Gbalamɔ Jwɛŋmɔ Kɛba “Je lɛ Mli La lɛ” Nɔ
1. Mɛɛ la kpeteŋkpele agba he sane afɔ̃ shi yɛ Nyɔŋmɔ Wiemɔ lɛ mli, ni mɛɛ nifeemɔ gbalaa mɛi ajwɛŋmɔ waa kɛbaa la nɛɛ nɔ?
1 Yehowa gba kɛtsɔ gbalɔ Yesaia nɔ akɛ: “Maŋ ni nyiɛɔ duŋ mli lɛ ena la kpeteŋkpele; mɛi ni hi gbele hɔ̃ɔŋ shikpɔŋ lɛ nɔ lɛ, la etso amɛnɔ!” (Yes. 9:1) Ana nakai “la kpeteŋkpele” lɛ yɛ nitsumɔi ni Nyɔŋmɔ diɛŋtsɛ Bi ni ji Yesu Kristo tsu lɛ amli. Nitsumɔ ni etsu beni eyɔɔ shikpɔŋ nɔ lɛ kɛ sɛɛnamɔi ni jɛɔ efɔleshaa lɛ mli kɛbaa lɛ ha mɛi ni yɔɔ duŋ mli lɛ tee hiɛ yɛ mumɔŋ. La nɛɛ ji nɔ ni he hiaa mɛi yɛ duŋ bei nɛɛ amli. Nuŋtsɔ Gbɛkɛnaashi Niyenii lɛ haa wɔnáa hegbɛ krɛdɛɛ ní wɔkɛaagbala mɛi ajwɛŋmɔ kɛba “je lɛ mli la lɛ” nɔ. (Yoh. 8:12) Nyɛsɛɛ afi lɛ, mɛi akpekpei abɔ jie hemɔkɛyeli kpo kɛtsɔ wɔhe ni amɛbafata kɛbo Yesu famɔ lɛ toi lɛ nɔ, akɛ: “Nyɛfea enɛ ni nyɛŋɔkai mi.” (Luka 22:19) Akɛni afi nɛɛ Kaimɔ lɛ yeli miibɛŋkɛ hewɔ lɛ, mɛɛ gbɛ nɔ wɔɔtsɔ wɔgbala mɛi ajwɛŋmɔ kɛba la kpeteŋkpele ni Yehowa eha etso eha mɛi lɛ nɔ?—Fil. 2:15.
2. Mɛɛ gbɛ nɔ wɔɔtsɔ wɔha tsuiŋ hiɛsɔɔ ni wɔyɔɔ kɛha kpɔmɔ afɔleshaa lɛ mli awa, ni mɛni baajɛ nakai feemɔ mli kɛba?
2 Ná Tsuiŋ Hiɛsɔɔ: Kaimɔ be lɛ ji be ni hi jogbaŋŋ ni akɛaajwɛŋ suɔmɔ kpele ni Yehowa kɛ Yesu jie lɛ kpo amɛtsɔɔ adesai kɛtsɔ kpɔmɔ afɔleshaa lɛ ni amɛkɛha lɛ nɔ lɛ nɔ. (Yoh. 3:16; 2 Kor. 5:14, 15) Ŋwanejee ko kwraa bɛ he akɛ nakai ni wɔɔfee lɛ baaha wɔná tsuiŋ hiɛsɔɔ babaoo wɔha nifeemɔ krɔŋkrɔŋ nɛɛ. Nyɔŋmɔ webii lɛ fɛɛ baasumɔ ni amɛto be pɔtɛɛ kɛha Kaimɔ lɛ he Biblia kanemɔ krɛdɛɛ lɛ taakɛ ejeɔ kpo yɛ Ŋmalɛi lɛ Amli ni Wɔɔkwɛ Daa lɛ mli lɛ, ní amɛjwɛŋ nɔ. Kɛ wɔsusu Yehowa sui ni nɔ kwɔlɔ ni ajie lɛ kpo yɛ gbɛ ni yɔɔ nyam waa nɔ yɛ kpɔmɔnɔ ni ekɛha lɛ mli lɛ he lɛ, ehaa wɔmli filiɔ wɔ waa akɛ eji wɔ-Nyɔŋmɔ. Ákɛ aŋkroaŋkroi lɛ, kɛ́ wɔjwɛŋ nɔ ni kpɔmɔnɔ lɛ tsɔɔ kɛha wɔ lɛ nɔ lɛ, ehaa suɔmɔ ni jɛ tsuiŋ ni wɔyɔɔ kɛha Nyɔŋmɔ kɛ e-Bi lɛ mli waa, ni etsirɛɔ wɔ koni wɔkɛ ekãa afee Nyɔŋmɔ suɔmɔnaa nii.—Gal. 2:20.
