Liv Jòb-la pé endé’w lè’w ka ba an konsèy

1-2. Poutji sa té rèd ba sé 3 kanmarad Jòb-la épi Éliyou konsolé Jòb ?

LÈ JÒB pèd tout richès-li, anlo moun adan réjion-an tann palé di sa ki té rivé’y. Lè 3 kanmarad Jòb, Élifaz, Bildad épi Zofa aprann sa ki rivé’y, yo désann jis Ouz pou konsolé’y. Men yo té lwen imajinen sa ki té ka atann yo !

² Imajinen sitiyasion-an. Jòb pèd près tout bagay i té ni. I té ni anlo bèt : mouton, bèf, chamo, épi fimèl bourik. Yo pasé épi yo vòlè ouben tjwé yo tout ! Yo tjwé tout tjanmay-li épi près tout sèvitè’y osi. É kay-la éti tjanmay-li té yé krazé an poud. É anplis di sa, i ni an gwo maladi : tout kòy kouvè épi bobo. O lwen, kanmarad Jòb ka wè’y asiz adan lasann é i krazé anba lapenn. Ki manniè yo ka réyaji ? Pandan 7 jou Jòb ka tòd anba doulè, men pa ni an mo ka sòti an bouch sé kanmarad-li a (Jòb 2:12, 13). An lè, an jenn misié yo ka kriyé Éliyou ka rivé, épi i ka asiz tou pré yo. Anfinaldikont Jòb ka koumansé palé : i ka modi jou-a i wè jou, é sa i lé sé mò (Jòb 3:1-3, 11). Asiré Jòb bizwen an pal ! Men sé an gwo défi ba kanmarad-li. Sa sé nonm-tala kèy di, é manniè yo kèy di’y sa, ké montré si yo zanmi Jòb pou vré, é si vréman yo ka sousié kòyo di’y.

3. Kisa nou kèy wè adan awtik-tala ?

³ Jéova té lé Moyiz matjé sa sé 3 kanmarad Jòb-la di épi fè. Pa ègzanp, i ka sanm yonn-dé bagay Élifaz di, sé an démon ki enspiré’y. Men sé Jéova ki enspiré Éliyou pou i palé (Jòb 4:12-16 ; 33:24, 25). Kidonk, fòk pa nou soté si adan liv Jòb-la nou ka jwenn, yonn-dé konsèy ki bon menm, men osi, pli mové konsèy an moun pé ba. Si liv-tala itil ba nou osi, sé pas i ka montré nou ki manniè pou konséyé an moun. Adan awtik-tala, nou kèy wè pou koumansé mové ègzanp sé 3 kanmarad Jòb-la. Apré, nou kèy palé bon ègzanp Éliyou. Adan chak sitiyasion, nou kèy wè ki manniè listwa Jòb dwèt endé sé Izrayélit-la, é ki manniè jòdi-a listwa-tala pé endé nou.

KOUMANNIÈ SÉ 3 KANMARAD JÒB-LA KONSÉYÉ’Y

4. Poutji sé 3 kanmarad Jòb-la pa rivé konsolé’y ? (gadé zimaj-la osi).

⁴ Apré yo tann palé di tout malè ki tonbé asou Jòb, Labib-la ka di nou ki sé 3 kanmarad-li a vini wè’y pou ‘montré afèksion-yo épi konsolé’y’ (Jòb 2:11). Men yo pa rivé atenn lòbjèktif-tala. Poutji ? Pou o mwen 3 rézon. Pou yonn, yo pa pran tan kouté Jòb, ni éséyé konprann sitiyasion’y. Olié di sa, yo anni sipozé ki Jéova té ka pini Jòb pas i té fè an bagay ki movéa (Jòb 4:7 ; 11:14). Pou dé, près tout konsèy yo ba’y pa pòté ayen di bon ba Jòb. Yo plito di pawòl ka blésé é ka fè mal. Tou lé 3 di bagay ki té ka sanm sa ki vré, men ki pa té ni fondas (Jòb 13:12). 2 fwa Bildad palé ba’y an manniè rèd lè i di Jòb i ka palé twòp (Jòb 8:2 ; 18:2, gadé nòt-la adan Bib-la ki fèt pou étidié, an fwansé). É Zofar, li menm, palé mal ba’y lè i fè’y konprann i té an nonm ki té sòt (Jòb 11:12). Pou twa, menmsi yo pa kriyé asou Jòb, sa yo di’y la, é manniè yo palé ba’y la fè’y santi kòy koupab, épi fè’y kwè pèsonn pa té enmen’y. Poutoudi, yo mantjé Jòb rèspé é yo pa montré piès lanmou ba’y (Jòb 15:7-11). Anfinaldikont, sa sé boug-tala té lé, sé montré Jòb i té ni tò, pasé yo té konsolé’y épi rann lafwa’y pli fò.

