Kpokpaa nɔ Kpee He Gbɛjianɔtoo Hee

Esa akɛ awo Yehowa hiɛ nyam. Te wɔbaafee tɛŋŋ wɔwo Yehowa hiɛ nyam? Mɛɛ naagbai mɛi komɛi kɛkpeɔ yɛ enɛ he? Mɛɛ jɔɔmɔi mɛi ni woɔ Nyɔŋmɔ hiɛ nyam lɛ náa amrɔ nɛɛ? Afi 2008 sɔɔmɔ afi lɛ kpokpaa nɔ kpee ni abaafee lɛ kɛ sanebimɔi nɛɛ ahetooi ni haa mɔ tsui nyɔɔ emli baaha. Kpee lɛ yitso ji ‘Nyɛfea Nɔ Fɛɛ Nɔ Kɛwoa Nyɔŋmɔ Hiɛ Nyam.’ (1 Kor. 10:31) Susumɔ Nyɔŋmɔ he nilee ni wɔnine baashɛ nɔ yɛ gbii enyɔ kpee ni abaafee lɛ shishi lɛ he okwɛ.

Kpokpaa wulu nɔkwɛlɔ lɛ baawie saneyitsei ni ji “Mɛni Hewɔ Esa akɛ Awo Nyɔŋmɔ Hiɛ Nyam?” kɛ “Feemɔ Nɔkwɛmɔnɔ Kpakpa akɛ Mɔ ni Kɛ Nyɔŋmɔ Taomɔ Nii Tsuɔ Nii” lɛ he. Maŋshiɛmɔ ni ebaaha lɛ yitso ji, “Namɛi Ji Mɛi ni Kɛ Anunyam Haa Nyɔŋmɔ?,” ni naagbee wiemɔ ni ebaaha lɛ yitso ji, “Afee Ekome Kɛmiiwo Nyɔŋmɔ Hiɛ Nyam yɛ Jeŋ Fɛɛ.” Ebaakwɛ Teokrase Sɔɔmɔ Skul lɛ nɔ hu. Kpokpaa nɔkwɛlɔ lɛ baaha wiemɔi ni yitsei ji “Okɛ Miishɛɛ Ajie Nyɔŋmɔ Anunyam lɛ Kpo,” “Kpokpaa lɛ Mli Hiamɔ Nii lɛ Ahesusumɔ,” kɛ “‘Onane Amɔ Shi yɛ Anɔkwale lɛ Mli’ Daa,” ní ajie kɛjɛ 2 Petro 1:12 lɛ. Kɛfata he lɛ, wɔbaakase bɔ ni “Gbɛgbamɔ Nitsumɔ lɛ Woɔ Nyɔŋmɔ Hiɛ Nyam” ha. “Nyɛhaa Wɔwoa Nyɔŋmɔ Hiɛ Nyam yɛ Wɔshihilɛ Gbɛ̀i Fɛɛ Amli,” ni ji wiemɔi enyɔ ni abaaha kɛtsara nɔ ni kanyaa mɔ lɛ ateŋ klɛŋklɛŋ nɔ lɛ baaha wɔnu wiemɔi ni yɔɔ 1 Korintobii 10:31 ni ajɛ mumɔŋ aŋma lɛ shishi jogbaŋŋ. Wiemɔ ni ahaa kɛtsaraa nɔ ni yitso ji “Okɛ Sɔɔmɔ Krɔŋŋ Ajie Yehowa Yi” lɛ baawie wɔjamɔ lɛ fãi srɔtoi ahe. Abaamua Buu-Mɔɔ lɛ naa, ni akɛwɔ baasusu daa gbi ŋmalɛ kɛha Hɔgbaa lɛ he. Abaabaptisi mɛi hu.

Adesai pii kpooɔ akɛ amɛaakpɛlɛ nɔ akɛ Nyɔŋmɔ yɛ. Adesai asusumɔi ehe mɛi babaoo ajwɛŋmɔ aahu akɛ amɛbɛ dekã ni amɛkɛaajwɛŋ Yehowa anunyam lɛ nɔ. (Yoh 5:44) Shi kɛlɛ, wɔheɔ wɔyeɔ akɛ, be ni wɔkɛaasusu sane ni ji “Nyɛfea Nɔ Fɛɛ Nɔ Kɛwoa Nyɔŋmɔ Hiɛ Nyam” lɛ he lɛ he baaba sɛɛnamɔ waa. Too gbɛjianɔ ni oya kpee lɛ fãi ejwɛ lɛ fɛɛ koni ona he sɛɛ kɛmɔ shi.