Ani Obuɔ Nyɛ Maŋtsɛyeli Asa Lɛ?
(KADIMƆ: Asafo fɛɛ asafo baato gbɛjianɔ ni ati nɛkɛ sane nɛɛ mli kɛ aha wɔ hegbɛ akɛ wɔya wɔmaŋtsɛyeli Asai lɛ amli ekoŋŋ lɛ.)
1 “Kwɛ bɔ ni ehi, kwɛ bɔ ni eyɔɔ fɛo, kɛ nyɛmimɛi fee ekome kɛhi shi lɛ!” (Lala 133:1) kpeei ni yaa nɔ yɛ wɔmaŋtsɛyeli Asa lɛ nɔ lɛ haa wɔnaa hegbɛ koni wɔkɛ wɔnyɛmimɛi lɛ afee ekome ni wɔnyɛ wɔkanya wɔhe kɛya suɔmɔ kɛ nitsumɔi kpakpai amli, ni wɔwowoo wɔhe hewalɛ.—Heb. 10: 24. 25.
2 Akɛni Maŋtsɛyeli Asa lɛ tsuɔ nii akɛ nɔ ko ni he hiaa yɛ wɔshihilɛ mli hewɔ lɛ, ani wɔbuɔ enɛ diɛŋtsɛ? Maŋtsɛyeli Asa lɛ ji anɔkwa jamɔ shikwɛɛ he yɛ he ni oyɔɔ lɛ. No hewɔ lɛ esa akɛ wɔkɛ bulɛ ni mli kwɔ aha enɛ. Esa akɛ wɔ fɛɛ wɔnu he akɛ ehe miihia ni wɔna hetsemɔ kɛ shihilɛ kpakpa mli ni eeehi lɛ mli gbɛfaŋnɔ. Be baashɛ ni akɛ jɛmɛ saamɔ baawo wɔ nikasemɔ kuu lɛ dɛŋ. Kɛ hegbɛ ba akɛ wɔɔnyɛ wɔkɛ wɔhe awo nitsumɔ ni tamɔ nɛkɛ mli lɛ, esa akɛ wɔsumɔ akɛ wɔɔfee nakai, ejaakɛ wɔkɛ nakai feemɔ miitsɔɔ hiɛsɔɔ ni wɔyɔɔ kɛhaa kpee he ni mli tse ni yɔɔ fɛo lɛ.
3 Wɔ fɛɛ wɔbaanyɛ wɔjie miishɛɛ kpo yɛ Maŋtsɛyeli Asa lɛ he, kɛ akɛ nitsumɔ wo wɔdɛŋ akɛ wɔsaa mli aloo ebaaa lɛ nakai. Yɛ mɛɛ gbɛ nɔ? Kɛtsɔ nifeemɔ ni yɔɔ mlɛo akɛ wɔnane shishi ni wɔɔtsumɔ yɛ be mli ni wɔboteɔ Asa lɛ nɔ koni wɔkɛ muji akaya jɛmɛ lɛ nɔ. Enɛ ji anɔkwale titri yɛ nugbɔnɛmɔ be mli. Kɛ wɔbote shamɔ he loo wamɔ he lɛ, wɔbaasumɔ ni wɔha emli atse aha mɔ kroko ni baanyiɛ sɛɛ aba jɛmɛ lɛ. Mɛi ni tsuɔ woji wuji kɛ woji tɛtrɛbii lɛ ahe nii lɛ hu baanyɛ ajie amɛmiishɛɛ kpo kɛtsɔ adekai ni woji bɛ mli ni amɛaajie fɛɛ kɛjɛ jɛmɛ lɛ nɔ. Akɛ jwɛi lɛ fɛɛ awo nibii ni esa akɛ akɛwo mli lɛ mli. Kɛ wɔna woji komɛi ni jwere shi loo jwɛi yɛ shikpɔŋ, aloo Maŋtsɛyeli Asa lɛ shikpɔŋ lɛ nɔ lɛ, esa akɛ wɔkɔlɔ enɛɛmɛi moŋ fe ni wɔɔha ni mɔ kroko abakɔlɔ. Wɔ Maŋtsɛyeli Sɔɔmɔ kɛha February 1989 lɛ kɛ ŋaawoi sɔrɔtoi ni kɔɔ gbɛ ni aaatsɔ nɔ ni aha adafitswaa tao lɛ nɔ atse lɛ ha. Esa akɛ mɛi krokomɛi kɛ onukpai asɛinɔtalɔ lɛ afee ekome ni akɛdi nɛkɛ ŋaawoo nɛɛ sɛɛ.—km. 2/89 bf.3