5. Ki rézilta konsèy sé kanmarad Jòb-la té ni anlè’y ?

⁵ Lè Élifaz, Bildad épi Zofa fini palé, Jòb santi kòy ankò pli mal ki avan (Jòb 19:2). Pli yo té ka akizé Jòb, sé plis i té lé défann kòy é èsplitjé poutji i té inosan. Nou ka konprann poutji i té lé montré i té an moun ki jis, é poutji souvan i té ka di bagay i pa té pou di (Jòb 6:3, 26). Kanmarad Jòb pa di’y bagay ki té annakò épi ansèyman Jéova, yo pa montré konpasion ba’y. San yo sav, yo vini zouti an lanmen Satan (Jòb 2:4, 6). Ki manniè listwa-tala dwèt endé sé Izrayélit-la, é ki manniè i pé endé nou jòdi-a ?

6. Kisa sé ansien Izrayèl-la dwèt aprann parapòt a mové lègzanp sé kanmarad Jòb-la ?

⁶ Kisa sé Izrayélit-la dwèt aprann parapòt a mové lègzanp sé 3 kanmarad Jòb-la ? Lè Jéova fòwmé nasion Izrayèl-la, i mété nonm ki mi pou jijé pèp-la. Sé ansien-tala té pou suiv koumandman’y (Dét. 1:15-18 ; 27:1). Yo té pou pran tan kouté sé moun-lan, avan ba yo an konsèy ouben avan jijé yo (2 Kwo. 19:6). Yo té pou pozé kèsion olié yo pansé yo té konnèt tout bagay (Dét. 19:18). É yo pa té pou palé an manniè rèd ba moun ki té ka vini mandé yo an pal. Poutji ? Pas si yo té ka montré yo té égri, sa té kèy dékourajé pèp-la lè yo té ka vini ouvè tjè-yo ba yo (Ègz. 22:22-24). Tousa, sé yonn-dé lison sé ansien Izrayèl-la té pé aprann asou listwa Jòb-la.

7. Kisa listwa Jòb-la té pé aprann sé Izrayélit-la ? (Pwovèb 27:9).

⁷ Sa klè, sé pa sèlman sé ansien-an ki té ka jijé Izrayèl ki té pou ba konsèy. Tout sé Izrayélit-la, nonm kon fanm, jenn kon vié, té pé konséyé lézòt si yo té bizwen an pal pou amioré rilasion-yo épi Jéova ouben korijé konduit-yo (Sòm 141:5). É sé sa an vré zanmi ka fè (li Pwovèb 27:9). Mové lègzanp sé 3 kanmarad Jòb-la té pé endé sé Izrayélit-la konprann, sa yo pa té pou fè, ni di lè yo té ka konséyé an moun.

8. Adan ki zatrap fòk pa nou tonbé lè nou ka ba an moun an konsèy ? (gadé sé zimaj-la osi).

⁸ Kisa nou ka aprann asou mové ègzanp sé 3 kanmarad Jòb-la ? Lè frè é sè-nou adan an léprèv nou lé endé yo. Men pou rivé fè sa, fòk pa nou fè kon sé 3 kanmarad Jòb-la. Pou yonn, fòk pa nou palé two vit, men pito chèché sav avan tousa ki pasé. Pou dé, fòk pa nou apiyé konsèy nou ka ba asou pwòp lèspérians-nou, kon Élifaz fè ; men Pawòl Bondié pou fondas sa nou ka di (Jòb 4:8 ; 5:3, 27). Pou twa, fòk pa nou rèd adan pawòl-nou ouben kritiké. Sonjé : Élifaz épi sé kanmarad-li a di bagay ki té vré ; dayè lapòt Pòl jik ripran yonn-dé pawòl Élifaz (konparé Jòb 5:13 épi 1 Korentjen 3:19). Men près tousa yo di asou Bondié pa té vré é sa blésé Jòb. Kidonk, ba Jéova yo pa té di lavérité (Jòb 42:7, 8). Lè nou ka ba lézòt an konsèy, fòk nou prangad pa fè Jéova parèt pou an moun ki rèd. Épi pa fè kwè non pli i pa enmen sèvitè’y. Atjèlman annou wè kisa lègzanp Éliyou ka aprann nou.

