Liv Jòb-la pé endé’w lè’w ka soufè

1-2. Poutji liv Jòb-la mérité nou li’y ?

ÈS OU li liv Jòb-la pa ni lontan ? Yo matjé liv-tala sa ka fè oliwon 3 500 lanné. Men ba anlo moun sé yonn adan sé pli bèl liv-la yo ékri. Anlo moun ka pòté anlè lotè liv-tala, pas sé mo-a senp pou konprann, yo bèl épi puisan. Sa vré sé Moyiz ki matjé’y, men vré lotè liv-tala sé Jéova (2 Tim. 3:16).

² Liv Jòb-la, sé an liv Labib ki ni kont lenpòwtans-li. Poutji ? Pas i ka endé nou konprann, sé zanj-lan épi sé nonm-lan ni pou chwézi si yo kèy sèvi Jéova pas yo enmen’y, é si yo kèy défann répitasion’y. I ka aprann nou anpil bagay asou manniè Jéova yé, kontèl asou lanmou’y, sajès-li, jistis-li épi puisans-li. Pa ègzanp, liv Jòb-la ka di pliziè fwa Jéova sé Bondié Tou-Puisan an. I ka réponn osi pliziè gran kèsion nou ka pozé kònou. Yonn adan yo ka tèrbolizé lèspri anpil moun : Poutji Bondié ka pèwmèt lasoufwans ?

3. Kisa liv Jòb-la kèy aprann nou ?

³ Liv Jòb-la ka endé nou pa wè sé léprèv-la jiskont a wotè-nou, men kon Jéova ka wè yo. Konsidiré nou té ka monté an tèt an mòn pou bien rivé wè tousa ki alantou nou. Kidonk, annou wè ki manniè liv-tala pé endé nou lè nou ka soufè. Awtik-tala kèy èsplitjé nou, ki manniè listwa Jòb dwèt endé sé Izrayélit-la, é ki manniè i pé endé nou jòdi-a. Nou kèy wè osi ki manniè nou pé sèvi liv Jòb-la pou endé lézòt.

BONDIÉ KITÉ JÒB SOUFÈ

4. Ki gran diférans ki té ni ant Jòb épi yonn-dé Izrayélit ki té ka viv Léjip ?

⁴ Jòb té ka viv adan an péyi yo ka kriyé Ouz, antan sé Izrayélit-la té èsklav Léjip. Ouz, sé té an péyi ki dwèt pa té lwen Léjip. Jòb pa té kon sé Izrayélit-la ki té ka adoré zidòl. I té ka sèvi Jéova épi fidélité (Joz. 24:14 ; Ézé. 20:8). Jéova di asou Jòb : « Pa ni pa an moun kon’y anlè latèa » (Jòb 1:8). Anplis Jòb sé té an gwo tjap, é sé té nonm-lan yo té ka rèspèkté plis adan réjion-tala (Jòb 1:3). Satan dwèt té faché menm. Poutji ? Pas i té ka wè nonm-tala ki té sélèb épi yo té ka rèspèkté, sèvi Jéova épi fidélité !

5. Poutji Jéova kité Jòb soufè ? (Jòb 1:20-22 ; 2:9, 10).

⁵ Satan prétann si Jòb té ka soufè, i té kèy sispann sèvi Jéova (Jòb 1:7-11 ; 2:2-5). Jéova té enmen Jòb anpil, men i pèwmèt Satan montré si tousa i té di asou Jòb, té vré ouben pa vré (Jòb 1:12-19 ; 2:6-8). Sé poutji Djab-la mété kòy an travay pou fè Jòb pèd tout bèt-li, pou tjwé sé 10 yich-li a, pou ba’y fiwonk ka fè mal dépi an tèt-li jik an plat-pié’y. Men, menmsi Satan épi manniè séléra’y fè Jòb soufè anpil, Jòb kontinié sèvi Jéova épi fidélité (li Jòb 1:20-22 ; 2:9, 10). Sonjé ki apré sa, Jéova fè’y ritouvé lasanté, i viré ba’y anpil richès, é moun viré rèspèkté’y. Pli bèl ankò, i viré ba’y 10 timanmay. É pou fini, Jéova fè’y viv 140 lanné ankò, sa ki pèwmèt li konnèt désandans-li jik katrièm jénérasion-an (Jòb 42:10-13, 16). Kisa sèvitè Jéova antan lontan aprann asou listwa Jòb, é kisa nou pé aprann jòdi-a ?

