee shishi obɔi lɛ tsɔsemɔ amrɔ nɔŋŋ. Kɛ́ ekɛ eshiɛmɔyaa he akɔntaabuu ha nɔŋŋ lɛ, abaatswa asafo lɛ adafi akɛ nikaselɔ lɛ ebatsɔ shiɛlɔ ni abaptisiko lɛ. Eji wɔ gbɛkpamɔ akɛ shiɛlɔi heei akpei abɔ, gbekɛbii kɛ onukpai fɛɛ baanyɛ ashɛ nɛkɛ mumɔŋ oti ni sa kadimɔ waa nɛɛ he yɛ nɛkɛ nyɔji krɛdɛɛi ni nitsumɔ yɔɔ mli nɛɛ mli.
21 Gbɛjianɔtoo Yeɔ Ebuaa ni Atsuɔ Nii Jogbaŋŋ: Gbɛjianɔ ni atsɔɔ hiɛ atoɔ mra lɛ baaye abua ni wɔ teokrase nitsumɔi lɛ aye omanye yɛ Kaimɔ be nɛɛ mli. (Abɛi 21:5) Saji babaoo yɛ ni esa akɛ onukpai lɛ asusu he.
22 Bɔni afee ni onukpai lɛ aye abua asafo lɛ ni shiɛmɔ nitsumɔ lɛ amɔ shi jogbaŋŋ lɛ, esa akɛ amɛto gbɛjianɔi ni anyɛɔ atsuɔ he nii ni amɛto kpee kɛha shiɛmɔyaa he gbɛjianɔ yɛ otsi lɛ mli fɛɛ, kɛ otsi lɛ naagbee hu. Esa akɛ sɔɔmɔ nitsumɔ nɔkwɛlɔ lɛ anyiɛ hiɛ yɛ nɛkɛ gbɛjianɔtoi nɛɛ amli. Ani abaanyɛ ato kpeei krokomɛi ahe gbɛjianɔ kɛfata he kɛha leebi mra, shwane, loo gbɛkɛnaashi? Esa akɛ atswa asafo lɛ adafi yɛ gbɛjianɔ ni ato lɛ he. Ebaanyɛ eye ebua jogbaŋŋ kɛji ákɛ akɛ gbɛjianɔtoo he wolo lɛ kpɛtɛ adafitswaa tao lɛ nɔ.
23 Esa akɛ onukpai lɛ ato Kaimɔ be lɛ he gbɛjianɔ kwraa kɛtsɔ hiɛ dani April 16 ashɛ. Nɔ ni fata enɛ he ji ní akɛ asafoi ni ekolɛ amɛkɛ Maŋtsɛyeli Asa lɛ baatsu nii lɛ afee ekome, Maŋtsɛyeli Asa lɛ nɔ saamɔ, mɛi ni abaahala ni amɛkwɛ shitaramɔ nɔ kɛ mɛi ni kɛ aboloo kɛ wein lɛ baaha, kɛ bɔ ni aaafee ni nine ashɛ okadi nibii lɛ nɔ. Esa akɛ atswa asafo lɛ be kɛ he ni abaafee Kaimɔ lɛ yɛ lɛ kɛ tsakemɔi ni afee yɛ kpee kɛha otsi lɛ mli lɛ he adafi. Kɛji atsu nibii nɛɛ ahe nii jogbaŋŋ lɛ, ebaaha kaimɔ lɛ ‘afee nɔ ni yɔɔ fɛo kɛ gbɛnaa gbɛnaa.’—1 Kor. 14:40.
24 Ekolɛ wekuyitsei baasumɔ ni amɛkɛ amɛweku nikasemɔ be lɛ eko asusu bɔ ni weku lɛ baanyɛ aná Kaimɔ be lɛ mli nitsumɔ ni baaya hiɛ lɛ mli gbɛfaŋnɔ kɛmɔ shi lɛ he. Ani oweku muu lɛ fɛɛ baanyɛ amɛkɛ amɛhe awo gbɛgbalɔi awalɔ nitsumɔ lɛ mli? Aloo ani weku lɛ baanyɛ aye abua mɔ kome loo mɛi ni fe nakai ni amɛkɛ amɛhe awo mli? Kɛji nakai feemɔ ebahiŋ lɛ, nyɛkɛ otii pɔtɛɛi amamɔa nyɛhiɛ ákɛ weku ni nyɛkɛ be babaoo atsua nii yɛ shiɛmɔ nitsumɔ lɛ mli. Ani mɔ ko yɛ weku lɛ mli ni edako, ní kɛ́ akɛ ekãawoo kɛ yelikɛbuamɔ fioo ko ha lɛ lɛ, ebaanyɛ ebatsɔ shiɛlɔ ni abaptisiko lɛ? Mɛi enyiɛ oweku lɛ baanyɛ afɔ̃ nine atsɛ amɛ kɛba Kaimɔ lɛ shishi afi nɛɛ? Gbɛjianɔtoo kpakpa kɛ sɛɛnamɔi babaoo kɛ miishɛɛ kpelei baaba ebaha oweku lɛ.
