“Nyɛsumɔa Yehowa, Nyɛ Mɛi Fɛɛ ni Nyɛji Emɛi Krɔŋkrɔŋi Lɛ”
Abaaye Yesu Gbele lɛ Kaimɔ lɛ yɛ April 4
1 Beni Ukraine yɔɔ Komunist nɔyeli shishi yɛ afii ni eho lɛ amli lɛ, nɔyelɔi lɛ kwɛɔ nyɛmimɛi lɛ ayaa kɛbaa jogbaŋŋ—titri lɛ kɛ́ Nuŋtsɔ lɛ Gbɛkɛnaashi Niyenii lɛ shɛ—ejaakɛ amɛmiitao ni amɛna heni amɛkpeɔ yɛ lɛ. Enɛ bafeɔ naagba ni yɔɔ daa nɛɛ, ejaakɛ nɔyelɔi lɛ le be pɔtɛɛ ni akɛyeɔ kaimɔ lɛ. Mɛni ji nɔ ni nyɛmimɛi lɛ baanyɛ afee? Nyɛmiyoo lɛ eko yɛ asa ko yɛ eshia lɛ shishi ni nu tá jɛmɛ. Akɛni nɔyelɔi lɛ kpaŋ gbɛ akɛ mɛi baabua amɛhe naa yɛ jɛmɛ hewɔ lɛ, nyɛmimɛi lɛ ma kpoku ko yɛ nu ni nɔkwɔlɛ shɛɔ nakutsei anaa lɛ hiɛ. Eyɛ mli akɛ ehe bahia ni nyɛmimɛi lɛ adɔrɔ amɛnaji kɛtara nɔ yɛ sɛndo ni kwɔɔɔ lɛ shishi moŋ, shi mɔ ko mɔ ko gbaaa amɛ naa beni asafo lɛ fɛɛ kɛ miishɛɛ yeɔ Kaimɔ lɛ.
2 Wɔnyɛmimɛi ni yɔɔ Ukraine lɛ afaishitswaa akɛ amɛbaabo famɔ akɛ akai Yesu gbele lɛ toi lɛ ji suɔmɔ ni amɛyɔɔ kɛha Nyɔŋmɔ lɛ kpojiemɔ ni yɔɔ naakpɛɛ. (Luka 22:19; 1 Yoh. 5:3) Be fɛɛ be ni wɔkɛ naagbai baakpe yɛ wɔshihilɛi amli lɛ, eba akɛ wɔɔha nɛkɛ nɔkwɛmɔnii nɛɛ awo wɔ hewalɛ koni wɔtswa wɔfai shi akɛ wɔbaahi jɛmɛ kɛye Nuŋtsɔ lɛ Gbɛkɛnaashi Niyenii lɛ Kaimɔ lɛ yɛ April 4. Kɛ́ wɔfee nakai lɛ, wɔkɛ henumɔ ni lalatsɛ lɛ jie lɛ kpo lɛ kpãa gbee, mɔ ni lá akɛ: “Nyɛsumɔa Yehowa, nyɛ mɛi fɛɛ ni nyɛji emɛi krɔŋkrɔŋi lɛ!”—Lala 31:24.
3 Ye Obua Mɛi Krokomɛi Koni Suɔmɔ ni Amɛyɔɔ Kɛha Nyɔŋmɔ lɛ Mli Awa: Suɔmɔ ni wɔyɔɔ kɛha Nyɔŋmɔ lɛ hu tsirɛɔ wɔ koni wɔfɔ mɛi krokomɛi anine kɛba, ni amɛkɛ wɔ abaye Yesu gbele lɛ kaimɔ lɛ. Nɔ ni aŋma ahɔ February Wɔ Maŋtsɛyeli Sɔɔmɔ lɛ mli lɛ woɔ wɔ fɛɛ hewalɛ koni wɔŋmala mɛi ni wɔto wɔyiŋ akɛ wɔbaafɔ amɛnine kɛba Kaimɔ lɛ shishi lɛ agbɛi yɛ wolo nɔ. Ani oobɔ mɔdɛŋ ni ofɔ mɔ fɛɛ mɔ ni oŋma egbɛi yɛ owolo lɛ nɔ lɛ nine? Hemɔ be ni okɛgbála nɔ ni nifeemɔ lɛ tsɔɔ lɛ mli oha amɛ. Mlihilɛ mli ni ooojɛ okai amɛ gbi kɛ be ni akɛbaafee Kaimɔ lɛ, loo kɛ eeehi lɛ, ni oha amɛle akɛ obaatsɛ amɛ kɛya lɛ, baanyɛ awo amɛ hewalɛ koni amɛba.
