Obaanyɛ Otsɔ Niiatsɛ!
1. Mɛni hewɔ esa akɛ osusu gbɛgbamɔ nitsumɔ lɛ he lɛ?
1 Ani oshweɔ ni oná miishɛɛ babaoo, ní otsui hu anyɔ omli yɛ shihilɛ mli? Ani oyɛ he miishɛɛ akɛ oooye obua mɛi krokomɛi? Ani oosumɔ ni olɛɛ sɔɔmɔ ni okɛhaa Yehowa lɛ mli? Kɛ́ oha sanebimɔi nɛɛ eko hetoo akɛ hɛɛ lɛ, belɛ obaanyɛ okɛ ohe awo daa gbɛgbamɔ nitsumɔ lɛ mli. Anɔkwale sane ji akɛ, dani mɔ ko kɛ ehe baawo mli lɛ, esa akɛ esusu eweku lɛ kɛ Ŋmalɛ naa sɔ̃i ni jwere enɔ, kɛ agbɛnɛ hu egbɔmɔtsoŋ hewalɛnamɔ he.
2. Tsii mumɔŋ ninámɔi ni daa gbɛgbalɔi anine shɛɔ nɔ lɛ ekomɛi ata.
2 Nibii ni Nyɔŋmɔ tsɔ emumɔ lɛ nɔ eha Salomo ŋma lɛ tsɔɔ akɛ Yehowa jɔɔmɔ ji nɔ ni haa mɔ náa nii. (Abɛi 10:22) Ŋmɛnɛ, nɔ titri ni Yehowa jɔɔmɔ kɛbaa ji mumɔŋ ninámɔ. Ninámɔ ni tamɔ nɛkɛ ni daa gbɛgbalɔi náa lɛ tekeɔ nɔ. Ákɛ nɔkwɛmɔnɔ lɛ, kɛ́ ‘amɛhe be’ kɛjɛ nibii ni amɛfeɔ lɛ mli ní amɛkɛ ye amɛbua mɛi krokomɛi lɛ, amɛnáa miishɛɛ babaoo. (Kol. 4:5; Bɔf. 20:35) Yehowa naa suɔmɔ deŋme ní amɛgboɔ lɛ, ni enáa he miishɛɛ. ‘Jwetrii ni yɔɔ ŋwɛi’ nɛɛ ajara nɔ gbɔŋ kɔkɔɔkɔ. (Mat. 6:20; Heb. 6:10) Kɛfata he lɛ, kɛ́ gbɛgbalɔi ha ‘amɛhiŋmɛii anɔ tse’ loo amɛha amɛshihilɛ fee mlɛo, ni amɛkɛ amɛhe fɔ̃ Yehowa nɔ kɛha amɛhiamɔ nii lɛ, ehaa wekukpaa ni kã amɛ kɛ Nyɔŋmɔ teŋ lɛ mli waa.—Mat. 6:22, 25, 32; Heb. 13:5, 6.
3. Mɛɛ srɔtofeemɔ yɔɔ mumɔŋ ninámɔ sɛɛtiumɔ kɛ heloonaa ninámɔ sɛɛtiumɔ teŋ?
3 Bei pii lɛ heloonaa ninámɔ sɛɛtiumɔ haa agbeɔ “kwashiai akɔnɔi pii ni fiteɔ mɔ” lɛ amli. (1 Tim. 6:9, 10; Yak. 5:1-3) Enɛ bɛ nakai yɛ jɔɔmɔi ni Yehowa kɛhaa lɛ gbɛfaŋ. Akɛni daa gbɛgbalɔi lɛ kɛ amɛbe babaoo tsuɔ nii yɛ shiɛmɔ nitsumɔ lɛ mli hewɔ lɛ, amɛnyɛɔ amɛŋmɛɔ pɛpɛɛpɛ yɛ mumɔŋ, ni amɛkɛ amɛhiɛ maa nibii ni he hiaa titri lɛ anɔ. (Filip. 1:10) Nyɛmi nuu ko kɛ enitsumɔ akɛ tsɔnei ahe nilelɔ lɛ ŋmɛ shi ni ekɛ ehe wo gbɛgbamɔ nitsumɔ lɛ mli. Ekɛɛ akɛ: “Mina akɛ heloonaa nitsumɔ ni mitsuɔ lɛ haa etɔɔ mi waa. Shi gbɛgbamɔ nitsumɔ lɛ bɛ nakai. Amrɔ nɛɛ minyɛɔ miyeɔ mibuaa mɛi, ni mitsɔɔ amɛ anɔkwale lɛ. Enɛ haa mitsui nyɔɔ mimli waa, ni ehaa mináa miishɛɛ.”
4. Mɛɛ jɔɔmɔi daa gbɛgbalɔi náa beni amɛkɛ jɔɔmɔi bahaa mɛi krokomɛi lɛ?
4 Jɔɔmɔi kɛha Mɛi Krokomɛi: Ŋmɛnɛ, mɔ fɛɛ mɔ kɛ “jaramɔ bei” miikpe. (2 Tim. 3:1) Hiɛnɔkamɔ he miihia mɔ fɛɛ mɔ. Maŋtsɛyeli jajelɔi lɛ amii shɛɔ amɛhe waa kɛ́ amɛna akɛ mɛi ni bɛ hiɛnɔkamɔ ni kpɛlɛɔ sanekpakpa lɛ nɔ lɛ baanyɛ aná hiɛnɔkamɔ lɛ. Kwɛ miishɛɛ kple ni daa gbɛgbalɔi ni kɛ ŋmɛlɛtswai ni fa fe 800 tsuɔ yibaamɔ nitsumɔ nɛɛ daa afi lɛ náa!—1 Tim. 4:16.
5, 6. Mɛni baanyɛ aye abua bo koni obatsɔ daa gbɛgbalɔ?
5 Ani okɛ hiɛdɔɔ susuɔ daa gbɛgbamɔ nitsumɔ lɛ ní okɛ ohe aaawo mli lɛ he? Ekolɛ ebaabi ni ohe be kɛjɛ nibii ni he ehiaaa tsɔ lɛ asɛɛtiumɔ mli koni onyɛ okɛ ohe awo mli. (Efe. 5:15, 16) Mɛi babaoo efee nakai ni amɛha amɛshihilɛ efee mlɛo, ni enɛ eha amɛgbɔ́ be ni amɛkɛtsuɔ heloonaa nitsumɔ lɛ nɔ bɔni afee ni amɛná be babaoo kɛtsu Maŋtsɛyeli lɛ he nibii lɛ ahe nii. Ani obaanyɛ oto gbɛjianɔ koni ofata amɛhe?
6 Bi Yehowa ni eha bo nilee koni okɛto obe he gbɛjianɔ jogbaŋŋ. (Yak. 1:5) Kɛ́ ofee nakai lɛ, mɛɛ jɔɔmɔi agbɛ obaanyɛ okpa? Mumɔŋ ninámɔ babaoo! Kɛfata he lɛ, Yehowa kɛ heloonaa nibii ni he hiaa bo lɛ baajɔɔ bo. (Mat. 6:33) Yehowa ‘baafɔse jɔɔmɔi ni tekeɔ nɔ’ eshwie mɛi ni kaa lɛ yɛ nɛkɛ gbɛ nɔ lɛ anɔ.— Mal. 3:10.