Lanmen Jéova pa janmen two kout

1. Koumanniè Moyiz montré i té ni konfians an Jéova lè i fè sé Izrayélit-la chapé Léjip ?

LIV Ébré-a ka palé di an patjé sèvitè Jéova ki té ni lafwa. Yonn adan yo, Moyiz, té ni an lafwa èstwòdinè (Ébré 3:2-5 ; 11:23-25). I montré i té ni konfians an Jéova, lè i fè sé Izrayélit-la chapé Léjip. I pa pran pè douvan Farawon épi lawmé’y. Épi lafwa, i travèsé lanmè Wouj la épi i dirijé pèp-la adan dézè-a (Ébré 11:27-29). Enpé adan sé Izrayélit-la pèd konfians-yo adan Jéova : yo pa té lé kwè i té kapab otjipé di yo. Men Moyiz pa réyaji kon yo. Ès i té ni rézon mété konfians-li an Jéova ? Asiré ! Pas épi an mirak, Jéova ba sé Izrayélit-la manjé épi bwè, pou yo pa mò adan an dézè sèk épi rèda (Ègz. 15:22-25 ; Sòm 78:23-25).

2. Poutji Jéova mandé Moyiz : ‘Ès lanmen-mwen two kout ?’ (Nonb 11:21-23).

² Menmsi Moyiz té ni an lafwa ki fò, oliwon an lanné apré i libéré sé Izrayélit-la épi an mirak, i koumansé douté. Jéova té di i té kèy ba pèp-la viann. Men Moyiz mandé kòy si Jéova té kèy rivé ba milion moun asé viann alòs ki yo té an mitan an dézè. Kifè, Jéova mandé’y : ‘Ès lanmen-mwen two kout ?’ (li Nonb 11:21-23). Adan sé vèsé-tala, pawòl-la « lanmen Jéova » sé pou palé di lèspri sen’y, puisans-li lè i ka aji. Avrédi, sé konsi Jéova té ka mandé Moyiz : « Ès vréman ou ka pansé man pé pa fè sa man di a ? »

3. Poutji fòk nou entérésé kònou a sa ki pasé lè Moyiz épi sé Izrayélit-la montré yo pa té ni konfians an Jéova ?

³ Ès ou ja mandé kòw si Jéova ké vréman pran swen di’w épi di lafanmi’w ? Nou tout, kisiswa sitiyasion-nou, nou pé aprann yonn-dé lison asou sa ki rivé Moyiz épi sé Izrayélit-la. Yo pa té ni konfians Jéova té kapab pran swen di yo. Sé prensip biblik la nou kèy wè a, ké ba nou plis lasirans ki lanmen Jéova pa janmen two kout.

SA NOU KA APRANN ASOU RÉYAKSION MOYIZ ÉPI KONPÒWTASION SÉ IZRAYÉLIT-LA

4. Poutji anlo Izrayélit koumansé douté ki Jéova té pé pran swen di yo ?

⁴ Poutji anlo Izrayélit koumansé douté ki Jéova té pé pran swen di yo ? Sonjé, nasion Izrayèl-la épi an « foul-moun dòt nasion » té kité Léjip pou alé adan Péyi pwonmès-la. Té ja ni an moman yo té adan dézè-a (Ègz. 12:38 ; Dét. 8:15). Foul-moun tala ki pa té Izrayélit té las manjé lamàn, yo koumansé plenn kòyo é an patjé Izrayélit koumansé plenn kòyo osi (Nonb 11:4-6). Yo tout té égri, pas yo pa té ni sa yo té ka manjé Léjip ankò. É i ka sanm, pas yo té ka mété présion anlè Moyiz, i té ka pansé sé li ki té pou otjipé di yo (Nonb 11:13, 14).

5-6. Poutji moun sé lézòt nasion-an rivé détenn asou anlo Izrayélit, é kisa sa ka aprann nou ?

