Bɔ ni Wɔɔfee Wɔye Wɔbua Mɛi ni Nyɛɛɛ Nii Akane Jogbaŋŋ Lɛ

1. Mɛni hewɔ ewa akɛ wɔkɛ mɛi ni nyɛɛɛ nii akane tsɔ lɛ baakase Biblia lɛ?

¹ Ekolɛ shiatsɛmɛi ni nyɛɛɛ nii akane jogbaŋŋ lɛ miisumɔ ni akɛ amɛ agba Biblia mli saji, shi kɛ́ amɛkwɛ bɔ ni Biblia lɛ kɛ woji krokomɛi lɛ yɔɔ lɛ, ehãa amɛshashaoɔ shi fioo. Kɛ́ ohã mɛi ni tamɔ nɛkɛ lɛ Biblia lɛ Tsɔɔ wolo lɛ be klɛŋklɛŋ ni okɛ amɛ baakpe lɛ, ekolɛ amɛheŋ. Te wɔɔfee tɛŋŋ wɔkɛ mɛi ni tamɔ nɛkɛ akase Biblia lɛ? Wɔbibii shiɛlɔi ni he esa waa ni jɛ maji srɔtoi 20 kɛ sɛɛ anɔ lɛ nɔ ni amɛfeɔ. Nɔ ni amɛwie lɛ baaje kpo yɛ kukuji ni nyiɛ sɛɛ nɛɛ amli.

2. Mɛɛ woji wɔbaanyɛ wɔkɛ mɔ ko ni nyɛɛɛ nii akane tsɔ lɛ akase?

² Kɛ́ nikaselɔ lɛ nyɛɔ ekaneɔ nii fioo loo enyɛɛɛ ekane nii kwraa lɛ, obaanyɛ okɛ Bo Nyɔŋmɔ Toi loo Bo Nyɔŋmɔ Toi Koni Ohi Shi Kɛya Naanɔ woji bibii lɛ aje shishi. Nɔ ni gbɛgbalɔ ko ni jɛ United States lɛ feɔ ji, ekɛ woji enyɔ lɛ fɛɛ tsɔɔ mɔ lɛ, ni ebiɔ lɛ emli nɔ ni ebaasumɔ ni amɛkase. Nitsumɔhe nine ni yɔɔ Kenya lɛ bɔ amaniɛ akɛ, woji enyɔ nɛɛ ewo yibii kpakpai yɛ amɛmaŋ lɛ mli, ejaakɛ yɛ Afrika lɛ mɛi babaoo miisumɔ ni agba amɛ sane ni amɛkase nii kɛjɛ mli, moŋ fe ni abaabibii amɛ saji ni amɛhã hetoo. Ekolɛ egbaŋ mɔ ko ni le woloŋ lɛ naa akɛ akɛ lɛ baakase nii kɛtsɔ sanebimɔ kɛ hetoohamɔ nɔ, shi mɔ ko ni eyako skul tsɔ lɛ naŋ enɛ feemɔ he miishɛɛ. Nɔ ni shiɛlɔi babaoo feɔ kɛ́ amɛna akɛ nikaselɔ lɛ nyɛɔ ekaneɔ nii fioo ji, amɛkɛ lɛ jeɔ nikasemɔ lɛ shishi kɛjɛɔ Sanekpakpa ni Jɛ Nyɔŋmɔ Ŋɔɔ! loo Obaanyɛ Otsɔ Nyɔŋmɔ Naanyo! woji bibii lɛ, loo ekolɛ Mi-Wolo ni Gbaa Biblia Mli Saji wolo lɛ mli.

3. Mɛni kɛ́ wɔle yɛ mɛi ni nyɛɛɛ nii akane lɛ ahe lɛ ebaaye ebua wɔ ni wɔnyɛ wɔtsɔɔ amɛ nii jogbaŋŋ?

³ Jiemɔ Amɛyi: Mɛi ni nyɛɛɛ nii akane lɛ ahiɛ gboɔ, ni amɛteŋ mɛi babaoo nuɔ he akɛ sɛɛnamɔ ko bɛ amɛhe. Bei pii lɛ, nɔ klɛŋklɛŋ ni esa akɛ wɔfee koni wɔnyɛ wɔtsɔɔ amɛ anɔkwale lɛ ji, ni wɔbaajie nakai hiɛgbele lɛ kɛje jɛmɛ. Mɛi babaoo ni nyɛɛɛ nii akane lɛ ajwɛŋmɔ mli egbele ni amɛbaanyɛ amɛkase nii. Jiemɔ bulɛ kpo otsɔɔ amɛ, ni owo amɛ. (1 Pet. 3:16, Ga Biblia hee) Kɛ́ amɛna akɛ amɛmɔdɛŋbɔɔ lɛ miiwo yibii, ni amɛmiiya amɛhiɛ yɛ nikasemɔ lɛ mli lɛ, no baawo amɛ hewalɛ ni amɛtsa nikasemɔ lɛ nɔ. No hewɔ lɛ jiemɔ amɛyi be fɛɛ be.

