Ani Oyɛ Bulɛ Kɛha Ojamɔ He Lɛ?

“Kɛjɛ sanekpakpa lɛ shishijee mli tɔ̃ɔ lɛ, Kristofoi lɛ naa he ko ni amɛhiɔ daa kɛhaa jamɔ krɔŋŋ.”​—“Primitve Christianity,” ni William cave ŋma.

NYƆŊMƆ webii yɛ he miishɛɛ daa akɛ amɛaabua amɛhe naa yɛ he ko kɛha jamɔ. Enɛ ji anɔkwale yɛ klɛŋklɛŋ afii oha lɛ mli taakɛ eji amrɔ nɛɛ lɛ. Mra be mli woji aŋmalalɔi kɛ Nyɔŋmɔ jamɔ he nilelɔi, tamɔ Lucian, Clement, Justin Martyr, kɛ Tertullian, fɛɛ kɛ amɛhe kpaa gbee akɛ Kristofoi yɛ hei pɔtɛɛ komɛi ni amɛkpeɔ kutuu yɛ jɛmɛ be fɛɛ be.

Biblia lɛ kɛ nakai oti lɛ nɔŋŋ maa shi, ni etsɛɔ saji ayisɛɛ babaoo ni ekɛtsɔɔ akɛ Kristofoi akui sɔrɔtoi yɛ ni kpeɔ be fɛɛ be. Ale nɛkɛ kui nɛɛ akɛ asafoi. Enɛ sa jogbaŋŋ ejaakɛ wiemɔ “asafo” ni yɔɔ mra be mli Biblia wiemɔi amli lɛ tsɔɔ gbɔmɛi akuu ko ni amɛkpe kutuu kɛha yiŋtoo loo nifeemɔ ko.

Mra Be Mli Hei Kɛha Kristofoi Ajamɔ

Mɛni afii oha lɛ mli Kristofoi lɛ feɔ, kɛ amɛkpe kutuu? Biblia lɛ tsɔɔ kpeei sɔrɔtoi ni tamɔ nakai lɛ amli ni etsɔɔ akɛ nitsɔɔmɔ ji efa titri ko ni he hiaa waa. (Bɔfoi lɛ Asaji 2:​42; 11:​26; 1 Korintobii 14:​19, 26) Ato tsɔsemɔ he gbɛjianɔ, ni ahaa wiemɔ kɛ tsɔɔmɔ, agbaa niiashikpamɔi ni woɔ mɔ hewalɛ, ni asusuɔ woji ni ana kɛjɛ nɔyeli kuu ni yɔɔ Yerusalem loo bɔfo ko dɛŋ lɛ he waa.

Wɔkaneɔ yɛ Bɔfoi lɛ Asaji 15:​22-35 akɛ, be mli ni akane nakai wolo lɛ eko atsɔɔ Kristofoi akuu ko yɛ Antiokia sɛɛ lɛ, Yuda kɛ Sila kɛ “wiemɔ babaoo shɛje nyɛmimɛi lɛ amii ni amɛwo amɛ hewalɛ.” Amaniɛbɔɔ kroko hu kɛɔ akɛ beni Paulo kɛ Barnaba ba Antiokia “ni amɛbabua asafo lɛ naa lɛ, amɛgba amɛ nii ni Nyɔŋmɔ kɛ amɛ eyatsu lɛ fɛɛ.” Yehowa ni asɔleɔ ahaa lɛ lɛ hu ji fa titri ko ni he hiaa waa yɛ Kristofoi akpeei amli.​—Bɔfoi lɛ Asaji 14:⁠27.

Hei ni klɛŋklɛŋ afii oha lɛ mli asafoi lɛ bua amɛhe naa yɛ kɛha jamɔ lɛ tamɔɔɔ Kristendom sɔlemɔtsui wuji ni anaa ŋmɛnɛ lɛ eko. Bei babaoo mli lɛ, mra be mli Kristofoi lɛ kpeɔ yɛ mɛi ashiai amli. (Romabii 16:5; 1 Korintobii 16:​19; Kolosebii 4:​15; Filemon 2) Nɔ ni afɔɔ feemɔ ji, akɛ pia loo ŋwɛitsu ni yɔɔ mɔ ko shia mli lɛ tsuɔ nii. Ŋwɛitsu mli ji he ni aye Nuŋtsɔ lɛ Gbɛkɛnaashi Niyenii lɛ yɛ. Ŋwɛitsu mli hu ji he ni akɛ mumɔ krɔŋkrɔŋ lɛ fɔ kaselɔi 120 lɛ amu, yɛ Pentekoste gbi lɛ nɔ yɛ.​—Luka 22:​11, 12, 19, 20; Bɔfoi lɛ Asaji 1:​18, 14; 2:​1-4; 20:​7, 9.