25 Okɛ Be ni Eshwɛ lɛ Atsu Nii Jogbaŋŋ: Beni bɔfo Petro ŋmaa klɛŋklɛŋ afii oha lɛ mli Kristofoi lɛ, ekai amɛ bɔ ni hiamɔ eba bei lɛ ahe eha ejaakɛ Yudafoi agbɛjianɔtoo lɛ naagbee ebɛŋkɛ. (1 Pet. 4:7) Ŋmɛnɛ, nibii fɛɛ miitsɔɔ akɛ amrɔ nɛɛ nibii agbɛjianɔtoo lɛ naagbee eshɛ etã. Esa akɛ bɔ ni wɔbaa wɔjeŋ wɔhaa daa gbi lɛ atsɔɔ nakai yiŋtsɔmɔ lɛ. Ákɛ Yehowa tsuji ni yɔɔ ekãa lɛ, esa akɛ wɔha wɔjwɛŋmɔ ahi nitsumɔ ni he hiaa, ni ji sanekpakpa lɛ jajemɔ lɛ nɔ.—Tito 2:13, 14.
26 Amrɔ nɛɛ ji be ni esa akɛ wɔkɛ ekãa atsu nii! Jwɛŋmɔ nibii ni Yehowa efee kɛha bo, oweku lɛ, kɛ asafo lɛ nɔ. Eyɛ mli akɛ wɔnyɛŋ wɔto Yehowa najiaŋ yɛ nibii srɔtoi ni efee eha wɔ lɛ ahe kɔkɔɔkɔ moŋ, shi wɔbaanyɛ wɔjɛ wɔtsui muu fɛɛ mli wɔjá lɛ. (Lala 116:12-14) Abaajɛ ŋwɛi akɛ jɔɔmɔi awo wɔ mɔdɛŋbɔi lɛ ahe nyɔmɔ. (Abɛi 10:22) Eba akɛ wɔ fɛɛ wɔbaabɔ “ekpakpafeemɔ he mɔdɛŋ” yɛ nɛkɛ be krɛdɛɛ ni nitsumɔ fa yɛ mli nɛɛ mli, “koni atsɔ Yesu Kristo nɔ awo Nyɔŋmɔ hiɛ nyam yɛ nii fɛɛ mli.”—1 Pet. 3:13; 4:11.
[Caption on page 3]
Mɛi ni Ba Kaimɔ lɛ yɛ Jeŋ Fɛɛ
1999 14,088,751
2000 14,872,086
2001 15,374,986
2002 15,597,746
[Caption on page 4]
Namɔ Obaafɔ̃ lɛ Nine Kɛha Kaimɔ Lɛ?
□ Weku mli bii ni bɛŋkɛ kpaakpa kɛ wekumɛi
□ Akutsoŋbii kɛ mɛi ni ole
□ Nanemɛi nitsulɔi kɛ skulbii
□ Sɛɛkuu kɛ saramɔi kɛ Biblia mli nikaselɔi
[Caption on page 5]
Ye Obua Mɛi ni Baa Kaimɔ Lɛ
□ Okɛ miishɛɛ akpee amɛ
□ Too gbɛjianɔ kɛha sɛɛkuu kɛ saramɔi
□ Too Biblia mli nikasemɔ he gbɛjianɔ oha amɛ
□ Fɔ̃ɔ amɛ nine kɛba maŋshiɛmɔ krɛdɛɛ lɛ shishi
[Caption on page 6]
Mɛɛ Otii Okɛmamɔ Ohiɛ yɛ Kaimɔ Be lɛ Mli?
□ Ha mɔ ko ni ofɔ̃ lɛ nine lɛ aba Kaimɔ lɛ
□ Ohe asa ákɛ sanekpakpa shiɛlɔ
□ Yé ŋmɛlɛtswai pɔtɛɛ ko yɛ shiɛmɔ nitsumɔ lɛ mli
□ Ná hiɛyaa yɛ shiɛmɔ nitsumɔ lɛ fã ko mli
□ Sɔɔmɔ akɛ gbɛgbalɔi awalɔ