4. Te wɔbaafee tɛŋŋ wɔwo mɛi ni nyɛɛɛ nii akane tsɔ lɛ hewalɛ ni amɛsaa amɛhe kɛhã nikasemɔ lɛ?

⁴ Kɛ́ nikaselɔ lɛ nyɛɛɛ akane nii jogbaŋŋ po lɛ, wo lɛ hewalɛ ni esaa ehe kɛhã nikasemɔ lɛ. Shiɛlɔi komɛi ni yɔɔ South Africa lɛ woɔ mɛi ni amɛkɛkaseɔ nii lɛ hewalɛ ni amɛhã amɛnaanyo loo wekunyo ko ní nyɛɔ ekaneɔ nii jogbaŋŋ lɛ aye abua amɛ. Shiɛlɔ ko ni yɔɔ Britain lɛ kɛ ewolo lɛ hãa mɛi ni ekɛkaseɔ nii lɛ koni amɛkwɛ mli kɛhã kukuji enyɔoo ko hetoo be ni ekɛ amɛ kaseɔ nii lɛ. Enɛ hãa amɛnaa akɛ kɛ́ amɛfolɔ hetoi lɛ ashishi lɛ, hetoi lɛ anamɔ waŋ kɛhaŋ amɛ, ni no woɔ amɛ hewalɛ ni amɛsaa amɛhe. Nyɛmi nuu ko ni yɔɔ India lɛ woɔ mɛi ni ekɛkaseɔ nii lɛ hewalɛ ni amɛkwɛ mfonirii ni yɔɔ nikasemɔ ni amɛbaakase wɔsɛɛ otsi lɛ mli ni amɛjwɛŋ nɔ dani eba.

5. Kɛ́ wɔkɛ mɛi miikase nii lɛ, mɛni baatsɔɔ akɛ wɔmiito wɔtsui shi wɔmiihã amɛ?

⁵ Too Otsui Shi: Ekɔɔɔ he eko wolo ni nyɛkaseɔ lɛ, wiemɔ otii lɛ ahe, ni oye obua mɔ ni okɛkaseɔ nii lɛ ni enu shishi jogbaŋŋ. Yɛ shishijee mli lɛ, ekolɛ ebaahi waa kɛ́ nyɛkɛ minitii 10 kɛmiimɔ 15 kase nii lɛ. Nyɛkakasea nibii pii yɛ shitamɔ kome mli; nyɛbaanyɛ nyɛkase kukuji enyɔoo ko pɛ. Kɛ́ nikaselɔ lɛ nyɛɛɛ akane nii oyayaayai lɛ, too otsui shi ohã lɛ. Ekã shi faŋŋ akɛ, be ni eyaa nɔ eleɔ Yehowa he nii babaoo lɛ, no baatsirɛ lɛ ni eya ehiɛ yɛ enikanemɔ lɛ mli. Nɔ ni obaanyɛ ofee kɛye obua lɛ koni enyɛ efee nakai ji, ni obaafɔ̃ lɛ nine ni eba asafoŋ kpeei be klɛŋklɛŋ ni okɛ lɛ baakase nii lɛ.

6. Te wɔɔfee tɛŋŋ wɔtsɔɔ mɛi nikanemɔ?

⁶ Kɛ́ wɔ-Biblia mli nikaselɔi lɛ le nikanemɔ lɛ, amɛbaaya amɛhiɛ oyayaayai yɛ mumɔŋ. (Lala 1:1-3) Mɛi pii eye ebua amɛ-Biblia mli nikaselɔi lɛ kɛtsɔ Kasemɔ Nikanemɔ kɛ Niŋmaa wolo lɛ ni amɛkɛ amɛ kaseɔ minitii fioo be fɛɛ be ni amɛbaagbe nikasemɔ lɛ naa lɛ nɔ. Kɛ́ nikaselɔ lɛ nijiaŋ je wui lɛ, ekolɛ obaanyɛ ogbala ejwɛŋmɔ kɛya nibii komɛi ni enyɛ ekase feemɔ lɛ anɔ koni no awo lɛ hewalɛ. Hã ele akɛ Yehowa baajɔɔ emɔdɛŋbɔi lɛ anɔ, ni owo lɛ hewalɛ ni esɔle ebi edɛŋ yelikɛbuamɔ. (Abɛi 16:3; 1 Yoh. 5:14, 15) Shiɛlɔi komɛi ni yɔɔ Britain lɛ woɔ mɛi ni amɛkɛkaseɔ nii lɛ hewalɛ ni amɛkɛ otii ni sa amamɔ amɛhiɛ. Ekolɛ klɛŋklɛŋ kwraa lɛ, amɛkɛbaama amɛhiɛ akɛ amɛbaakase a, b, d, lɛ jogbaŋŋ, kɛkɛ lɛ no sɛɛ lɛ amɛkase ŋmalɛi pɔtɛi komɛi agbelemɔ kɛ amɛkanemɔ, kɛkɛ lɛ naagbee lɛ amɛkase Biblia kasemɔ woji komɛi ni kanemɔ waaa lɛ akanemɔ. Kɛ́ ootsɔɔ mɔ ko nikanemɔ lɛ, bei pii lɛ esa akɛ owo lɛ hewalɛ ni esumɔ nikanemɔ hu.

7. Mɛni hewɔ esaaa akɛ wɔshashaoɔ shi akɛ wɔbaatsɔɔ mɛi ni nyɛɛɛ nii akane lɛ anɔkwale lɛ?

⁷ Yehowa ebuuu mɛi ni eyako skul pii lɛ akɛ amɛhe bɛ sɛɛnamɔ. (Hiob 34:19) Mɛi lɛ atsuii amli Yehowa kwɛɔ. (1 Kron. 28:9) No hewɔ lɛ, kaashashao shi akɛ obaatsɔɔ mɛi ni nyɛɛɛ nii akane lɛ anɔkwale lɛ. Oyɛ dɛŋdadei ni nɔ bɛ ni obaanyɛ okɛje nikasemɔ lɛ shishi. Kɛkɛ lɛ, sɛɛ mli lɛ obaanyɛ okɛ Biblia lɛ Tsɔɔ wolo lɛ atsa nɔ koni mɔ lɛ anu Ŋmalɛ lɛ shishi jogbaŋŋ.