Ani Ohiŋmɛi nɔ Tse?
1. Kɛ́ akɛɛ ‘wɔhiŋmɛi nɔ atse’ lɛ, te atsɔɔ tɛŋŋ?
1 Nɔ ni wɔhiŋmɛi naa lɛ náa wɔnifeemɔi anɔ hewalɛ. Belɛ esa jogbaŋŋ akɛ Yesu wie akɛ: “No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ fɛɛ aaayi kɛ la”! (Mat. 6:22) Kɛ́ wɔhiŋmɛi nɔ “tse” yɛ mumɔŋ shishinumɔ naa lɛ, no tsɔɔ akɛ wɔkɛ oti kome ema wɔhiɛ—no ji Nyɔŋmɔ suɔmɔnaa nii ni wɔɔfee. Wɔkɛ Maŋtsɛyeli lɛ yeɔ klɛŋklɛŋ gbɛhe, ni wɔhaaa heloonaa nibii kɛ nibii krokomɛi ni haaa wɔnyɛ wɔkɛ wɔhe awo sɔɔmɔ nitsumɔ lɛ mli lɛ agbala wɔjwɛŋmɔ.
2. Mɛɛ nibii baanyɛ aha wɔsusu nii ahe yɛ gbɛ ni ejaaa nɔ, shi mɛni kɛ́ wɔfee lɛ ebaaye ebua wɔ?
2 Ehe Miihia ni Wɔpɛi Wɔmli Wɔkwɛ: Nibii ni mɛi yɔɔ ni wɔnaa loo bɔ ni atswaa nibii ni ahɔɔ lɛ he adafi koni eha wɔnu he akɛ nibii nɛɛ ahe miihia wɔ lɛ baanyɛ aha wɔsusu nii ahe yɛ gbɛ ni ejaaa nɔ. Dani wɔbaatsu nitsumɔ ko loo wɔbaahe nɔ ko ni baahe wɔbe babaoo, wɔshika loo wɔhewalɛ lɛ, ebaahi akɛ ‘wɔbu naa wɔkwɛ dã’ kɛtsɔ sane nɛɛ ni wɔɔbi wɔhe lɛ nɔ akɛ: ‘Ani enɛ baaha masɔmɔ Yehowa jogbaŋŋ, aloo ebaatsɔ gbɛtsii nii kɛha mi?’ (Luka 14:28; Fil. 1:9-11) Nilee yɛ mli akɛ yɛ be kɛ beaŋ lɛ, wɔɔtao gbɛi anɔ ni wɔɔtsɔ wɔha wɔshihilɛ afee mlɛo koni wɔnyɛ wɔtsu babaoo yɛ sɔɔmɔ nitsumɔ lɛ mli.—2 Kor. 13:5; Efe. 5:10.
3. Mɛni wɔkaseɔ kɛjɛɔ nyɛmi yoo ko ni fee tsakemɔi komɛi koni eha eshihilɛ afee mlɛo lɛ ŋɔɔ?
3 Beni nyɛmi yoo ko je daa gbɛgbamɔ nitsumɔ lɛ shishi lɛ, kulɛ ebaanyɛ ekɛ ebe fã atsu nii ni ená shika ni fa bɔ ni sa kɛkwɛ ehe, shi ekpɛ eyiŋ akɛ ebaaya nɔ etsu nitsumɔ ni ekɛ ebe fɛɛ tsuɔ lɛ. Sɛɛ mli lɛ emu sane naa akɛ: “Mɔ ko nyɛŋ nuŋtsɔmɛi enyɔ asɔmɔ. Esa akɛ mikɛ nibii ni kɛ́ miná lɛ miisumɔ lɛ ashã afɔle koni madi nibii ni he hiaa mi lɛ pɛ asɛɛ. Miyɔse akɛ heloonaa nibii fiteɔ ni amɛbe hu hoɔ, ni kɛ́ migbo deŋme kɛtiu sɛɛ lɛ, ebaatɔ mi efolo.” Yɛ bɔ ni eshihilɛ ji lɛ naa lɛ, efee tsakemɔi koni etao nitsumɔ kroko ní eshihilɛ hu afee mlɛo koni enyɛ eya nɔ etsu gbɛgbamɔ nitsumɔ lɛ.
4. Mɛni hewɔ ehe hiaa waa ni wɔya nɔ wɔha wɔhiŋmɛi nɔ atse amrɔ nɛɛ?
4 Akɛni be lɛ faaa dɔŋŋ hewɔ lɛ, ehe miihia waa ni wɔya nɔ wɔha wɔhiŋmɛi nɔ atse. Beni je naa ni je tsɛreɔ lɛ, belɛ nɛkɛ wɔbɛŋkɛɔ nibii agbɛjianɔtoo nɛɛ naagbee kɛ be ni Nyɔŋmɔ jeŋ hee lɛ baaje shishi lɛ he kpaakpa. (1 Kor. 7:29, 31) Kɛ́ wɔha shiɛmɔ nitsumɔ lɛ fee wɔnitsumɔ titri lɛ, wɔbaanyɛ wɔhere wɔ diɛŋtsɛ kɛ mɛi ni boɔ wɔ toi lɛ ayiwala.—1 Tim. 4:16.