Gbɛjianɔ Ni Atoɔ Koni Aná Jamɔhei

YEHOWA efã mɛi fɛɛ ni jáa lɛ lɛ akɛ, amɛkpe koni akɛ gbɛtsɔɔmɔ ahã amɛ ni amɛwowoo amɛhe hewalɛ. (Heb. 10:23-25) “Sɔlemɔ buu lɛ, ni ji kpee buu lɛ,” ji klɛŋklɛŋ jamɔhe ni Israelbii ni ji Nyɔŋmɔ webii ni ehala lɛ kɛtsu nii. (2 Mo. 39:32, 40) Sɛɛ mli lɛ, David bi Solomon ma shĩa ko loo sɔlemɔ shĩa ko kɛwo Nyɔŋmɔ hiɛ nyam. (1 Maŋ. 9:3) Be ni afite nakai sɔlemɔ shĩa lɛ yɛ afi 607 D.Ŋ.B. lɛ, Yudafoi lɛ to gbɛjianɔ ni amɛkpe yɛ kpeehei kɛjá Nyɔŋmɔ. Sɛɛ mli lɛ, asaa ama sɔlemɔ shĩa lɛ, ni ebatsɔ he titri ni anɔkwa jalɔi kpeɔ yɛ kɛjáa anɔkwa Nyɔŋmɔ lɛ. Yesu tsɔɔ nii yɛ kpeehei nɛɛ kɛ sɔlemɔ shĩa lɛ. (Luka 4:16; Yoh. 18:20) Be ko po lɛ, mɛi bua amɛhe naa yɛ gɔŋ ko nɔ, ni Yesu tsɔɔ amɛ nii yɛ jɛmɛ.​—Mat. 5:1–7:29.

² Yesu gbele sɛɛ lɛ, Kristofoi lɛ kpe yɛ skul tsũi amli kɛ hei krokomɛi ni tamɔ nakai, kɛ agbɛnɛ hu, yɛ mɛi ashĩai amli koni amɛsusu Nyɔŋmɔ Wiemɔ lɛ he, ni amɛkɛ amɛnyɛmimɛi Kristofoi lɛ abɔ. (Bɔf. 19:8, 9; Rom. 16:3, 5; Kol. 4:15; Flm. 2) Bei komɛi lɛ, blema Kristofoi lɛ kpe yɛ hei ni etse amɛhe banee koni mɛi ni waa amɛyi lɛ akana amɛ. Anɔkwa, Nyɔŋmɔ tsuji anɔkwafoi ni hi shi yɛ blema lɛ shwe akɛ amɛkpe yɛ jamɔhei koni ‘Yehowa atsɔɔ amɛ nii.’​—Yes. 54:13.

³ Ŋmɛnɛ hu lɛ, afeɔ Kristofoi akpeei yɛ mɛi ashĩai, stediɔm, kɛ hei krokomɛi. Bei pii lɛ, afeɔ kpeei kɛhã shiɛmɔyaa yɛ mɛi ashĩai. Mɛi buɔ lɛ akɛ eji hegbɛ ni amɛná akɛ amɛbaahã afee kpeei nɛɛ yɛ amɛshĩai. Mɛi babaoo nuɔ he akɛ amɛshĩai ni amɛkɛhã koni akɛfee kpeei nɛɛ eye ebua amɛ yɛ mumɔŋ.