⁵ Moun sé lézòt nasion-an té mantjé rikonésans. É i ka sanm, sé Izrayélit-la kité yo détenn anlè yo. Nou tou, nou pé kité moun ki engra détenn anlè nou épi plenn kònou pas nou pa kontan sa Jéova ka ba nou. Sa pé rivé nou si nou ka yenki sonjé sa nou té ni avan, ouben si nou jalou sa lézòt ni. Men si nou ka fè épi sa nou ni, kisiswa sitiyasion-nou, nou ké ni tjè-kontan.

⁶ Sé Izrayélit-la té pou sonjé ki sé sèlman aprézavwè yo rivé adan Péyi pwonmès-la, yo té ké alèz kòyo, kon Jéova té pwonmèt yo. Pou vré, sé sèlman a moman-tala pwonmès-tala té ké réyalizé, é pa pandan yo té adan dézè-a. Menm manniè-a, olié nou mété lèspri-nou anlè sa nou pa ni adan monn-tala, simié nou mété lèspri-nou anlè sa Jéova pwonmèt i ké ba nou adan monn nouvo-a. Annou katjilé osi asou vèsé ki ké endé nou ni ankò plis konfians an Jéova.

7. Poutji nou pé asiré sèten ki lanmen Jéova pa two kout ?

⁷ Lè Jéova di Moyiz sa nou li an Nonb 11:23, pétèt i té lé Moyiz sonjé 2 bagay : 1) Bondié’y la pé kèy janmen mantjé puisans, é 2) i pé sèvi puisans-li nenpòt ki koté. Kidonk, i té kapab ba sé Izrayélit-la viann, menmsi yo té adan an dézè sèk épi rèd. Anfinaldikont, « épi fòs lanmen’y épi bra’y ki puisan », Jéova montré yo wotè fòs-li (Sòm 136:11, 12). Kidonk, fòk nou asiré sèten ki lè nou adan an léprèv, i pé sèvi puisans-li pou endé nou chak la (Sòm 138:6, 7).

8. Ki konpòwtasion anlo Izrayélit té ni ki désivwè Jéova anchay, é kisa sa ka aprann nou ? (gadé zimaj-la osi).

⁸ Jéova réyalizé pwonmès-li lè i ba sé Izrayélit-la an patjé ti zwézo pou manjé. Men yo pa rimèsié Jéova pou mirak-tala. Olié di sa, anlo fè vorasité. Tout lajounen, tout lannuit épi lè landèmen, yo sanblé ti zwézo alé-pou-viré. Jéova té tèlman faché kont « sé moun-lan ki té aji épi an lanvi égoyis », kifè i pini yo (Nonb 11:31-34). Kisa sa ka aprann nou ? Fòk nou prangad pou pa tonbé adan vorasité. Ki nou rich, ki nou pòv, priorité-nou sé ranmasé « trézò adan sièl-la ». Kidonk, annou travay pou Jéova épi Jézi rété zanmi-nou (Mat. 6:19, 20 ; Lik 16:9). Si nou ka fè sa, nou pé ni lasirans Bondié-nou kèy otjipé di nou.

9. Ki lasirans nou pé ni ?

⁹ Jòdi-a tou, Jéova « ka mété lanmen » pou endé sèvitè’y. Ès sa lé di nou pé kèy janmen mantjé lajan ouben manjé ? Nonb. Men Jéova pé kèy ladjé nou. Kisiswa léprèv-la, i kèy toujou la ba nou. Annou wè 2 sitiyasion éti nou pé montré nou asiré sèten Jéova pé mété lanmen pou otjipé di nou : 1) lè nou ni pwoblèm lajan épi 2) lè nou ka chwazi sa pou fè pou ni asé lajan pou viv lè nou ké laritrèt.

