Nyɛhaa Wɔhiɛa Wɔjamɔhe lɛ Jogbaŋŋ
1. Mɛɛ yiŋtoo he nii Maŋtsɛyeli Asa lɛ tsuɔ?
1 Ayɛ Yehowa Odasefoi asafoi ni fa fe 94,000 yɛ jeŋ fɛɛ. Asafoi babaoo kpeɔ kɛha Biblia lɛ kasemɔ kɛ Kristofoi anaanyobɔɔ yɛ Maŋtsɛyeli Asa, ní tsuɔ nii akɛ jamɔ krɔŋŋ shikwɛ̃ɛhe kɛha mɛi ni yɔɔ jɛmɛ lɛ nɔ.
2. Mɛni hewɔ ehe hiaa ni aha Maŋtsɛyeli Asa lɛ afee falefale kɛ he ni yɔɔ fɛo lɛ?
2 Gbɛjianɔ ni Ato Kɛha Jɛmɛ Saamɔ Daa: Nitsumɔ ni atsuɔ koni akɛkwra Maŋtsɛyeli Asa lɛ nɔ lɛ ji wɔsɔɔmɔ krɔŋŋ lɛ fã titri ko ni he hiaa. Our Ministry wolo lɛ kɛɔ yɛ baafa 61-62 lɛ akɛ: “Esaaa akɛ nyɛmimɛi lɛ buɔ shika ni amɛkɛfiɔ Maŋtsɛyeli Asa lɛ sɛɛ lɛ akɛ hegbɛ ni amɛná kɛkɛ, shi moŋ esa akɛ amɛkɛ amɛhe aha hu ni amɛtsu nii ni jɛmɛ afee falefale, he ni yɔɔ fɛo, in asaa nibii fɛɛ jogbaŋŋ. Esa akɛ Maŋtsɛyeli Asa lɛ mli kɛ ehewɔ fɛɛ afee nɔ ni damɔɔ Yehowa gbɛjianɔtoo lɛ najiaŋ yɛ gbɛ kpakpa nɔ.” Akɛni akɛ Maŋtsɛyeli Asa lɛ tsuɔ nii shii abɔ otsi fɛɛ otsi hewɔ lɛ, ehe miihia ni aha jɛmɛ afee falefale daa ni asaa nibii jogbaŋŋ. Bei babaoo lɛ, nyɛmimɛi ni kɛ amɛhe eha ni jɛ asafo(i) ni kpeɔ yɛ Maŋtsɛyeli Asa lɛ nɔ lɛ ji mɛi ni tsuɔ saji nɛɛ ahe nii. Taakɛ eji yɛ Biblia beaŋ lɛ, esa akɛ Yehowa tsuji ni yɔɔ ŋmɛnɛ lɛ abɔ mɔdɛŋ ‘ni wɔsaa nibii ni efite’ yɛ wɔjamɔhe lɛ jogbaŋŋ.—2 Kron. 34:10.
3. Te atoɔ Maŋtsɛyeli Asa lɛ nɔ falefalefeemɔ he gbɛjianɔ ahaa tɛŋŋ, ni namɛi baanyɛ aná hegbɛ nɛɛ mli gbɛfaŋnɔ?
3 Esa akɛ akɛ gbɛjianɔ ni ato kɛha Maŋtsɛyeli Asa lɛ nɔ saamɔ daa otsi ni yɔɔ ebe naa lɛ akpɛtɛ adafitswaa tao lɛ nɔ. Esa akɛ ato woloŋ nikasemɔ kui lɛ fɛɛ anaa ni amɛsaa asa lɛ nɔ otsi fɛɛ otsi, esa akɛ amɛkɛ nibii ni aŋmala ashwie shi ni tsɔɔ nibii ni esa akɛ atsu he nii lɛ atsu nii. Mɛi fɛɛ ni yɔɔ gbɔmɔtsoŋ hewalɛ lɛ baanyɛ aná gbɛfaŋnɔ yɛ hegbɛ ni anáa daa otsi yɛ Maŋtsɛyeli Asa lɛ nɔ falefalefeemɔ kɛ nibii ni efite ni asaa lɛ jogbaŋŋ lɛ mli. Abaanyɛ akɛ gbekɛbii ni baatsu nii yɛ amɛfɔlɔi anɔkwɛmɔ shishi lɛ afata he, ni amɛkɛ nakai feemɔ baatsɔɔ amɛ koni amɛjie hiɛsɔɔ kpo amɛha nɛkɛ hegbɛ ni amɛná akɛ amɛaasɔmɔ mɛi krokomɛi nɛɛ. Ekomefeemɔ ni mli wa he miihia, titri lɛ kɛ́ asafoi ni fa fe ekome kɛ Maŋtsɛyeli Asa lɛ tsuɔ nii, bɔni afee ni anyɛ atsu wɔjamɔ lɛ fã titri ni he hiaa nɛɛ he nii koni nitsumɔ akakã asafo kome ko loo mɛi fioo ko pɛ nɔ.