MAŊTSƐYELI ASA

⁴ Maŋtsɛyeli Asa lɛ nɔ ji he titri ni Yehowa Odasefoi kpeɔ yɛ. Bei pii lɛ, amɛhéɔ shikpɔŋ, ni amɛmaa Maŋtsɛyeli Asa hee yɛ nɔ loo amɛsaa tsũ ni yɔɔ shikpɔŋ lɛ nɔ lɛ. Asafoi srɔtoi nyɛɔ amɛkpeɔ yɛ Maŋtsɛyeli Asa kome nɔ kɛ́ nakai feemɔ sa, koni akabɔ asa lɛ he nyɔmɔ pii, ni agbɛnɛ hu akɛfɔ nitsumɔ. Yɛ hei komɛi lɛ, ehe miihia ni ayahai asa ko. Kɛ́ amamɔ Maŋtsɛyeli Asai hei loo afee tsakemɔi wuji yɛ asai lɛ ahe lɛ, esa jogbaŋŋ akɛ abaato gbɛjianɔ ni ajɔɔ nɔ. Shi kɛ́ tsakemɔi bibii pɛ afee yɛ asai lɛ ahe lɛ, ehe ehiaaa ni ajɔɔ nɔ.

⁵ Esaaa akɛ amaa Maŋtsɛyeli Asa lɛ haŋtsii koni akɛwo lɛ okɛse. Eyɛ mli akɛ esoro bɔ ni amamɔɔ lɛ yɛ he fɛɛ he moŋ, shi be fɛɛ be lɛ, esa akɛ ama lɛ bɔ ni abaanyɛ akɛtsu yiŋtoo hewɔ ni amaa lɛ he nii. (Bɔf. 17:24) Esa akɛ ama asa lɛ yɛ he ni mɛi baanyɛ aba Kristofoi akpeei yɛ, ni ama lɛ bɔ ni mɛi ni baaba kpeei lɛ ahe baajɔ amɛ hu yɛ bɔ ni shihilɛ ni yɔɔ he ni abaama yɛ lɛ ji lɛ naa.

⁶ Yehowa Odasefoi asafoi fɛɛ tsuɔ onia koni akɛwo Maŋtsɛyeli Asa ni amɛkpeɔ yɛ nɔ lɛ he nyɔji, ni agbɛnɛ hu, akɛkura. Aheee kɔlɛshiŋ; asaŋ abalaaa shika yɛ jɛmɛ. Akɛ oniatsumɔ adeka maa shi koni mɛi ni eba kpeei lɛ atsu onia ni akɛwo asa lɛ he nyɔji. Amɛjɛɔ amɛsuɔmɔ kɛ amɛtsui mli amɛfeɔ nakai.​—2 Kor. 9:7.

⁷ Mɛi fɛɛ ni yɔɔ asafo lɛ mli lɛ buɔ lɛ akɛ eji hegbɛ ni amɛná akɛ amɛtsu onia ni akɛkura Maŋtsɛyeli Asa lɛ jogbaŋŋ ni amɛkɛ amɛhe ahã hu kɛsaa asa lɛ nɔ koni emli kɛ ehewɔ fɛɛ afee falefale. Akɛwoɔ asafoŋ onukpa ko loo asafoŋ sɔɔlɔ ko dɛŋ koni eto asa lɛ nɔ saamɔ kɛ ekuramɔ he gbɛjianɔ. Bei pii lɛ, shiɛmɔyaa kui tsuɔ nii yɛ amɛkuu nɔkwɛlɔ lɛ loo esɛɛmɔ lɛ gbɛtsɔɔmɔ shishi kɛsaa asa lɛ nɔ kɛ ehewɔ. Esa akɛ Maŋtsɛyeli Asa lɛ nɔ kɛ ehewɔ fɛɛ afee nɔ ni woɔ Yehowa kɛ esafo lɛ hiɛ nyam.

⁸ Kɛ́ asafoi ni fa fe ekome kpeɔ yɛ asa ko nɔ lɛ, asafoŋ onukpai ni yɔɔ asafoi nɛɛ amli lɛ toɔ Maŋtsɛyeli Asa Nɔkwɛmɔ Ajinafoi Akuu koni amɛto saji ni kɔɔ asa lɛ kɛ shikpɔŋ ni ema nɔ lɛ ahe gbɛjianɔ. Onukpai akui lɛ ji mɛi ni baahala nyɛmi nuu ni baasɔmɔ akɛ ajinafoi akuu nɛɛ saji ahe gbɛjianɔtolɔ. Ajinafoi akuu nɛɛ tsuɔ nii yɛ onukpai akui lɛ agbɛtsɔɔmɔ shishi, ni amɛkwɛɔ koni asaa asa lɛ nɔ ni akura lɛ jogbaŋŋ, ni agbɛnɛ hu amɛkwɛɔ koni aná nibii ni he baahia kɛhã nitsumɔi nɛɛ babaoo bɔ ni sa. Enɛ biɔ ni asafoi ni kpeɔ yɛ asa lɛ nɔ lɛ afee ekome kɛtsu nii.