KOUMANNIÈ ÉLIYOU KONSÉYÉ JÒB

9. Poutji Jòb té toujou bizwen yo ba’y an pal menm apré sé kanmarad-li a té fini palé, é ki manniè Jéova ba’y fòs-tala ?

⁹ Pandan tout tan-an Jòb palé épi sé kanmarad-li a, bagay-la dwèt té cho menm ! Pou vré, diskision-an pran 28 chapit Labib ! Adan près tousa yo té ka di, ou ka santi yo té kontrayé épi menm faché. Sa pa étonan ki lè yo fini palé, lapenn épi doulè Jòb té toujou la ! Pou vré, nou ka konprann poutji Jòb poko té trapé piès konsolasion ni disiplin. Ki manniè Jéova endé’y ? I itilizé Éliyou pou konséyé’y. Poutji Éliyou pa koumansé palé pli bonnè ? « I di : “Man sé an jenn-jan é zòt sé dé gran-nonm. Sé pas man ni rèspé ba zòt man pa palé jik aprézan” » (Jòb 32:6, 7). Éliyou, ki té pli jenn, té sav an bagay nou tout la konnèt jòdi-a ankò : sé gran-moun lan ja wè lavi, é yo aprann anlo bagay. Kifè, souvan yo ni plis sajès épi lèspérians ki sé jenn-lan. Men apré i pran tan kouté épi pasians Jòb épi sé kanmarad-li a, Éliyou pa té pé rété san palé pli lontan. I konstaté : « Sé pa lanné sèlman ka rann an moun saj, épi sé pa nonm ajé sèlman ka konprann sa ki jis » (Jòb 32:9). Kisa i di apré, é ki manniè i di sa ?

10. Kisa Éliyou fè avan i ba Jòb konsèy ? (Jòb 33:6, 7).

¹⁰ Avan ba Jòb konsèy, Éliyou mété’y adan an bon kondision pou i paré kouté sa i té ni pou di’y. Koumanniè i fè sa ? Pou koumansé, i tjenbé kòy, alòs ki Labib-la ka di nou o dépa i té faché (Jòb 32:2-5). Men menmsi i té kontrayé, i pa palé ba Jòb an manniè rèd. Okontrè, i palé ba’y an manniè ki rasiré’y. Pa ègzanp, i di’y : « Gadé ! Douvan vré Bondié-a, man kon’w » (li Jòb 33:6, 7). Pou dé, Éliyou montré Jòb i té bien kouté tousa i di. Pou vré, i fè an rézimé sé lidé mèt la ki té adan sé 6 diskou Jòb-la (Jòb 32:11 ; 33:8-11). É lè i kontinié palé, i répété sa Jòb té di pou montré’y i té bien kouté’y (Jòb 34:5, 6, 9 ; 35:1-4).

11. Ki manniè Éliyou konséyé Jòb ? (Jòb 33:1).

¹¹ Lè Éliyou konséyé Jòb, i montré i té ka rèspèkté dinité nonm fidèl tala. Ki manniè ? I koumansé pa kriyé’y pa non’y. É pou vré, i ka sanm sé 3 kanmarad-li a pa janmen fè sa (li Jòb 33:1). I montré osi i té ni konpasion ba’y, lè i kité Jòb réponn li. É i fè sa, pas i dwèt té ka sonjé, li menm té anvi réponn lè Jòb té ka bokanté épi sé kanmarad-li a (Jòb 32:4 ; 33:32). I palé ba’y osi, parapòt a yonn-dé rézònman i té ni, ki té pé mennen’y asou an mové chimen. Pou fini, i fè’y sonjé épi anpil jantiyès ki Jéova sé an Bondié ki saj, puisan, ki jis épi ki ni an lanmou ki fidèl (Jòb 36:18, 21-26 ; 37:23, 24). Bon konsèy Éliyou dwèt endé Jòb pou i paré kouté dòt konsèy Jéova té kèy ba’y (Jòb 38:1-3). Ki manniè lègzanp Éliyou dwèt endé sé Izrayélit-la, é ki manniè i pé endé nou jòdi-a ?