Ŋmɛnɛ, Yehowa Odasefoi nyiɛɔ gbɛtsɔɔmɔ ni bɔfoi lɛ to amɛmashi lɛ sɛɛ. Amɛkɛ kpee hei ni ale nomɛi akɛ Maŋtsɛyeli Asai lɛ tsuɔ nii. Jɛmɛ ji he ni atsɔseɔ amɛ yɛ akɛ Nyɔŋmɔ Maŋtsɛyeli lɛ he sanekpakpa shiɛlɔi. (Mateo 24:14) Amɛkaseɔ Ŋmalɛi lɛ hu, amɛsɔleɔ, ni amɛkɛ wiemɔ woɔ amɛhe hewalɛ yɛ Maŋtsɛyeli Asa lɛ nɔ. Enɛ kɛ Biblia mli ŋaawoo ni yɔɔ Hebribii 10:​24, 25 lɛ kpaa gbee akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.”

Wɔ Jamɔ He lɛ ni Wɔkɛaatsu Nii Jogbaŋŋ

Ani okaiɔ bɔfo Paulo wiemɔi ni kɛɛ nɛkɛ lɛ, akɛ: “Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni” kɛ agbɛnɛ “Afee nii fɛɛ bɔ ni yɔɔ fɛo kɛ gbɛnaa-gbɛnaa” lɛ? Kɛ opɛi wiemɔi kukuji ni bɔle wiemɔi nɛɛ ahe lɛ mli lɛ, obaana akɛ Paulo miitsɔɔ gbɛ ni esa akɛ atsɔ nɔ atsu Kristofoi akpeei ahe nii aha. Taakɛ eji yɛ bɔfoi lɛ abeaŋ lɛ, ŋmɛnɛŋmɛnɛ Kristofoi lɛ bɔɔ mɔdɛŋ ni amɛkwɛ akɛ ato amɛkpeei lɛ hu naa pɛpɛɛpɛ ni ato he gbɛjianɔ jogbaŋŋ hu.​—1 Korintobii 14:26-40.

October 15, 1969, Watchtower lɛ kɛɛ akɛ: “Mumɔŋ shihilɛ ni yɔɔ Maŋtsɛyeli Asa lɛ mli lɛ ji anɔkwa nɔ, ni ejɛɔ miishɛɛ diɛŋtsɛ ni ayɔɔ yɛ anɔkwa jamɔ kɛ Biblia ŋaawoo he lɛ mli kɛbaa. Ni kanei, kɛ shihilɛi ni ebɔle asa lɛ he kɛkpe lɛ hu woɔ mɛi ni eba lɛ hewalɛ koni amɛfee mɛi ni hereɔ mɛi kɛ mɛi ni yɔɔ naanyobɔɔ su, ni jamɔ mli teemɔŋ nɔ ko etsiii amɛnaa.” Eji anɔkwale akɛ, akwɛɔ jogbaŋŋ hu bɔni afee ni Maŋtsɛyeli Asa ni akɛtsuɔ nii lɛ afee he ko ni bulɛ kɛ nyam yɔɔ jɛmɛ daa nɛɛ.

Kristendom ejie bulɛ ni abɛ kwraa kpo yɛ enɛ mli. Jamɔ gbɛjianɔtoi komɛi kɛ amɛjamɔ hei tsuɔ nii akɛ maŋbii ahiɛtserɛjiemɔ hei. Amɛyɛ jamɔ mli rɔk lala he shwɛmɔ nifeemɔ nii ni ajieɔ atsɔɔ ni mɛi kwɛɔ, amɛyɛ tsui ni aholeɔ dadei anɔ yɛ mli kɛhaa kpɔiaŋgbɔlemɔ, amɛyɛ okpɔlɔi ni atswaa bɔɔlui yɛ nɔ, amɛyɛ hei ni akwɛɔ gbekɛbii bibii anɔ yɛ, kɛ agbɛnɛ tsũi ni ajieɔ sinii yɛ mli. Sɔlemɔ ko kɛ amɛhe wo abɔtirifɔɔ he akaŋshii mli akɛ nifeemɔ nii ko ni fata gbɛjianɔ ni amɛto lɛ he. Ebaawa waa diɛŋtsɛ akɛ enɛ kɛ nɔkwɛmɔ nɔ ni bɔfoi lɛ fee kɛfɔ shi lɛ aaakpa gbee.