⁹ Kɛ́ asafoi ni fa fe ekome kpeɔ yɛ Maŋtsɛyeli Asa kome nɔ lɛ, yɛ be kɛ beiaŋ lɛ abaanyɛ atsake bei ni asafoi lɛ kɛfeɔ kpeei lɛ. Asafoŋ onukpai lɛ baajɛ mɔhesusumɔ kɛ nyɛmimɛi asuɔmɔ mli amɛto bɔ ni abaafee tsakemɔi nɛɛ ahã lɛ he gbɛjianɔ. (Fip. 2:2-4; 1 Pet. 3:8) Esaaa akɛ asafo kome kpɛɔ yiŋ ehãa asafoi krokomɛi lɛ fɛɛ. Kɛ́ kpokpaa nɔkwɛlɔ miisara asafoi ni kpeɔ yɛ Maŋtsɛyeli Asa lɛ nɔ lɛ ateŋ ekome lɛ, asafoi krokomɛi lɛ baafee tsakemɔ yɛ bei ni amɛkɛkpeɔ lɛ amli nakai otsi lɛ.

¹⁰ Asafoŋ Sɔɔmɔ Ajinafoi Akuu lɛ baanyɛ aŋmɛ gbɛ ni akpee yoo loo afee yara yɛ Maŋtsɛyeli Asa lɛ nɔ. Kɛ́ mɔ ko babi gbɛ ni ahã efee nifeemɔi nɛɛ eko yɛ Asa lɛ nɔ lɛ, onukpai nɛɛ susuɔ gbɛbimɔ lɛ he jogbaŋŋ ni amɛdamɔɔ gbɛtsɔɔmɔ ni nitsumɔhe nine lɛ kɛhã lɛ nɔ amɛkpɛɔ yiŋ.

¹¹ Akpaa gbɛ akɛ mɛi ni aŋmɛɔ amɛ gbɛ koni amɛkɛ Maŋtsɛyeli Asa lɛ atsu nii kɛhã nifeemɔi nɛɛ afee amɛnii bɔ ni sa anɔkwa Kristofoi. Esaaa akɛ afeɔ nɔ ko yɛ Maŋtsɛyeli Asa lɛ nɔ ni baagba asafoŋbii lɛ anaa loo ebaawo Yehowa gbɛ́i lɛ kɛ asafo lɛ gbɛ́i lɛ he muji. (Fip. 2:14, 15) Abaanyɛ akɛ Maŋtsɛyeli Asa lɛ atsu nii kɛhã Nyɔŋmɔjamɔ nifeemɔi krokomɛi yɛ nitsumɔhe nine lɛ gbɛtsɔɔmɔ shishi, tamɔ Maŋtsɛyeli Sɔɔmɔ Skul kɛ Gbɛgbamɔ Sɔɔmɔ Skul.

¹² Be fɛɛ be ni wɔbaaya he ni wɔkpeɔ yɛ lɛ, esa akɛ wɔjie bulɛ kpo. Esa akɛ wɔtadewoo, wɔhesaamɔ, kɛ wɔnifeemɔi atsɔɔ akɛ wɔkɛ woo hãa Yehowa ni wɔjáa lɛ lɛ. (Jaj. 5:1; 1 Tim. 2:9, 10) Kɛ́ wɔkɛ ŋaa ni awoɔ wɔ yɛ enɛ he lɛ tsu nii lɛ, no tsɔɔ akɛ wɔhiɛ sɔɔ wɔ-Kristofoi akpeei lɛ.

