Be ni Esa akɛ Akɛshiɛ lɛ Nɛ!

1. Mɛni hewɔ amrɔ nɛɛ ji be ni esa akɛ akɛshiɛ lɛ?

¹ “Nyɛshea Nyɔŋmɔ gbeyei ni nyɛkɛ anunyam ahaa lɛ.” Aajaje shɛɛ sane nɛɛ amrɔ nɛɛ kɛmiitsɔɔ “jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ” yɛ ŋwɛibɔfoi agbɛtsɔɔmɔ shishi. Mɛni hewɔ ajajeɔ enɛ? ‘Ejaakɛ Nyɔŋmɔ kojomɔ ŋmɛlɛtswaa lɛ eshɛ.’ Ŋmɛnɛ, wɔyɛ nakai ‘kojomɔ ŋmɛlɛtswaa’ ni baaba naagbee kɛ́ akpata nibii agbɛjianɔtoo ni yɔɔ amrɔ nɛɛ hiɛ lɛ mli. Ehe miihia ni mɛi ‘ajá Mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.’ Nitsumɔ ko bɛ ni atsuɔ ŋmɛnɛ ni he hiaa loo ebiɔ ni akɛ oyaiyeli atsu tamɔ “naanɔ sanekpakpa” lɛ shiɛmɔ. Hɛɛ, be ni esa akɛ akɛshiɛ lɛ nɛ!—Kpoj. 14:6, 7.

2. Mɛɛ gbɛ nɔ Yehowa tsuji tsɔɔ yɛ akɛ amɛyɔseɔ hiamɔ ni yɔɔ be ni wɔyɔɔ mli lɛ he lɛ?

² Yɛ afii nyɔŋma ni ho lɛ amli lɛ, Yehowa tsuji kɛ nɔ ni miihe ashɛ ŋmɛlɛtswai akpekpei toi akpei 12 tsu Maŋtsɛyeli shiɛmɔ kɛ kaselɔfeemɔ nitsumɔ lɛ. Mɛi babaoo efee tsakemɔi yɛ amɛshihilɛ mli bɔni afee ni amɛkɛ bei pii atsu mumɔŋ nikpamɔ nitsumɔ lɛ. (Mat. 9:37, 38) Ákɛ nɔkwɛmɔnɔ lɛ, kɛ́ aja mli lɛ shiɛlɔi ni fa fe 850,000 sɔmɔ daa nyɔŋ nɔ akɛ gbɛgbalɔi yɛ nyɛsɛɛ afi lɛ mli. Yɛ daa gbɛgbalɔi lɛ agbɛfaŋ lɛ, enɛ bi ni kɛ́ aja mli lɛ amɛkɛ ŋmɛlɛtswai 70 ashiɛ yɛ daa nyɔŋ nɔ. Ni gbɛgbalɔi awalɔi hu kɛ ŋmɛlɛtswai 50 tsu nii.

3. Mɛɛ tsakemɔi bei pii lɛ ehe hiaa ni shiɛlɔi afee koni amɛnyɛ amɛtsu gbɛgbamɔ nitsumɔ lɛ?

³ Bɔ ni Ooofee Osɔmɔ akɛ Gbɛgbalɔ: Akɛni gbɛgbalɔi yɔseɔ akɛ “be lɛ faaa dɔŋŋ” hewɔ lɛ, amɛbɔɔ mɔdɛŋ koni amɛkaha amɛshihilɛ miifee haŋtsii. (1 Kor. 7:29, 31) Amɛtaoɔ gbɛ̀i ni amɛbaatsɔ nɔ amɛha shika ni amɛfiteɔ yɛ shihilɛ mli lɛ nɔ agbɔ́, koni no aha amɛkɛ be fioo pɛ atsu heloonaa nitsumɔ. Ákɛ nɔkwɛmɔnɔ lɛ, mɛi komɛi efã kɛyahi shĩai bibii amli. Mɛi komɛi hu ejie heloonaa nibii ni he ehiaaa ni amɛyɔɔ lɛ kɛjɛ amɛshihilɛ mli. (Mat. 6:19-21) Bei pii lɛ, amɛtseɔ nibii ni amɛtiuɔ sɛɛ lɛ hu anɔ. Oti ni ma amɛhiɛ hewɔ ni amɛfeɔ enɛɛmɛi fɛɛ ji koni amɛgbala amɛjwɛŋmɔ kɛya shiɛmɔ nitsumɔ lɛ nɔ ní amɛkɛ be babaoo hu atsu. (Efe. 5:15, 16) Yɛ hiɛmiamɔ, hekɛ-afɔleshaa mumɔ, kɛ he ni akɛfɔɔ Yehowa nɔ kɛtsɔ sɔlemɔ nɔ hewɔ lɛ, shiɛlɔi babaoo enyɛ amɛto be he gbɛjianɔ jogbaŋŋ, ni enɛ eye ebua amɛ koni amɛtsu gbɛgbamɔ nitsumɔ lɛ.