4 Bɔɔ mɔdɛŋ krɛdɛɛ koni oŋa mɛi ni eba lɛ ni oha amɛhiɛ amɛ heni abaafee Kaimɔ lɛ yɛ lɛ. Te ooofee tɛŋŋ oye obua amɛ ni amɛdara yɛ suɔmɔ ni amɛyɔɔ kɛha Yehowa lɛ mli? Feemɔ klalo ni ojɛ osuɔmɔ mli oha amɛsanebimɔi lɛ ahetoo. Kɛ́ ebaahi lɛ, feemɔ klalo koni oje Biblia mli nikasemɔ shishi. Fɔɔ amɛnine kɛba asafoŋ kpeei ni wɔfeɔ daa otsi lɛ ashishi. Nɔ ni esa akɛ onukpai lɛ asumɔ akɛ amɛbaafee hu ji ni amɛgbala amɛjwɛŋmɔ kɛya Kristofoi ni ekpa shiɛmɔyaa ni amɛba jɛmɛ lɛ anɔ. Amɛbaanyɛ ni amɛto gbɛjianɔ koni amɛyasara mɛi ni tamɔ nɛkɛ lɛ koni amɛwo amɛ hewalɛ ni amɛkɛ asafo lɛ abɔi bɔɔ ekoŋŋ, ekolɛ kɛtsɔ wiemɔ ni aha yɛ Kaimɔ lɛ shishi lɛ ni amɛkɛ amɛaasusu he kɛya shɔŋŋ lɛ nɔ.—Rom. 5:6-8.
5 Suɔmɔ ni Wɔyɔɔ Kɛha Yehowa lɛ ni Wɔɔha Emli Akwɔ: Kpɔmɔ afɔleshaa lɛ nɔ ni wɔɔjwɛŋ lɛ baanyɛ aha suɔmɔ ni wɔyɔɔ kɛha Yehowa kɛ e-Bi lɛ mli akwɔ. (2 Kor. 5:14, 15) Mɔ ko ni kɛ afii babaoo etee Kaimɔ lɛ kɛɛ akɛ: “Wɔmiikpa Kaimɔ lɛ gbɛ. Ebafeɔ nɔ ko krɛdɛɛ kɛha wɔ daa afi. Mikaiɔ beni midamɔ shia ni afeɔ yara lɛ yɛ mli lɛ aaafee afii 20 ni eho nɛ lɛ, beni mikwɛɔ mitsɛ ni misumɔɔ lɛ waa lɛ, kɛ bɔ ni miná hiɛsɔɔ ni jɛ tsuiŋ kɛha kpɔmɔ afɔleshaa lɛ. Dani nakai be lɛ aaaba lɛ no mli lɛ Kpɔmɔ afɔleshaa lɛ ji nilee ko ni yɔɔ miyitsoŋ kɛkɛ. Oo, mile ŋmalɛi ni kɔɔ he lɛ kɛ bɔ ni agbálaa amɛ mli ahaa! Shi beni mina bɔ ni gbele yɔɔ diɛŋtsɛ kɛ nɔ ni afɔleshaa ni jara wa lɛ etsu kɛha wɔ lɛ, eha mitsui yi obɔ kɛ miishɛɛ.”—Yoh. 5:28, 29.
6 Be mli ni be ni akɛbaafee afi nɛɛ Kaimɔ lɛ bɛŋkɛɔ lɛ, hemɔ be ni okɛsaa otsui kɛha nifeemɔ lɛ. (2 Kron. 19:3) Susumɔ Biblia kanemɔ krɛdɛɛ kɛha Kaimɔ lɛ ni ato he gbɛjianɔ yɛ Ŋmalɛi lɛ Amli ni Wɔɔkwɛ Daa—2004 nɔ lɛ kɛ afi 2004 Kalanda lɛ mli lɛ he. Mɛi komɛi náa he miishɛɛ akɛ amɛaatĩ Gbɔmɔ ni Fe Mɔ Fɛɛ Mɔ wolo lɛ mli saneyitsei 112-116 lɛ mli beni amɛfeɔ amɛweku nikasemɔ. Mɛi krokomɛi taoɔ saji amli kɛfataa he kɛtsɔ woji ni akɛtaoɔ saji amli ni tsulɔ anɔkwafo kɛ nilelɔ kuu lɛ kɛha lɛ kɛ nitsumɔ nɔ. (Mat. 24:45-47) Wɔ fɛɛ wɔbaanyɛ wɔha nikeenii ni ji kpɔmɔnɔ lɛ afee nɔ ni wɔkɛ fataa wɔsɔlemɔi ahe. (Lala 50:14, 23) Hɛɛ, yɛ Kaimɔ bei nɛɛ mli lɛ, eba akɛ wɔɔya nɔ wɔsusu suɔmɔ ni Yehowa yɔɔ kɛha wɔ lɛ he koni wɔtao gbɛ̀i ni wɔɔtsɔ nɔ wɔjie suɔmɔ ni wɔyɔɔ kɛha lɛ lɛ kpo wɔtsɔɔ.—Mar.12:30; 1 Yoh. 4:10.