¹³ Esa akɛ afee nɔ fɛɛ nɔ yɛ gbɛjianɔtoo kpakpa naa yɛ wɔkpeei lɛ ashishi. Ebaafee nɔ ni hi jogbaŋŋ akɛ gbekɛbii kɛ amɛfɔlɔi baatara shi. Esa akɛ awo fɔlɔi ni yɔɔ bii bibii lɛ hewalɛ ni amɛtara hei ni amɛgbaŋ mɛi anaa tsɔ kɛ́ ehe bahia ni amɛkɛ gbekɛbii lɛ aje kpo koni amɛyatsɔse amɛ loo amɛyatsu gbekɛbii lɛ ahiamɔ nii krokomɛi ahe nii lɛ.

¹⁴ Ahãa nyɛmimɛi hii ni sa sɔmɔɔ akɛ kpeei ashishi sɔɔlɔi yɛ kpeei ni afeɔ yɛ Maŋtsɛyeli Asa lɛ nɔ lɛ ashishi. Esa akɛ amɛhiɛ ahi amɛhe nɔ, amɛná mɛi ahe miishɛɛ, ni amɛkɛ hiɛshikamɔ atsu nii. Sɔ̃i ni amɛtsuɔ he nii ji, amɛhereɔ mɛi hei ni eba lɛ hiɛmɛɛ, amɛyeɔ amɛbuaa mɛi ni ekpe sɛɛ lɛ koni amɛná he ko amɛtara, amɛkaneɔ mɛi abɔ ni eba kpee lɛ ni amɛŋmalaa, ni amɛkwɛɔ koni asa lɛ nɔ adɔ loo ejɔ bɔ ni sa ni kɔɔyɔɔ kpakpa aba asa lɛ nɔ. Kɛ́ ehe miihia lɛ, kpeei ashishi sɔɔlɔi lɛ baakai fɔlɔi ni amɛhã amɛhiɛ ahi amɛbii lɛ anɔ koni amɛbii lɛ akashwɛ yɛ wiemɔ kpoku lɛ nɔ loo amɛjo foi kɛtee kɛba yɛ asa lɛ nɔ be ni ajeko kpeei lɛ ashishi loo be ni akpa. Kpeei ashishi sɔɔlɔ ko baanyɛ ajɛ mlihilɛ kɛ hiɛshikamɔ mli ebi fɔlɔ ko ni bi miifee basabasa lɛ koni ekɛ ebi lɛ aje kpo ni ekagbala toibolɔi lɛ ajwɛŋmɔ bɔ ni esaaa. Kpeei ashishi sɔɔlɔi lɛ anitsumɔ lɛ hãa mɔ fɛɛ mɔ náa kpeei lɛ ahe sɛɛ jogbaŋŋ. Ebaahi jogbaŋŋ akɛ abaahã asafoŋ onukpai loo asafoŋ sɔɔlɔi asɔmɔ akɛ kpeei ashishi sɔɔlɔi.

MAŊTSƐYELI ASAI AMAAMƆ

¹⁵ Kristofoi ni hi shi yɛ blema lɛ ateŋ mɛi komɛi yɛ nii fe mɛi krokomɛi. No hewɔ lɛ, bɔfo Paulo ŋma akɛ: “Bɔ ni afee ni nibii aŋmɛ pɛpɛɛpɛ lɛ, nyɛnii ni nyɛná kɛteke nɔ amrɔ nɛɛ ayatsu amɛhiamɔ lɛ he nii, koni amɛ hu amɛnii ni amɛná kɛteke nɔ lɛ abatsu nyɛhiamɔ lɛ he nii, koni nibii aŋmɛ pɛpɛɛpɛ.” (2 Kor. 8:14) Ŋmɛnɛ hu lɛ, nakai pɛpɛɛpɛ ji bɔ ni afeɔ. Abuaa oniai ni asafoi ni yɔɔ jeŋ fɛɛ lɛ tsuɔ lɛ anaa ni akɛyeɔ abuaa kɛmamɔɔ Maŋtsɛyeli Asai, ni asaa Asai nɛɛ ekomɛi hu. Yehowa asafo lɛ kɛ asafoi srɔtoi ni yɔɔ jeŋ fɛɛ lɛ hiɛ sɔɔ suɔmɔ mli ni nyɛmimɛi ni yɔɔ jeŋ fɛɛ lɛ jɛɔ amɛtsuɔ onia kɛyeɔ amɛbuaa lɛ naakpa.

