Maŋtsɛyeli Asai Amaamɔ—Sɔɔmɔ Krɔŋkrɔŋ lɛ Fã ko ni He Hiaa Waa
1. Mɛni anyɛ atsu yɛ Maŋtsɛyeli Asai amaamɔ gbɛfaŋ, ni mɛɛ hiamɔ yɔɔ lolo?
1 Yɛ afii kpawo ni eho lɛ mli lɛ, amamɔ Maŋtsɛyeli Asai babaoo, ni asaa ekomɛi hu yɛ Ghana maŋ nɛɛ mli. Wɔmiida Maŋtsɛyeli Asa Tsumaa kui lɛ kɛ mɛi fɛɛ ni ye kɛbua amɛ lɛ ashi waa yɛ mɔdɛŋbɔɔ ni amɛkɛtsu nii lɛ hewɔ. Eyɛ mli akɛ amamɔ Maŋtsɛyeli Asai saŋŋ moŋ, shi babaoo yɛ lolo ni abaamamɔ. Mɛɛ gbɛ nɔ wɔ fɛɛ wɔbaanyɛ wɔtsɔ wɔfi wɔsɔɔmɔ krɔŋkrɔŋ lɛ fã ni wɔkɛhaa Yehowa nɛɛ sɛɛ?—Kpoj. 7:15.
2. Kɛ́ abaama Maŋtsɛyeli Asa lɛ, mɛɛ gbɛ nɔ wɔbaanyɛ wɔtsɔ wɔfi nitsumɔ lɛ sɛɛ tɛ̃ɛ?
2 Jɛɛ Osuɔmɔ Mli: Kɛ́ oji shiɛlɔ ni abaptisi bo lɛ, wɔmiiwo bo hewalɛ ni okɛ ohe aha ni ofata Maŋtsɛyeli Asa Tsumaa kui lɛ ahe kɛtsu nii kɛ́ atswa adafi akɛ abaama Maŋtsɛyeli Asa yɛ he ni oyɔɔ lɛ. (Lala 110:3) Esa akɛ mɛi ni kɛ amɛhe haa lɛ ajɛ amɛsuɔmɔ mli amɛfee nakai, ní amɛfee mɛi ni baanyɛ amɛkɛ mɛi atsu nii yɛ ekomefeemɔ mli. (Lala 133:1) Kɛ́ obɛ hesaai ni akɛmaa tsu po lɛ, obaanyɛ otsɔ gbɛ̀i srɔtoi anɔ oha tsumaa lɛ aye omanye.
3. Mɛni hewɔ ehe hiaa waa akɛ nyɛmimɛi kɛ amɛhe aaaha kɛha Maŋtsɛyeli Asa maa lɛ?
3 Nyɛmimɛi aaafee enumɔ ni he esa ni atsɔse amɛ koni amɛye amɛbua nyɛ kɛma nyɛ diɛŋtsɛ nyɛ-Maŋtsɛyeli Asa yɛ be pɔtɛɛ ko mli lɛ yɔɔ tsumaa kuu kome mli. Enɛ tsɔɔ akɛ ehe miihia ni nyɛmimɛi ni yɔɔ he ni amaa asa lɛ yɛ lɛ kɛ amɛhe aha bɔni afee ni agbe nitsumɔ lɛ naa. Kɛ́ mɛi fioo ko pɛ kɛ amɛhe ha, ní no ha nitsumɔ lɛ sɛɛ gbala shi lɛ, ebaaha asafoi krokomɛi ni Maŋtsɛyeli Asa he miihia amɛ waa lɛ ana nɔ.