3. Mɛɛ gbɛ nɔ wɔbaanyɛ wɔtsɔɔ yɛ akɛ wɔyɛ hiɛsɔɔ kɛha Kaimɔ lɛ?
3 Kɛ wɔha hiɛsɔɔ ni wɔyɔɔ kɛha gbɛjianɔ ni Yehowa eto kɛha yiwalaheremɔ lɛ mli wa lɛ, no lɛ miishɛɛ ni wɔyɔɔ kɛha Kaimɔ lɛ baaná Biblia mli nikaselɔi, mɛi ni wɔkuɔ wɔsɛɛ kɛyasaraa amɛ, wekumɛi, akutsoŋbii, nanemɛi skulbii, nanemɛi nitsulɔi kɛ mɛi krokomɛi hu ni wɔfɔ̃ɔ amɛ nine kɛbaa nifeemɔ krɛdɛɛ nɛɛ shishi lɛ anɔ hewalɛ. (Luka 6:45) No hewɔ lɛ, bɔɔ mɔdɛŋ jogbaŋŋ ni ofɔ̃ nɛkɛ mɛi nɛɛ fɛɛ anine, ní okɛ Kaimɔ lɛ he ninefɔ̃ɔ wolo ni akala ni haŋ amɛhiɛ akpa Kaimɔ lɛ nɔ lɛ aha amɛ. Nɔ ni mɛi babaoo ena akɛ no yeɔ omanye bɔni afee ni amɛhiɛ akakpa mɛi ni amɛfɔ̃ɔ amɛ nine lɛ ateŋ mɔ ko mɔ ko nɔ ji akɛ, amɛkɛ wolo ni amɛŋmala mɛi ni amɛfɔ̃ɔ amɛ nine daa kɛbaa Kaimɔ lɛ shishi lɛ agbɛi yɛ nɔ lɛ toɔ, ni amɛŋmalaa mɛi heei ni amɛná lɛ agbɛi amɛfataa he daa afi. Kɛ wɔto gbɛjianɔ ni wɔbɔ mɔdɛŋ fɛɛ ni wɔɔnyɛ ni wɔkɛfɔ̃ mɛi ni yɔɔ wiemɔ lɛ he miishɛɛ lɛ anine lɛ, enɛ baafee gbɛ ni hi jogbaŋŋ ni wɔtsɔɔ nɔ wɔjieɔ hiɛsɔɔ ni wɔyɔɔ kɛha Yehowa Nyɔŋmɔ lɛ kpo “yɛ enikeenii ni anyɛŋ agba lɛ hewɔ!”—2 Kor. 9:15.
4. Mɛni baanyɛ aye abua wɔ koni wɔkɛ wɔhe awo shiɛmɔ nitsumɔ lɛ mli babaoo yɛ March kɛ April?
4 Shiɛmɔ Nitsumɔ lɛ ni Akɛ He Woɔ Mli Babaoo: Ani obaanyɛ okɛ ohe awo shiɛmɔ nitsumɔ lɛ mli babaoo yɛ March kɛ April? Ekã shi faŋŋ akɛ Nyɔŋmɔ baajɔɔ mɔdɛŋ ni wɔbɔɔ koni wɔgba mɛi krokomɛi “Kristo . . . anunyam sanekpakpa lɛ” nɔ babaoo. Yehowa ni ji Mɔ ni haa anuɔ mumɔŋ nibii fɛɛ ashishi jogbaŋŋ lɛ efã akɛ: “La ajɛ duŋ mli akpɛ.” (2 Kor. 4:4-6) Kɛ ehe baahia lɛ, onukpai lɛ baato gbɛjianɔ koni afee kpeei kɛha shiɛmɔyaa yɛ bei krokomɛi hu amli kɛ yɛ hei srɔtoi, ní amɛnyiɛ hiɛ kɛye abua mɛi ni baasumɔ ni amɛtsɛ yɛ shiɛmɔ nitsumɔ lɛ mli lɛ. Ekolɛ enɛ baafee leebi maaŋkpa gbɛjegbɛ nɔ nitsumɔ loo gbɛjianɔi ni atoɔ koni akɛ he awo nitsumɔhei ashikpɔŋkuku kɛ tɛlifoŋ nɔ odaseyeli lɛ mli yɛ shwane mli loo gbɛkɛnaashi. Bɔni afee ni onyɛ okɛ ohe awo shiɛmɔ nitsumɔ lɛ mli babaoo lɛ, okɛ ŋmɛlɛtswai ni ooonyɛ oná lɛ he otii amamɔ ohiɛ, ni omia ohiɛ waa koni oshɛ he. Nɔ ni mɛi babaoo feɔ ákɛ hegbɛ ni amɛná ji akɛ, amɛkɛ amɛhe woɔ gbɛgbalɔi awamɔ nitsumɔ lɛ mli, ni amɛkɛ no tsɔɔ akɛ amɛkɛ nii ni hi fe fɛɛ ni amɛyɔɔ lɛ miiha Yehowa.—Kol. 3:23, 24.