Kɛ klɛŋklɛŋ afii oha lɛ mli asafo lɛ eko kɛ ehe wo nɔ fɔŋ feemɔ ko mli lɛ, ajajeɔ shihilɛ lɛ. Akɛ nɔkwɛmɔ nɔ lɛ, mɛi ni yɔɔ Kristofoi asafo lɛ mli yɛ Korinto lɛ ateŋ mɛikomɛi kɛ Nuŋtsɔ lɛ Gbɛkɛnaashi Niyenii lɛ gbijurɔyeli lɛ tsu nii akɛ be kɛha niyeli kɛ ninumɔ. Nɔ ni amɛfee ji, amɛkɛ amɛgbɛkɛnaashi niyenii lɛ baa koni amɛbaye dani aje kpee lɛ shishi loo akɛ yɛ kpee lɛ shishi, ni mɛi komɛi po yeɔ nii fe nine ni amɛnuɔ nii hu fe nine. Eka shi faŋŋ akɛ enɛ esaaa kwraa. Bɔfo Paulo ŋma eyaha amɛ akɛ: “Aso nyɛbɛ shiai ni nyɛaaye nii ni nyɛaanu yɛ jɛi?”​—1 Korintobii 11:20-29.

Yɛ Paulo ŋaawoo nɛɛ kɛ gbeekpamɔ naa lɛ, Yehowa Odasefoi bɔɔ mɔdɛŋ koni amɛtsu amɛ diɛŋtsɛ amɛsaji ahe nii yɛ shia loo yɛ he kroko fe ni amɛaafee nakai yɛ Maŋtsɛyeli Asa lɛ nɔ. Eji anɔkwale akɛ, wɔkpee ni wɔkpeɔ daa lɛ haa wɔ hegbɛ ko ni sa ni haa wɔnaa wɔnanemɛi lɛ yɛ be ko mli. Kɛlɛ, ajɔɔ Maŋtsɛyeli Asa lɛ nɔ aha Yehowa, no hewɔ lɛ esa akɛ akɛtsu nii kɛha ejamɔ pɛ. Wɔkɛ hegbɛ ni wɔnaa yɛ jɛmɛ lɛ tsuuu nii ni wɔkɛdi je lɛŋ jarayeli nibii asɛɛ loo ni wɔkɛaatsu shika taomɔ he gbɛjianɔtoo he nii.

Kɛfata he lɛ, asafo lɛ kɛ Maŋtsɛyeli Asa lɛ tsuuu nii kɛha hiɛtserɛjiemɔ he nifeemɔ nii, ni akɛtao shika, loo kwasafoŋ nifeemɔ nibii, tamɔ gbekɛ-kwɛmɔ. Hei krokomɛi yɛ ni mɔ baanyɛ atsu mɔ diɛŋtsɛ saji kɛ jarayeli saji ni tamɔ nakai lɛ ahe nii yɛ.

Asafoŋ onukpai ni yɔɔ Maŋtsɛyeli Asa ko nɔ lɛ yoo akɛ asafo lɛ mlibii miima nibii ni amɛkɛ nibii ni amɛmamai lɛ miiku sɛɛ kɛmiiha yɛ kpeei ashishi. Agbɛnɛ hu, amɛyaa nɔ amɛtsakeɔ sinii ahe video kasɛt yɛ Maŋtsɛyeli Asa lɛ nɔ. Eyɛ mli akɛ nifeemɔ nii ni tamɔ nɛkɛ jeee jarayeli nifeemɔ moŋ, shi asafoŋ onukpai lɛ ye amɛbua amɛ koni amɛna nilee ni yɔɔ saji ni tamɔ nɛkɛ he nii ni amɛaatsu yɛ shia be fɛɛ be kɛ ehe miihia lɛ mli.

Bɔni afee ni wɔkwa shihilɛi ni baaha mɔ ko ana jwɛŋmɔ ni ejaaa ni agbɛnɛ hu ni wɔbɔ mɔdɛŋ ni akɛ Maŋtsɛyeli Asa lɛ atsu nii jogbaŋŋ lɛ, esa akɛ mɔ fɛɛ mɔ abi ehe akɛ: ‘Ani miitsu miteemɔŋ saji komɛi ahe nii yɛ Maŋtsɛyeli Asa lɛ nɔ, moŋ fe ni aaanyɛ atsu he nii yɛ shia?’ Akɛ nɔkwɛmɔ nɔ lɛ, kɛji nyɛmiito kpojee kɛha hiɛtserɛjiemɔ he gbɛjianɔ loo kɛha henaabuamɔ ko lɛ, ani ebahiŋ akɛ aaagba gbɛjianɔtoo ni tamɔ nɛkɛ he sane yɛ shia? Ani wɔbaanyɛ wɔkɛ telifon atsu he nii loo ni wɔya mɛi ni wɔsumɔɔ ni wɔkɛ amɛ agba sane lɛ ashiai amli? Kɛ wɔɔma Paulo wiemɔi nɛɛ wɔkɛtsu nii lɛ, wɔɔnyɛ wɔkɛɛ akɛ: ‘Ani wɔbɛ shiai ni wɔbaatsu saji ni tamɔ enɛɛmɛi ahe nii yɛ jɛi?’