6. Kisa listwa Jòb dwèt endé sé Izrayélit-la konprann ? (gadé zimaj-la osi).

⁶ Ki manniè listwa Jòb-la dwèt endé sé Izrayélit-la ? Ba sé Izrayélit-la, viv Léjip sa pa té rédi chèz bò tab. Pa ègzanp lè yo té jenn, Jozié épi Kalèb té èsklav. Apré, yo viv 40 lanné adan dézè-a, alòs ki yo pa té mérité pinision-tala. Si sé Izrayélit-la té konnèt listwa Jòb, é si yo té sav sa Jéova fè ba’y alafen léprèv-li, pétèt sa endé yo — menm manniè sa dwèt endé désandan-yo — konprann ki moun anfinaldikont ka fè lézòm soufè. Yo dwèt rivé konprann plimié osi, poutji Jéova ka pèwmèt lasoufwans, é tout valè-a fidélité lézòm ni ba’y.

7-8. Ki manniè liv Jòb-la pé endé nou lè nou ka soufè ? Ba an ègzanp.

⁷ Ki manniè listwa Jòb pé endé nou ? Jòdi-jou osi, malérèzman, menm lè’w sé an bon moun, malè ka tonbé anlè’w. Kifè, anlo moun pa ka konprann poutji sa ka rivé, épi yo ka pèd lafwa an Bondié. Annou palé di Hazelb ki ka viv Wannda. Lè i té jenn i té ka kwè an Bondié. Men anlo malè tonbé anlè’y. Paran’y divòsé, épi manman’y rimayé épi an nonm ki té ka maltrété’y. Lè i té jenn-fi yo violé’y. É lè i té ka alé koté-a i té ka adoré Bondié, i pa jwenn konsolasion-an i té ka chèché. Plita i ékri an lèt ba Bondié. I di’y : « Bondié, man prédié’w, man fè tousa man pé pou fè sa ki bien, men ou rann mwen sa ki mal pou tout bien-an man té ka fè. Atjèlman, man ka ladjé’w, é man kèy fè tousa man pé pou ni tjè-kontan adan lavi-mwen. » Sa tris ki anlo moun kon Hazel, ka fini pa kwè Bondié rèsponsab soufwans-yo !

⁸ Men nou, nou aprann gras a listwa Jòb, ki sé pa Bondié ki dèyè sé soufwans-lan, men sé Satan ! Nou aprann osi, ki lè an moun ka soufè, sé pa rékòlté i ka rékòlté sa i simen. Labib ka èsplitjé, ki « léprèv épi sa yo pé pa prévwè » pé tonbé anlè nenpòt ki moun, a nenpòt ki moman (Ékl. 9:11 ; Jòb 4:1, 8). Pou fini, nou aprann ki lè nou ka andiré an léprèv épi fidélité, nou ka ba Jéova lokazion montré Satan sé an mantè. Sé konsa nou ka défann répitasion’y (Jòb 2:3 ; Pwo. 27:11). Kidonk, fòk nou ni rikonésans pou tout sé bèl vérité-a nou aprann ! Yo ka pèwmèt nou sav poutji nou épi moun nou enmen ka soufè konsa. Annou viré palé di Hazel. Plita, i étidié Labib épi sé Témwen Jéova-a, é i konprann sé pa Bondié ki dèyè soufwans i té ka jwenn. I di konsa : « Man viré koumansé prédié épi tout tjè-mwen. Mwen èsplitjé Jéova ki menmsi man té di’y man té kèy ladjé’y, avrédi, sé pa sa man té lé fè. Sé pas man pa té konnèt li vréman. É tousa ka ba mwen tjè-kontan, pas atjèlman man sav i enmen mwen » Nou chansé sav poutji Bondié ka pèwmèt lasoufwans ! Annou wè atjèlman, ki manniè listwa Jòb pé endé nou chak la, lè nou anba an léprèv.