LÈ NOU NI PWOBLÈM LAJAN

10. Ki difikilté nou sé pé jwenn ?

¹⁰ Pli lafen monn-lan ka pwoché, sé plis nou ké soufè akòz pwoblèm politik, ladjè, katastwòf natirèl ouben nouvo pandémi. Lavi-nou pé vini plizanpli rèd. Sibitman, nou sé pé pèd travay-nou, sa nou ni, ouben kay-nou. É sa pé vini ankò pli rèd touvé sa nou bizwen pou viv. Pétèt fòk nou ké chèché an nouvo travay la nou ka viv la ouben déménajé adan an lòt réjion épi fanmi-nou pou rivé otjipé di yo. Kisa kèy endé nou pran dé désizion ka montré nou asiré sèten nou pé fè lanmen Jéova konfians ?

11. Kisa ki pé endé nou jéré pwoblèm lajan nou ni ? (Lik 12:29-31).

¹¹ Palé di lentjétid-ou ba Jéova kèy endé’w anpil. Sa vréman enpòtan fè sa (Pwo. 16:3). Mandé’y ba’w lasajès pou pran bon désizion, épi endé’w pa entjèt épi rété kam parapòt a sitiyasion’w (li Lik 12:29-31). Mandé Jéova endé’w fè épi sa ou ni (1 Tim. 6:7, 8). Fè richèch adan piblikasion-nou pou touvé konsèy ki ké endé’w jéré pwoblèm lajan’w. An patjé moun touvé awtik épi vidéwo asou jw.org ki ka palé di pwoblèm lajan, é sa endé yo.

12. Ki kèsion an krétjen pou pozé kòy, pou pran méyè désizion ki ni, ba’y épi fanmiy-li ?

¹² Yonn-dé asèpté an travay ki mennen yo lwen fanmi-yo. Men, lè ou bien gadé, sa pa té an bon désizion. Avan ou asèpté an travay, sé pa sèlman zafè genyen plis lajan ka konté ; men gadé-wè si travay-tala kèy endé’w, wou épi fanmiy-ou, rété pwòch Jéova (Lik 14:28). Mandé kòw : « Si man alé viv lwen di konjwen-mwen, kisa ki pé rivé mariaj-nou ? Si man té ka asèpté travay-tala, ès sa ké détenn an mové manniè anlè aktivité èspiritièl mwen, épi fè mwen pasé mwens tan épi frè é sè-mwen ? » Si ou ni timanmay, ou pé mandé kòw osi : « Ki manniè man ké pé “kontinié édiké yo épi prensip èk avètisman Jéova”, si man pa épi yo ? » (Éfé. 6:4). Sa ki pou endé’w pran an désizion, sé manniè Jéova ka wè bagay-la, é pa manniè wè fanmiy-ou épi zanmi’w ki pa ka rèspèkté prensip Labibc. Tony, ki ka viv pa koté Lwès Lazi, risivwè pliziè bèl pwopozision travay adan an lòt péyi ki sé pé mennen’y lwen fanmiy-li. Men, lè i prédié épi diskité épi madanm-li parapòt a sa, i désidé rifizé travay-la. Yo chwazi dépansé mwens lajan pito. Men jòdi-a, Tony ka konstaté : « Man rivé endé pliziè moun aprann konnèt Bondié, é timanmay-nou ka pran plézi sèvi Jéova. Fanmi-mwen konprann, tout tan nou ka viv annakò épi Matié 6:33, Jéova ka otjipé di nou. »

ANNOU PRAN BON DÉSIZION POU TRAPÉ SA KI NÉSÉSÈ LÈ NOU KÈY LARITRÈT

13. Kisa nou pé fè jòdi-a, pou trapé sa ki nésésè lè nou kèy pran laj ?

¹³ Nou pé montré osi nou asiré sèten lanmen Jéova pa two kout. Ki manniè ? Sé silon sa nou kèy désidé fè pou ni asé lajan pou lè nou kèy laritrèt. Labib-la ka di nou, fòk nou travay rèd pou nou pé sa ni asé lajan, pou ni sa ki nésésè pou dèmen (Pwo. 6:6-11). Sé pou sa, sa rézonnab mété an ti lajan asou koté pou lè nou kèy pran laj. Sa vré, adan an sans, nou pé pa viv san lajan (Ékl. 7:12). Men janmen lajan pa pou vini poto-mitan lavi-nou.