Be ni Ato kɛ He ko ni Akɛaaja Yehowa

Biblia lɛ kɛɔ yɛ Jajelɔ 3:1 akɛ: “Nɔ fɛɛ nɔ yɛ ebe ni ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe.” Wɔbaanyɛ wɔkɛ wɔhe awo nitsumɔi ni kɔɔ Kristofoi asɔɔmɔ nitsumɔ lɛ he lɛ amli vii, kɛ wɔmiiba kpee yɛ Maŋtsɛyeli Asa lɛ nɔ. Eji be ni ato ni akɛaaja Yehowa.

Yesu nyɛmi Yakobo kɛ ŋaawoo ko ni teɔ shi ewoɔ mɛi ahiɛaŋkwɛmɔ yɛ Kristofoi asafo lɛ mli ha. (Yakobo 2:​1-9) Mɛɛ gbɛ nɔ wɔɔtsɔ ni wɔkɛ ŋaawoo nɛɛ atsu nii yɛ wɔ Maŋtsɛyeli Asai anɔ? Mɛi ahiɛaŋkwɛmɔ baanyɛ ajie ehiɛ kpo kɛji atsu ninefɔɔ he woji ni aŋmala, ni akɛhaa mɛi kɛha hiɛtserɛjiemɔ he nii yɛ jɛmɛ. Yɛ asafo ko mli lɛ ebatsɔ su ko yɛ jɛmɛ akɛ, akɛ ninefɔɔ he woji nɛɛ woɔ mɛi ni eba lɛ awoji baagii loo Bibliai amli. Eji anɔkwale akɛ, enɛ haa ehiɔ fe ni akɛ ninefɔɔ he woji nɛɛ baatsɔ post ɔfis adekai amli loo ni akɛaaya shia fɛɛ shia. Kɛlɛ, te mɛi ni naaa ninefɔɔ he woji nɛɛ eko lɛ baanu he aha tɛŋŋ yɛ be mli ni amɛnaa akɛ, akɛ ninefɔɔ he woji eha aŋkroaŋkroi komɛi lɛ? Ani enɛ baajie mɛi ahiɛaŋkwɛmɔ kpo?

Eji anɔkwale akɛ, esaaa akɛ ebafeɔ mla ni yɔɔ kpɛŋŋ ni miitsɔɔ akɛ esaaa akɛ mɔ ko kɛ amaniɛbɔɔ ko loo nɔ ko haa mɔ ko yɛ be mli ni ayɔɔ Maŋtsɛyeli Asa lɛ nɔ; asaŋ, ejeee tɔmɔ akɛ mɔ ko aaawie daa gbi mli nifeemɔ loo nibii ahe, ni ooofɔ mɔ ko nine kɛba oshia, aloo ni ooobi mɔ ko ni efata ohe yɛ hiɛtserɛjiemɔ ko mli, yɛ Maŋtsɛyeli Asa lɛ nɔ. Shi moŋ esa akɛ akutɔ enɛɛmɛi amli ni akɛ ŋaa atsu he nii ni afee yɛ teemɔŋ. Esaaa akɛ mɔ ko teemɔŋ nifeemɔ he gbɛjianɔtoo gbalaa mɔ ko jwɛŋmɔ kɛjɛɔ yiŋtoo krɛdɛɛ hewɔ ni wɔkpeɔ kutuu, ni ji, koni awo mɛi ahewalɛ yɛ mumɔŋ yɛ maŋtsɛyeli Asa lɛ nɔ lɛ nɔ kɔkɔɔkɔ.​—Mateo 6:​33; Filipibii 1:⁠10.

