Frè é sè ki ajé, zòt ni anlo valè ba sanblé-a

Pétèt wou osi, pas laj-la monté, ou pé pa fè otan ki avan ? É menmsi ou rété fidèl a Jéova pandan an patjé lanné, lè’w ka konparé, sa’w té ka fè ba’y avan, épi sa’w ka fè atjèlman, sa pé dékourajé’w. Si’w adan sitiyasion-tala, kisa ki pé endé’w viré ni tjè-kontan ?

SA JÉOVA KA MANDÉ’W

Mandé kòw : « Kisa Jéova lé man fè ? » Sa ki matjé adan Détéwonòm 6:5 pé rasiré’w anpil. Nou ka li adan vèsé-tala : « Ou dwé enmen Jéova Bondié’w épi tout tjè’w, épi tout nanm-ou, é épi tout fòs-ou. »

Dapré vèsé-tala, sa Jéova lé, sé ki ou sèvi’y épi tout tjè’w, épi tout nanm-ou, é épi tout lafòs-ou. Lidé-tala pé endé’w pa konparé kòw épi lézòt, oben pa konparé sa’w pé fè jòdi-a, épi sa’w té pé fè avan.

Katjilé anlè sa : Lè’w té pli jenn, kisa ou té ka ba Jéova ? Ou dwèt té ka ba’y sa’w té ni di méyè, parapòt a sitiyasion’w antan-tala. Kisa ou pé ba Jéova jòdi-a ? Asiré, ou toujou ka ba Jéova sa ki méyè, silon sa’w pé fè atjèlman. Si’w ka wè bagay-la konsa, ou kèy rann kòw kont, ki ou ka ba Jéova menm bagay-la, ki avan : avan ou té ka ba’y sa ou té ni di méyè, é jòdi-a ou toujou ka ba’y sa ou ni di méyè.

OU PÉ FÈ ANPIL BA LÉZÒT

Pasé ou wè laj-ou kon an bagay ki pé frennen’w, éséyé wè’y kon an avantaj. Sa vré jòdi-a, ou pé fè dé-twa bagay ou pa té pé fè, lè’w té pli jenn. Pa ègzanp kisa ou pé fè ?

Partajé sa’w aprann épi lézòt. Katjilé anlè sa Labib ka di adan sé vèsé-tala :

Wa David di : « Man té jenn, épi atjèlman man sé an gran-moun, men mwen pa janmen wè Bondié abandonnen an moun ki jis, ni kité timanmay-li chèché manjé » (Sòm 37:25).

Jozié di : « Atjèlman, kouté ! Adan an ti moman, man ké mò. Zòt sav bien épi tout tjè-zòt èk épi tout nanm-zòt, pa ni an sèl pawòl ki pa réyalizé adan tout bèl pwonmès Jéova Bondié-zòt fè zòt. Yo tout réyalizé ba zòt. Pa ni an sèl pawòl ki pa réyalizé » (Joz. 23:14).

David épi Jozié té ka sèvi Jéova dépi an patjé lanné. Kidonk, yo té sav di kisa yo té ka palé, kifè pawòl-yo té ni ankò plis fòs. Pétèt wou menm ou di bagay ka sanm sa yo di, lè’w té pli jenn pou ankourajé lézòt. Men atjèlman, asiré pawòl-ou pé ni ankò plis fòs ki avan.

Pa ègzanp, si’w ka sèvi Jéova dépi pliziè lanné, sa’w ja viv ka ba’w lasirans, ki adoré’y ka pòté anpil bénédision é ou pé palé di sé bénédision-tala alantou’w. Ès ou ka sonjé an sitiyasion éti ou wè Jéova endé an sèvitè’y an manniè èspésial ? Alò, pa ézité partajé bèl pasaj-tala épi lézòt ! Pétèt ou ja wè dé ti kamo konsa ka ankourajé lézòt. Kidonk ou pé fè anpil pou ankourajé frè épi sè’w, lè’w ka rakonté yo sa’w viv adan sèvis-ou ba Jéova (Wom. 1:11, 12).