4. Mɛni esa akɛ afee bɔni afee ni asafo lɛ ale nɔ ni esa akɛ efee kɛji aasaa Maŋtsɛyeli Asa lɛ nɔ lɛ?
4 Esa akɛ aŋmala nibii ni abaatsu lɛ ashwie shi, ní kɛ aaahi lɛ, akɛkpɛtɛ shi yɛ he ni akɛ nibii ni akɛsaa jɛmɛ lɛ toɔ lɛ. Esa akɛ nɛkɛ nibii ni aŋmala ashwie shi nɛɛ atsɔɔ nitsumɔi ni abaatsu yɛ daa otsi mli lɛ mli, ní jɛmɛ bɛɛmɔ, niiasɛɛyaahei kɛ nushwiemɔhei lɛ shamɔ, kɛ samfɛji lɛ ahe ni aaatsumɔ, woji akɔlɔmɔhei lɛ tsumɔmɔ, jwɛi ni abaatsi ashwie, shikpɔŋ lɛ shamɔ, kɛ ashwishwɛ lɛ hiɛ tsumɔmɔ fata he lɛ. Nitsumɔi lɛ ekomɛi yɛ ni ehe ehiaŋ ni atsu lɛ daa, tamɔ sɛii ni akɛ tsei kpɛ lɛ ahe pɔlishimɔ kɛ amɛhewɔ fɛɛ ni ajeɔ gbɛ atsumɔɔ jogbaŋŋ kɛmɔɔ shi, samfɛji anaa mamai lɛ ahe fɔmɔ, kɛ kanei lɛ ahe tsumɔmɔ nɛkɛ. Esa akɛ akɛ tsofai fɛɛ ni akɛtsuɔ nii kɛha jɛmɛ falefalefeemɔ lɛ ama he ko ni gbekɛbii anine nyɛŋ ashɛ nɔ, ni esa akɛ akadi enɛɛmɛi jogbaŋŋ. Esa akɛ agbála bɔ ni akɛ tsofa fɛɛ tsofa tsuɔ nii ahaa lɛ mli kuku.
5. Te shweshweeshwefeemɔ he hiaa ha tɛŋŋ, ni mɛɛ nibii esa akɛ akwɛ yɛ be kɛ bei amli? (Kwɛmɔ akrabatsa ni yɔɔ baafa 4 lɛ.)
5 Shweshweeshwe ní abaafee yɛ Maŋtsɛyeli Asa lɛ nɔ lɛ ji nɔ ko ni he hiaa waa. (5 Mose 22:8) Enɛ hewɔ lɛ, ato nibii komɛi ni esa akɛ akwɛ yɛ be kɛ bei amli bɔni afee ni akɛtsĩ osharai anaa lɛ naa yɛ akrabatsa ni yɔɔ baafa 4 lɛ mli.
6. Mɛɛ gbɛ nɔ atsɔɔ akwɛɔ Maŋtsɛyeli Asa lɛ nɔ saamɔ he nitsumɔ lɛ nɔ?
6 Nibii Asaamɔ Jogbaŋŋ yɛ Maŋtsɛyeli Asa lɛ Nɔ: Sɔ̃ kã onukpai akuu lɛ nɔ akɛ amɛkwɛ ni asaa Maŋtsɛyeli Asa lɛ he nibii ni efite lɛ jogbaŋŋ. Bei pii lɛ, ahalaa onukpa loo asafoŋ sɔɔlɔ ko koni ekwɛ nitsumɔ lɛ nɔ. Etoɔ daa gbi nitsumɔ ni abaatsu yɛ Maŋtsɛyeli Asa lɛ nɔ lɛ he gbɛjianɔ, ni ekwɛɔ koni aha jɛmɛ afee falefale ni asaa nibii lɛ jogbaŋŋ. Esa akɛ ekwɛ akɛ ayɛ nibii ni akɛsaa jɛmɛ ni fa bɔ ni sa. Ehe miihia ni akwɛ koni shihilɛi komɛi ni baanyɛ ekɛ oshara aba akahi asa lɛ nɔ loo ehewɔ. Kɛ́ asafoi enyɔ loo nɔ ni fa fe nakai kɛ asa kome too lɛ nɔŋŋ tsuɔ nii lɛ, onukpai akui ni jɛ asafoi srɔtoi lɛ amli lɛ baahala nitsumɔ he ajinafoi akuu ní baato gbɛjianɔ kɛha tsũ lɛ kwramɔ kɛ shikpɔŋ ni ema nɔ lɛ nɔ saamɔ. Nitsumɔ he ajinafoi akuu nɛɛ tsuɔ nii yɛ onukpai akui srɔtoi lɛ agbɛtsɔɔmɔ shishi.