4. Mɛɛ nifeemɔi kpakpai baanyɛ aye abua bo koni otsu gbɛgbamɔ nitsumɔ lɛ?

⁴ Ani obaanyɛ otsu gbɛgbamɔ nitsumɔ lɛ? Mɛni hewɔ obiii gbɛgbalɔi ni eye omanye lɛ gbɛ nɔ ni amɛtsɔ amɛnyɛ amɛfee enɛ? Okɛ amɛ atsu nii yɛ shiɛmɔ nitsumɔ lɛ mli koni oyɔse miishɛɛ ni amɛnáa lɛ. Kanemɔ gbɛgbamɔ nitsumɔ lɛ he saji ni aŋmala yɛ wɔwoji lɛ amli lɛ. Okɛ otii ni obaanyɛ otsu he nii ní baaye abua bo koni otsu gbɛgbamɔ nitsumɔ lɛ amamɔ ohiɛ. Kɛ́ nibii komɛi yɛ ni miitsi onaa koni okasɔmɔ akɛ gbɛgbalɔ amrɔ nɛɛ lɛ, tsĩi tã otsɔɔ Yehowa yɛ sɔlemɔ mli, koni obi lɛ ni eye ebua bo kɛtsu he nii.—Abɛi 16:3.

5. Gbɛgbamɔ nitsumɔ lɛ yeɔ ebuaa wɔ koni wɔha hesai ni wɔyɔɔ yɛ shiɛmɔ nitsumɔ lɛ mli lɛ aya hiɛ yɛ mɛɛ gbɛ nɔ?

⁵ Jɔɔmɔi kɛ Miishɛɛ ni Yɔɔ Mli: Gbɛgbamɔ nitsumɔ lɛ haa hesai ni wɔyɔɔ yɛ bɔ ni wɔkɛ Nyɔŋmɔ Wiemɔ lɛ tsuɔ nii wɔhaa lɛ yaa hiɛ, ni enɛ haa wɔmiishɛɛ lɛ tekeɔ nɔ babaoo. Oblayoo ko ni ji gbɛgbalɔ lɛ kɛɛ akɛ: “Nyɔŋmɔ Wiemɔ lɛ ni anyɛɔ ajaa mli pɛpɛɛpɛ lɛ ji jɔɔmɔ kpele diɛŋtsɛ. Kɛ́ okɛ ohe wo gbɛgbamɔ nitsumɔ lɛ mli lɛ, okɛ Biblia lɛ fɔɔ nitsumɔ waa. Amrɔ nɛɛ kɛ́ miishiɛ yɛ shia kɛ shia lɛ, minyɛɔ miyɔseɔ ŋmalɛi ni sa kɛha shiatsɛ fɛɛ shiatsɛ.”—2 Tim. 2:15.

6. Mɛɛ tsɔsemɔi gbɛgbamɔ nitsumɔ lɛ haa mɔ náa?

⁶ Gbɛgbamɔ nitsumɔ lɛ haa akaseɔ hesai babaoo hu yɛ shihilɛ mli. Ebaanyɛ eye ebua oblahii kɛ oblayei koni amɛkase bɔ ni akɛ nilee toɔ be he gbɛjianɔ, bɔ ni ahiɔ shi ni afiteee shika pii, kɛ bɔ ni akɛ mɛi hiɔ shi yɛ toiŋjɔlɛ mli. Gbɛgbamɔ nitsumɔ lɛ haa mɛi babaoo kwɛɔ shihilɛ taakɛ Nyɔŋmɔ naa lɛ lɛ. (Efe. 4:13) Kɛfata he lɛ, gbɛgbalɔi naa akɛ Yehowa nine yɛ nitsumɔ ni amɛtsuɔ lɛ mli, ni enɛ ji hegbɛ kpele.—Bɔf. 11:21; Fil. 4:11-13.

7. Gbɛgbamɔ nitsumɔ lɛ yeɔ ebuaa wɔ koni wɔtsi wɔbɛŋkɛ Yehowa yɛ mɛɛ gbɛ nɔ?

⁷ Ekolɛ jɔɔmɔi ni fe fɛɛ ni gbɛgbamɔ nitsumɔ lɛ haa anáa lɛ ateŋ ekome ji akɛ eyeɔ ebuaa wɔ ni wɔtsiɔ wɔbɛŋkɛɔ Yehowa. Enɛ baanyɛ aha wɔŋmɛ wɔtsui shi yɛ kaai amli. Nyɛmi yoo ko ni tsɔ jaramɔ shihilɛ ko ni naa wa waa mli lɛ kɛɛ akɛ: “Gbɛgbamɔ nitsumɔ lɛ ha miná mikɛ Yehowa teŋ wekukpaa ni yɔɔ gbagbalii, ni enɛ ha minyɛ miŋmɛ mitsui shi yɛ kaa lɛ mli.” Ekɛfata he akɛ: “Miyɛ miishɛɛ waa akɛ mikɛ midalɛ beaŋ fɛɛ esɔmɔ Yehowa akɛ be-fɛɛ sɔɔlɔ. Eeye eebua mi ni mikɛ mihe miiha yɛ gbɛ̀i ni misusuko he dã anɔ.” (Bɔf. 20:35) Eba akɛ wɔ hu wɔɔná jɔɔmɔi babaoo beni wɔbɔɔ mɔdɛŋ fɛɛ ni wɔɔnyɛ yɛ shiɛmɔ nitsumɔ ni he hiaa waa nɛɛ mli lɛ.—Abɛi 10:22.