Anba dominasion Bondié, tout lakréyasion té ka viv dan linité épi lapé.

Poutji nou bizwen wayòm Bondié ?

Okoumansman listwa lézonm, Kréyatè-nou, ki ni pou non Jéova, té sèl Dirijan-an. I té ka dirijé épi lanmou. I té kréyé ba lézonm an koté pou yo té rété ki té bèl menm, jaden Édenn-lan. I té ka ba yo an bondans manjé. I té ba yo tou, an travay ki té entérésan toubannman (Jénèz 1:28, 29 ; 2:8, 15). Si yo té rété anba dominasion plen lanmou’y, lézonm té kay viv an pé.

Adan ka tjenbé adan lanmen’y fwi défandi-a Èv fini ba’y-la. — Sé prèmié nonm-lan rijété lotorité Bondié.

Labib ka di an zanj ribèl, yo kay kriyé Satan Djab-la apwé, lévé kont dwa Bondié ni di gouvèné. I fè konprann ki lézonm té kay pli biennéré san dominasion Bondié épi san konsèy-li. Malérèzman, Adan épi Èv, sé prèmié paran nou-an, suiv menm chimen ki Satan : yo tounen do yo ba Bondié (Jénèz 3:1-6 ; Révélasion 12:9).

Davwè yo rijété lotorité Bondié, Adan épi Èv pèd an bèl bitasion adan an paradi épi lèspwa viv pou tout tan épi santé pawfé (Jénèz 3:17-19). Timanmay-yo ki vini apwé, trapé malè palakòz désizion-yo. Silon Bib-la, pas Adan péché, « péché vini antré an monn-lan, é palakòz péché-a lanmò antré » (Women 5:12). Péché-a mennen an lòt konsékans ki grav menm : « Moun ka dominé asou moun, pou fè yo soufè » (Éklézias 8:9). An manniè pou di, lè nonm ka dirijé nonm, asiré, yo toujou ka jwenn pwoblèm.

NONM KA KOUMANSÉ DOMINEN NONM

Nèmwòd, épi an manniè awogan. Pa dèyè, moun ka konstwi batiman. — Nèmwòd viré do ba Jéova.

Prèmié nonm-lan Labib ka palé ki té dirijan sété Nèmwòd. Nonm-tala tounen do’y kont ladominasion Jéova. Dépi an tan Nèmwòd, sé moun-an ki ni lotorité ka fè pwofitasion épi pouvwa yo ni. I ni 3 000 lanné, wa Salomon matjé : « Man wè dlo koulé nan zié moun yo té ka pijé, é yo pa té ni pèsonn pou konsolé yo. Sé moun-lan menm ki té ka pijé yo, sé yo ki té ni pouvwa » (Éklézias 4:1).

Ayen pa chanjé jòdi-jou. An 2009, an louvraj Nasion zini té ka di yo ka wè plizanpli, ki « mové manniè gouvèné » sé « yonn adan sé prèmié rézon ki ka fè lasosiété ka soufè ».

LÈ POU CHANJMAN-AN RIVÉ !

Monn-lan bizwen pli bon dirijan épi an lòt manniè gouvèné ki méyè. Èk sé sa menm Kréyatè-nou ka ponmèt nou !

Lalis zimaj : Konsékans gouvènans nonm. 1) An madanm aziyatik, asiz atè-a adan an lari ki sal, ka tjenbé an bra’y yich-li ka pléré. 2) an vié misié ki malad asou an kabann lopital. 3) Sòlda ki ka fè ladjè ka tiré kout fizi. 4) Moun an kòlè ka manifesté, ka kriyé èk ka soukwé pankat. 5) Lè yo ka rivé kay-yo, an madanm épi fi’y-li ka rann kòyo kont vit lapòt kay-yo kasé. 6) An vil ki ni chiminé lizin èk poto élèktrik, ka néyé adan an bwouya lapolision. — Menm sé pli bon gouvèlman lézonm pa rivé réglé sé gwo pwoblèm limanité-a.

Bondié mété an plas an wayòm, oben gouvèlman. Gouvèlman-tala kay ranplasé tout lézòt dominasion lézonm-lan épi « li-yonn kéy rété pou tout tan » (Dannièl 2:44). Mi sé sa ki « règne », oben wayòm-tala, milion moun ka prédié-a (Matié 6:9, 10). Men sé pa Bondié li menm ki kay dirijé gouvèlman-tala. Bondié nonmen an moun ki viv kon an nonm pou’y pé Chèf gouvèlman-tala. Ki moun i chwazi ?