SA KI RIVÉ JÒB PÉ ENDÉ’W ANDIRÉ

9. Koumanniè ou pé imajinen Jòb anba léprèv-li ? (Jak 5:11).

⁹ Imajinen sa Jòb ka viv : I asiz tousèl adan lasann. I kouvè épi gwo bouton plen pi, tout kòy ka fè’y mal, i mèg kon an klou. Lapo’y vini lèd menm ! Jòb las, é ou sé di dènié fòs ki rété’y sé pou i graté kòy épi mòso pòt an tè, épi pléré anlè sa ka rivé’y. Poutan, i pa ka sèlman sipòté soufwans-li. Men i ka tjenbé épi fidélité ! (li Jak 5:11). Kisa ki endé Jòb rété fidèl ?

10. Ki rilasion Jòb té ni épi Jéova ?

¹⁰ Jòb ouvè tjè’y ba Jéova (Jòb 10:1, 2 ; 16:20). Pa ègzanp, adan Jòb chapit 3, Jòb ka di a ki pwen i tris parapòt a sa ka rivé’y. Sé pas i té ka pansé Jéova té dèyè pwoblèm i té ka jwenn. É apré sa, 3 swadizan kanmarad vini wè Jòb é yo trapé pliziè diskision ki té cho menm épi’y. É adan sé diskision-tala, Jòb pa las di yo i sé an moun ki fidèl. Men souvan, sé ba Jéova i té ka vréyé pawòl-li. Pandan an tan, sa Jòb di té ka kité sipozé i té pli jis ki Bondié (Jòb 10:1-3 ; 32:1, 2 ; 35:1, 2). Men i rikonnèt ki pou défann kòy, sa té ka rivé i di « pawòl an lè » (Jòb 6:3, 26). Adan chapit 31-an, nou ka aprann ki sa Jòb té lé, sé ki Bondié di tout moun i inosan (Jòb 31:35). Asiré i té ni tò ègzijé ki Bondié réponn li dirèktiman épi èsplitjé’y poutji i té ka soufè. Sé atjèlman nou ka konprann poutji Jòb ensisté konsa. Sé pas i té enmen Jéova anpil épi i té asiré sèten, kisiswa manniè-a, Bondié’y la té kèy admèt i fidèl.

11. Ki manniè Jéova réyaji parapòt a sa Jòb di ?

¹¹ Lè Jéova réponn Jòb an mitan tanpèt van-an, i pa èsplitjé’y an détay poutji i té ka soufè. I pa kondané’y non pli pas i té ka plenn kòy, ouben pas i té lé a tout fòs Bondié di i inosan. Jéova plito ansénié’y kon an papa té kèy ansénié yich-li. É sé té méyè manniè pou fè. Pou vré, Jòb admèt épi limilité i pa té konnèt gran chòy, épi i ripanti kòy pou tout pawòl an lè i té di (Jòb 31:6 ; 40:4, 5 ; 42:1-6). Ki manniè listwa Jòb dwèt fè sèvitè Jéova antan lontan dibien ? É ki manniè i pé fè nou dibien jòdi-a ?