4. Mɛɛ gbɛ̀i krokomɛi anɔ wɔbaanyɛ wɔtsɔ wɔfi nitsumɔ nɛɛ sɛɛ?
4 Nyɛjiea Hiɛsɔɔ Kpo: Maŋtsɛyeli Asai amaamɔ gbɛjianɔtoo lɛ nyɛŋ aye omanye kɔkɔɔkɔ kɛ́ nyɛkɛ nyɛshika fiii sɛɛ. Beni nitsumɔ lɛ yaa nɔ lɛ, asafo lɛ toɔ wɔɔhe ni sa kɛ niyenii kpakpa he gbɛjianɔ ehaa tsumaa kuu lɛ mli bii lɛ. Mɛi babaoo jɛɔ amɛsuɔmɔ mli amɛkeɔ niyenii. Atsuɔ onia afataa he bɔni afee ni akɛhé nibii krokomɛi ni he baahia kɛha nitsumɔ lɛ. Eyɛ mli akɛ enɛ feemɔ baanyɛ afee nɔ ni wa kɛha asafoi komɛi moŋ, shi amɛbuuu lɛ akɛ eji jatsu, shi moŋ amɛbuɔ lɛ akɛ hegbɛ ni amɛná ní amɛkɛaajie suɔmɔ ni amɛyɔɔ kɛha Yehowa, ewebii lɛ, kɛ Maŋtsɛyeli lɛ kpo.—Abɛi 3:9.
5. Mɛni hewɔ amamɔɔ Maŋtsɛyeli Asai lɛ bɔ ni bɛ haŋtsii lɛ?
5 Ajeɔ gbɛ amaa Maŋtsɛyeli Asai lɛ bɔ ni bɛ haŋtsii, ni akɛ tsumaa nibii ni sa maa asa lɛ. Afeɔ enɛ bɔni afee ni anyɛ akɛ shika fioo ni yɔɔ lɛ ama asai babaoo. Ehaa anyɛɔ akwraa wɔ-Maŋtsɛyeli Asai lɛ hu yɛ gbɛ ni waaa nɔ. Wɔmiijie nyɛ yi yɛ tsũii ni bɛ haŋtsii nɛɛ anɔ ní nyɛkpɛlɛɔ lɛ hewɔ. Le ní wɔle akɛ esaaa akɛ wɔ-Maŋtsɛyeli Asai lɛ feɔ tsũii ni yɔɔ haŋtsii ní amaa koni akɛsa mɛi krokomɛi ahiɛ lɛ yeɔ kɛbuaa wɔ ni wɔgbalaa wɔjwɛŋmɔ kɛyaa “nii ni hi titri” lɛ anɔ.—Fil. 1:10.
6. Mɛni wɔbaanyɛ wɔfee ni wɔkɛkula wɔ-Maŋtsɛyeli Asa lɛ?
6 Nyɛkwraa Nyɛ-Maŋtsɛyeli Asa Lɛ: Kɛ́ ama asa lɛ agbe naa lɛ, asafo lɛ yaa nɔ amɛjɛɔ amɛsuɔmɔ mli amɛtsuɔ onia koni akɛwo shika ni ayafa kɛma tsu lɛ. (2 Kor. 9:2) Esa akɛ mɛi fɛɛ ana akɛ eji hegbɛ ni amɛná akɛ amɛkɛ amɛshika aaafi nitsumɔ lɛ sɛɛ, ní amɛkɛ amɛhe aha kɛkwra asa lɛ, ni enɔ afee falefale, ni efee fɛo, ni asaa nibii ni efite lɛ. Esa akɛ Maŋtsɛyeli Asa lɛ mli kɛ ehewɔ fɛɛ afee nɔ ni damɔɔ Yehowa asafo lɛ najiaŋ yɛ gbɛ kpakpa nɔ.—od-GA bf. 120-121.
7. Kɛ́ asafoŋbii lɛ fɛɛ fee ekome koni amɛha anɔkwa jamɔ ashwere lɛ, mɛni jɛɔ mli kɛbaa?
7 Bɔfo Paulo wie asafo lɛ mli bii lɛ ahe akɛ amɛkɛ ekomefeemɔ miitsu nii ‘kɛha gbɔmɔtso lɛ daa, ni ema ehe yɛ suɔmɔ mli.’ (Efe. 4:16) Suɔmɔ ni wɔyɔɔ kɛha Yehowa kɛ enɔkwa jamɔ lɛ tsirɛɔ wɔ koni wɔya nɔ wɔfi Maŋtsɛyeli Asai amaamɔ sɛɛ.