LISON 46

Poutji fòk ba Jéova lavi’w épi pran batenm ?

Modèl pou enprimé

Ba Jéova lavi’w, sé pwonmèt li adan an lapriyè sé li sèl ou kèy adoré, é ki ou kèy fè volonté’y pasé an prèmié (Sòm 40:8). Apré sa, ou ka pran batenm pou montré tout moun ou ba Jéova lavi’w. Ba Jéova lavi’w, pa ni désizion ki pli enpòwtan. Kisa ki pé pousé’w pran désizion-tala ?

1. Kisa ki ka pousé an moun ba Jéova lavi’y ?

Sé lanmou’y ba Jéova ki ka pousé an moun ba’y lavi’y (1 Jan 4:10, 19). Labib-la ka di : « Ou dwé enmen Jéova Bondié’w épi tout tjè’w, tout nanm-ou, tout lèspri’w épi tout lafòs-ou » (Mak 12:30). Nou ka montré nou enmen Bondié adan pawòl-nou men osi adan aksion-nou. Toukon an gran lanmou ka fè an nonm épi an madanm mayé, menm manniè-a, lanmou-nou ba Jéova ka fè nou ba’y lavi-nou épi pran batenm.

2. Ki bénédision Jéova ka ba sé Témwen’y lan ki batizé ?

Jéova ni an fanmi plen lajwa. Lè’w ka pran batenm ou ka antré adan fanmi-tala. A moman-tala, ou ké wè lanmou Jéova ba’w diféran manniè, é ou pé ké sispann vini pli pré’y (li Malaki 3:16-18). Jéova kèy divini Papa’w é ou ké adan an fanmi frè é sè ki enmen’y, é ki enmen’w, wou tou (li Mak 10:29, 30). Kon nou té ja wè, i ni bagay pou fè avan batenm-lan. Fòk ou koumansé pa aprann konnèt Jéova, enmen’y, épi ni lafwa adan Fis-li. Apré sa, adan an lapriyè, ou pou ba Jéova lavi’w. Lè’w kèy fè tout sé bagay-tala épi pran batenm, ou kèy asou chimen lavi étèrnèl. Pawòl Bondié ka di : « Batenm-lan [...] ka sové zòt » (1 Piè 3:21).

ANNOU PLI LWEN

Annou wè poutji ba Jéova lavi’w épi pran batenm, sé dé bagay enpòwtan.

3. Nou tout pou chwazi ki moun nou kèy sèvi

I ni lontan di sa, i ni Izrayélit ki té ka kwè yo té pé adoré Jéova épi fo dié-a Baal an menm tan. Men Jéova voyé pwofèt Éli pou korijé manniè wè yo. Li 1 Wa 18:21 épi diskité kèsion-tala :

Ki chwa sé Izrayélit-la té pou fè ?

Kon sé Izrayélit-la, nou pou chwézi ki moun nou kèy sèvi. Li Lik 16:13 épi diskité sé kèsion-tala :

Poutji nou pé pa adoré an moun oben an bagay an menm tan nou ka adoré Jéova ?
Koumanniè nou pé montré Jéova sé li nou chwézi adoré ?

4. Katjilé asou lanmou Jéova ni ba’w

Montaj : An misié ka katjilé asou tousa Bondié ba’y. 1. Lanmou an manman ba ti-bébé’y. 2. An nouriti tété-dwèt, an patjé fwi épi lédjim. 3. Labib. 4. Laranson, Jézikri maré anlè an poto.

Jéova ba nou an patjé kado ki ni anpil valè. Kisa nou menm nou pé ba’y ? Gadé VIDÉWO-a.

VIDÉWO : Ba Jéova dé ti kado (3:04)

Ki diféran manniè Jéova ja montré’w i enmen’w ? Li Sòm 104:14, 15 épi 1 Jan 4:9, 10, épi diskité sé kèsion-tala :

Ki kado Jéova ba’w ou enmen èspésialman ?
Kisa ou ka risanti ba Jéova lè ou ka sonjé sé kado-tala ?

Lè an moun ka ofè nou an kado nou enmen anpil, nou lé montré’y rikonésans-nou. Li Détéwonòm 16:17 épi diskité kèsion-tala :

Lè ou ka sonjé tousa Jéova fè ba’w, kisa ou té ké anvi ba’y ?

5. Ba Jéova lavi’w kèy pwotjiré’w bon bénédision

Anlo moun ka pansé, ki si yo sé an pèrsonalité, yo ni an bon pòs, ouben anpil lajan sa kèy rann yo éré, men ès sa vré ? Gadé VIDÉWO-a épi diskité sé kèsion-an ka vini an.

VIDÉWO : Tout lavi-mwen sé té foutbòl (5:45)

Montaj : Zimaj ki sòti an vidéwo-a ‘Tout lavi-mwen sé té foutbòl’. 1. Andreï ka rikoumansé étidié Labib. 2. Andreï ka préché épi fi’y li.

Menm si Andreï té enmen jwé boul, poutji i abandonnen kariè-tala ?
I désidé ba Jéova lavi’y pito ki foutbòl. Ès sa té an bon désizion ? Poutji ?

Avan i vini krétjen lapòt Pòl té étidié lalwa sé Juif-la épi an gran pwofésè lépòk-li. I té koumansé an bèl kariè men i ladjé’y pou vini krétjen. Ès i rigrété ? Li Filipien 3:8 épi diskité sé kèsion-tala :