Nikasemɔ ni Haa Anáa Wala
1 Kɛ́ mɛi nu anɔkwale ni yɔɔ Nyɔŋmɔ Wiemɔ lɛ mli lɛ shishi lɛ, amɛmli filiɔ amɛ, ni kwɛ bɔ ni enɛ haa wɔnáa miishɛɛ ha! Nyɔŋmɔ he nilee kɛ eyiŋtoo kɛha adesai lɛ ni akɛ mɛi krokomɛi aaagba he sane lɛ haa mɔ tsui nyɔɔ emli waa diɛŋtsɛ. Nikasemɔ ni tamɔ nɛkɛ lɛ baanyɛ aha mɔ aná naanɔ wala.—Yoh. 17:3.
2 Nɔ Hewɔ ní Enɔ Bɛ Lɛ: Ŋmɛnɛ, kɛ́ hooo kwraa lɛ aaatsɔ gbɛ fɛɛ gbɛ ni aaanyɛ nɔ aatsɔɔ mɛi anii yɛ sane fɛɛ sane he. (Jaj. 12:12) Shi anyɛŋ akɛ nikasemɔ ní tamɔ nɛkɛ lɛ ato sɛɛnamɔ ni yɔɔ “Nyɔŋmɔ niwuji lɛ” ahe lɛ he. (Bɔf. 2:11) Je lɛŋ nikasemɔ lɛ nyɛko eha adesai anyɛ abɛŋkɛ Bɔlɔ lɛ kpaakpa koni amɛle eyiŋtoo lɛ. Enyɛko eye ebua mɛi koni amɛnu nɔ ni baa mɛi anɔ kɛ́ amɛgboi loo nɔ hewɔ ní piŋmɔi babaoo yɔɔ lɛ shishi. Enyɛko eha mɛi aná hiɛnɔkamɔ. Enyɛko eye ebua weku gbɛjianɔtoo lɛ. Nikasemɔ ni jɛ Nyɔŋmɔ ŋɔɔ lɛ pɛ ji nɔ ni baanyɛ atsu wɔshihilɛ mli saji ni he hiaa nɛɛ ahe nii.
3 Nikasemɔ ni jɛ Nyɔŋmɔ ŋɔɔ lɛ kɛ nɔ ko ni elaaje kwraa yɛ je lɛŋ ŋmɛnɛ lɛ haa—no ji akɛ ehaa nikaselɔ lɛ jeŋba hiɔ. Nyɔŋmɔ Wiemɔ lɛ jieɔ hewolonɔ su mlijiemɔ, weku mlijiemɔ, kɛ maŋhedɔɔ kɛjɛɔ mɛi ni kpɛlɛɔ Biblia mli tsɔɔmɔi lɛ anɔ ní amɛkɛtsuɔ nii lɛ atsuiiaŋ kwraa. (Heb. 4:12) Eha mɛi ekwá awuiyeli nifeemɔi srɔtoi fɛɛ, ni eha ‘amɛwo gbɔmɔ hee lɛ.’ (Kol. 3:9-11; Mika 4:1-3) Kɛfata he lɛ, nikasemɔ ni jɛ Nyɔŋmɔ ŋɔɔ lɛ eye ebua mɛi akpekpei abɔ koni amɛye nifeemɔi kɛ sui ni esaaa Nyɔŋmɔ hiɛ ní eka amɛhe lɛ anɔ.—1 Kor. 6:9-11.
4 Nɔ Hewɔ ní Ehe Hiaa Waa Amrɔ Nɛɛ: Wɔ-Tsɔɔlɔ Kpeteŋkpele lɛ haa wɔleɔ nɔ ni be ni wɔyɔɔ mli nɛɛ tsɔɔ lɛ shishi. Saji ni yɔɔ amɛbe naa pɛpɛɛpɛ ní esa akɛ ajaje yɛ je lɛŋ fɛɛ lɛ ji nɔ ni yɔɔ kojomɔ wiemɔi ni yɔɔ egbalɛ wiemɔi lɛ amli lɛ amli. (Kpoj. 14:6, 7) Kristo miiye nɔ yɛ ŋwɛi, ni eshwɛ fioo ni abaakpata jeŋ muu fɛɛ apasa jamɔ maŋtsɛyeli lɛ hiɛ, ni Nyɔŋmɔ Maŋtsɛyeli lɛ efee klalo akɛ ebaakpata shikpɔŋ nɛɛ nɔ nɔyelii fɛɛ ahiɛ. (Dan. 2:44; Kpoj. 11:15; 17:16) No hewɔ lɛ, ehe miihia ni mɛi ayɔse Nyɔŋmɔ nɔyeli ní yeɔ nɔ amrɔ nɛɛ lɛ nɔ Maŋtsɛ lɛ, koni amɛje Babilon Kpeteŋkpele lɛ mli, ni amɛkɛ hemɔkɛyeli atsɛ́ Yehowa gbɛi lɛ. (Lala 2:11, 12; Rom. 10:13; Kpoj. 18:4) Eba akɛ wɔɔbɔ mɔdɛŋ fɛɛ ni wɔɔnyɛ koni wɔha mɛi anine ashɛ nikasemɔ ní haa mɔ wala lɛ nɔ.