Hii ni Toɔ Okadi

Asafoŋ onukpai kɛ asafoŋ sɔɔlɔi kɛ ekaa toɔ okadi kpakpa yɛ gbɛ ni amɛtsɔɔ nɔ amɛjieɔ bulɛ kpo amɛhaa Maŋtsɛyeli Asa lɛ mli. Yɛ bei babaoo mli lɛ asafoŋ onukpa kome loo mɛi enyɔ kɛ asafoŋ sɔɔlɔi yɛ ni atuu saji ni kɔɔ Maŋtsɛyeli Asa lɛ kwɛmɔ jogbaŋŋ lɛ he nitsumɔ awo amɛdɛŋ. He ni asafoi fe ekome kpeɔ yɛ asa kome lɛ nɔŋŋ nɔ lɛ, asafoŋ onukpai ajinafoi ji mɛi ni kwɛɔ saji ni tamɔ nɛkɛ nɔ.

Eyɛ mli akɛ atuu nakai nitsumɔ lɛ awo mɛi pɔtɛɛ komɛi adɛŋ moŋ, shi esa akɛ asafoŋ sɔɔlɔi kɛ asafoŋ onukpai fɛɛ ajie miishɛɛ diɛŋtsɛ kpo yɛ asa lɛ he. Nɔ ni amɛyɔseɔ ji akɛ ajɔɔ Maŋtsɛyeli Asa lɛ nɔ aha Yehowa ni akɛtsuɔ nii kɛhaa ejamɔ.

Esaaa akɛ asafoŋ onukpai lɛ shashaoɔ shi kɛ ehe miihia ni asaa nibii yɛ he. (2 Kronika 24:​5, 13; 29:3; 34:8; Nehemia 10:​39; 13:11) Yɛ asafoi komɛi amli lɛ akwɛɔ Maŋtsɛyeli Asa lɛ shikamɔ daa bɔni afee ni asaa nɔ ko yɛ he amrɔ nɔŋŋ kɛ ehe miihia. Aŋmalaa nibii ni ayɔɔ lɛ gbɛi awoɔ woji anɔ bɔni afee ni akwɛ ni ana nibii ni he hiaa lɛ ni anyɛ akɛtsu nii. Kɛ ayɛ he ko pɔtɛɛ ni akɛ nibii ni ayɔɔ, nitsumɔ dadei, kɛ falefale-feemɔ he nibii toɔ jɛmɛ lɛ, no lɛ esa akɛ asafoŋ onukpai kɛ asafoŋ sɔɔlɔi fɛɛ ajie miishɛɛ kpo yɛ ehe nitsumɔ he, ni akwɛ jogbaŋŋ ni ehe atse. Mɛi ni tsuɔ nii yɛ woji kɛ woji tɛtrɛbii akpɔlɔi asɛɛ lɛ baanyɛ ajie miishɛɛ ni amɛyɔɔ lɛ kpo kɛtsɔ woji adekai lɛ ni amɛkɛwoŋ asa lɛ mli muji nɔ.

Kɛ asafoŋ onukpai kɛ asafoŋ sɔɔlɔi lɛ to okadi kpakpa lɛ amɛbaanyɛ amɛye amɛbua asafo lɛ mlibii lɛ koni amɛjie ekaafeemɔ kpo yɛ Maŋtsɛyeli Asa lɛ shikamɔ he. (Hebribii 13:⁠7) Mɔ fɛɛ mɔ baanyɛ ajie bulɛ ni sa kpo kɛtsɔ asa lɛ mlisaamɔ mli gbɛfaŋnɔ ni eeena yɛ ehewɔ nitsumɔ lɛ fɛɛ mli lɛ nɔ.

Yesu kɛɛ yɛ Mateo 18:20 lɛ akɛ: “He ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi.” Hɛɛ, Yesu yɛ miishɛɛ yɛ nɔ ni wɔfeɔ kɛ wɔbua wɔhe naa kutuu koni wɔja Yehowa lɛ he. Kpee fɛɛ kpee ni afeɔ yɛ mɛi ashiai amli kɛ kpee wuji hu fata he.

Yɛ Yehowa Odasefoi akpekpei abɔ lɛ agbɛfaŋ lɛ, he ko he ko bɛ ni ka amɛtsui nɔ fe he ni amɛfɔɔ kpee yɛ kɛha jamɔ lɛ, ni ji Maŋtsɛyeli Asa lɛ nɔ. Amɛtsɔɔ bulɛ kpakpa amɛha nakai he lɛ. Amɛjieɔ ekaafeemɔ mumɔ kpo yɛ ehe nitsumɔ mli, ni amɛbɔɔ mɔdɛŋ daa gbi koni amɛkɛtsu nii jogbaŋŋ. Eba akɛ bo hu ooonyiɛ ŋaawoo ni Yehowa diɛŋtsɛ kɛhaa lɛ sɛɛ, akɛ: “Kɛ ooya Nyɔŋmɔ we lɛ, kwɛ onane naa jogbaŋŋ.”​—Jajelɔ 4:⁠17.