Ha Ohiŋmɛi Nɔ Atse
1. Ákɛ aaaná hiŋmɛi ni nɔ tse lɛ tsɔɔɔ mɛni, ni mɛni hewɔ enɛ he hiaa lɛ?
1 Yesu gbala jwɛŋmɔ kɛtee hewalɛ kpele ni mfonirifeemɔŋ loo mumɔŋ hiŋmɛi lɛ baanyɛ aná yɛ wɔshihilɛ fɛɛ nɔ lɛ nɔ yɛ e-Gɔŋ nɔ Shiɛmɔ lɛ mli. Ekɛɛ akɛ: “No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ fɛɛ aaayi kɛ la; shi kɛji ohiŋmɛi nɔ tseee lɛ, ogbɔmɔtso muu lɛ aaawo duŋ.” (Mat. 6:22, 23) Hiŋmɛi ni nɔ tse ji hiŋmɛi ni ma oti kome nɔ—Nyɔŋmɔ suɔmɔnaa nifeemɔ—ni heloonaa nibii ahe yeyeeyefeemɔ ni esaaa gbaaa enaa. (Mat. 6:19-21, 24-33) Mɛni baaye abua wɔ koni wɔya nɔ wɔha wɔhiŋmɛi nɔ atse?
2. Mɛɛ susumɔ ni kɔɔ heloonaa nibii ahe Nyɔŋmɔ Wiemɔ lɛ woɔ he hewalɛ?
2 Ha Omii Ashɛ Onii Ahe: Ákɛ mɔ ko aaakwɛ ewe nɔ jogbaŋŋ lɛ ji Ŋmalɛ naa gbɛnaa nii. (1 Tim. 5:8) Shi enɛ biii ni wɔkɛ wɔhe awo nibii ni hi fe fɛɛ kɛ nibii ni eba nɔ lɛ asɛɛtiumɔ daa mli. (Abɛi 27:20; 30:8, 9) Yɛ no najiaŋ lɛ, Ŋmalɛi lɛ woɔ wɔ hewalɛ koni wɔmii ashɛ “ŋmãa kɛ hehaanii,” ni ji nibii ni he hiaa yɛ shihilɛ mli lɛ ahe. (1 Tim. 6:8; Heb. 13:5, 6) Ŋaawoo nɛɛ toi ni wɔɔbo lɛ baanyɛ aye abua wɔ koni wɔhiŋmɛi lɛ akwɛ he kometoo.
3. Mɛni baanyɛ aye abuɔ wɔ koni wɔkwa jatsui ni wɔ diɛŋtsɛ wɔkɛaafɔ wɔnɔ lɛ?
3 Ebaafee nɔ ni nilee yɔɔ mli kɛha wɔ akɛ wɔɔkwa nyɔmɔ ni he ehiaaa, kɛ nibii loo nii asɛɛtiumɔ ni biɔ be kɛ jwɛŋmɔ babaoo lɛ koni ekatsɔ jatsu kɛha wɔ. (1 Tim. 6:9, 10) Mɛɛ gbɛ nɔ wɔɔtsɔ wɔfee enɛ? Kɛ́ oosusu nɔ ko ni obaafee he lɛ, esa akɛ osɔle jogbaŋŋ yɛ sane lɛ he ni okɛ anɔkwayeli aŋmɛ okwɛ kɛji akɛ ebaagba mumɔŋ nibii ni otiuɔ sɛɛ lɛ anaa. Tswaa ofai shi ni okɛ mumɔŋ nibii aye klɛŋklɛŋ gbɛhe yɛ oshihilɛ mli.—Fil. 1:10; 4:6, 7.
4. Mɛni hewɔ esa akɛ wɔtao gbɛ̀i ni wɔɔtsɔ nɔ wɔha wɔshihilɛ afee mlɛo lɛ?
4 Ha Oshihilɛ Afee Mlɛo: Gbɛ kroko ni atsɔɔ nɔ ateɔ shi ashiɔ heloonaa ninamɔ he akɔnɔ lɛ ji ni atao gbɛ ni aaatsɔ nɔ aha shihilɛ afee mlɛo. Nyɛminuu ko ni yɔse akɛ eweku lɛ baanyɛ ahi shi jogbaŋŋ kɛ́ amɛbɛ heloonaa nibii babaoo lɛ kɛɛ akɛ: “Agbɛnɛ minyɛɔ mifeɔ babaoo yɛ asafo lɛ mli ni mikɛsɔmɔɔ minyɛmimɛi lɛ. Eha miyɔse akɛ Yehowa jɔɔ etsuji fɛɛ kɛ́ amɛkɛ anɔkwa jamɔ ye amɛ diɛŋtsɛ amɛnibii ni amɛsumɔɔ lɛ ahiɛ.” Ani obaasumɔ ni oha oshihilɛ afee mlɛo koni oná jɔɔmɔi babaoo?
5. Mɛni hewɔ ehe hiaa ni wɔya nɔ wɔha wɔhiŋmɛi nɔ atse lɛ?
5 Ehe miihia ni wɔya nɔ wɔbɔ mɔdɛŋ ni wɔte shi wɔshi hewalɛ ni Satan, ejeŋ ni diɔ heloonaa ninamɔ sɛɛ, kɛ emuu ni wɔ diɛŋtsɛ wɔyeee lɛ náa yɛ wɔnɔ lɛ. Yɛ nɔ najiaŋ ni wɔɔha wɔhiŋmɛi akpa shi lɛ, nyɛhaa wɔyaa nɔ wɔkwɛa Nyɔŋmɔ suɔmɔnaa nifeemɔ kɛ naanɔ wala he hiɛnɔkamɔ ni yɔɔ miishɛɛ lɛ.—Abɛi 4:25; 2 Kor. 4:18.