12. Ki manniè listwa Jòb-la dwèt fè sé Izrayélit-la dibien ?

¹² Ki manniè listwa Jòb-la dwèt endé sé Izrayélit-la ? Sé Izrayélit-la dwèt aprann anlo bèl lison, parapòt a sa Jòb viv. Pa ègzanp, Moyiz andiré lè i té ka djidé pèp Izrayèl-la. Pou vré, délè i té ka dékourajé. I jwenn osi anlo difikilté épi désèpsion. Alòs ki sé Izrayélit-la pa té janmen kontan sa Jéova té ka fè ba yo, Moyiz li menm té ka di Bondié tout ti lapenn-li (Ègz. 16:6-8 ; Nonb 11:10-14 ; 14:1-4, 11 ; 16:41, 49 ; 17:5). Fòk i té andiré osi lè Jéova korijé’y. Alòs ki sé Izrayélit-la té ka kanpé pabò Kadèsh, pa koté 40^ièm lanné-a lè yo té adan dézè-a, Moyiz palé san réfléchi épi i pa gloriyé non Jéova (Sòm 106:32, 33). Ki manniè sa fini ? Jéova pa kité’y antré an Péyi pwonmès-la (Dét. 32:50-52). Disiplin-tala dwèt fè Moyiz mal, men i asèpté’y épi limilité. Listwa Jòb-la té pé endé sé Izrayélit-la andiré léprèv yo té kèy jwenn, lè yo té kèy antré adan Péyi-a Bondié té pwonmèt yo. Si yo té médité asou listwa Jòb-la, sé Izrayélit-la ki té fidèl, té kèy konprann anlo bagay : fòk yo té ouvè tjè-yo ba Jéova, arété jistifié kòyo douvan’y, épi asèpté épi limilité i korijé yo.

13. Ki manniè listwa Jòb pé endé nou andiré ? (Ébré 10:36).

¹³ Ki manniè listwa Jòb pé endé nou ? Lépòk-la nou ka viv la difisil menm, kifè nou bizwen andirans (li Ébré 10:36). Pétèt nou ni an gwo maladi, ouben nou ka soufè palakòz ladéprésion ouben nou ka fè gwo kriz langwas. Pétèt osi nou ni difikilté adan lafanmi-nou, ouben nou pèd an moun nou enmen, ouben ankò nou ni dòt pwoblèm ki grav. É délè, sa lézòt ka di ouben fè, pé rann sitiyasion-an pli rèd ankò pou sipòté (Pwo. 12:18). Men liv Jòb-la ka aprann nou, ki fòk nou di Jéova tousa ki an fon tjè-nou, pas nou sav i kèy kouté nou (1 Jan 5:14). I pé ké kondané nou, menmsi délè adan siplikasion-nou, nou ka di « pawòl an lè » kon Jòb. Okontrè, i kèy ba nou fòs-la épi sajès-la ki nésésè pou nou andiré (2 Kwo. 16:9 ; Jak 1:5). Men si sa nésésè, i kèy pétèt osi korijé nou kon i korijé Jòb. Pou vré, liv Jòb-la ka ansénié nou osi, koumanniè pou andiré lè yo ka ba nou an konsèy ouben korijé nou. Konsèy-la ouben korèksion-an pé vini di Pawòl Bondié, lòwganizasion’y ouben zanmi ki mi (Ébré 12:5-7). Menm manniè sa fè Jòb dibien lè i aksèpté épi limilité Jéova korijé’y, nou osi sa kèy fè nou dibien si nou ka kité Jéova disipliné nou (2 Kor. 13:11). Mi bèl lison nou ka aprann adan liv Jòb-la ! Annou wè atjèlman, koumanniè nou pé sèvi liv-tala pou endé lézòt.

SÈVI LIV JÒB-LA POU ENDÉ LÉZÒT

14. Ki èsplikasion nou pé ba an moun ki ka mandé nou poutji nou ka soufè konsa ?

¹⁴ Ès an moun ja mandé’w poutji nou ka soufè konsa ? Ki répons ou ba’y ? Pétèt ou di’y sa ki pasé adan jaden Lédenn kon sa matjé adan Labib. Pétèt ou èsplitjé’y ki Satan sé an lèspri méchan ki manti ba prèmié koup-la pou yo ribélé kòyo kont Bondié (Jén. 3:1-6). Pétèt apré, ou fè’y rimatjé, dépi ribélion Adan épi Èv, lézòm ka soufè épi ka mò (Wom. 5:12). É pétèt pou fini, ou èsplitjé’y Bondié ka kité asé tan pasé pou tout moun sav Djab-la sé an mantè. Épi pou tout moun sav i kèy tiré lasoufwans pou nou pwofité di lavi-a pou tout tan (Rév. 21:3, 4). Sé an bèl répons ou ba’y, é répons-tala pé ba bon rézilta.

