Ès lézòm pé fè disparèt ladjè ?

SÉ GOUVÈNMAN-AN KA ÉSÉYÉ AMIORÉ LÉKONOMI PÉYI-YO

Sa yo lé fè : Endé sé moun-lan ni an méyè lavi. Konsa i ké ni mwens lenjistis sosial, pas souvan sé sa ki ka mennen ladjè épi pwoblèm.

Poutji sa difisil fè sa : Pas fodré sé gouvènman-an dépansé lajan-yo an lòt manniè. An 2022, adan monn-lan yo dépansé 34,1 milia dola améritjen pou favorizé lapé. Men sa pa ayen parapòt a lajan-an yo dépansé pou larmé adan menm lanné-a.

« Nou ka sèvi anlo lajan épi lénèrji pou jéré sé pwoblèm-lan. Lontan plis lajan ki sa nou ka sèvi pou anpéché sé ladjè-a épi mété lapéa ». (António Guterres, sèkrétè jénéral Òwganisasion Lénasionzini).

Sa Labib-la ka di : Pétèt sé gouvènman-an épi sé òwganizasion sosial la pé endé sé moun-lan ki maléré, men yo pé ké janmen rivé tiré tout lanmizè ki ni asou latè (Détéwonòm 15:11 ; Matié 26:11).

SÉ GOUVÈNMAN-AN KA CHÈCHÉ AKÒ POU MÉTÉ LAPÉ

Sa yo lé fè : Diskité adan lapé pou réglé sé pwoblèm-lan ki ni ant pliziè péyi, épi touvé solision ki kèy mété tout moun dakò.

Poutji sa difisil fè sa : Yonn oben pliziè péyi pé rifizé pran pa adan diskision-an, oben yo pé rifizé asèpté an akò. Anplis, sa fasil pa rèspèkté an akò.

« Lè sé gouvènman-an ka chèché fè lapé, sé pa tout lè yo ka rivé. Délè, ni tèlman défo adan akò-a yo pran pou bout ladjè-a, ki sa ka mennen dòt pwoblèmb » (Raymond Smith, American Diplomacy).

Sa Labib-la ka di : Fòk lézòm « chèché lapé » (Sòm 34:14). Malérèzman, jòdi-a ni anpil moun ki pa « fidèl », ki pa ka « antann kòyo » épi ki « trèt » (2 Timoté 3:1-4). Menmsi ni dirijan politik ki sensè, yo pa ka rivé réglé sé pwoblèm-lan akòz di sé konpòwtasion-tala.

SÉ GOUVÈNMAN-AN KA ÉSÉYÉ MÉTÉ KÒYO DAKÒ POU NI MWENS ZAM

Sa yo lé fè : Sé gouvènman-an ka chèché mwayen pou fè disparèt sé zam-lan, èspésialman zam ki puisan épi ki pé tjwé anlo moun.

Poutji sa difisil fè sa : Sé gouvènman-an ka rifizé détwi zam-yo pas yo pè pèd puisans-yo oben yo pè pa rivé défann kòyo. É menmsi yo té ka rivé débarasé kòyo di tout sé zam-lan, yo pé ké pé débarasé kòyo di tousa ki ka fè sé nonm-lan goumen.

« Apré 1991, anpil gouvènman té pwonmèt débarasé kòyo di zam-yo. Men yo pa fè sa yo té di ; èspésialman chèché vré solision pou kalmé sé tansion-an ki ni ant sé péyi-a épi, anfinaldikont, mennen plis sékirité adan monn-lanc » (« Assurer notre avenir commun : un programme de désarmement »).

Sa Labib-la ka di : Fòk lézòm abandonnen zam-yo, épi fòk yo fè « lépé-yo [...] tounen zouti pou labouré latè » (Izayi 2:4). Men pou arété ladjè-a sé nonm-lan pou fè plis, pas sé an tjè-yo menm laviolans ka sòti (Matié 15:19).

SÉ GOUVÈNMAN-AN KA FÈ ALIANS POU ARÉTÉ LADJÈ

Sa yo lé fè : Yonn-dé gouvènman ka lianné kòyo pou konbat lènmi-yo. Yo ni lenprésion lènmi-yo ké pè goumen kont an liannaj larmé.

Poutji sa difisil fè sa : Sé pa tout lè lapè kont an liannj péyi ka mennen lapé. Anplis, sé pa tout sé nasion-an ki ka rèspèkté angajman-yo. É yo pa toujou dakò asou manniè-a épi moman-an pou aji kont lènmi-yo.

« Menmsi Sosiété sé Nasion-an épi Òwganizasion Lénasionzini travay rèd pou anpéché sé ladjè-a, yo pa rivé fè sa » (« Encyclopedia Britannica »).

Sa Labib-la ka di : Souvan sa pli fasil mété lapé lè pliziè moun ka travay ansanm-ansanm (Éklézias 4:12). Men sé gouvènman-an pé pa mennen lapé épi lasékirité pou bon. « Pa mété konfians-zòt adan sé prens-lan, ni adan an yich nonm, ki pa sa sové. Lè souf lavi-a i té ni ka pati, moun-lan ka ritounen anba tè-a ; menm jou-tala, tout lidé’y ka mò » (Sòm 146:3, 4).