4 Abaanyɛ akɛ shishitoo mla nɛɛ nɔŋŋ atsu nii yɛ be mli ni wɔyaa kpeei, kpee he lɛ ji jamɔ krɔŋŋ shikwɛɛ he, kɛ eji wɔ kpee Asa loo he kroko ni ato he gbɛjianɔ, ni esa akɛ wɔjie bulɛ kpo wɔtsɔɔ hei nɛɛ. Be fɛɛ be ni wɔɔshi Asa lɛ nɔ lɛ, esa akɛ wɔkwɛ akɛ ani ashiko jwɛi yɛ jɛmɛ lo. Esa akɛ wɔye wɔbua ni wɔna jwɛŋmɔ kpakpa ni wɔkanu he akɛ mɛi ni akɛ jɛmɛ saamɔ nitsumɔ lɛ ewo amɛdɛŋ lɛ ji mɛi ni baaloo jwɛi ni baa yɛ wɔsɛɛ lɛ.
Asa Ni Asafoi Krokomɛi Hu Baa Jɛmɛ
5 Akɛni tsui ajara wa hewɔ lɛ, asafoi pii yaa Maŋtsɛyeli Asa kome mli. Asafoi aaafee enumɔ loo ekpaa yaa Maŋtsɛyeli Asa kome mli yɛ maji wuji lɛ amli. Esa akɛ asafo fɛɛ asafo anya Maŋtsɛyeli Asa lɛ he, ni amɛyoo akɛ eji Yehowa nii ni akɛmiitsu nii aha ejamɔ. No hewɔ lɛ, bulɛ kɛha Maŋtsɛyeli Asa lɛ etsɔɔɔ suɔmɔ ni wɔyɔɔ wɔhaa Yehowa pɛ shi moŋ suɔmɔ ni wɔyɔɔ kɛha wɔnyɛmimɛi ni yɔɔ asafoi krokomɛi ni baa Maŋtsɛyeli Asa lɛ nɔ lɛ amli lɛ hu.
6 Nɔ ni afɔɔ feemɔ ji Maŋtsɛyeli Asa lɛ mli saamɔ shikome daa otsi. Kɛ asafoi fe ekome yaa Asa lɛ nɔ lɛ, belɛ ehe miihia ni abɛɛ jɛmɛ kɛ agbe kpee fɛɛ kpee naa koni asafo ni baanyiɛ sɛɛ aba Asa lɛ nɔ lɛ ana akɛ emli tse. Enɛ hu kɔɔ Hɔgbaa fɛɛ Hɔgbaa he yɛ be mli ni asafo kome nyiɛɔ ekroko sɛɛ baa nɔŋŋ lɛ. Ehi akɛ aaabɛɛ mli bɔ ni belɛ aaaŋmɛ gbɛ aha asafoi nibaanyiɛ sɛɛ aba lɛ. Kɛ asafoi pii baa asa lɛ nɔ yɛ gbi kometoo lɛ nɔŋŋ nɔ lɛ, emli baawo muji yɛ gbi lɛ naagbee kɛji akɛ mɔ ko kwɛɛɛ emli bɛɛmɔ nɔ.
7 Taakɛ bɔ ni ‘wɔ fɛɛ wɔyitsoŋ kɛ wɔjwɛŋmɔ efee ekome’ yɛ mumɔŋ saji ahe lɛ, eba akɛ wɔɔfee ekome nakai nɔŋŋ yɛ bulɛ ni wɔjieɔ lɛ kpo yɛ wɔ Maŋtsɛyeli Asai ahe lɛ mli.—1 Kor. 1:10.