Ès ou ka sonjé ?

Ès ou pran tan’w li sé Tou di Gad-la ki parèt lanné 2025 ? Alò gadé si’w ka rivé réponn sé kèsion-tala :

Ki divès rézon nou ni di gloriyé Jéova ?

Nou ka gloriyé Jéova pas nou ni an anpil rèspé ba’y, nou enmen’y épi tout tjè-nou é nou lé tout moun konnèt li (w25.01, p. 3).

Si an moun ka blésé nou, kisa kèy endé nou padonnen’y bon tjè ?

Fòk pa nou mété santiman-nou asou koté. Men, fòk nou ladjé tout vié santiman épi fòk nou sispann rété an kolè. Konsa, sa kèy anpéché nou ni rantjin an tjè-nou (w25.02, p. 15-16).

Poutji disip Mak sé an bèl ègzanp ba sé jenn frè-a ?

Menmsi Mak jwenn an sitiyasion ki dwèt blésé tjè’y épi désivwè’y, i pa ladjé. I asèpté bon tjè an mision yo té konfié’y. I vini bon zanmi épi Pòl épi dòt frè ki té mi (w25.04, p. 27).

Lè Jézi di adan lapriyè’y : « Mwen aprann yo konnèt non’w », kisa sa té lé di ? (Jan 17:26).

Disip Jézi té ja sav non Bondié sé té Jéova. Jézi endé yo konnèt ki Bondié Jéova té yé vréman. I ansénié yo pwojé Jéova pou latè é ba lézòm. I aprann yo sa i ja fè, é sa i kéy fè dèmen. I aprann yo osi kalité i ni (w25.05, p. 20-21).

Si nou ni limilité, kisa nou kèy asèpté ?

Nou kèy asèpté i ni bagay nou pa sav. Pa ègzanp, nou pa sav ki tan lafen monn-tala ké rivé é sa Jéova kèy fè ba nou. Nou pa sav kisa dèmen ké pòté é nou pé pa rivé konprann manniè Jéova konnèt nou (w25.06, p. 15-18).

Kisa nou pé fè pou aprann plis lè nou ka li an awtik ouben kouté an diskou piblik ?

Pou aprann plis nou pé mandé kònou : « Ki prèv yo ka ba pou èsplitjé vérité-tala ? Ès i ni an ègzanp entérésan man pé sèvi pou ansénié vérité-tala ? Ki moun sijé-tala pé entérésé ? » (w25.07, p. 19).

Lè nou ka wè kouman Jéova aji épi David, kisa sa ka aprann nou asou manniè Jéova ka padonnen ?

David té fè péché ki grav. Men i ripanti kòy épi sensérité, kifè Jéova té padonnen’y (1 Wa 9:4, 5). Lè Jéova ka padonnen péché-nou sé an fwa pou tout, é i pé ké janmen viré anlè sa nou fè ! (w25.08, p. 17).

Kisa ou pé fè si an moun ka étidié Labib épi’w pa ka rivé konprann an lansèyman ?

Si étidian-an pa ka rivé konprann an lansèyman magré tout éfò ou fè pou èsplitjé’y an manniè klè épi Bib-la, mété asou koté ansèyman-tala, épi viré asou’y plita (w25.09, p. 24).

Labib-la ka di péché-a ni « pouvwa kouyonnen moun » (Ébré 3:13). Kisa sa lé di ?

Difèt nou né adan péché-a, sa ka fè nou fè mové bagay. I ka fè nou douté osi ki Jéova enmen nou (w25.10, p. 16).

Di 3 bagay nou pé fè pou lapriyè-nou endé nou lianné ankò plis épi Jéova.

1) Médité anlè kalité Jéova. 2) Pran tan katjilé asou sa nou lé di Jéova. Pa ègzanp annou mandé kònou : Ki difikilté man ka jwenn sé tan-tala ? Ès man pou padonnen an moun ? Épi apré palé di sa adan lapriyè-nou. 3) Pran tout ti tan-nou pou priyé. Konsa nou kèy di pli fasilman sa nou ka pansé épi sa nou ka risanti (w25.10, p. 19).

Ki manniè nou pé endé sé frè é sè ajé a ?

Nou pé vini wè yo épi téléfònen yo souvan, alé épi yo kay dòktè-yo épi préché épi yo diféran manniè (w25.11, p. 6-7).

Asou ki bagay enpòwtan sé krétjen-an dwé rété véyatif pou jou mariyaj-yo onoré Jéova ?

Fòk yo rèspèkté lwa péyi-a la yo ka viv la. Fòk yo asiré kòyo ki mariyaj-yo kèy mété douvan bèl kalité lèspri Bondié kisiswa lasal di Wayòm men osi pandan fèt-la. Manniè abiyé kòyo jou-tala pou montré yo ka rèspèkté kòyo épi lézòt. Fòk yo viré-do ba tout tradision ki pa annakò épi Labib épi palé épi lanmou èk rèspé ant yo men osi épi fanmi-yo lè yo ka préparé mariyaj-yo (w25.12, p. 21-24).