Mɛni Mɛi Krokomɛi Kaseɔ Kɛjɛɔ Odɛŋ Kɛ́ Amɛkwɛ Bo?
1. Mɛni Yesu kaselɔi lɛ kase yɛ ehe beni amɛkwɛ bɔ ni efeɔ enii ehaa lɛ?
1 Yesu kɛɛ akɛ: “Nyɛwoa mipã lɛ nyɛfɔ̃a nyɛnɔ, ni nyɛkasea mi.” (Mat. 11:29) Eyɛ faŋŋ akɛ, jeee ewiemɔi anɔ pɛ kɛkɛ etsɔ etsɔɔ mɛi anii, shi moŋ etsɔ nɔkwɛmɔnɔ kpakpa ni efee lɛ hu nɔ. Susumɔ nɔ ni Yesu kaselɔi lɛ kase yɛ ehe beni amɛkwɛ bɔ ni efeɔ enii ehaa lɛ he okwɛ. Emli jɔ, emli hi, ni eyɛ suɔmɔ. (Mat. 8:1-3; Mar. 6:30-34) Eba ehe shi kɛjɛ etsui mli tɔ̃ɔ. (Yoh. 13:2-5) Beni kaselɔi lɛ fata Yesu he kɛshiɛɔ lɛ, amɛna akɛ eji mɔ ko ni bɔɔ mɔdɛŋ waa, ni etsɔɔ mɛi anɔkwale lɛ yɛ gbɛ ni mɔ̃ɔ shi nɔ. (Luka 8:1; 21:37, 38) Kɛ́ mɛi kwɛ bɔ ni wɔshiɛɔ wɔhaa lɛ, te enáa amɛnɔ hewalɛ ehaa tɛŋŋ?
2. Mɛɛ gbɛ nɔ wɔjeŋba kpakpa kɛ wɔhesaamɔ ni yɔɔ hiŋmɛi nɔ lɛ baanyɛ aná shiatsɛmɛi lɛ anɔ hewalɛ kpakpa?
2 Shiatsɛmɛi: Wɔhesaamɔ ni yɔɔ hiŋmɛi nɔ, wɔjeŋba kpakpa, kɛ mɛi ahe miishɛɛ ni wɔnáa lɛ baanyɛ aná shiatsɛmɛi lɛ anɔ hewalɛ yɛ gbɛ kpakpa nɔ. (2 Kor. 6:3; Fil. 1:27) Amɛyɔseɔ akɛ wɔkɛ Biblia lɛ fɔɔ nitsumɔ. Mɛi krokomɛi náa he miishɛɛ akɛ wɔjɛɔ bulɛ mli wɔboɔ amɛ toi beni amɛwieɔ lɛ. Nɔkwɛmɔnɔ kpakpa ni wɔfeɔ yɛ nibii nɛɛ amli lɛ baanyɛ aha mɛi abo Maŋtsɛyeli shɛɛ sane lɛ toi jogbaŋŋ.
3. Mɛɛ hewalɛ kpakpa wɔbaanyɛ wɔná yɛ wɔnyɛmimɛi lɛ anɔ?
3 Wɔnyɛmimɛi Lɛ: Susumɔ hewalɛ kpakpa ni wɔbaanyɛ wɔná yɛ wɔnyɛmimɛi lɛ anɔ lɛ hu he okwɛ. Ekãa ni wɔkɛtsuɔ shiɛmɔ nitsumɔ lɛ tsɛŋeɔ mɛi krokomɛi. Taakɛ dade jɔɔ dade naa lɛ, kɛ́ wɔto wɔshiɛmɔ wiemɔi lɛ ahe gbɛjianɔ jogbaŋŋ lɛ, ebaakanya mɛi krokomɛi koni amɛha hesaa ni amɛkɛtsuɔ shiɛmɔ nitsumɔ lɛ aya hiɛ. (Abɛi 27:17) Mɔdɛŋ ni wɔbɔɔ kɛŋmalaa mɛi ni jie miishɛɛ kpo yɛ sanekpakpa lɛ he lɛ ahe saji, kɛ wɔsɛɛ ní wɔkuɔ kɛyasaraa amɛ oya nɔŋŋ lɛ kanyaa nyɛmimɛi krokomɛi ni amɛhu amɛfeɔ nakai. Kɛ́ wɔgbe wɔsɔɔmɔ lɛ naa kwraa lɛ, wɔbaaná wɔnyɛmimɛi lɛ anɔ hewalɛ kpakpa.—2 Tim. 4:5.
4. Mɛni hewɔ esa akɛ wɔpɛi bɔ ni wɔnifeemɔi náa mɛi krokomɛi anɔ hewalɛ lɛ mli yɛ be kɛ beaŋ lɛ?
4 Mɛni hewɔ yɛ be kɛ beaŋ lɛ, opɛiii onifeemɔ kɛ owiemɔ mli, ni okwɛ bɔ ni oshihilɛ náa mɛi krokomɛi anɔ hewalɛ ehaa? Wɔnɔkwɛmɔnɔ kpakpa lɛ baasa Yehowa hiɛ, ni no baaha wɔkɛ nɔmimaa awie tamɔ bɔfo Paulo, beni ekɛɛ akɛ: “Nyɛkasea mi, taakɛ bɔ ni mi hu mikaseɔ Kristo lɛ.”—1 Kor. 11:1.