5. Ŋmɛlɛtswai abɔ ni ataoɔ yɛ gbɛgbalɔi awamɔ nitsumɔ lɛ mli lɛ nɔ ni atse lɛ he eba sɛɛnamɔ eha mɛi babaoo yɛ mɛɛ gbɛ nɔ?
5 Ani Obaanyɛ Okɛ Ohe Awo Gbɛgbalɔi Awamɔ Nitsumɔ lɛ Mli? Nɔ ni fa fe afii kpawo sɔŋŋ eho kɛjɛ beni atse ŋmɛlɛtswai abɔ ni ataoɔ yɛ gbɛgbalɔi awamɔ nitsumɔ lɛ mli lɛ nɔ lɛ. Tsakemɔ ni afee nɛɛ eha mɛi ni fa babaoo enyɛ amɛkɛ amɛhe ewo gbɛgbalɔi awamɔ nitsumɔ lɛ mli, ni jɔɔmɔi ejɛ mli kɛbaha amɛ. Ani óka okwɛ? Mɛi komɛi ekpɛ amɛyiŋ akɛ amɛbaafee enɛ daa afi. Yɛ asafoi babaoo amli lɛ, shiɛlɔi lɛ ateŋ mɛi saŋŋ feɔ ekome ni amɛkɛ amɛhe woɔ sɔɔmɔ nɛɛ mli, ni enɛ bafeɔ nitsumɔ ni asafo lɛ tsu yɛ afi lɛ mli lɛ he sane ni yɔɔ miishɛɛ babaoo. Ani obaanyɛ oto gbɛjianɔ koni okɛ ohe awo gbɛgbalɔi awamɔ nitsumɔ lɛ mli kɛ miishɛɛ yɛ Kaimɔ be lɛ mli nyɔji lɛ eko mli? April baanyɛ afee nyɔŋ ni hi jogbaŋŋ kɛha mɛi komɛi, ejaakɛ otsii anaagbeei enumɔ sɔŋŋ yɔɔ mli.
6. Mɛɛ gbɛjianɔi ni yɔɔ miishɛɛ ato aha wɔ?
6 Ani kpokpaa nɔkwɛlɔ lɛ baaba ebasara nyɛsafo lɛ yɛ March loo April? Obaanyɛ oná jɔɔmɔi babaoo. Taakɛ atsɔ hiɛ atswa adafi lɛ, yɛ afi 2006 sɔɔmɔ afi lɛ mli lɛ, abaaha mɛi fɛɛ ni baasɔmɔ akɛ gbɛgbalɔi awalɔi yɛ nyɔŋ ní kpokpaa nɔkwɛlɔ lɛ kɛbaasara amɛsafo lɛ nɔ lɛ aya kpee ni akɛ gbɛgbalɔi feɔ yɛ saramɔ otsi lɛ mli lɛ, ni amɛbaaná kpee lɛ klɛŋklɛŋ fã lɛ mli gbɛfaŋnɔ. Ŋwanejee ko bɛ he akɛ wiemɔi ni woɔ mɔ hewalɛ yɛ mumɔŋ ni akɛhaa yɛ kpee nɛɛ shishi lɛ baaye abua gbɛgbalɔi awalɔi babaoo ni amɛmia amɛhiɛ ni amɛbatsɔmɔ daa gbɛgbalɔi. Kɛfata he lɛ, wɔkɛ miishɛɛ baaye abua mɛi yɛ April mli koni amɛba mumɔŋ la lɛ mli kɛtsɔ nikasemɔ wolo hee ni ji Mɛni Biblia lɛ Tsɔɔ Diɛŋtsɛ? lɛ kasemɔ nɔ. Mɛni hewɔ okɛfeee oti ni ma ohiɛ akɛ okɛ wolo hee lɛ baaje Biblia mli nikasemɔ shishi?