An lòt manniè ou pé ankourajé frè èk sè’w, sé lè’w ka vini an réyinion lasal di Wayòm, lè sa posib ba’w. Lè’w ka fè sa, non sèlman ou ka ankourajé lézòt, men ou menm ou ka trapé ankourajman. Connie, nou palé, tibren pli wo a, ka ajouté : « Vini réyinion ka endé mwen pa dékourajé. É pou vré, man ka risivrè tèlman lanmou lè man ka alé lasal. Ki manniè man sé pé dékourajé ! Man ka ofè frè é sè-mwen ti kado pou montré yo rikonésans-mwen. É man ka fè éfò toujou pran pa adan aktivité èspiritièl épi yo. »

SA’W KA FÈ BA JÉOVA NI ANPIL VALÈ BA’Y

Labib-la ka palé di an patjé moun, ki té ni limit adan lavi-yo, é poutan Jéova té enmen sé moun-tala. Kontèl Siméon, an Izrayélit ki té ja ni an gran laj, lè Jézi wè jou. Lè Siméon té ka alé adan Tanp-lan, i dwèt té ka wè nonm pli jenn ki’y épi privilèj enpòwtan. Ki manniè Siméon té pé wè sitiyasion-tala ? I té pé pansé ki pas i té vié, i pa té ni anlo valè an zié Jéova. Men sé pa konsa Jéova té ka wè bagay-la. I té ka wè Siméon kon an nonm ki té ‘jis é ki té ka sèvi’y épi tout tjè’y’, é i béni’y lè i ba’y lonnè wè Jézi lè i té ti bébé. I jis sèvi Siméon pou pwofétizé anlè Mési-a ! (Lik 2:25-35). Sa klè sé pa laj Siméon Jéova té ka gadé, men sé plito gwo lafwa-a i té ni an. Anplis « lèspri sen té anlè’y ».

Fòk ou asiré sèten Jéova ka ba sèvis-ou an gran valè, kisiswa limit ou ka jwenn. Ba Jéova, an sakrifis vréman ni valè, lè i fèt ‘parapòt a sa nou ni, é non parapòt a sa nou pa ni’ (2 Kor. 8:12).

Sé poutji, rété pito anlè sa ou pé fè. Mandé kòw pa ègzanp : « Ki diféran manniè man pé préché, menmsi man ka fè an ti mòso chak lè-a. Ès man pé téléfònen ouben vréyé an ti kat, ba an moun pou ankourajé’y ? » Ti jès konsa ki fèt épi lanmou, pé ankourajé frè épi sè’w, èspésialman si yo ka vini di an moun ka sèvi Jéova dépi lanné.

Avrédi, magré limit ou ni, ou pé fè anlo bagay adan sèvis Jéova-a. Sé sa an sè pa koté Lafrik, ka rakonté adan kad-la « An sè sèvi Labib pou sové lavi an moun », ou ka touvé adan awtik-tala.

Pa jen oubliyé ki lafwa épi fidélité ou ni dépi an patjé lanné, ka ankourajé lézòt anpil. Ou sé an lègzanp ba lézòt lè’w ka andiré é ou pé asiré sèten ki ‘Bondié pa enjis pou i bliyé travay-ou, épi lanmou-a ou montré ba non’y, lè’w ka sèvi sé sen-an, é lè’w ka kontinié sèvi yo’ (Ébré 6:10).

TRAVAY BA JÉOVA TOUT TAN OU PÉ

I ni richèch ka montré ki souvan, lè sé gran-moun lan ka endé lézòt, yo ka ni an méyè santé, lèspri-yo ka alé pli vit é yo ka viv pli lontan.

Sa vré, endé lézòt, pé ké anpéché’w santi laj-la ka monté. Sé sèlman wayòm Bondié-a ki kèy tiré sa ka fè nou viéyi épi mò : péché-a (Wom. 5:12).

Men lè’w ka fè sa Jéova ka mandé’w, èspésialman endé lézòt aprann konnèt li, sa ka endé’w ni an lèspérans ki solid, é sa pé menm bon ba santé’w. Men pa jen oubliyé : ba Jéova, sèvis-ou ni anlo valè an zié’y, é ba sanblé-a ou sé an bèl lègzanp lafwa !