7. (a) Mɛni afeɔ daa afi koni akɛná nɔmimaa akɛ asaa Maŋtsɛyeli Asa lɛ nɔ kɛ ehewɔ fɛɛ jogbaŋŋ? (b) Mɛɛ saji nɛkɛ ebiɔ ni atsu he nii yɛ be kɛ bei amli? (Kwɛmɔ akrabatsa ni yɔɔ baafa 5 lɛ.)
7 Daa afi lɛ, akwɛɔ Maŋtsɛyeli Asa lɛ mli kɛ ehewɔ fɛɛ kɛkpeɔ. Sɔ̃ kã onukpai lɛ anɔ akɛ amɛto gbɛjianɔ koni atsu nibii ni he hiaa lɛ ahe nii jogbaŋŋ. Abaanyɛ afɔ̃ shiɛlɔi lɛ anine koni amɛbaye amɛbua ni akɛsaa nibii ni ehe hiaa ni asaa lɛ. Esa akɛ mɔ fɛɛ mɔ abɔ mɔdɛŋ koni esaa nibii bibiibibii ni fiteɔ lɛ po, ni ehe afee oya ni etsu nibii ni ehe hiaa ni atsu he nii lɛ ahe nii. Esa akɛ akpoo nifeemɔ ni atsiɔ atoɔ.
8. Mɛɛ be nɛkɛ onukpai lɛ baanyɛ atsi abɛŋkɛ Maŋtsɛyeli Asa Tsumaa Nitsumɔhe lɛ yɛ saji ni kɔɔ nibii asaamɔ he lɛ?
8 Kɛ́ onukpai lɛ nu he akɛ ŋaawoo loo yelikɛbuamɔ he miihia amɛ koni akɛtsu Maŋtsɛyeli Asa lɛ saamɔ he nii lɛ, amɛbaanyɛ amɛtsi amɛbɛŋkɛ Maŋtsɛyeli Asa Tsumaa Nitsumɔhe lɛ. Nibii tamɔ saamɔ ni aaasaa niiasɛɛyaahei ni efite, tsɔne ni haa tsũ mli jɔɔ loo fan ni tsuuu nii kɛ tsũ ni yiteŋ miidu lɛ saamɔ baanyɛ afata nibii ní ekolɛ abaasumɔ ni aná he ŋaawoo lɛ ahe.
9. Mɛɛ gbɛjianɔtoo esa akɛ akɛtsu nii kɛ́ ehe bahia ni akɛ nitsumɔ aha mɔ ko loo nitsumɔhe ko lɛ?
9 Asafo Shika ni Akɛaatsu Nii yɛ Nilee Mli: Nyɛmimɛi ni kɛ amɛhe eha ji mɛi ni tsuɔ nitsumɔi babaoo ni atsuɔ yɛ Maŋtsɛyeli Asa lɛ kɛ ehewɔ lɛ he nii. Mɔdɛŋ ni amɛbɔɔ yɛ amɛhe ni amɛkɛshãa afɔle lɛ mli lɛ ji suɔmɔ kpojiemɔ yɛ gbɛ kpakpa nɔ, ni eyeɔ ebuaa waa ni abaa nyɔmɔbɔɔ shi. Kɛ́ ehe bahia ni akɛ nitsumɔi komɛi ni jeee asafoŋbii lɛ baatsu tamɔ wamɔ ni abaagbala aha mɔ ko loo nitsumɔhe ko ni ebatsu lɛ, onukpai lɛ baafɔ̃ nine amɛtsɛ nitsumɔhei loo nitsulɔi srɔtoi ni baanyɛ nitsumɔ lɛ atsu ni amɛkwɛ koni akabɔ he nyɔmɔ tsɔ̃. Amɛbaafee enɛ kɛtsɔ ŋmalamɔ ni amɛaaŋmala bɔ ni nitsumɔ ni abaatsu lɛ yɔɔ ha, kɛ nibii ni akɛbaaha ni akɛtsu nii lɛ amɛshwie shi lɛ klɛŋklɛŋ. Amɛbaaha nitsumɔhei loo nitsulɔi srɔtoi ni baanyɛ nitsumɔ lɛ amɛtsu lɛ wolo nɛɛ eko koni amɛtsɔɔ bɔ ni amɛbaatsu nii lɛ amɛha kɛ bɔ ni amɛbaahe. No sɛɛ lɛ onukpai lɛ baakwɛ mɔ ni sa ní jara ni etsɔɔ lɛ hu baa shi ni amɛkɛ nitsumɔ lɛ aha lɛ. Kɛji akɛ nyɛmi ko po tsɔɔ akɛ ebaatsu nitsumɔ nɛɛ loo ekɛ nibii ni he hiaa kɛha nitsumɔ nɛɛ tsumɔ lɛ baaha yɛ jara pɔtɛɛ ko naa po lɛ, esa akɛ akɛ gbɛjianɔtoo nɛɛ atsu nii.
