Tsɔɔmɔ Mɛi ni Nyɛɛɛ Nii Akane lɛ Nii
1. Mɛɛ naagba wɔbaanyɛ wɔkɛkpe yɛ shiɛmɔ nitsumɔ lɛ mli?
1 Wɔkɛ naagbai ni kɔɔ mɛi ni leee nikanemɔ ni esa akɛ wɔtsɔɔ amɛ anɔkwale lɛ kpeɔ yɛ wɔshiɛmɔ nitsumɔ lɛ mli yɛ be kɛ beaŋ. Mɛni wɔbaanyɛ wɔfee?
2. Te wɔɔfee tɛŋŋ wɔjie bulɛ kpo wɔtsɔɔ mɛi ni leee nikanemɔ lɛ, ni mɛni hewɔ?
2 Okɛ Bulɛ Aha Amɛ: Nɔ ni Yehowa kwɛɔ ji mɔ lɛ tsui mli, shi jeee woloŋlee ni ená yɛ je lɛ mli. (1 Sam. 16:7; Abɛi 21:2) No hewɔ lɛ, wɔkɛ bulɛ haa mɛi ni leee nikanemɔ lɛ. Kɛ́ wɔjie bulɛ kpo ni wɔto wɔtsui shi wɔha amɛ lɛ, ewaŋ kɛhaŋ amɛ akɛ amɛaakpɛlɛ yelikɛbuamɔ ni wɔkɛhaa amɛ lɛ nɔ. (1 Pet. 3:15) Nɔ ni fata enɛ he ji akɛ, ehe ehiaaa ni wɔnyɛ mɔ lɛ nɔ doo akɛ ekane ŋmalɛ ko loo kuku ko mli. Beni mɔ lɛ yaa ehiɛ yɛ Biblia mli anɔkwalei ni jara wa lɛ kasemɔ mli lɛ, ekolɛ ebaasumɔ ni ehe asa kɛ nikanemɔ, bɔni afee ni ena miishɛɛ ni anáa yɛ Nyɔŋmɔ Wiemɔ lɛ kanemɔ “shwane kɛ nyɔɔŋ” lɛ mli lɛ eko.—Lala 1:2, 3.
3. Mɛɛ nitsɔɔmɔ gbɛ̀i abaanyɛ akɛtsu nii kɛtsɔɔ mɛi ni nyɛɛɛ nii akane lɛ nii?
3 Nitsɔɔmɔ Gbɛi Srɔtoi ni Atsɔɔ nɔ Afeɔ Biblia Mli Nikasemɔ: Mfonirii haa nitsɔɔmɔ mɔɔ shi jogbaŋŋ ni ekaa jwɛŋmɔ mli. Obaanyɛ obi nikaselɔ lɛ jwɛŋmɔ yɛ mfoniri ko ni yɔɔ wolo ni nyɛkaseɔ lɛ mli lɛ he. No sɛɛ lɛ, okɛ sanebimɔi pɔtɛ̃ɛ komɛi aye abua lɛ ni enu nɔ ni mfoniri lɛ tsɔɔ lɛ shishi. Okɛ ŋmalɛi ni tsɔɔ mfoniri lɛ fãi komɛi ni osumɔɔ ni omamɔ nɔ mi lɛ atsu nii. Abaanyɛ akɛ mfoniri lɛ atsu nii kɛtĩ nikasemɔ lɛ mli. Kaawie otii babaoo he yɛ be kometoo mli. Maa saneyitso lɛ kɛ saji otii ni yɔɔ nikasemɔ lɛ mli lɛ nɔ mi, ni okɛ saji ni kɔɔɔ nikasemɔ lɛ he lɛ akafata he. Kanemɔ ŋmalɛi lɛ kɛjɛ Biblia lɛ mli tɛ̃ɛ, ni okɛ sanebimɔi atsu nii kɛye abua nikaselɔ lɛ koni enu nɔ ni nyɛkane lɛ shishi. Enɛ baanyɛ eha eshwe akɛ ebaaha enikanemɔ hesai lɛ aya hiɛ, bɔni afee ni lɛ diɛŋtsɛ etao Biblia mli anɔkwalei babaoo mli.
4. Mɛɛ gbɛ nɔ wɔbaanyɛ wɔye wɔbua wɔnikaselɔ lɛ koni eya ehiɛ yɛ enikanemɔ mli?
4 Nibii ni Yeɔ Ebuaa ni Haa Nikanemɔ Yaa Hiɛ: Mɛi ni nyɛɛɛ nii akane, loo amɛnáaa hegbɛ kɛkase nikanemɔ jogbaŋŋ lɛ baanyɛ anu saji ashishi jogbaŋŋ diɛŋtsɛ. Obaanyɛ owo mɛi ni tamɔ nɛkɛ hewalɛ ni amɛbo mɛi ni he esa kɛ nikanemɔ lɛ toi. Kɛ́ ebo mɔ ni kaneɔ lɛ toi ni ekwɛ ewolo lɛ nɔ beni akaneɔ lɛ, ni etsɛ wiemɔi lɛ kɛnyiɛ sɛɛ lɛ, ebaaye ebua lɛ ni enikanemɔ lɛ aya hiɛ. Kasemɔ Nikanemɔ kɛ Niŋmaa wolo lɛ hu baanyɛ aye abua lɛ. Yɛ hei komɛi lɛ, asafoŋ onukpai lɛ baanyɛ ato nikanemɔ skul he gbɛjianɔ yɛ asafo lɛ mli. Ŋaawoi nɛɛ baanyɛ awa wɔ ni wɔye wɔbua mɛi ni leee nikanemɔ lɛ koni amɛnu “ŋmalɛi krɔŋkrɔŋi lɛ,” ni baanyɛ aha amɛle nii kɛya yiwalaheremɔ mli lɛ shishi.—2 Tim. 3:15.