12. Poutji Jéova vréyé pwofèt pou endé sé Izrayélit-la, é ki manniè bèl lègzanp Éliyou dwèt endé yo ?

¹² Koumanniè bon lègzanp Éliyou dwèt endé sé Izrayélit-la ? Pandan tout listwa pèp Izrayèl, Jéova ba yo pwofèt pou fè yo konnèt pwojé’y. Pa ègzanp, antan sé jij-la, Débora ba nasion-an an dirèksion èspiritièl kon an manman. É Jéova sèvi osi Samièl, ki té ankò an jenn gason, pou ansénié sé Izrayélit-la (Jij 4:4-7 ; 5:7 ; 1 Sam. 3:19, 20). Apré sa, antan sé wa-a, Jéova itilizé sé pwofèt-la pou konséyé épi ba pèp-li lafòs pou yo pa ladjé vré adorasion-an (2 Sam. 12:1-4 ; Akt 3:24). Ki nonm ki fanm fidèl adan nasion Izrayèl-la té pé bénéfisié lègzanp Éliyou. Kifè, lè yo té kèy konséyé an moun, yo té pé sav sa pou di, é manniè pou di’y.

13. Ki manniè nou pé ankourajé frè èk sè-nou ?

¹³ Ki manniè bon lègzanp Éliyou pé endé nou ? Menm manniè ki sé pwofèt-la, nou, sé krétjen-an, nou ka fè sé moun-lan konnèt volonté Bondié gras a Labib. É kon yo, nou ka konsolé épi ankourajé osi frè èk sè-nou épi pawòl-nou (1 Kor. 14:3). Pa ègzanp, fòk sé ansien-an véyatif pou toujou palé ba frè èk sè-yo épi jantiyès èk lanmou. Fòk yo fè sa, menm épi sé tala ki èstrésé oben ki ni labitid palé san réfléchi (1 Tés. 5:14 ; Jòb 6:3).

14-15. Épi an ègzanp montré ki manniè an ansien pé imité Éliyou lè i ka konséyé an moun.

¹⁴ Imajinen sitiyasion-tala : An ansien ka aprann an sè adan lasanblé’y la déprimé. I ka désidé alé wè’y épi an lòt frè pou éséyé ankourajé’y, é sé an bèl bagay. Pandan vizit-la, sè-a ka di yo tout vié lidé i ni. I ka èsplitjé yo, sa vré i ka alé réyinion, i ka préché men i ka santi lajwa’y fébli. Koumanniè ansien-an kèy réyaji ?

¹⁵ Pou koumansé, i kèy chèché sav sa ki séré dèyè soufwans sè-a. Pou sa, fòk i pran tan bien kouté’y. Ès sè-a ka pansé i pa mérité lanmou Jéova ? Ès lèspri’y an lapenn parapòt a « traka lavi » ? (Lik 21:34). Apré, ansien-an kèy chèché osi yonn-dé rézon pou félisité sè-a. Lè’w bien gadé, magré i tris, i ka kontinié alé réyinion épi préché. Anfinaldikont, lè i rivé konprann sitiyasion sè-a épi sa ki dèyè dékourajman’y, frè-a kèy pé sèvi Labib pou rasiré’y ankò plis ki Jéova enmen’y (Gal. 2:20).

KONTINIÉ APRANN LISON ASOU LIV JÒB-LA

16. Ki manniè liv Jòb-la pé kontinié endé nou ?

¹⁶ Asiré, i ni an patjé lison nou pé aprann adan liv Jòb-la ! Kon nou wè’y adan prèmié awtik-la, listwa-tala Bondié enspiré, ka aprann nou poutji Bondié ka pèwmèt lasoufwans, é ki manniè nou pé andiré. Anplis, kon nou wè adan awtik-tala, listwa Jòb-la ka ansénié nou gras a mové ègzanp sé 3 kanmarad-li a, épi bon ègzanp Éliyou. I ka aprann nou osi koumanniè nou pé ba bon konsèy. Pwochen fwa ou ni an konsèy pou ba an moun, sonjé sé lison-an ou aprann adan liv Jòb-la. É si sa ka fè an moman ou pa li liv èstwòdinè tala, poutji ou pa ka viré li’y. Ou kèy rann kòw kont i toujou osi éfikas jòdi-a ki lè yo ékri’y.