10. Mɛni afeɔ koni akwɛ ákɛ akɛ asafo shika lɛ miitsu nii jogbaŋŋ lo?
10 Kɛ asafoi ni fa fe ekome kɛ Maŋtsɛyeli Asa kome too lɛ nɔŋŋ tsuɔ nii lɛ, nitsumɔ he ajinafoi akuu ni kwɛɔ asa lɛ he gbɛjianɔtoo nɔ lɛ baato shika fotro srɔtoi ahe gbɛjianɔ aha amɛ, ni amɛha onukpai akui srɔtoi lɛ fɛɛ anine ashɛ shika he amaniɛbɔɔ nɔ daa nyɔŋ nɔ, kɛtsɔ nakai feemɔ nɔ lɛ, amɛbaaha onukpai lɛ ale bɔ ni akɛ shika lɛ tsuɔ nii ahaa. Sɔ̃ kã onukpai lɛ anɔ akɛ amɛkwɛ koni akɛ asafo shika lɛ atsu nii jogbaŋŋ.
11. Mɛni esa akɛ afee kɛ́ ehe bahia ni atsu nitsumɔ wulu ko he nii loo asaa ama asa lɛ ekoŋŋ lɛ?
11 Nɔ ko ni Efitemɔ lɛ Da ni Abaasaa kɛ Tsũ ni Abaasaa Ama Ekoŋŋ: Kɛ́ nitsumɔ he ajinafoi akuu lɛ na akɛ ehe miihia ni atsu nɔ ko wulu he nii yɛ bɔ ni akɛ Maŋtsɛyeli Asa lɛ tsuɔ nii ahaa loo yɛ esaamɔ mli lɛ, amɛkɛ sane lɛ yafɔ̃ɔ onukpai akuu lɛ hiɛ kɛha gbɛtsɔɔmɔ. Kɛ́ amɛna akɛ ehe miihia ni asaa nɔ ko wulu yɛ tsũ lɛ he, loo ákɛ yelikɛbuamɔ he baahia kɛjɛ asafo(i) krokomɛi ni baaa kpee yɛ nakai Maŋtsɛyeli Asa lɛ nɔ lɛ adɛŋ lɛ, onukpai lɛ baatsi abɛŋkɛ Maŋtsɛyeli Asa Tsumaa Nitsumɔhe lɛ. Nɛkɛ nyɛmimɛi hii ni he esa ni amɛyɔɔ niiashikpamɔ nɛɛ kɛ ŋaawoi ni baaye abua nitsumɔ lɛ baaha.—Kwɛmɔ Sanebimɔ He ni je kpo yɛ February 1994 Wɔ Maŋtsɛyeli Sɔɔmɔ lɛ mli lɛ.
12. Mɛɛ gbɛ nɔ wɔbaatsɔ wɔjie hiɛsɔɔ kpo yɛ hegbɛ ni wɔná akɛ wɔɔya kpeei yɛ Maŋtsɛyeli Asa lɛ nɔ lɛ he lɛ?
12 Kwɛ bɔ ni wɔhiɛ sɔɔ hegbɛ ni wɔná akɛ wɔɔkpe kutuu yɛ Maŋtsɛyeli Asa lɛ nɔ lɛ waa wɔhaa! Ekaba kɔkɔɔkɔ akɛ wɔbaafolɔ kpeei amli loo ni wɔbu lɛ akɛ nɔ ko ni he ehiaaa. Wɔ fɛɛ wɔbaanyɛ wɔye wɔbua ni nɛkɛ gbɛjianɔtoo nɛɛ aye omanye kɛha wɔ hewalɛwoo kɛtsɔ wɔ Maŋtsɛyeli Asa lɛ nɔ saamɔ mli gbɛfaŋnɔ ni wɔɔná kɛmɔ shi lɛ nɔ. Enɛ wóɔ anɔkwa jamɔ nɔ gojoo ni ewoɔ Yehowa gbɛi lɛ hiɛ nyam. Nyɛhaa wɔtswaa wɔfai shi akɛ wɔbaaha wɔjamɔhe lɛ afee he ni asaa lɛ jogbaŋŋ.