7, 8. (a) Mɛni baanyɛ aye abua wɔ koni wɔto be he gbɛjianɔ kɛha gbɛgbalɔi awamɔ nitsumɔ lɛ? (b) Yɛ mɛɛ gbɛ nɔ ekome ni weku lɛ feɔ lɛ yeɔ ebuaa, ni te weku muu lɛ fɛɛ náa he sɛɛ amɛhaa tɛŋŋ?
7 Yɛ be mli ni osusuɔ ŋmɛlɛtswai 50 ni ataoɔ yɛ gbɛgbalɔi awalɔ dɛŋ lɛ he lɛ, too be he gbɛjianɔ ni baaha onyɛ okɛ ŋmɛlɛtswai 12 atso anɔkwale la lɛ oha mɛi daa otsi. Okɛ mɛi ni kɛ omanyeyeli enyɛ efee nakai lɛ kɛ mɛi krokomɛi hu agba enɛ he sane. Ekolɛ enɛ baawo amɛ hewalɛ ni amɛfata ohe. Akɛni shiɛlɔi ni abaptisi amɛ ni ji gbekɛbii kɛ onukpai to gbɛjianɔ jogbaŋŋ kɛha enɛ feemɔ hewɔ lɛ, amɛna akɛ ejeee nɔ ni wa tsɔ̃ akɛ aaashɛ oti ni hi jogbaŋŋ nɛɛ he. Okɛwo sɔlemɔ mli. Kɛkɛ lɛ, kɛ́ aaahi lɛ, too gbɛjianɔ, ní okɛ ohe awo gbɛgbalɔi awamɔ nitsumɔ lɛ mli kɛ miishɛɛ!—Mal. 3:10.
8 Wekui babaoo eyɔse akɛ gbɛjianɔ kpakpa ni weku lɛ mli bii kɛ ekomefeemɔ toɔ lɛ baanyɛ aha ni kɛ́ hooo lɛ weku lɛ mlinyo kome anyɛ ashɛ oti nɛɛ he. Weku ko mli bii kpɛ amɛyiŋ akɛ amɛteŋ mɛi enumɔ ni abaptisi amɛ lɛ kɛ amɛhe baawo gbɛgbalɔi awamɔ nitsumɔ lɛ mli. Gbekɛbii krokomɛi enyɔ ni yɔɔ weku lɛ mli ni abaptisiko amɛ lɛ bɔ mɔdɛŋ waa koni amɛha amɛshiɛmɔ nitsumɔ lɛ aya hiɛ babaoo. Te weku lɛ ná mɔdɛŋbɔɔ ni amɛkɛtsu nii babaoo lɛ he sɛɛ amɛha tɛŋŋ? Amɛŋma akɛ: “Miishɛɛ ni wɔná yɛ nakai nyɔŋ lɛ mli lɛ fa babaoo, ni wɔnu he waa diɛŋtsɛ akɛ ekomefeemɔ ni yɔɔ wɔweku lɛ mli lɛ mli ewa waa. Wɔmiida Yehowa shi yɛ jɔɔmɔ babaoo ní wɔná nɛɛ hewɔ!”
9. Te wɔɔfee tɛŋŋ wɔha wɔla atso yɛ Kaimɔ be nɛɛ mli?
9 Ani nitsumɔ krɛdɛɛ ni wɔbaatsu yɛ March kɛ April lɛ baaha wɔná ekãa ni wɔtsi wɔbɛŋkɛ wɔ-Tsɛ ni yɔɔ ŋwɛi lɛ? Babaoo baadamɔ mɔdɛŋ ni wɔ diɛŋtsɛ wɔbɔɔ ni wɔkɛha suɔmɔ ni wɔyɔɔ kɛha Nyɔŋmɔ kɛ e-Bi lɛ mli awa, ní wɔkɛ wɔhe awo shiɛmɔ nitsumɔ lɛ mli babaoo lɛ nɔ. Eba akɛ wɔbaatswa wɔfai shi taakɛ lalatsɛ lɛ tswa efai shi lɛ, mɔ ni lá akɛ: “Mikɛ minaabu aaada Yehowa shi babaoo, ni majie eyi yɛ mɛi babaoo ateŋ!” (Lala 109:30) Yehowa baajɔɔ nitsumɔ ni wɔkɛ ekãa baatsu yɛ Kaimɔ be nɛɛ mli lɛ nɔ. No hewɔ lɛ, eba akɛ wɔɔha la kpeteŋkpele atso aha mɛi bɔni afee ni mɛi ni fa babaoo lolo anyɛ aje kpo kɛjɛ duŋ mli ni ‘amɛná wala la lɛ.’—Yoh. 8:12.