¹⁶ Nitsumɔhe nine lɛ damɔɔ he ni asafoi lɛ yɔɔ kɛ nibii krokomɛi anɔ etsɔɔ Maŋtsɛyeli Asai ni esa akɛ asafoi lɛ ayafee kpeei yɛ nɔ. Kɛfata he lɛ, nitsumɔhe nine lɛ tsɔɔ be ni esa akɛ amamɔ Maŋtsɛyeli Asai hei, he ni esa akɛ amamɔ yɛ, kɛ asai ni yɔɔ momo yɛ eshikpɔŋkuku lɛ mli lɛ ateŋ nɔ ni esa akɛ asaa. Kɛ́ oshãrai ba lɛ, atoɔ gbɛjianɔ ni asaa Maŋtsɛyeli Asai ni amɛhe nibii komɛi efite lɛ, ni bei komɛi hu lɛ asaa nyɛmimɛi ashĩai.

¹⁷ Nitsumɔhe nine lɛ toɔ mɛi ni kɛ amɛhe ehã kɛtsuɔ tsũi amaamɔ he nii lɛ ahe gbɛjianɔ. Nyɛmimɛi nɛɛ yeɔ amɛbuaa ni ahéɔ shikpɔji, amɛkwɛɔ bɔ ni abaama Maŋtsɛyeli Asa lɛ ahã, amɛheɔ tsumaa he gbɛŋmɛɛ woji, ni amɛkwɛɔ emaa kɛ ekuramɔ nɔ. Akɛni ehe ebahia ni amamɔ Maŋtsɛyeli Asai babaoo yɛ maji pii anɔ hewɔ lɛ, ehe miihia ni mɛi pii kɛ amɛhe ahã. Ebaahi jogbaŋŋ akɛ shiɛlɔi fɛɛ ni abaptisi amɛ ni shɛɔ taomɔ nii lɛ ahe ni miisumɔ akɛ amɛye amɛbua lɛ aŋmala gbɛbimɔ woji anɔ nii ni amɛkɛhã amɛ-Safoŋ Sɔɔmɔ Ajinafoi Akuu lɛ. Shiɛlɔi ni abaptisiko amɛ po baanyɛ aye abua kɛ́ aama loo aasaa amɛ diɛŋtsɛ amɛ-Maŋtsɛyeli Asa lɛ.

KPEE ASAI

¹⁸ Blema Kristofoi lɛ bua amɛhe naa yɛ kui bibii amli kɛfee kpee. Shi bei komɛi lɛ, “mɛi pii” hu buaa amɛhe naa. (Bɔf. 11:26) Ŋmɛnɛ hu lɛ, Yehowa webii kpeɔ kutuu kɛfeɔ kpokpaa nɔ kpeei kɛ kpokpaa wulu nɔ kpeei. Bei pii lɛ, ayahaiɔ he ko yɛ kpokpaa lɛ nɔ kɛfeɔ kpee nɛɛ, shi kɛ́ anáaa he ko, loo he ni aná lɛ ehiii lɛ, atoɔ gbɛjianɔ koni aná jamɔhe ko ni atsɛɔ lɛ Kpee Asa.

