Abaahere Gbɔmɛi Sɔrɔtoi Fɛɛ Yiwala
1 Yehowa miisumɔ ‘akɛ ahere gbɔmɛi sɔrɔtoi fɛɛ yiwala, koni amɛshɛ anɔkwale lɛ lee mli.’ (1 Tim. 2:4) Eyɛ mli akɛ fɔmɔ su, shihilɛ mli ni gbɔmɛi jɛ, kɛ nibii ni ebɔle gbɔmɛi lɛ naa amɛnɔ hewalɛ kɛyashɛɔ he ko moŋ, shi amɛyɛ heyeli yɛ nɔ ni amɛsumɔɔ akɛ amɛaafee mli, ni amɛbaanyɛ amɛhala bɔ ni amɛbaahi shi amɛha akɛ aŋkroaŋkro. Amɛbaanyɛ amɛfee ekpakpa ni amɛyi ana wala loo amɛbaanyɛ amɛfee efɔŋ ni amɛhiɛ akpata. (Mat. 7:13, 14) Mɛɛ gbɛ nɔ sane shishinumɔ nɛɛ saa bɔ ni wɔsusuɔ mɛi ni wɔkɛ Maŋtsɛyeli sanekpakpa lɛ yaa amɛ ŋɔɔ lɛ ahe lɛ he ehaa?
2 Esaaa ni wɔsusuɔ akɛ miishɛɛ ni mɔ ko yɔɔ yɛ anɔkwale lɛ he lɛ damɔ nibii tamɔ maŋ nɔ ni ajɛ, loo hiŋmɛigbelemɔ shihilɛ mli ni ayɔɔ, loo hegbɛ ni ayɔɔ yɛ shihilɛ mli lɛ nɔ. Anɔkwale lɛ baanyɛ aŋɔɔ mɛi ni woloŋlee eyako hiɛ loo etee hiɛ, mɛi ni kɛ amɛhe ewo maŋkwramɔ saji amli, kɛ nitsulɔi, mɛi ni kɛɛ Nyɔŋmɔ ko bɛ, mɛi ni kɛɔ akɛ anyɛŋ ale kɛji Nyɔŋmɔ ko yɛ, kɛ efɔŋ feelɔi kpanakui fɛɛ po anaa. Gbɔmɛi ni jɛ shihilɛi kɛ hegbɛi sɔrɔtoi fɛɛ mli lɛ etsake kɛjɛ amɛ tsutsu shihilɛ gbɛi lɛ amli, ni amɛmiikpa shihilɛ yɛ Nyɔŋmɔ jeŋ hee lɛ mli gbɛ bianɛ. (Abɛi 11:19) No hewɔ lɛ, esaaa akɛ wɔshashaoɔ shi akɛ wɔkɛ Maŋtsɛyeli shɛɛ sane lɛ baanina mɛi ni yɔɔ shihilɛi sɔrɔtoi fɛɛ amli lɛ.
3 Susumɔ Nɔkwɛmɔ Nii Nɛɛ Ahe: Nuu ko kpɛ eyiŋ akɛ ebaagbe enyɛ wu shi efeee. Sɛɛ mli lɛ, ekpɛ eyiŋ akɛ ebaagbe ehe shi enyɛɛɛ efee. Egbalashihilɛ fite yɛ beni awo lɛ tsuŋ yɛ juu kɛ tsofãi fɔji ni ehɔɔ hewɔ lɛ sɛɛ. Ŋmɛnɛ, gbɔmɔ nɛɛ miiye anɔkwale yɛ eshihilɛ mli, ni eena gbalashihilɛ ni miishɛɛ yɔɔ mli kɛ ekɛ enyɛ wu lɛ teŋ wekukpaa kpakpa hu mli ŋɔɔmɔ. Mɛni kɛ sɔrɔtofeemɔ lɛ ba? Ekɛ Yehowa Odasefoi kase Biblia lɛ, ni ekɛ nɔ ni ekase lɛ tsu nii. Yehowa ebuuu lɛ akɛ mɔ ni anyɛŋ ahere eyiwala.
4 Obalayoo ko ni he gbɛi waa akɛ mɔ ko ni jieɔ mɛi ahiɛtserɛ yɛ TV nɔ lɛ haaa ena miishɛɛ. Shi, ni ebaná Odasefoi lɛ ajeŋba kpakpa lɛ he miishɛɛ hewɔ lɛ, ekpɛlɛ ni akɛ lɛ akase Biblia lɛ, etsɛɛɛ ni ebɔi mɛi krokomɛi ayelikɛbuamɔ koni amɛkase Maŋtsɛyeli sanekpakpa lɛ he nii. Ayɔseɔ lɛ yɛ he fɛɛ he ni eyaa yɛ shia kɛ shia sɔɔmɔ nitsumɔ lɛ mli, shi ekɛ miishɛɛ tsɔɔ mli akɛ eesumɔ ni ale lɛ akɛ Yehowa Odasefoi lɛ ateŋ mɔ kome moŋ fe mɔ ni jieɔ mɛi ahiɛtserɛ.
5 Beni Odasefonyo ko kɛ mɔ ko ni shɛɔ Buu-Mɔɔ lɛ to gbɛjianɔ kɛha Biblia mli nikasemɔ lɛ, akutsoŋnyo ko ni bɛŋkɛ shia lɛ nu sane lɛ, ni eba nikasemɔ lɛ shishi. Amrɔ nɔŋŋ ni akutsoŋnyo lɛ yɔse anɔkwale ni étao aahu lɛ! Lɛ kɛ ewu lɛ fo gbalamlitsemɔ he akpɔ ní amɛwo ni aha amɛ hegbɛ yɛ he lɛ mli, ni amɛsaa amɛ gbalashihilɛ lɛ ekoŋŋ. No mli lɛ ekɛ ehe ewo ŋulamiiaŋ kwɛmɔ mli vii diɛŋtsɛ, ni ekɛ ehe ekpɛtɛ mumɔi ajamɔ ko he, shi eshɛrɛ woji ni jara wawai kɛ nibii krokomɛi fɛɛ ni kɔɔ daimonioi anifeemɔi ahe ni eyɔɔ lɛ eshwie amrɔ nɔŋŋ. Etsɛɛɛ ni ebɔi kpeei yaa, ni ebɔi ehemɔkɛyeli hee ni ena lɛ he sanegbaa etsɔɔ ewekumɛi kɛ enanemɛi. Ekɛ ekãa yeɔ mɛi krokomɛi odase bianɛ.
6 Esaaa akɛ wɔtsɔɔ hiɛ wɔkojoɔ mɔ ko. Shi moŋ, nyɛhaa wɔkɛ ekãa ashiɛa sanekpakpa lɛ wɔtsɔɔa gbɔmɛi yɛ he fɛɛ he. Wɔyɛ yiŋtoo kpakpa ni wɔɔdamɔ nɔ wɔna nɔmimaa akɛ Yehowa, mɔ ni ‘kwɛɔ tsui’ lɛ baafee “gbɔmɛi fɛɛ ayiwalaherelɔ.”—1 Sam. 16:7; 1 Tim. 4:10.