[Caption on page 4]
Nibii ni Ato Naa Kɛha Shweshweeshwefeemɔ
◻ Esa akɛ atsake samfɛji ni efite lɛ amrɔ nɔŋŋ.
◻ Esa akɛ akadi shinaai ni atsɔɔ mli kɛjeɔ kpo lɛ kɛ atrakpoi lɛ jogbaŋŋ, ni akɛ kane awo jɛmɛ ni jɛmɛ akpɛ jogbaŋŋ.
◻ Esa akɛ tsũi ni akɛ nibii toɔ mli, niiasɛɛyaahei kɛ hei ni akɛ atadei tsotsoroɔ lɛ amli atse, ni ato nibii lɛ amamɔ mli jogbaŋŋ, ni esaaa akɛ akɛ nibii ni baanyɛ eha la aje kɛ jwɛi ato mli.
◻ Esa akɛ akwɛ akɛ tsũ lɛ yiteŋ yɛ pɛpɛɛpɛ lo, ni enɔ afee falefale be fɛɛ be.
◻ Esa akɛ aha kane akpɛ́ yɛ hei ni anyiɛɔ kɛ tsɔnei amaamɔhei lɛ, ni esaaa ákɛ akɛ nɔ ko ni baanyɛ aha mɔ ashane loo etsi mɔ egbee shi maa gbɛ lɛ nɔ.
◻ Esa akɛ be kɛ be fɛɛ lɛ, akwɛ akɛ sarawa hewalɛ he nibii, tsɔne ni haa tsũ mli jɔɔ, kɛ tsɔnei tamɔ fan ni tswaa kɔɔyɔɔ lɛ miitsu nii jogbaŋŋ.
◻ Esa akɛ asáa paipii fɛɛ ni duɔ lɛ amrɔ nɔŋŋ koni ekatsɔ naagba agbo.
◻ Esa akɛ aŋa shinaa lɛ kɛji akɛ mɔ ko bɛ asa lɛ nɔ.
[Akrabatsa ni yɔɔ baafa 5]
Tsũ lɛ kɛ Shikpɔŋ lɛ Kwramɔ
◻ Agbonaa: Ani ziŋele, tso ni akɛbã tsũ lɛ naa, tsũ lɛ he pɛnte, samfɛji, kɛ Maŋtsɛyeli Asa tao ni aŋma “Kingdom Hall of Jehovah’s Witnesses” yɛ nɔ lɛ yɛ jogbaŋŋ, ni ani atsumɔɔ he daa otsi?
◻ Shikpɔŋ: Ani asaa shikpɔŋ lɛ jogbaŋŋ? Ani nyiɛmɔhei, afabaŋi ni afo, kɛ tsɔnei amaamɔhei lɛ hi jogbaŋŋ? Ani ahũ jwɛi ŋmɔŋ ni yɔɔ shikpɔŋ lɛ nɔ jogbaŋŋ, ni ani afolɔɔ fɔfɔii lɛ anɔ ni ashwieɔ nɔ nu jogbaŋŋ?
◻ Tsũ lɛ mli: Ani ashaa sɛii kɛ gbogboi lɛ ahe daa? Ani adekai ni akɛ woji lɛ woɔ mli lɛ mli tse ni ato woji lɛ jogbaŋŋ? Ani mulu, woji memeji ni akɛfeee nɔ ko, kɛ wolo adekai ni nɔ ko bɛ mli bɛ jɛmɛ?
◻ Tsɔnei ni akɛtsuɔ nii: Ani kanei, tsɔne ni haa wiemɔ gbɛɛɔ, kɛ tsɔne ni haa tsũ mli jɔɔ lɛ miitsu nii jogbaŋŋ?
◻ Niiasɛɛyaahei: Ani jɛmɛ yɛ falefale ni eetsu nii jogbaŋŋ? Ani samala kɛ nu yɛ jɛmɛ kɛha dɛfɔmɔ?
◻ Nibii: Ani nine baanyɛ ashɛ gogai, bɔlɔ, tako, kɛ samala nɔ be fɛɛ be? Ani nu yɛ be fɛɛ be kɛha jɛmɛ kwramɔ?
◻ Asafoŋ woji: Ani tsũ lɛ he woji ni tsɔɔ mɔ ni gbɛi kã nɔ lɛ ja kɛmɔ shi ni eyɛ ebe naa?