14. Koumanniè Ébré 13:5 kèy endé nou pa entjèt twòp pou dèmen ?

¹⁴ Jézi sèvi an ègzanp pou èsplitjé ki sa initil anmasé lajan, alòs ki nou pa « rich an zié Bondié » (Lik 12:16-21). Pèsonn pa sav kisa dèmen kèy pòté (Pwo. 23:4, 5 ; Jak 4:13-15). Anplis, konm nou sé disip Jézi, nou ni an lòt pwoblèm ankò. Pou vré, Jézi di ki pou rété disip-li, fòk nou ké paré viré do ba tousa nou ni (Lik 14:33). O 1^ié sièk, sé krétjen Jidé-a té paré pèd tousa yo té ni (Ébré 10:34). Jòdi-a osi, an patjé frè é sè pèd travay-yo, pas yo pa té lé voté ba an pati politik (Rév. 13:16, 17). Kisa ki ba yo fòs-tala ? Sé pas yo té ni an gran konfians adan pwonmès-tala Jéova fè : « Man pé ké jen kité’w, é man pé ké jen ladjé’w » (li Ébré 13:5). Kidonk, annou fè tousa nou pé, pou ni asé lajan pou lè nou kèy pran laj. Men, si an bagay nou pa té prévwè vini rivé, fòk nou asiré sèten Jéova kèy pran swen di nou.

15. Ki létjilib lé paran pou ni parapòt a timanmay-yo ? (gadé zimaj-la osi).

¹⁵ Adan yonn-dé péyi, i ni dé paran ka fè yich, èspésialman pou yo ba yo an pal lè yo pran laj. Sa yo lé, sé ki timanmay-yo vini « an lasirans » pou vié jou-yo. Men sonjé, dapré Labib, sé lé paran ki pou pran swen di timanmay-yo (2 Kor. 12:14). Sa vré, lè laj-la ka monté, délè yo ké bizwen sé timanmay-la endé yo, é yo kèy kontan fè sa (1 Tim. 5:4). Men lé paran ki ka fè Jéova konfians, ka konprann ki pou ni tjè-kontan, fòk yo élivé timanmay-yo pou yo sèvi Jéova, plito ki ankourajé yo genyen plis lajan pou pran swen di yo (3 Jan 4).

16. Koumanniè lé paran pé endé timanmay-yo genyen lavi-yo lè yo kèy pli gran ? (Éfézien 4:28).

¹⁶ Lé paran pou aprann timanmay-yo genyen lavi-yo. Men fòk yo montré sé timanmay-la, ki pli enpòtan-an, sé fè Jéova konfians. Dépi yo tou piti, montré yo sa enpòtan travay rèd (Pwo. 29:21 ; li Éfézien 4:28). Épi lè yo kèy rantré lékòl, ankourajé yo pou yo vini bon zélèv ki sérié. Fè richèch tou, pou endé yo touvé prensip Labib ki kèy pèwmèt yo plita, chwazi épi sajès ki kalté létid yo ké fè. Pas pli enpòtan-an, sé ki an jou, yo touvé an travay pou genyen lavi-yo, san néglijé ministè-yo, é pétèt menm vini pionié.

17. Ki lasirans fòk nou ni ?

¹⁷ Sèvitè Jéova ki fidèl pé ni lasirans ki Jéova lé, é i pé otjipé di yo. Pli lafen monn-lan ka pwoché, sé plis nou pou fè Jéova konfians, pas lavi-a kèy vini plizanpli rèd. Men kisiswa sa ki fèt, fòk nou fè Jéova konfians, fòk nou ni lasirans i ké sèvi puisans-li pou otjipé di nou. É fòk nou asiré sèten, ki lanmen Jéova pé ké janmen two kout pou otjipé di nou !