¹⁹ Bei komɛi lɛ, ahéɔ tsũ ko ni asaa lɛ kɛfeɔ Kpee Asa. Shi bei pii lɛ, ahéɔ shikpɔŋ ni amaa asa hee yɛ nɔ. Esoro Kpee Asai lɛ eko fɛɛ eko kɛ edalɛ, ni amamɔɔ asai nɛɛ yɛ bɔ ni hiamɔ lɛ ji yɛ hei ni amamɔɔ yɛ lɛ naa. Dani nitsumɔhe nine lɛ baakpɛ yiŋ akɛ ahé tsũ ko kɛfee Kpee Asa loo ama eko lɛ, abuɔ nyɔmɔ ni abaanyɛ abɔ lɛ naa akwɛɔ jogbaŋŋ ni akwɛɔ shii abɔ hu ni akɛ asa lɛ baatsu nii.

²⁰ Nitsumɔhe nine lɛ holeɔ nyɛmimɛi hii koni amɛkwɛ Kpee Asa lɛ nɔ ni amɛkura. Atoɔ gbɛjianɔ koni kpokpai lɛ asaa Asa lɛ nɔ kɛ ehewɔ yɛ be kɛ beiaŋ, kɛ agbɛnɛ hu daa nyɔji ekpaa. Kɛfata he lɛ, ahãa kpokpai lɛ batsuɔ Kpee Asa lɛ he nibii lɛ ahe nii koni amɛkafite. Kɛ́ nyɛmimɛi lɛ kɛ amɛhe hã kɛtsu nitsumɔ nɛɛ, amɛnáa he sɛɛ. No hewɔ lɛ, ebaahi jogbaŋŋ akɛ asafoi lɛ amli bii lɛ baajɛ amɛtsui fɛɛ mli amɛye amɛbua ni atsu nitsumɔ nɛɛ.​—Lala 110:3; Mal. 1:10.

²¹ Bei komɛi hu lɛ, afeɔ teokrase nifeemɔi krokomɛi yɛ Kpee Asa lɛ nɔ, ni ekomɛi ji Biblia skul srɔtoi kɛ kpeei krɛdɛi ni afeɔ ahãa kpokpaa nɔkwɛlɔi. Bɔ ni ajɔɔ Maŋtsɛyeli Asa lɛ nɔ ahã Yehowa jamɔ lɛ, nakai nɔŋŋ ajɔɔ Kpee Asa lɛ hu nɔ kɛhã Yehowa jamɔ. No hewɔ lɛ, kɛ́ wɔtee kpee yɛ Kpee Asa ko nɔ lɛ, esa akɛ bulɛ ahi wɔnifeemɔi, wɔtadewoo, kɛ wɔhesaamɔ he, tamɔ bɔ ni eji kɛ́ wɔkpe yɛ Maŋtsɛyeli Asa lɛ nɔ kɛhã jamɔ lɛ nɔŋŋ.

²² Bei ni eshwɛ ni naagbee lɛ baaba lɛ faaa, ni mɛi hei babaoo kɛ amɛhe miidɔmɔ Nyɔŋmɔ asafo lɛ oyayaayai. Enɛ tsɔɔ akɛ Yehowa miijɔɔ jamɔ ni wɔkɛhãa lɛ lɛ nɔ. (Yes. 60:8, 10, 11, 22) No hewɔ lɛ, wɔmiisumɔ ni wɔfi gbɛjianɔ ni atoɔ koni aná jamɔhei ni kɛ́ mɛi kpe yɛ mli lɛ amɛhe jɔɔ amɛ lɛ sɛɛ ni wɔye wɔbua ni jɛmɛ afee falefale hu. Kɛ́ wɔfee nakai lɛ, no tsɔɔ akɛ wɔhiɛ sɔɔ nɔ ni akɛ jamɔhei nɛɛ feɔ lɛ. Wɔkpeɔ yɛ jɛmɛ koni wɔwowoo wɔhe hewalɛ ejaakɛ wɔmiina akɛ Yehowa gbi lɛ miibɛŋkɛ.