15. Koumanniè nou pé sèvi liv Jòb-la pou réponn an moun ka mandé nou, poutji soufwans ka ègzisté ? (gadé sé zimaj-la osi).

¹⁵ Annou wè an lòt manniè ou sé pé réponn : ou pé sèvi liv Jòb-la pou ba moun-lan yonn-dé èsplikasion anplis. Koumansé pa félisité’y pas i pozé an kèsion ki vréman entérésan. Apré, ou pé palé’y di Jòb, an nonm fidèl ki soufè anlo, ki pozé menm kèsion-an. I té kwè sé Bondié ki té ka fè’y soufè (Jòb 7:17-21). Pétèt moun-lan ou ka palé ba’y la, kèy étonnen épi sa kèy brennen tjè’y lè i kèy aprann, sé pa jòdi moun lé sav poutji nou ka soufè. Apré, san fwasé’y, èsplitjé’y sé pa Bondié men Djab-la ki té dèyè soufwans Jòb. Présizé’y osi, ki Satan ataké Jòb, pou éséyé montré ki lézòm ka sèvi Bondié sèlman pou lentéré-yo. Ou pé ajouté osi, ki menmsi sé pa Bondié ki té ka fè Jòb soufè, lè i kité Jòb sibi sé soufwans-lan sé té pou montré konfians i té ni adan sèvitè’y ki fidèl. I té asiré sèten yo té kèy montré Djab-la sé an mantè. Anfen, fè moun-lan sav sé pa ti bénédision Bondié ba Jòb pas i rété fidèl. Nou pé rasiré sé moun-lan lè nou ka èsplitjé yo ki pliziè bagay pé lakòz sé soufwans-lan, men sé pa janmen Jéova ki lotè !

16. Sèvi an ègzanp pou montré ki liv Jòb-la pé endé an moun ka soufè.

¹⁶ Annou wè ki manniè listwa Jòb endé Mario. An 2021, an jou, an sè té ka préché pa téléfòn épi i kriyé’y. Sé té prèmié moun sè-a té ka kriyé jou-tala. I li an vèsé Labib ba’y é i èsplitjé’y, non sèlman Bondié ka kouté lapriyè-nou, men osi i lé ba nou an divini é an lèspwa. Lè i mandé Mario sa i té ka pansé, i fè’y sav jiskont lè téléfòn-lan sonnen, i té ka ékri an lèt ka di i té lé tjwé kòy. Épi i ajouté : « Man ka kwè an Bondié, men bonmaten-an, man mandé kòmwen si i pa té ladjé mwen. » Lè sè-a viré kriyé’y, yo palé anlè soufwans Jòb. Mario di konsa fòk i té li tout liv Jòb-la. Kidonk, sè-a vréyé an lien ba’y pou li La Bible. Traduction du monde nouveau. Ki manniè sa fini ? Mario asèpté an létid Labib, é i té kontan aprann konnèt Bondié-a ki enmen’y é ki té ka entérésé kòy a li.

17. Poutji nou kontan Jéova mété liv Jòb-la adan Pawòl-li ? (Jòb 34:12).

¹⁷ Sa klè, Pawòl Bondié ni an pouvwa èstwòdinè : i pé endé an patjé moun épi konsolé moun ka soufè (Ébré 4:12). Sé pa ti kontan nou kontan, pas Jéova mété liv Jòb-la adan Pawòl-li ! (Jòb 19:23, 24). Mi sa nou ka li adan’y : « Asiré Bondié pa ka aji épi méchansté » (li Jòb 34:12). Liv-tala ka aprann nou poutji Bondié ka kité nou soufè. I ka èsplitjé nou ki manniè nou pé andiré, épi i ka endé nou osi, konsolé moun ka soufè. Adan awtik-la ka vini an, nou kèy wè kisa nou ka aprann ankò adan liv Jòb-la. Nou kèy wè pa ègzanp, ki manniè nou pé fè pou konséyé an moun.